كم المسافه من الرياض لام رقيبه

[شويح]

السلام عليكم ورحمة الله وبركاته

اخواني ارجو الافاده عن المسافه بين الرياض وام رقيبه وهل هي زحمه في الايام هذي

وجزاكم الله خير

[راعي الكيف]

هلابك اخوي شويح ...

ان كانك تسأل عن الخط ... فعليك الحساب

الرياض المجمعة 182 كلم
المجمعة الحفر 370 كلم تقريبا

وهي تقع بين الحفر وبين المجمعة ... يعني على الخط مع صفة الارطاوية والديار اللي بذاك .... ماعندي معلومة كم تبعد عن الثنتين

ولك مني اجمل تحية

[منتصر]

السلام عليكم ورحمة الله وبركاته

من الرياض الى المجمعة 182كم

من المجمعة الى الارطاوية 70كم

من الارطاوية الى ام الجماجم 30كم

من ام الجماجم الى ام رقيبة 30 كم تقريبا

يعني تبعد عن الرياض 182+70+30+30=312كم تقريبا

[رســــــــاوي]

اليوم كان بام رقيبة المزايين وانتهت ,,.


لذا بعد اليوم لن تكن هناك زحمة ,,.

[شويح]

بارك الله فيكم جميعا ولكم مني كل شكر

اخوي الرساوي المزايين الخميس الجاي ان شاء الله

[الكونترولCONTROL]

رحت الخميس انا و اخواني ................
ما استفدنا اي شي .................................. الا مشاهدة ناس من جميع انحاء المملكة و الخليج ...
مجرد ازدحام على لا شيء ................................
المهم ان عزمت تروح تأكد ما ملء خزان البنزين قبل تتعدى ام الجماجم .... و تأكد من اخذ الحاجات التموينية
حيث يوجد سوق ما عليه لا رقابة من البلدية ... و لا نظافة ... و لا رقابة من التجارة ......
و ممكن يعزل السوق هذا ما يقيمونه لا ايام المزاين الرئيسية .... و كذلك المخيمات الكبيرة
حيث بعد اسبوع من اليوم لن تجد الا الرمث هناك !!!!!!!!!!!!!!
-------------------------------------------
و بالنسبة للمسافة مثل ما ذكر اخوي منتصر وفقه الله
-----------------------------------
اما انا فقد ذهبت من جهة الدهناء الشرقية ..... حيث نزلت من عند فيضة التنهات
ثم اتجهت بواسطة القارمن باتجاه مستقيم الى ام رقيبة
حيث الطريق كله رمال شديدة الخطورة و تبي سواق و موتر يصبر و يسوق اكثر من 3 ساعات
متواصلة في رمال الدهناء ...... حيث كانت رحلتي شاقة جدا و بواسطة vxr \ و 8 سلندرات و منسم الى 25
من الساعة 8:30 الى 11:45 دقيقة بدون توقف و باتجاه مستقيم ....
و ع شدة الحرص غرزت مرة واحدة حيث تفاجأت عند النزول من نفود مرتفع ان امامي حفرة (( نثيلة )) و خفت ازيد السرعة
تصطدم بواجهة السيارة ... فخففت السرعة مما ادى الى تعلق واجهة السيارة و ارتفاع المقدمة بالكانل ...
لكن يا زين الشيول (( الكريك )) 10 دقايق من الحفر المتوال و طلعت السيارة
=============
بوجه عام ما انصحك تروح المكان ما هوب ذاك الزين للكشتة الا اذا كنت تحب التجمعات
اما الارض فهي مربعة و زينة و ان شاء الله الخميس القادم تكون خضراء
-------------------------------------------------------------------

[شويح]

اخوي الكنتروال
السلام عليكم
اشكرك على هذه المعلومات القيمه وللمعلوميه صار لي نفس الموقف الاسبوع اللي راح حيث اتجهت من عرق ود الدهنا ناوي ام الجماجم ومنها لام رقيبه وقطعت مسافه 70 كيلو وكانت الارض ممتازه والكفرات 35 ومبسوطين مادريت الا وطحت في ارض ما جاه ريحت المطر وقال الموتر هذا مكاني وقعدنا نحاول يمين يسار حفر لا تحفر نسم لا تنسم وبالجهاز ناد لاتنادي وما فيه فايده وكان يوم جمعه ولا حولك احد مقطعه بس كنا ولله الحمد متطامنين معنا الماء والاكل المهم جلسنا حدود خمس ساعات ولا هذاك الشاص اللي يمر اشوى ويشوفنا ويطلعنا ونجيك راجعين
وبعدها قلت الاسبوع الجي ابروح خط عن طريق المجمعه وعلشان كذا قلت اعرف المسافه لاكن دامن الدعوى حوسه خلنا على الدهناء وما حولها ابرك والله كنت ناوي اقولك يومك تقول عن خط سيرك لاكن ما لله ومرن

وشكر على مرورك وياليت ترجع توقيعك القديم

[الكونترولCONTROL]

غريبة تقول المسافة 70
============
انا اذكر انها 145 و أكثر !!!!!!!!!!!!!!
========================
أقصد من التنهات الى ام رقيبة direct

[nahham]

عموما انتهى المهرجان

كل عام والجميع بخير