آآآه منك يالـــ Vxr

[عاشق الجبل]

السلام عليكم ورحمة الله وبركاته


موضوعي هذا يثبت أن الــVXR خصوصآ و جيوب تويوتا عامة عدا الموديلات القديمة ماعدا لــ 97 وتحت .


الصناعة الجديدة حساسة جدآ وأليكم قصتي مع هذا الخايب ولكم الحكم :)


سيارتي v x r ولها معي 3 سنوات و6 أشهر فجأة وأنا جاي من مقناصنا الأخير وكنت مثبت

السرعة : أصبحت السيارة تسرع وتهدي من نفسها بعدها تعطل مثبت السرعة ثم توقف أنبير السرعة

وولعت لمبة برتقالية عليها شكل ( مكينة ) اللهم أجعله خير مدام مافيه حرارة ولاصوت واصل

كلها 200 كيلو وأنا واصل إن شاء الله تعالى لديرتي .


بعد يومين طلع صوت بالمكينة ( لاحول ولاقوة إلا بالله ) وعلى طول للوكالة




التقرير :

حساس المثبت المرتبط بسلك السرعة متعطل بــ 500 ريال ( قلت : غيروه )

طرمبة الماء الصوت صادر منها ( قلت غيروها )

السير الداخلي في صدر المكينة مع بعض البكرات البلاستيكية أنتهى عمرها الإفتراضي ( قلت غيرها )

البكرات الخارجية يفضل تغييرها لأن عمرها الإفتراضي على وشك ( قلت : أقشعوها ) :)

قلت لهم الله لايهينكم مابقي إلا أوتوماتيك المروحة والسير الخارجي غيروها على الدرب :)

طبعآ قالوا : أبشر بالسعد ( فيها دفع دراهم )


أتصلوا علي وقال المهندس : لقينا عندك بداية تهريب في الدفرنس الخلفي ومن الأفضل تغيير الوجيه

والصوفة ) قلت : لامانع )


قال : الصليب شكله مش عاجبنا ( قلت : أمصعوه ) لأن له صوت احيانآ ( دقه ) لأن القير عادي


بعد 3 أيام طلع الجيب وجربته والصراحة تغير من ناحية العزم وصوت الصليب .


طيب جاء دور الفاتورة : 4400 ريال من غير الكسور :(

ويتوسط لي جاري العزيز ( الزول ) ويخفضون 1000 ريال ( ضمنا حق شد الموتر والذبيحة ) :)


ملاحظة ( غيرت عامود كردان قبل 4 أشهر بسبب الرجه وراحت والحمدلله

قد يقول قائل أني شاري السيارة من شخص مهمل وأقول شاريها والله من شخص عاقل جدآ من البيت

الى المطار ( لأنه يشتغل بالمطار ) والسيارة يدخلها بالكراج )

اللي مضيق صدري يالجماعة الخير أن الباترول اللي عندي له معي 4 سنوات وموديله 88 وجاه مني شي

لايصدقركبت عليه 3 مكاين


4200 معدله وغيرتها الى 4500 معدله ثم ركبت 4800


ومع كل هالكرف ماغيرت والحمدلله ولا شي ( لا عمدان ولا صليب ولا تهريب والدبل حق بلده 88 )


بيني وبينكم ياجماعة الخير ومثل ماقالوا : الشمس ماتغطى بمنخل ( نيسان وبس ) :)


والله يرحم أيامك القديمة يالتويوتا

[كبريت]

قصتك محزنه ههههههههههههههههههه

طيب وش رايك تنصح في الباترول 2005-2006

فل اوبشن؟؟

[عاشق الجبل]

هلا بالغالي ( تضحك علي ) :)

الله لايبلاك :)


عليك وأنا أخوك بالفتك 4800 من موديل 2002 وفوق

[الوشاح]

وعليكم السلام ورحمة الله وبركاته

مشألله عليك ماخليت شي ماغيرته :) ... اجل لو قالولك المكينه لك عليه ماعجبتنا وش تبي تقول؟؟ غيروه!!

الوكاله وناخوك هذا شغلهم .. يدورون اي شي ويقولون لك انتها عمره الافتراضي !! وهو باقي نص عمره

وخذه نصيحه إذا وديت موترك للوكاله لايغيرون ألا القطعه الي تالفه بس ..

اما ليش يخرب .. فكل شي معرض للخراب حتى الباترل الي معك لايغرك :d يجيله يوم ..

ولاتنسى لكل شي ضريبه .. الكشخه والراحه تكلف .. :)

[عاشق الجبل]

الأخ : الغالي ( الوشاح )


بالنسبة للوكالة فهم أعلم من غيرهم بكل قطعة تنتهي بعد عمرها الإفتراضي خاصة أنها مرتبطة بالكمبيوتر وعداد الكيومترات

مثال :

بعد أن تمشي السيارة 120000 كيلو متر تولع لمبه برتقالية Lt وتعني أن الجنزير الداخلي للمكينة على وشك التلف وهذا

الذي حصل لي قبل ذلك ولغيري وتستطيع أن تسأل من يملك مثل هذه السيارة .

والوكالة لديهم تعليمات بكل لمبة تولع مرتبطة بالكمبيوتر بالعربي طال عمرك راح وقت الصناعية في عهد سيارات الكمبيوتر

لأني وديت سيارتي لمركز الوعلان بعد ماولعت لمبة المكينة قال المهندس : عندك مشكلة في المكينة أو الكمبيوتر ‍‍‍!!!

وبعدين الوكالة لو قصروا في شغلهم تقدر تشتكي وتأخذ حقك بسرعة بعكس غيرهم تقعد معاملتك شهور وماعندك أحد

لأنهم يخافون على سمعتهم .

واللي يبي الشغل الزين يرخي الدراهم والرخيص مخيس :)

وبالنسبة للنيسان يالغالي تراني ماصنعته علشان يغرني :):):)

قالوها الأولين : عط الخباز خبزه لو ياكل نصفه :)

وماخليتهم يغيرون هالأشياء إلا أنها قديمة ولا عندي نية بيع ( ماهي سيارة شريطي ) :)

والمكينة لو أبي أغيرها رحت للتشليح لأن الدعوي فك وركب وفيه ضمان يالغالي والدعوي مهيب طهبله :)

والحمد لله ماشريت الموتر إلا كشخه وراحه لي ولأهلي ومقتدر على صيانته والحمدلله :)

وأما بنعمة ربك فحدث :)

[جال القلايل]

اخي الكريم ،،

تقول النيسان اللي عندك موديل 88 ، طيب قارنه بتويوتا جي إكس أو في إكس موديل 88 وشف الفرق ،

لأن النيسان الجديد مشاكله أكثر من مشاكل التويوتا ، ومجربينه يعجبك شوي في الرمال لكنه مايصمل معك وقرقعته ماتنتهي ، انت ماخذي موتر علشان قير ودفرنش ومكينه بس .!!

انا كان عندي جي إكس آر من سنة 98 إلى الشهر اللي فات يعني سبع سنوات وزياده ولاشكيت من شي ماغير الأمور الي تستهلك العادية ، لاشكيت لا من قير ولا دفرنش ولامكينه وبعته بسعر ممتاز وبعد ربح فيه الي شراه مني ، يعني كان كافيني يوم كان معي ، ويوم بعته مابار فيني.

[1400]

السلام عليكم ورحمة الله وبركاته
عزيزي عاشق الجبل التويوتا سيارة مصنعة خصيصا للجبال والسهول والأودية
انا مساعد مهندس ورشة صيانة في إحدى اكبر شركات المقاولات ميتحمل مثل التويوتا وبسسسسسسسسسس المشاكل كلها تأتي من الامريكي النيسان الأيسوزو ثم التسوبيشي واخيرا التويوتا

وصلى الله وسلم على نبينا محمد

[عاشق الجبل]

صدقت أخوي الصلف ..... لكن الــ vxr حساس والــ gxr عملي ومكينته 6 سلندر ومشاكلها قليلة .

فعلآ السيارات القديمة تفرق عن الجديدة .



لاهنت أخوي : 1400 المشكلة وكالة تويوتا مليانه معظم فروعها بجيوب صوالين من 98 وفوق

لكن جميع السيارات اليابانية وعلى رأسها التويوتا تغيرت( سلبآ ) بعد تقنيتها الجديدة بالكمبيوتر اضافة الى الــ body

الضعيف .

[البرحه]

السلام عليكم

اول شي قبل لا اقول لك عن الموتر

انت غلطان يوم تروح به للوكاله !!

لان الوكاله عندانا ما تشجع ابددددددددددددددددد ... شغلهم اردى منه مافيه

والشي الزين يخربونه والخربان يعقدونك ما زينوه

وشرهك على الي طب الوكاله عقب صيانة الالف كيلو

وبعدين ترى غلطه الي ياخذ في اكس ار

هالموتر الحين ما ينبغى ....... تقل كابرس من كثر الخرابات

ان كانك ملزم خذ جي اكس ار ..... <<هذا كانك تبي الراحه والا Gx ماله مثيل

[al-nashmi]

السلام عليكم ورحمة الله وبركاته

اخونا عاشق الجبل..

معوض خير ان شاء الله..

والفكسار يستاهل اللي يصب عليه من الدراهم لو تسلفها سلف،،،، والله يغنيك عن حاجة الناس

اذا صار بينك وبين الرياض 2000كم مع ستر الله ما تهتم من طول الخط وانت مجرب الشي هذا.....

لكن اللي مضيق صدرك انك منت متوقع هالمبلغ يوم تدخله الوكالة....

وتراه شئ طبيعي موتر قيمة جديد 200000 الف ريال ..... تبي صيانة 400 ريال؟؟؟؟؟؟


وتقبل تحياتي

وخيك النشمي

[path_poth]

السلام عليكم ورحمة الله وبركاته

ابو منصور وش لك بالشقى؟؟

طق لك 2006 Vtc وانس الهم



كـــــيــف نعيش بلا بــاترول :d

[patereot]

انا والله نفس المشكله الي واجهة جارنا
شرى له V.x.r مستعمل ما مشى الا 10000كيلو يعني ما مشى شي وكل يوم عند الوكالة وكان موديلة 2003 وكان شارية بوقت 2004 وكل يوم رايح للوكالة بس زين ان الموتر يمسك سعره

[عاشق الجبل]

تسلم أخوي البرحه ( vxr ) وبس :)

صدقني دخلت عدة سيارات للوكالة وماقد لاحظت شي والحمدلله لكن ورش الصناعية وبعض المراكز ( طقها وألحقها )

ماوراهم إلا وجع الراس .

تسلم أخوي البرحه






لاهنت يالنشمي وأنت معك نفس الموتر ( عديلي ) عزالله أنه يبرد القلب :)



الظاهر يالباث بوث أبطق لي واحد إن شاء الله وأبعد عن التويوتا وأهيجن له :)



الأخ : باترول ..... هذا اللي محلي التويوتا أنه يمسك سعره وإلا كان علوم

[الربذي]

السلام عليكم
اخوي عاشق الجبل وفي بالي ان الي يعشق الجبل هو الذيب فاقولك يالذيب ان الناس فعلا بدات تتخوف من الفي اكس ار وترغب الجي اكس ار لكن تصدق انك ريحتني بهذا الخبر ليس فرحه بمصيبة غيري ولكن السالفه ان قبل يومين كان عندي واحد ونسولف بالسيارات قال ماتبيلك في اكس ار مواصفات كاملة والكامل وجه الله سبحانه بالبداية ترددت لكن بدا يمدح فيه ويقول لي احسن من هالي معك معي باثفيندر
النهم الجيب مع زميلة المدرس ويبي يبيعة ورحت صدفة للمعارض وشفته بصراحه روعة موديله له سبع سنوات يكرف (م98) يشتكي من صرف البانزين
مراتب جلد وكهرب
فتحة
رموت كنترول بالمفتاح (2)
دف لك اساسي اصلا في الفكس ار وايضا مثبت
هيدرولك وزر سبورت
ونش و نظام اي بي اس
اللون ابيض
الصدمات لايوجد صدمات ولامخوش
البدي نظيف ومن داخل روعه لون الجلد بيج
ماشي 156 الف
مسيوم ب 77500
وتصدق اني كدت اخذ الحاقي من البنك ومتردد لكن الحين
يفتح الله كنسلت
وخصوصا اني اكره شي اسمة وكاله والا صناعية واللي يخرب معى اصلح بعد شهر من كرهي لثلاث حاجات
الصناعية
غسل السيارة
الحلاقه
لان فيها سرا وانتظار
واي شي اسمة انتظار ماحبه
تحية ود لاخونا عاشق الجبل (الذئب)
محبك الربذي

[LAND CRUSER]

لولا اختلاف الاراااءلبارت السلع والله انى احب التايوتا الين اشووف صورة الهايلكس الغمارة والغمارتين تحووم تسبدى لا ويحطوونهاا توقيع !!!
اما النيسااان بسلامته بس يووم شفت الراماادااا والله كنى ودى اجربه الفل كامل شكله روووعه بصرااحه
والفكس ار حق خط يااشبااب مهووب للبر
وانت ياعااشق الجبل مانافع لك الا الهمر بس يقوولوون كثير عطال والكامل وجه الله سبحانه

[عاشق الجبل]

الله يبيض وجهك أخوي الربذي


الصرحة الــvxr سيارة ممتازة لكن تحتاج الى عناية وصيانة وهي مريحه وقوية

بالنسبة لصرفية البنزين فهناك فرق بسيط عن الــ gxr حسب تجربة أحد الزملاء لكن المشكلة قطع غيار الــvxr أغلى

تخيل البوجي الواحد بــ 41 ريال لكن يمشيك 80000 كيلو على الأقل .

عمومآ اذا تبي تتعلم الصبر مثلي عليك بصيد الوبران لأنها والله هي التي علمتني الصبر خاصة أن صيده لذيذ وكذلك طعمه

ولكنها حذره جدآ ( بعضها ) .


أشكر لك مرورك وردك وحسن أدبك








الله لايهينك أخوي لاند كروزو .... وأنا من عشاق التويوتا اصلآ لكن غيروه الله لايغير علينا والـvxr كما تفضلت حق خط


على طاري الهايلوكسات تراني مثلك أكرها كره العمي بسبب سواويقها وطفاقتهم وسرعتهم في كل وقت وشارع ( الربوه )

طبعآ ماأعمم لأن فيه ناس عاقلين .

تلقاه الله يهديه يركب هيدرز ودبه رياضية وجنوط مرسدس وكفرات خط أبيض ويقوم يخطط لك الشوارع وهو طاير

طيب يأخي رح بعيد عن الحواري وسو اللي تبي والله يستر عليك .

[غيّام]

ياحبي لك يابو منصور عز الله انك معاني وانا مقدر اتكلم عن التايوت ولا عن النيسان انت خابر لكن العين ماتعلى على الحاجب

[البرحه]

لولا اختلاف الاراااءلبارت السلع والله انى احب التايوتا الين اشووف صورة الهايلكس الغمارة والغمارتين تحووم تسبدى لا ويحطوونهاا توقيع !!!
اما النيسااان بسلامته بس يووم شفت الراماادااا والله كنى ودى اجربه الفل كامل شكله روووعه بصرااحه

بلاك والله محروم !!

اجل جايز لك ذالي معفج مع كل عاير؟؟

[توونا]

التايوتا اصبحت غش في غش من المصنع حتى الوكيل الذي يعطي النصائح الاقتصاديه للمصنع بهدف الربحيه مع تهميش المستهلك السعودي فما يحصل من وكلاءتايوتا في بلادنا والله لاتقبله الوكالات الخليجيه الاخرى فكل همها هوارضاء العميل بجوده المنتج فلاحول ولاقوة الابالله على هذا الاحتقار والتهميش والاستغلال لنا من مجموعه راس ماليه لايهمها الا الزياده وجمع الاموال باي طريق كان 0

[أبو يوسف]

عساك سالم
والسيارات بشكل عام من جرف لدحديرة
كل الموديلات الجديدة على الكمبيوتر اي شي يخربط حسبته حتى ماء المساحات

وين ايام قبل تفك الكلبليتر مليان رمل تغسله ببانزين ثم تركبه وكأنه ما صار شي
اما الحين البخاخ الواحد يحوسك ولا ينظف الا بورشة
الظاهر بنرجع للبعارين عطية الله والخيول لا سيور ولا بواجي
الحمد لله على سلامتك واذا سلم العود الحال تعود

تحيتي

[نقا خريم]

اللي يبي يسب الهلي يسب الجديدة 2006
والا اللي قبلهن ماعليهن كلام ماشاء الله
شف توقيع اخوي البرحه(جزاه الله خير)
ولكل واحد منا وجهة نظر
اهمممممممممممم شي مافيه زعل

[عاشق الجبل]

هلا بالشيخ : غيام :)

كلك نظر طال عمرك ( وبعدين مايمدي الواحد يقفي من عندك إلا أنت ناسيه ) :)

مكالمة من باب الإحتساب لأني الشايب :)




وسع صدرك أخوي البرحه :)

ترى الهايلوكس مواتر لكن فيه شباب شوهوا سمعته وإلا هو شيخ الوانيتات




الشكوى الى الله أخوي توونا




ودي أتخيلك يبويوسف على بعير ..... بس أنتبه لاتقطع علينا الطريق السريع :)

وزي ماتفضلت الدعوى غش × غش والوكيل يحش $ :)




يانقا خريم والله أن الهاي موتر خاصة الأول ( قبل 2006 )