الفتك يشفط بنزين شفط

[واثق الخطوه-]

السلام عليكم ورحمة الله وبركاته

اخواني معي فتك 2009 طبعاً لؤلؤي:D اعبي التانكيين بنزين 95 120 لتر بــ 72 ريال يالله يمشيني داخل الديره 500 كيلو علماً بأن رجلي حاره على الموتر ادري بعضهم يبي يقول خف رجلك اشوي جربت ولكن يالله مشاني 600 كيلو وفي السفريات على الخطوط يمشيني 600 والكفرات فيها 40 وغيرت البواجي عند الوكاله هذا كانهم مغيرنها :mad: والموتر توه جديد ماشي 95000 الف بس :eek: ومكاني في الرياض كان فيه احد يقلل من الصرفيه وشكراً للجميع

[باترول 4500]

وعليكم السلام

معروف الفتك إذا كان لؤلؤي يصرف كثير :D

الصرفية عادية موترك مافيه مشكلة

[آبونآصر]

..


وعليكم السلام ورحمة الله وبركاته


لكن هذي المشكله يعاني منها كل اصحاب الباترولات ولااعتقد انها مشكله بل هذي صرفيته الطبيعيه لكن أنا ماعندي خلفيه


وإن شاء الله مايقصرون معك الأخوان إذا كانت مشكله طبعاً :D


...

[اتجاه السحاب]

نفس المشكله,,

[خشم العان]

مساء الخير
اتوقع لو تغير اللون؟؟؟؟؟؟
اخوي نفس الموتر معي ماشي 54000 ومغير البواجي
طبيعي جداً

[أبو عمار الخالدي]

عب 91

معي باترول 2008
الفل حول 50

ليش 95

[واثق الخطوه-]

شكراً للردود وننتظر البقيه

[مدمن فتك]

بصراحه الفتك اذا دست يروووح بنزينه

[واثق الخطوه-]

عب 91

معي باترول 2008
الفل حول 50

ليش 95

95 يقولون ازين وكنت اعبي 91 وطلع عندي صوت طقطقه اذا كتمت له ويوم غيرت لـ95 راحت الطقطقه وطلع صوته ناعم

[هولوكس2005]

السلام عليكم ورحمة الله وبركاته

اخواني معي فتك 2009 طبعاً لؤلؤي:D اعبي التانكيين بنزين 95 120 لتر بــ 72 ريال يالله يمشيني داخل الديره 500 كيلو علماً بأن رجلي حاره على الموتر ادري بعضهم يبي يقول خف رجلك اشوي جربت ولكن يالله مشاني 600 كيلو وفي السفريات على الخطوط يمشيني 600 والكفرات فيها 40 وغيرت البواجي عند الوكاله هذا كانهم مغيرنها :mad: والموتر توه جديد ماشي 95000 الف بس :eek: ومكاني في الرياض كان فيه احد يقلل من الصرفيه وشكراً للجميع
السلام عليكم ورحمته وبركاته

خل عنك يقلون
شف الي صنعه وش يقول يقول بانزين 91 وتلقاه بالكتلوج

[خشير الذيب]

الله يبارك لك والله انه يستاهل كل قطره بنزيم تنحط فيه اكرمه وانطرب ولاعليك من البنزيم طبيعي النيسان يشرب

[ابوسند9]

اخوي
اذا كانت رجلك ثقيله على الدعسه اكيد راح يستهلك بنزين هذا شي معروف بكل السيارات.
لكن فيه حل بس راح يقل عزمه شي بسيط
تروح للوكله وقول ابغى وزن للديلو (طبعا بالكمبيوتر عندهم) بحيث يكون على 2.75 لانه غالبا يكون 5 او 4 ونص وها الشي ما يضر بالسياره ابد من واقع جربه
وشكرا

[عآشق الحره]

معروف النيسان بصرف البنزيت جت على الفتك

[أحمد الدهمشي]

وعليكم السلام ورحمة الله وبركاته

الصرفية اللي ذكرت طبيعية جدا بالباترول
لا تغير شي ولا تشغل بالك هو كذا

[مقلع الرمث]

صرفيته حلوه جدا وانتبه تحوس اموترك عشان يزود 20 كيلوا ولا ينقص

ولاتعبي الا 95 وبس

وصرفيه الباترول معروفه مع الدوس يمشي 500 كيلو على ركاده يمشيك 600

[واثق الخطوه-]

مشكورين يالربع ماقصرتو

[البراق كروزر]

نفس الشيء معي عندي لاندكروزر 6سلندر يمشيني 500 او 550

الجيوب عموما تشفط البانزين شفاط

[ذيب حريملاء]

الباترول كذا معرووف بس يستااهل البنزين لو يبي اعبييه كل يوم فل

على العمووم ركب له فرارات وبتلاحظ الصرفيه اقل في البنزين

[باثفندر]

اذا هو قيرعادي

صرفيتك فوق الممتاز

انا عندي عادي يمشيني 550 بالطقاق

[ابو فهد 1]

مرحبا اخوي
احتمال الصرفية يصير فية تنسيم بالقزوز وبعدين يصرف شيك على القزوز

والله يعطيك خيرة ويكفيك شرة ..

[Inch]

من تجربة وأنا أخوك أنا كنت أعبي 95 ومستغرب الصرفية .
لكن عبيت 91 وارتحت . إذا نويت تطلع للبر عب 95 .

[التعـ King ـديل]

الله يبارك لك والله انه يستاهل كل قطره بنزيم تنحط فيه اكرمه وانطرب ولاعليك من البنزيم طبيعي النيسان يشرب

:good2: هذا الكلام وبس :good2:

[شاص نيسان 93]

وش الموتر اللي معك قبله

[HCW]

تصدق ان موترك يصرف اقل من ال جي اكس ار حق الوالد.

[الربذي]

انا معي فتك يمشيني بالبلد 470 وتولع اللمبة اعبي 91 وفل ب50ريال اذا مصفر مرة مرة
اما جيب وتبيه يمشي اكثر من 500 وبالبلد ورجلك حارة بعد سوق بركاده مره وراح يمشيك زود 40الى 60كم
انا اشوفه طبيعي بعد لاتعلم احد كان معي 99 والتانكيين وبالبلد مايمشيني الابالطقاق 400

[غرب غريب]

السلام عليكم
الحل سهل
بس لا احد يزعل علي
الحل هو اطلع من الرياض
وتزين كل الامور
خل الموتر يرتاح نفسياً
او اصبر شوي لين يتعود على الرياض والزحمه والقلق

[عاشق الvx]

صرفيته معقولة يالغالي
بس خف رجلك شوي وبتضبط اكثر ان شاء الله
والي اعرفه ان بنزين الفتك 91 ليش تعبيه 95؟
اما بالنسبة للصوت الي طلع هذا من الزيت جرب غير نوعية الزيت
وبيروح ان شاء الله حصلت مع واحد من الشباب طلع يطق طق موتره تقل صوت صبابات
وصار من الزيت,,

[سفاري959]

صرفيته حلوه تعال اوريك صرفيه الجي اكس ار حق الوالد 2003 من فكيناه من الوكاله الى يومك التانكي الأساسي ما يمشي خط اكثر من 350 ك وعلى سرعه 120 وديناه للوكاله اكثر من مره عجزنا نغير صرفيته يشرب بشكل غريب

[كهلان]

مشكلة الصرفيه من لون السياره
لوكان اسود ربما يعكس اشعة الشمس وتقل عندك الصرفيه
جرب تغير اللون وشف الفرق (تراي أمزح )
اللي أشوفه صرف طبيعي والمتعارف عليه بجميع الجيوب تصرف معدل من 5 الى 6 كيلو للتر الواحد
ومادام إنك حول المعدل الطبيعي فما هناك مشكله
تمتع بقيادة سيارتك واستمعت معه والعمر فاني
الله يوفقك ويسعدك

[عـــــزام]

فدوك الاخوان

[ابو سلطان س]

عندي باترول موديل 2000 ماغيرنا البواجي الا بعد 000ر 300 كيلو وكان يمسح الطبلون مسح مع العلم ان الجنوط حديد والكفر نازل وما كنت اشتكي من البنزين ابد واعبي 95.

[راعي الفتك 9]

صرفيه جداااا طبيعيه من واقع تجربه
وما في فرق باختلاف نوع البنزين

[واثق الخطوه-]

مشكورين يالربع وموتري تماتيك
لأن السياره اللي كانت معي قبل الفتك كامري ياحبيلها فل بـ 27 ريال ويقعد اسبوع أما الحين اعبي 72 ريال وكل ثلاث ايام حتى حق المحطه عارفني اول مايشوفني يجيبيلي 4 مناديل هههههههههههه

[سفاري959]

مشكورين يالربع وموتري تماتيك
لأن السياره اللي كانت معي قبل الفتك كامري ياحبيلها فل بـ 27 ريال ويقعد اسبوع أما الحين اعبي 72 ريال وكل ثلاث ايام حتى حق المحطه عارفني اول مايشوفني يجيبيلي 4 مناديل هههههههههههه

اخوي واثق الخطوه ما تقارن الجيوب بسياره صغيره الجيب تقارنه بجيب مثله هذي مشكله غالب الناس اذا جلست معه قعد يسب موتره بصرف البنزين واذا سألته قال كان معي صغيره ما تصرف صدقني موترك طبيعي وبالعكس احسن من بعض جيوب ما شاء الله

[كديان]

مشكلة بعض الاخوان يطبل للبنزين نوع 91 و مايدري وش السالفة و يطير بالعجة
ووش خطورته

الوكالة قالت عب بنزين 91 لكن المشكلة البنزين عندنا تعبان و حلله بعض الاعضاء بالمختبر
و طلع الاوكتان 88 و ليس 91 للاسف
ايضا البنزين 95 طلع بعد التحليل 93 و كسور للاسف

عيب ال91 انه يضعف شرارة البواجي لانه مايحرق 100% لذلك يبني كربون على البوجي
و يقلل من ادائه
ايضا عيب ال91 انه يتكون كربون على شفة البلوف لذلك مع مرور الايام و السنين
مايحجب البلف و مايسكر 100%
و يسبب صرف بنزين لانه مايقفل 100%
و يسوي لخبطة لمنظم الهواء
المسئول كمية البنزين المناسبة مع كمية الهواء

اقرب مثال الباترول الكبليتر القديم م 2000 و تحت الى حتى م89
عب احمر و شف اشتغال الموتر ما شاء الله من اول نقرةة يشتغل
و لا لقلقة و لا يحزنون
بعكس ال91 سيئ الذكر و السمعة


على فكرة ال91 خصوصا للفتك مع جلد الموتر سفط الطبلون بالخط + جلد بالنفود
باستمرار يؤدي مع الايام الى تاكل سطح البستم و يتكون نتؤات و حفر
لان ال91 حار جدا على سطح البستم
بعكس ال95 تماما

[كديان]

على فكرة غالب الجيوب و الباترول و الجموس الموتر يمشي بالديرة تقريبا 5كيلو لكل لتر
اما
في السفر الجمس و الفكسار اقل صرفية لان السرعة ثابتة و المكينة مرتاحه 8سلندر
بشرط الا تتجاوز السرعة 150 او على الحد الاقصى 160

و معروف عن المكينة ذات الراس المستقيم انه اكثر صرفية بعكس الراسين V

اما مشكلة الفتك فان المكينة شاده تحصل الابنص ضاغط فوق
و هذي ميزة انك اذا لمست الدعسه يفز الموتر بالخط
لكن مقابل هالعزم ان الموتر يصرف فالمسالة نسبة و تناسب

مثال اخر الباترول البخاخ القير العادي سواء فتك او م 97 و تحت اذا كنت على سرعة 160 يكون الابنص شاد
على 3,5 يعني ضغط المكينة 3.5
و السبب لكون الترس ال5 كبير
اذكر احد الاعضاء ركب قير ياباني عادي لفتك و نزل الضغط على سرعة 160 الى 3
يعني ار بي ام واطي بفضل القير الاستخدام الياباني
لكن اختلفت نوعا ما فزة الموتر بالخامس ترس صغير
و ايضا فرق بالصرفية بنسبة ما

[خليفان]

موترك فيه بلا
يعلم الله اني امشي بالجكسار ثمانيه سرندل 2010 بالديره الف كيلو واعبيه 80 ريال فل
ويمشيني بالخط 750 كيلو بسرعة 150

[drive]

اخوي واثق الخطوه ما تقارن الجيوب بسياره صغيره الجيب تقارنه بجيب مثله هذي مشكله غالب الناس اذا جلست معه قعد يسب موتره بصرف البنزين واذا سألته قال كان معي صغيره ما تصرف صدقني موترك طبيعي وبالعكس احسن من بعض جيوب ما شاء الله


صرفية الباترول كثيرة لكن هذا هو الطبيعي حقه
اما مقارنة مع الجيوب في الصرفية وليس في الاداء...... الاكسبلورر 6 سلندر الجديد من 2006 وجاي خزانه 80 لتر ويمشي من 450 الى 500 داخل المدينة و 600 وفوق على الخط بنزين 91
واحد من الزملاء دايم يعبي 95 ويقول وصل 700 كيلوعلى الخط

[ابن علوان]

موترك فيه بلا
يعلم الله اني امشي بالجكسار ثمانيه سرندل 2010 بالديره الف كيلو واعبيه 80 ريال فل
ويمشيني بالخط 750 كيلو بسرعة 150

انا عندي فتك والصرفيه تعتبر طبيعية جدا وهذا من تجربه وكما روى معظم اصحاب الفتك
الشي الثاني انا اخبر ان السيارات يقل صرفها في الخطوط الطويلة وهو عكس ماتقول
لانك تقول في البلد 1000 كم اولا مااتوقع 1000كم ثانيا في البلد الصرف يكون ازود من الخط

[راع العوجاء]

اخوي عادي

واللي يبي الدح لا يقول آح

والزين يستاهل البنزين



تقبل مروري

أبو سعد

[Bader-M]

91 مناسب لسيارتك

و النيسان عموما معرف باتستهلاك الوقود العالي و خاصة الباترول

[super 2006]

وش تبي اكثر من 600 كيلو

[واثق الخطوه-]

يعطيكم العافيه وماقصرتوا

[الجني العبد]

موترك فيه بلا
يعلم الله اني امشي بالجكسار ثمانيه سرندل 2010 بالديره الف كيلو واعبيه 80 ريال فل
ويمشيني بالخط 750 كيلو بسرعة 150




الله :eek:
أتوقع والله العالم إنك ماتعدى 80 :good2:
ليت الشعب السعودي مثلك :mad:


أذكر موتري هاك المرة عبيته فل 91 وماتعديت الـ 80 بأي حال من الأحوال
مشاني 750 بوسط الديرة ، وكان عنده نفس زياده بعد
المرة اللي بعدها بديت أسرع عليه وبالمطاقق وصلني لـ 550 :D

[سفاري959]

صرفية الباترول كثيرة لكن هذا هو الطبيعي حقه
اما مقارنة مع الجيوب في الصرفية وليس في الاداء...... الاكسبلورر 6 سلندر الجديد من 2006 وجاي خزانه 80 لتر ويمشي من 450 الى 500 داخل المدينة و 600 وفوق على الخط بنزين 91
واحد من الزملاء دايم يعبي 95 ويقول وصل 700 كيلوعلى الخط

اخوي الأكسبلور ما تقارنه بالجيوب اليابانيه عند اخوي عنده ميركور منتونير مافيه مقارنه مع الجيوب اقرب ماله الصغيره بصرف البنزين ولكن الضريبه خراب قيور ونشاطه بالخط والبلد يروح نصه اذا دخل الرمل وهذا اشوفه بموتر اخوي وابشرك موضبين قيره وهو 2008 فاكينه وكاله واستخدامه زين وتشييكاته بالوكاله او بأول لكن ما نفع

[لجلك تعنيت]

الله يعينك

هذا هوو معرووووف

يشرب شررب

لك شكري

[رهيبXرهيب]

مرحبا شباب
بالنسبه للفتك
اسمه نيسان بترول يعني يعشق شيئ اسمه بنزين سواء 91 ولا 95
انا من قطر يا طويل العمر انا انصحك في بنزين 95 انظف من 91 وانا مشتغرب تشتكي من الصرفيه والبنزين رخيص عندكم اجل روح الامارات ولا قطر وشوف البنزين بكم
والي يقول انه الاندكروزر صرفيته مثل النيسان بترول غلطان 100%
انا عندي لاندكروزر 2007 وعندي لاندكروزر2010 وكلهم ابيض لولوي هههههههههههههههه
وكلهم 6 سلندر انا كله اسافر في الاندكروزر 2007 وكله اعبي بنزين في السعوديه وانا رايح دبي مشغل مكيف والثلاجه وامشي 120 الموتر قير عادي اوصل دبي ولسه ما استعملت الخزان الثاني والمسافه من مركز سلوى لين شارع الشيخ زايد في دبي فوق 600 كيلو ......... وانا اعبي سيارتي من الربع عندكم في السعوديه بنزين 95 فل 50 او 55 ريال..................
ملاحظه لاصحاب الجيوب:- 1- لاتخلي السياره لين ما تولع اشاره البنزين احسن شيئ تعبي السياره من الربع لا تخليها تنزل عن الربع ليش لانه معروف اخر الخزان ممكن تكون متجمع فيها اتربه ولا شيئ
2- عليك بتبديل فلتر البنزين كل 50 الف
3- بين فتره وفتره لازم تمسك السياره خط طويل
4- البواجي تحافظ على تبديلها في الوقت المناسب
5- استعمل زيت يناسب السياره يعني عندك زيت(سوبرشيل-زيت تويوتا-زيت نيسان) على حسب سيارتك
انا استعمل زيت سوبر شيل اذا تركب زيت ثقيل على السياره اكيد بتظطر السياره تبذل مجهود اكبر وراح تصرف اكثر بنزين لانه الزيت ثقيل يجهد المحرك
6- حتى مستواى الهواء في الكفر يخلي السياره تصرف بنزين تاكد انه هواء الكفر 35 الى 40 احسن شيئ

طبعا هذا كله على سياره شد بلد
اما السياره المعدله اكيد 100% بتكون تصرف بنزين يعني الي مركب هدرز او فلتر ريس اكيد راح تزيد الصرفيه
اشكركم كلكم واتمنى قد افدت صاحب الموضوع وكل من شارك فيه

الزبده راعي الفتك سو الي قلت لك عليه وشووووف اقل شيئ بتحافظ على محرك سيارتك

[من شمر]

اهم شي اخوي لا تحوس في سيارتك ترى مافيها الاالعافيه 0000 والباترول يمكن فيه زياده وكل سياره ستزيد صرفيتها اذا كانت الرجل ثقيله والله اعلم 0000

[دروب الذكريات]

صرفية موترك ممتازه جدا وش تبغى أحسن من كذا

أتكلم عن تجربتي مع سفاري 2005 سوبر سفاري
نصف التانكي الكبير حسبته وحصلته يمشيني 275 كم يعني أقل من 20 ريال

والسرعة ما بين 120 و140 ونصف المشوار مشغل المكيف

ونا أعتبرها صرفية جداً رائعة يعني ما يطلع واحد ويقول صرفية كبيرة كيف ما أدري
لا تقارن سيارة مرتفعة وجنط 17 الكفر كبير حجم الموتر كبير مكينة ما شاء الله كبيرة تبغى الصرفية صرفية كرولا ما فية مقارنة بسيارات كبيرة الحجم والمكينها بسيارات صغيرة الحجم والمكينة

[KhALeD A]

يا صاحب الموضوع فيه شئ ابسأله

انت تقول تعبي التانكيين يالله تمشي 600 كيلو؟

هل ال600 اللي تقصدها بالتانكيين؟؟؟؟

[ابو سعود4500]

ههههههههه انا عرفت وش المشكله الفتك اذا صار لونه ابيض يصرف اكثر من الالوان الثانيه
بعدين فعلا موترك مامشى شي بس 95الف وهو موديل 2009 يع بس بسنتين 95 هههههه
بعدين اذا الموتر يمشيك 600كم كم تبي بعد اكثر من كذا هههه

موضوعك اخوووي من اونس المواضيع الي قريته بالمنتدى شكراااا جزيلا لك :p

[drive]

اخوي الأكسبلور ما تقارنه بالجيوب اليابانيه عند اخوي عنده ميركور منتونير مافيه مقارنه مع الجيوب اقرب ماله الصغيره بصرف البنزين ولكن الضريبه خراب قيور ونشاطه بالخط والبلد يروح نصه اذا دخل الرمل وهذا اشوفه بموتر اخوي وابشرك موضبين قيره وهو 2008 فاكينه وكاله واستخدامه زين وتشييكاته بالوكاله او بأول لكن ما نفع


صباح الخير
انا قلت في الصرفية وليس الاداء
بعدين الدبلات انواع ... والماونتنير دبله مثل الدينالي ... دفع رباعي مستمر وماله زر تعشيق ....... كيف تبيه يكون ممتاز بالبر ومايضعف عزمه؟