مشكلة بالـ Vxr 2006

[كليجا]

انا اشتريت جيب Vxr 2006 من البازعي ولكن طلعت لي مشكلة فيه وهو عند وصول السرعة إلى 150 يطلع صوت من عند باب السائق .. ويوم سألتهم قالوا هذي المشكلة كثيرة ويحتاج وزن للباب فقط ووزنوه لكن المشكلة خفت ولكنها لم تختفي !!! فما أدري وش الحل ياجماعة هل فيه حل لها ... وهل لي حق إني أشتكيهم لأن هذا عيب في الصنع ولا لا ... ولا بس أبي أطالب بدون فايدة لأن حقوق المستهلك ضايعه ... أرجو إنكم ( تشورون علي ) ..

[القصيم-الرس]

أسمع أخوي
كفو
لأنك شريت هالموتر
أنا معي Gxr 2003
وفيه نفس المشكله وأظنه مجرد جلده
ولاكن وش عليك خل الصوت يطلع من هالحين لين بكرى
وترى هو مهب على حسب السرعه على حسب الهواء
وأحياناً مايطلع هالصوت وجرب ورد لي

[أبو أسامة]

أخوي الله يعطيك خيره ويكفيك شره ومبروك ونعم ما شريت
أخوي ترى الصوت عادي كان مع الوالد 99 في صوت إذا دعسنا وإيضاً أشترى بعده 2004 وفي أيضاً نفس المشكله وأيضاً في جيب الكزس موديل 2002 . ... وكل هذه السيارات أنا جربتها وسمعت الصوت فيها بس كأن اللكزس أخفن صوت ما أدري الدعوه يمكن نفسيه
علشانه لكزس....

[anas]

انا قبل اسبوع كنت مع اخوى على طريق الثمامة في الرياض معاه gxr فل كامل وارد اليحي 2004 يوم وصلت السرعة 160 طلع الصوت من زجاج السائق ... وهذه المشكلة نفس المشكلة اللي عندي في الكامري 2003 يطلع الصوت من قزاز الراكب يوم رحت للوكالة قالوا لي يطلع معاك واحد يجربها واذا طلع الصوت نغير فقط الجلب .... وبصراحة يا اخوان بدت التويوتا تخرب

[الكونترولCONTROL]

الصوت عادي جدا .................... لا داعي للقلق ......................... لا تسوي شي بالباب
------------------------
و نصيحتي الوكالة لا يلمسون موترك !!!!!!! اشتره منهم و انسهم الله يغنيك عنهم و عن كل الورش
ترى فيه ورش في الصناعية لديهم خبرة تفوق خبرة الوكالة ............. و الله اعلم ....

[هويدي]

السلام عليكم

اول شي مبروك الموتر ويطعمك خيره ويكفيك شره انشالله

المشكله هاذي في اغلب سيارات تايوتا بدأت 2003

الجي اكس اللي بالتوقيع 2005 كان يطلع صوت هوا مزعج لا وصلت 150

ركب عليه ربلات جلد تلصق من داخل الباب ولله الحمد راح الصوت

وتلقى اللفه هاذي في محلات الزينه وعند الغرابي اذا كنت من سكان الرياض

ركبها وبتدعيلي انشالله

[هاوي قصيده]

مساكم الله بالخييييييييير

صراحه يا اخوان حتى انا اذا اكلت مطب او مشيت بالنفد يطلع صوت خرخشه بالباب صوت جلد تتصافق بس خفيييف مره..

اما من ناحيه التنسيم معنا جي اكس ار بريمي ينسم هواا من اول ما طلعناه وكاله 2004

ومعي جي اكس 2005 اللي بالتوقيه نفس الحكايه اللي قلتها لكم


وكنك ما سمعت شي لا توسوس ولا تتعب قلبك وانا اخوك..تراها اشياء بسيطه

وتقبل تحياتي

[anas]

تبغون الصراحة يا اخوان الصوت ازعجنا وااااااااااجد اذا جيت اسافر من جدة الى الرياض .....
يا ولد منيرة عندي سؤال الله يرضى عليك فين تلصق هذه الجلبة في الباب نفسه ام في البودي اللي يصك الباب عليه وبكم تشريها ؟؟

[أبو يحيى]

حصلت معي في Gxr 2005 رجعته لهم في الجبيل, والخمد لله غيروا الربله حقت الباب وراح الصوت.

[b373r]

شباب صوت الجلد او الخرفشه الي تقولونها هذي مع المطانيج والتطعيس تطلع هذي صوت المرتبه الوسطى
للجانب الأيمن لأنها مفصوله عن الأخرى فا يحدث إحتكاك بصيط
والحل إسدح المرتبه قليلاً فقط يختفي الصوت ....ايضا المراتب القماش لاحظ بين المراتب يوجد جلد ....

وصوت الهواء مرات يكون من الربلات مثل ما ذكرو الاخوان
ومرات صوت المرايات اذا مشيت تقريباً ستين إفتح القزازه وإسمع الصوت
ومرات يطلع صوت تصفير ...

هذي الأشياء حصلت معي .....................

[وادي الصفرا]

السلام عليكم

اول شي مبروك الموتر ويطعمك خيره ويكفيك شره ان شالله

المشكله هذه في اغلب سيارات تايوتا بدأت 2003

وانا صارت معي في الكامري وبعد بحث طويل عن سبب المشكله لم نجد حلا مقنعا او علاج للمشكله
وفي احد المرات اشار علي احد الاحباب بأن انزل القزازه تكه خفيفه جدا جدا وجربتها وانا مسرع وراح الصوت او قل بشكل كبير والحقيقه كل ما ازعجني الصوت وصلحت هالحركه قمت ادعي لحبيبي ابو ناصر
ارجو تجربة هذه الطريقه ولا تنسونا من الدعاء ولا راعي الفضل الاول بعد الله .

ولا تأخذك الظنون في الموتر تراه جديد وما يبيله اختراعات من بعض الورش والوكالات
اسأل الله ان يبارك لك فيه ويكفيك شره .............
آمل ان تجد في هذه الطريقه ضالتك وتقبل سلاماتي الحاره
واذا نفعت معاك انشرها للفائده

[غالي]

الهواء معروف من الجلد الي في الباب
واكثر الي تخرب عليهم بسبب التظليل

الي يظلل له يقوم بشق التظليله والجلده معها بالغلط بالمشرط ولو كان فتحه مقاسها ملم واحد بيطلع صوت
هذا وجهة نظري عاد والله اعلم :)

[الفتى المجازف]

السلام عليكم

اول شي مبروك الموتر ويطعمك خيره ويكفيك شره انشالله

المشكله هاذي في اغلب سيارات تايوتا بدأت 2003

الجي اكس اللي بالتوقيع 2005 كان يطلع صوت هوا مزعج لا وصلت 150

ركب عليه ربلات جلد تلصق من داخل الباب ولله الحمد راح الصوت

وتلقى اللفه هاذي في محلات الزينه وعند الغرابي اذا كنت من سكان الرياض

ركبها وبتدعيلي انشالله

في الصميم بارك الله فيك والربله هي الحل وماعداه فهو اجتهاد المخطئين.

[قناص الحبارى]

في الصميم بارك الله فيك والربله هي الحل وماعداه فهو اجتهاد المخطئين.
ــــــــــــــــــــــــــــــــــــــــــــــــــ ـ


أخي الحبيب / بعد إذن الأخوان ,,,,, ركب الربله اليابانيه ولا تركب الماليزي ..ولا الكوري ولا التايوان .. :no2:

تراه يبن الفرق وأنت تشوفه ,,,((( الياباني خشن الملمس )) وخذ العلم يالغالي ورد علينا ,,,
تلقاهم عند الصناعيه يدورون بها السودانيين والبنغال ...


أخوك / قناص الحبارى

[ولد زايد]

للبيع هايلكس 2005 غماره عادي مكيف عداد25000 للاستفسار ج:0559115450

[الكونترولCONTROL]

يا الشيخ ولد زايد .......... تعديت على موضوع الرجال ..... و تعديت على خيمة السيارات
===============
بإمكانك تحط اعلان جديد ...... في خيمة البيع و الشراء
==============================
و آسف جدا على اللقافة ............ يا زين الهايلكس (( على شان ما تزعل ))

[كليجا]

الله يجزى الجميع خير ... والله ردودكم ريحتني وزعلتني ... ريحتني إن مهب بس بسيارتي بلحالي ومثل مايقولون الموت مع الجماعة رحمة . :) .. وزعلتني إن هالمشكلة منتشرة والشركة أكيد عارفة هالمشكلة ومازالت تبيع السيارة مع وجود هالعيب :confused: .... !!!
الصراحة قهر سيارة قيمتها فوق ميتين ألف وآخرتها فيها عيب مصنعي ؟؟؟ الصوت بعض الأحيان يطلع وبعض الأحيان يهديه الله ويروح الصوت يطلع على السرعات العالية فقط ومن عند باب السواق :mad: بس ياجماعة تكفون دلوني على هالربلات اللي تقولون عليها اللي في الغرابي لأني منب أطب الغرابي إلا كل خمس سنين مرة :D لأني منب راعي زبرقة حتى التضليلة منب أركبها :no2: ... تكفون وضحوا لي وش قصة الربلات بالتفصيل يعني أروح للغرابي أقولهم ربلات حقة الباب هم يعرفونها ولا وشلون ؟؟ :rolleyes: ترى أخوكم عليمي بأمور الزبرقة . :p ..وشاكر لكل من رد على موضوعي والله يجزاكم خير ...

[الشقردي]

بالنسبة للربلات اللي يقولون الاخوان منتشره هناك وأصلا مايمديك توقف سيارتك الى هالعماله جايينك يبيعون عليك.


ارسلت لك رساله على الخاص أرجو الرد فضلا لا أمرا.

[كليجا]

المشكلة ان الصوت يجي من قدام الباب والجلد اللي تقولون تركب في آخر الباب ... وبعدين الجلد هذي الصراحة ماهضمت شكلها اللي تركب على البيبان ... يبي يسير تقول وارد اليمن هههههههه