لدي مشكلة ارهقت كاهلي ساعدوني جزاكم الله خير

[شمالي بحت]

السلام عليكم ورحمة الله وبركاته

صباح الخير جميعاً


لدي سيارة من نوع جيب شاص الموديل 2005

الموتر نظيف جداً والممشى مايقارب الـ 256 الف

الموتر لايعاني من شي

منذو مايقارب الــ 4 أشهر بداء يخرج صوت خفيف عبارة عن شي يكر اقرب ماله طق طقه يعني اذا حطيت الموتر بالنمره 4 يطلع وكذلك 5 خفيف ويختفي

مالقيته بال أبد

سافرت اكثر من مره ومشيت مايقارب 5000 بعد خروج الصوت

سافرت عليه قبل اسبوعين يم تبوك وحقل ورجعت يم ديرتي حائل

تفأجئت أن الصوت زاد وبداء يخرج لي من بداية الممشى لكن يزود مع الضغط ع دواسات البنزين ..

مريت الكثير من المكانيكين شيبو فيني ..

غيرت كراسي مكينه وكرسي قير وديسك وفحمات وحذاف وصليبات للعمود اللي قدام واللي ورى ربلات القدام غيرتهم .. كل شي يقولونه سويته ولكن للآسف مالقيت حل

في اكثر من واحد قال لي المكينة فيها مشكله وهذا بداية خرابها
المكينه اثق فيها لئنها نظيفه جداً حتى انني اذا صحيت الصبح وشغلت الموتر اسخنه الموتر يندي تحت الشكمان وينقع وهذا دليل على نظافة المكينة ..

آخر الكوارث الذي حلت بي وبعدها أحسست بحاله من اليأس ولا يأس مع رحمة الله ..
ذهبت إلى الوكالة المسماة toyota ولكن الصدمه انهم شيكو على الموتر كامل قال عندك الكنداسه يبي لها تغير فقط ..
قلت حصل خير وطلعت من عندهم

اخذت موتر اخوي شاص جديد وفكيت كنداسته وركبتها في موتري ..
الا نفس الحكاية نفس الصوت نفس الطق طقه ..

لا أعلم اين المشكله فقد سبب لي الموتر قلق كبير ..

الصوت مادري كيف اوصفه بالضبط لكن اقرب ماله صوت هايلكوبتر ..

مع العلم ان صوت الموتر صافي اذا كانت واقف واذا دعست كذا مايظهر شي ..
لكن المصيبه مع الدعسه يزود ..


ملاحظة /

عزم الموتر ماشاء الله تبارك الله نشيط جداً حتى ان احدهم عندما طلبت منه ان يفحص الموتر ساق الموتر قال موترك مكينته جمس ؟؟



أنتظركم

[الشقردي]

طيب أخوي لو مشيت بالموتر الى سرعة 80 مثلا, وفضيت القير هل يطلع الصوت؟
ويعدين أدعس وهو على الفاضي, هل يطلع الصوت ؟

اللي فهمت انه وهو واقف وتدعس ما يطلع شئ.صحيح؟


موفقين والله يحفظك ويحفظ لك موترك

[ساري 111]

شف مثل موترك وبدل معه كفرات احتمال يكون عندك مسحيه بأحد الكفرات

وشيك على رمان الهوبات

[البرتقالي]

الله يسهل امرك اخوي
ماعندي خبره لكن دام الصوت يختفي اذا وقفت ما اتوقع المكينه فيها شي
شيك على الأشياء اللي تتأثر بالاهتزاز مثل الصندوق لا يكون يبي تربيط
أو تغيير جلد وباب الصندوق والمساعدات

[volcano]

وعليكم السلام ورحمة الله وبركاته

اخوي اذا كانك بالشرقية ممكن نشيك الموتر عند فني جيد .. ومع ذلك شيك جنزير الدبل

بالتوفيق

[ياعمار يانجد]

السلام عليكم
أخي الكريم كان الصوت يطلع فقط أثناء مشي السيارة ومع المطبات ومثل ما تقول ان موترك عزمه زين وما عليه خلاف ما شاء الله
فشيك على الكبوت ومسكاته وجلبه الامامية لإن كبوت الشاص كبير ومع الاستخدام يبدأ يصرصر وبعضاه يطقطق ، افتح الكبوت وحط سفنجه وصك عليها علشان تضغط الكبوت وجرب. صار معي كذا وما خليت شئ وأخيرا اكتشفها واحد من الشباب انها من الكبوت ، وأيضاً شيك على الصندوق وجلده.
موفق خير.
أبوعبدالله،،،،

[ابو عاذر]

شيك اخوي على رمانات الهوبات الامامية بأن ترفع السيارة على العفريته ثم قم بهز الكفر من اعلى واسفل فإن بدأ الكفر يرج معاك فعندك الرمانات تعبانة فغيرها ،،،،،، ان كانت ذي سليمة فشيك على مسامير الكليبرات لكفرات الامامية ربما تكون مرتخية وتحتاج الى اعادة ربط مع تأكد من وجود مسمار تأمين الكليبر فهو مهم ويغفل عن كثير من الناس عند تغيير الفحمات وقيمته لا تتجاوز عشرين ريال وان شاء الله تكون حل المشكلة

مع تحيات اخوك ابو عاذر

[sgl2002]

أحسن حل وأنا اللي أسويه دايم ...

لاتخسر نفسك ولاشي ترى ماتستفيد شي

امش يارجال وطنش ( مادامه يعشق ولاينقص زيت ) إلا إذا قال هذا مكاني ...

كان معي شاص اذا وصلت 80 وهو في الخامس أسمع صوت صرصرة تقول تصفير ومخليه ورحت وجيت ولا ضره ...

خل عنك يارجال وطع شوري ترى بتخرج بدون فايدة والخراب مابتكتشفه إلا إذا خرب مره وبتلقاه حاجة بسيطه

[فليت بن قنه]

تاكد من مسامير الكبرسر المكيف اوشداد الجنزير اورمان شداد السير م - فليت

[فليت بن قنه]

تاكد من ماسميرالكمبرسر المكيف او رمان الجنزير اوشداد السير

[مجهول مكشات]

السلام عليكم ورحمةالله وبركاته

اخوي شمالي

ماودي بصراحة اضيق صدرك بس تاكد من تروس الدبل لان صار لي مشكله معها أول بدايتها على قولك طقطقة بسيطة حوالي عشر طقات ثم تروح وخاصه اذا صرت ماشي واجد او جاي من سفر وفجاءة استمرت الطقطقة يوم كامل تقول صوت بريشم بعده شقص الموتر معا د مشى الابسطحة وحصلت تروس الدبل متكسره
والله يعين طقيت لي واحد من التشليح ب3000ريال والله يخلف
وانشاء الله ان مشكلك تكون بسيطه

[YUKON_GMC]

اتوقعك مشكلتك من القير او الدبل ...

وللتأكد ارفع الموتر بعفريته جميع الكفرات الاربع عند ورشه وشغل وعشق الموتر بجميع النمر والميكانيكي تحت السياره وبيطلع لك مصدر الصوت

[العرض داري]

اتوقع السيور يبيها شد او رمانة اوغيرة

او عمود الكردان من القير الى الدفرنس

[شمالي بحت]

ياشباب رفعت الموتر فوق والصوت خفيف مره يكاد لايظهر

وبالنسبه لاخوي مجهول مكشات فعلا الصوت اقرب ماله صوت البريشم بالضبط

[شمالي بحت]

بس اخوي مجهول مكشات انت تقول طلع يوم كامل وبعدين شقص الموتر .. انا لي اربع شهور والصوت معي