وكالة نيسان تتحول إلى عيادة أسنان !!!!

[أبو يوسف]

السلام عليكم ورحمة الله وبركاته


بتتعجبون من هالموضوع لكن
اذا عرف السبب بطل العجب

الوالد قال بيشيك على موتره يعني الفحمات والزيوت وخاصة زيت القير لأنه ما يغير بالورش ( قيرين )
راح للوكالة يوم الاربعاء اي قبل امس
قالوا له لا ما نستقبلها خذ لك موعد :confused:

وشلون يا الطيبين اول مرة اسمع كذا ،،، يقول توقعت انهم بيقولون تعال العشاء ولا بكرا
قالوا موعدك بعد اسبوع ،،،، ما ناقص الا يقولون عطنا حق فتح الملف


والله حاله بئيسة
طيب اللي موتره فيه مشكلة بالكمبيوتر ولا تشتغل السيارة يتعطل لمدة اسبوع ثم يا عالم كم تقعد عندهم

والله حالة تقهر

هل يوجد ذلك في وكالات ثانية ؟؟؟
لا أعلم

تحيتي

[ابوقاسم]

هذا يخوك حال الوكالات الحين كل وكالة سوت روحها حجز بالمواعيد والتعب على الزبون.........
والله يعين اللي ما عنده الا سيارة وحدة .......

[هبايب نجد]

معي سيارة من أشهر سيارات نيسان في الرياض ... وحدث عندي مشكلة في المروحة وتطلب الأمر تغييرها .. وبالذهاب الى الوكالة في الرياض أفادو بعدم وجودها عندهم وسيتم طلبها من جدة ... للأسف العاصمة الرياض لا يتوفر فيها قطع غيار أساسية لبعض سيارات نيسان
وبصراحة لا يوجد حماية مستهلك فوكالة الجميح لها نفص القصص والمشاكل ...
وأن شاء الله مع منظمة التجارة نتوقع الخير أن شاء الله

[الكونترولCONTROL]

لأن السيارة مضمونة يحاولون التخلص من الالتزام بإجبارك على الذهاب للصناعية .... و طبعا على حساب سومي تومو الياباني
اقصد على حسابك لأنه ما يعرفك سومي تومو اصلا .....
--------------------------------------
عاد من زين مهندسينهم الوكالات ؟؟؟؟؟
لو تشوف سمكرة في موتر اعرفه صلحو الوكالة رفرفه بيس ... تقول خباز ما هوب و لا دكتور اسنان .... ما تقول وكالة تويوتا

[عاشق الجبل]

وعليكم السلام ورحمة الله وبركاته


أبويوسف لازم وأنا أخوك عندك واسطه

أنا مدخل موتري لعبداللطيف جميل وقالوا بعد أسبوع يخلص مادروا أني موبد لي مهندس سوداني رجال شرواكم

وهو اللي يروح معي الزول الله يرحم والديه وكلها 3 أيام والموتر طالع مع خصم 1000 ريال :)

[أبو يوسف]

والله هزلت يا ابو منصور
اصلح على حسابي وبواسطة وشغل شخاميط :(
والاسعار نااااار
حسبي الله عليهم من وكالات

كل الشكر لكم على المشاركة
تحيتي

[غالي]

نفس الحال ابو يوسف مع وكالة البورش شارع الضباب
الموعد بعد 10 ايام
ما اقول الا ربنا على المفتري حسبي الله عليهم

[محب الشمال]

ما دام الامور كذا ليش اشتري من وكالاتنا الخليج قريب واحسن

[القرم]

والمشكلة يا اخوان انه ما فيه بديل مقنع يعني لازم تغامر بموترك وتروح للورش اليي برا وخصوصا الي لها سمعة طيبة...وغير كذا ما فيه حل لان الحمراني وغيره بيقولك "جايزن لك ولا بالطقاق"!! المشكلة انك راح تستاجر سيارة يعني زود تكاليف..وفي احسن الاحوال بتستغير لك موتر من اخوك او قريبك والموضوع ما يخلا من الاحراج..

[القماري]

السالفة لاتتعلق بنيسان أوتويوتا أو هوندا فقط - معظم الوكالات تماطل كما هو حاصل معك.
تويوتا الإستلام بعد 3 أيام ولا تستلمها إلا بعد أسبوع وأحمد رب العالمين إذا لم تستبدل قطعة بغيرها
الجميح السيارة هتخلص بعد 8 ايام وسيارات الإيجار متوفرة اليوم بـ 100 ريال
نيسان أدفع 550 ريال بدلنا لك البواجي والقماشات في فحص الـ 5000 كلم
... سوالف ماتنتهي
نسيت شكل الوكالة من أول يوم أستلمت في سيارة - بلا وكالة بلا بطيخ (أكثر موظفيهم بدون خبرة وبدون معرفة ودراية ) وسالفة الضمان كذبة وغصبا عنهم في حال العطل الكبير (لاقدر الله) يصلحونه وهم يضحكون بعد أو الشكوى للمصنع جاهزة.
كيف يكون ضمان شامل 3 سنوات أو مفتوح الكيلوا ... هل هذا ضمان محلي أو عالمي ؟
صيانة الوكالات (نصب ) عيني عينك والقصص طويلة لاحاجة لذكرها.
أقول قصة وحده بما أن الموضوع يخص نيسان .
واحد من أخوياي عنده سوبر سفاري جديد والحبيب حتى تبديل الزيت لازم بالوكالة (واثق بالضمان وشغل الوكالة) في فحص الضمان لـ 5000 حسب كتيب الضمان وبعد أسبوع من ركن السيارة في الصيانة توجب علية دفع مبلغ وقدرة 570 ريال . السبب؟! حتي يذهب العجب.
الشباب بحسب زعم الصيانة ومتطلبات الفحص في هذا الوقت بدلوا البواجي وغيروا قماشات (فحمات البريك) وغيروا الزيوت وعملو تربيط وتشيك عام للسيارة.
هل يعقل سيارة جديده ولم تسير سوى 5000 كلم ويبدل لها كل ماذكر أعلاة؟
خوينا ترك عنه شغل وصيانة الوكالة بعد هذه الحادثة

[CRUISE**كروز]

كل الوكالات كذا
ولوكانت على انتظار الموعد مافيه مشكله بننتظر وسياراتنا معنا
المشكله اذا استلموا سيارتك
احسب على شهر اذا كان العطل متوسط الى كبير
واحسب على 10 ايام وفيها ان كان العطل سهل جدا
حسبنا الله ونعم الوكيل
والله ياخوان واحد معه هايلكس 2006 انكسرت المرايه الجانبيه وطبعا هو شاريها بنظام الايجار والوكاله مامنين عليها تامين شامل
تدري وش يقولون؟؟؟
ادفع 500ريال رسوم تحمل:( مادروا ان ال500 هي قيمة التامين لمدة عام
الثانيه والفاجعه قلو له اذا دفعت ال 500 دخلنا السياره ولانشوفك الا بعد اسبوع
لاحظ؟؟؟ اسبوع عشان يركبون المرايه الجانبيه حقت الهايلوكس
حسبنا الله على الظالم وعلى اللي يقدر يوقف هالظلم ولم يفعل
حسبنا الله ونعم الوكيل

[Khalid AlGhamdi]

الله يعين ، بعلمكم بهالسالفة اللي علمني بها موظف في شركة نيسان

يقول طلعنا موتر من الصيانة الدورية جديد طبعا ونسي الموظف يوم يغير الزين انه يعبيه

وراح الرجال بدون زين موتره يوم وصل الاشارة انتبه موتره لمبة الزيت والعة ورجع للوكالة

يوم شيكوا لقوا الموتر مابه زيت ، فعبوا له الزيت وقالوا له خلل فني بسيط وصلحناه وراحت لاتحاسب الموظف على خطاه ولا العميل درى باللي صار على موتره !!

الله يعييننا حنا السعوديين مادري وش بنا !! اكثر الناس ندفع في السيارات وفي كل الاشياء نبحث عن الجودة ولكن للأسف ماعندنا خدمات ابدا ً

وحماية المستهلك ماندري والله وينهم عن مثل هالتجاوزات الكثيره !!

[Waleed1]

السلام عليكم

الحقيقة زاد الاستضراط أسف ياشباب على هل الكلمة ماودى بس هذا حقهم، مع العلم أنة نفس البشر وعدد السيارات، بس هذى حركة جديدة القصد منها أهانت الناس زى واحد مودى سيارتة لوكالت تويوتا قالة المفروض أنك كلمت وحجزت موعد، وفى أفقر البلدان وأغناها أذا السيارة تحت الضمان يأخذون سيارتك من عند الباب ويعطونك سيارة بديلة فى حالة العطل، وفوقها كلمت SIR

وهنا الاخ يقولك شوو أعملك، عليهم من اللة مايستحقون

[ذيب حضن]

أخس وكالة بالمملكة والله أعلم هي نيسان

[الكونترولCONTROL]

اعجبني رد اخونا اقماري (( بلا وكالة بلا بطيخ )) و انا اقول : بلا بطيخ بلا وكالة

[عاشق النفد]

ياخوي فيه

مدير للوكالة

ادخل لوكلمة

انا رحت لوكالة تويوتا ابدخل السيارة للفحص

قالو لي بتطلع بعد يومين
قلت طيب عطون سيارة بديل
قالو ما فيه كلمت المدير قلتله ما عندكم سيارة بديل وبتخلونها يومين

واذا ما دخلتها الفحص بتطلع من الضمان

انا شاري السيارة علشان ما استاجر ولا انقطع عن اشغالي

وبعد ما كلمته

طلعها لي بنفس اليوم

[حرباش]

:( استغربت مره من أحد الأخوه دخل مكتب الصيانه وكنه مكتب ابوه ويعامل الموجودين بكل احتقار وازدراء .

ومازاد بي الدهشه ان الرجل على خلق عالي وان هذا الأسلوب ماعهدته منه خصوصا مع العماله الوافده .

مسكته على جنب وقلت يابن الحلال وش فيك وش طرا عليك وين الخلق وين الأدب في المخاطبه وين الناس الواعيه وين وين وين !!!!!!!!!!!!!


ضحك شوي وقال كل اللي قلته موجود بس خارج هذا المكتب ؟؟؟؟؟؟؟؟؟؟؟
العين الحاره وقفلت الاخلاق احيانن لها فوائد




بعد فتره من تعاملي مع هذا المكتب اكتشفت فعلا ان غير هذا الأسلوب ماينفع معهم :d


وهذا ماحدث لي عندما ذهبت اليهم بالسياره واشتكي من صفير وضجيج عالي يصدر من ربله الباب مع العلم ان هذا الصوت موجود من اخذت السياره من عندهم وطلبت منهم اصلاحه على الضمان ورفضوو

وبعد ان سألتهم عن قيمه الإصلاح ردو علي بـ 40 ريال وقلت غيروها فالشغله ماتستاهل كثره نقاش



كالعاده تبلو احد الربلات وقامو بتغيرها ....




خرجت سعيدا وبعد مايقارب اسبوعين خرجت لمشوار قصير واذا بالصوت يعود لأنه لا يظهر الا عند السرعات العاليه


عدت اليهم وشرحت الوضع وتبلو نفس القطعه التي سبق وان غيروها


بعدها طال النقاش واصطفينا على تغير ربله اخرى وقيمتها 140 ريال



وعندما حان وقت السداد فوجئت بفاتوره قيمتها 580 ريال :(




واضطررت الى استخدام اسلوب خوينا بالسابق
بعد ذلك قمت بالإتصال على مدير فروع صيانه شركه الجبر بالدمام والذي لم يتفانى في خدمتي وقام بالإتصال عليهم وتعللوو بأن السياره لها اكثر من سنه بحوزتي مع العلم بأني امتلك السياره منذ 3 اشهر فقط .



طبعا صلحوها على الضمان وعندما حضرت لإستلامها فزو من فوق المكاتب وقدمو اعتذراتهم واني سيرفر وفي اني تايم حاضرين :)



اعذرونا على الإطاله وهذا انما هو تعليق على ماسرده لنا كاتب الموضوع اخينا عاشق الجبل
يعطيك العافيه يابو منصور



تحياتي لكم اخوكم حرباش

[أبو يوسف]

اشكركم على التفاعل مع الموضوع

حسبي الله عليهم

تحيتي

[عابد]

السلام عليكم ورحمة الله

يقول المثل ( من أمن العقوبة اساء الأدب ) وهذا الكثل ينطبق على جميع الوكالات بدون استثناء حتى الجيدة منها
اخواني
هل تتوقعون لو أن وزارة التجارة شهرت بوكالة الجميح او عبداللطيف جميل أو الحمراني باعلان كبير على صفحة كالمة في احدى الصحف بأنها غشت زبون أوأخرت زبون آخر اقول هل تعتقدون بأن بقية الوكالات ستتجرأ أن تماطل زبائنها ؟

أمر آخر يا اخواني
ان المشكلة تكمن فينا نحن مستخدمي السيارات لو كل واحد فينا حصلت له مشكلة مع الوكالة كتب بريقة وارسلها للشركة الأم في كشركة جنرال موتورز أو نيسان أو هوندا صدقوني ستجدون تجاوب منهم كبير لأنهم يهتمون بعملائهم خشية أن يتحولوا إلى منافسيهم.

اخوكم عابد

[حرباش]

يعطيك العافيه اخوي ابو يووسف واعذرنا والله جاني زي الإلتماس ونسبت كتابه الموضوع لأخونا عاشق الجبل في ردي السابق





الله لا يهيينك ويعطيك ألف عافيه على الموضوع الجميل



تحياتي لك اخوي ابو يوسف


حرباش ;)

[حمد1234]

السلام عليكم من واقع تجربة مع الوكيل المجرررررم السيد الحمراني كنت طالب منه قطع غيار مستهلكه اي يكثر الطلب عليها وهي بواجي لجيب نيسان vtc مديل 2003+2004عدد 2طقم قالي ماعندي متوفر غير طقم واحد وكاله بهالكبر ماعندها الاطقم بواجي واحد متوفر بعدين قال نطلبها من فرع جدة وش رائكم يالربع بهالكلام وبعدين طلبتها من وكالة الجبر بالدمام واكثر قطع الغيار غير متوفره والله يكون في العون :mad: :mad: :mad: