اللي جرب الهمرh3 يفيدنا ...السعر ابتداء من 119500معقول!! ((يوجد صور))

[الشقردي]

السلام عليكم ورحمة الله وبركاته

أمس وأنا أقرا جريدة الرياض شفت اعلان للهمر H3 ومكتوب تحت

((السعر ابتداء من 119500 )) وأربط فرامل :confused:

حسيت ان سعره معقول نوعا ما لكن من اللي عنده خبره فيها أو قد جربها بشكل عام , ووشي مواصفات اللي عندنا بالسعودية

وكيف قطع الغيار من ناحية السعر والتوفر وهل تركب عليها قطع الحمس أو اليوكن مثلا ؟؟؟؟

وهذي بعض الصور منقوله من هالموضوع من منتدى السيارات

http://www.assayyarat.com/forums/showthread.php?t=77144

http://www.mekshat.com/pix/upload/images12/mk286_normal_h301.jpg

http://www.mekshat.com/pix/upload/images12/mk286_normal_h313.jpg

[عاشق النفد]

القير عادي

[أبو أديب التميمي]

يعني ظنك انه بيغطي على سفاري 2006 !! والله ما يمديه لا من ناحية السعر ولا من ناحية القوة !!

وعلى قول المثل ( اشتر تبيع ) ...

غير الياباني لا تدور !!

[فهد الرياض 00]

غير الياباني اتدور <<<<<<<<< انا معك في هذي
لكن النيسان <<<<<<<<<<<<< اسمحلي (يطيح سعره اكثر من التيويتا - يصرف بنزين اكثر - يتفكك اكثر - ازعاج هوا اكثر)

[عاشق المزون]

والله ماعمري شفت الهمر في الصمان او الرملة ماشوفة الى في الثمامة ليش ماادري :)

[فهد الرياض 00]

انا اقولك ليش/
الهمر بكم ؟ واغلا سياره شفتها بالاماكن الي انت قلت بكم؟ وافهمها
بعباره ثانيه وحط نفسك مكانهم بتقول ( ليه احط مبلغ وقدره في سيارة بكرفها فالصمان او غيرها؟ خصوصا ان فيه سيارات ارخص وتقوم بنفس المقام)

[عاشق المزون]

والله باخوي فهد اعرف ناس ماهمتهم الداراهم ماشاء الله وشارين لكازس ويقنصون عليها ومن عرفته وهو كل سنة لكزز و Vxr والهمر الظاهر مايعرفة :) ومشكور على المشاركة :) انا ارشح تايوتا من واقع تجرية مع الامريكي ومن شريت ياباني وانا مرتاح مرة

[القصيم-الرس]

يا ناس
هذا ههههههههههمممممممممممممررررررررررر
مهب لاند ولا سفاري

شف المدرعات حقت الجيش (كل جيوش العالم)
هموووووور


الموت كم مديله ويمكن مرشوش

حكمت اليوم
((اللي مايقدر يوصل للشيء يسبه))
سامحونا

[عريدان]

السلام عليكم ورحمة الله وبركاته
بإختصار هل سؤالك عن تجربه طويله من الاستخدام فهذه ليست لدي.
أما لمدة يوين تقريباً فنعم وكانت على هامر h3 أتوماتيك (وهو بدون تيب ترونيك) تشغيل الدبلات بأزرار كهربائيه والمقاعد جلد سعره كان بنهاية رمضان بالوكاله 155000 تعبيه فل بـ 75-85 ريال .
محركه خمسه (5) سلندر فقط. تغييرات القير متناسقه ومرن بالتغيير أيضاً. الموترتعليقه من الخلف سست مع مساعدات غاز ومن الامام دفرنس فليور ثلاث وصلات زي الأمريكات الجديده ماهو دفرنس كامل زي القديمات وعموما مريح مره. عزمه في القومه عادي ماهو بذيك القوة. مشيه على الخط مهبول ما تحس بالمشي فيه على 160 لكن مع المراوغات أثبت إنه بايخ. حجمه مدروس للرحلات جربته بالوعر ممتاز لأعلى درجه و جربته برمل محروث قبل الأمطار اللي على الثمامه مشيه كان حلو نسبياً مع ملاحظة إنا الهوا بالكفرات كان 40. أما بالطلعات الرملية الطويله ما جربته فيها لأنه ماهو خاص بي وأخاف يجيه اجله تحت رجلي. يعني المفروض ما يتعدى المية الف ريال بأي حال.وسلامتكم

[عاشق المزون]

مشكور اخ عريدان هذا الكلام

[فهد الرياض 00]

اخوي عاشق
انا معاك في كلامك 100% صح فيه ناس كذا.... لكن الهمر ب300 الا شوي
جيب اللكزس ب 220 يعني لسى فيه فرق
وانا قلت اساسا (( ليه احط مبلغ وقدره في سيارة بكرفها فالصمان او غيرها؟ خصوصا ان فيه سيارات ارخص وتقوم بنفس المقام))

[الشقردي]

أخوي عريدان مشكور وما قصرت, كم ياخذ من راكب وبالنسبه للعزم والمراوغة في الخط هو ولا الـ Vxr؟

والشكر موصول لكل من رد وأفاد

الاخ فهد الرياض, عاشق المزون

مشكورين وما قصرتوا, لكنكم رحتوا بعيد أنا ما أقصد الهمر الكبير اللي قيمته فوق 200 ألف

لكني أقصد الهمر الصغير اللي بالصورة فوق وسعره يبدأ من 120 ألف تقريبا

[عريدان]

السلام عليكم
والله إن الفي إكس آر (شقردي) مثلك بس الفرق كبير لصالح الفي إكس آر بدون اي تحفظات ما عدا (السعر المجنون) لأن مستوى سيارات الـ v8. مثل أرمادا - يوكون - إكسبلورر تنقص عن التويوتا 30% مع أنها نازله بأشكال جديده ولا تهون عطايا الله الباترول تحصله بنصف السعر2006 بعد.

[فهد الرياض 00]

شقردي مع التحية/
عموما السياراة توها جديده نازله السنه هذي . ما اتوقع يمدي احد يفيد بمميزاتها وعيوبها. لكن اغلب الضن انها بتكون مقاربه للشروكي من جميع النواحي...
والسلام عليكم...

[ذيب الصحرا]

حسبماعرفالهمر شكل فقط
مكينة البنزين حسب ماروي لي هي نفسها مكينة كدلك اسكاليدا

والافضل منه الديزل حيث أن الذي يستعمل للجيش يختلف عن المخصص للبيع ويبدو انه اغلى

[الكونترولCONTROL]

شفته يمشي بالدائري قبل كم يوم ....... لكن بصراحة ... حجم اصغر بكثير من حجم الهمر المعروف بكثيييييييير
================================================== =====
ال في اكس ار اكبر و ازين .................... و ياباني !!!!

[فهد الرياض 00]

اخوي ذيب ...... لاتستهين بمكينة الاسكليد خصوصا فالبر ...... واسأل مجرب

[ذيب الصحرا]

انا ماستهنت اخوي فهد بس مقارنة بحجم السيارتين طيب خذلك اسكاليدا
او حتى شيروكي همي مكينة 5.7

[فهد الرياض 00]

اسف جدا بس حسبتك مستهين فيها مثل اغلب الناس الي يقولون ان الاسكليد ولا شي فالبر. ومن واقع تجربه ومن ناحية القوة أقوى من جيب اللكزس واللاند في اكس ار..
على العموم انا اسف بس تحمست شوي :)

[راعيChevrolet]

أخوي
لاتسأل ولا تدور
تبي همر هو أخو الجمس
نفس المكينه
وميزته بالدبل الثقيل فقط
فيه قوة جيدة

ولا تنسون المثل
الي ما يطول العنب يقول عنه حامضضضضضض

[أبو أسامة]

السلام عليكم ورحمة الله وبركاته

الهمر اللي يتكلم عن صاحب الموضوع هو المعروف بأسم همر إيتش 3 ..... مكينته 5 سليندر والله فضيحه يعني ليه ماحطوها سته يمكن تنبلع ...... ثاني شيء ..... القوة تبلغ 220 حصان يعني حرام تقارنونه بالجي أكس آر ....... كيف عاد بالفي أكس آر 250 حصان ....... أو السفاري 280 حصان ........ أما العزم فتكلم عنه الأخ عريدان وقد جربه يعني مش ولا بد وبعدين كيف تبي من سيارة مكينتها 5 سليندر وحجم المكينه أصغر من الباث فيندر تقوم حتى على الباث فيندر .........



قاطعوا الباضائع الأمريكية

والسلام عليكم ورحمة الله وبركاته

[عاشق المزون]

حبيت اوضح اجربتي مع الامريكي.
الامريكي يبي له واحد مقرش يعني يملك المال الكثير اول ماتشترية وكالة ماشاء الله ثقل ودلع وقوة بس للاسف مع المدة كل شي يتناقص القيمة والقوة وثمن تبدا البلشة فية بس اذا صرت مقرش طقتة وطقت السلوقي وانتم بطرامة وحدة .
وهذي تجربتي مع الامريكي . وعلى فكرة نصف الجيوب الهمر الى في حرب الخليج مرهمين البدي تبعهن عشش في العراق :)

وهذا المثل :اعط الخبز خبازة ولو اكل نصفة

وسلامتكم

[عاشق المزون]

يطرامة=بكرامة ----> حتى على النت لاحول ولاقوة الى بالله

[الربذي]

عاشق المزون السلام عليكم
تصدق كنت ابي اكتب عنك انك مالقيت على اخونا الي هو انت الا هذة الكلمة واكيد غلطة مطبعية لان ط ك بجنب بعض وطلعت انت تصحح خطاك
نرجع حق الهمر او المطرقة وهذا معناه
اذكر واحد معه همر يوم الهمر همر على ماعتقد 98 او حول هكا السنة وكان هذا سعره وكاله مشترية وكالة بعد الخصم 480 الف ريال بس كان يعيبة انه ثقيل صوته مزعج يعني جيشي وليس للمدن بس مواصفاته رائعة اذكر تقدر تنفخ الكفرات وتنزل الهواء وانت تمشي اما بعد ان حطوه لربح المادي وبس ودخل فيه التخكري خرب شفت مرة لقطة كمرة جوال همر بكبره صدمته ددسن غمارتين خلف الكفر الخلفي وقلب ثلاث مدري 4 قلبات بمنظر مضحك وين الثقل والددسن تمشي حول 50 وهو معترض امامها يمشي بحدود سرعتها ويمكن احد الشباب يقدر ينزله والمكان بر نفود وسرعة الددسن حوالى 50 او 60كم بس؟؟؟؟؟؟؟؟؟؟؟؟؟!!!!!!!!!!!!!!!!!!

[ولـد الدوادمي]

اخوي الشقردي غير الددسن لا تدور

ياخي مصدق انت هذا سعر الهمر اخاف انه مليون مو مئه الف لا تاكد مغير يلعبون

اما من ناحيه قوه اسئلني انا واحد من العيال معه واحد H2 والله ياهو موتر

على العموم مابي اطول عليكم

ولـــ الدوادمي ــــد

[غالي]

الصراحه ياشباب ماقابلت احد ومدحه لي
الي سمعت من الناس
اولا: مكينته صغيره عليه حتى h2 صغيره على حجمه حاطين له مكينة الجمس !!! الجمس وهو الجمس اخف منه يغرز ويالله يشيل نفسه بالرمل عاد مابالك هالكبير ولا شفت سبحان الله همر اتش 2 بالرمل الا مغرز
ثانيا:مراتبه مثل مراتب الاندكروزر ربع يعني كنها بلاستيك
يعني لاتتوقعون سياره زينه بيخفضون فيها لخاطر عيون المشتري
هالزمن ياخوان عند التجار زمن دراهم يجيبها من المصنع ب50 الف يبيعها في ديرتنا على 120 الف اكثر من نصفها
ما اقول الا لحول ولاقوة الا بالله

[القماري]

الهمر H3
المواصفات
المحرك صنع خصيصا للشاحنات الخفيفة (فورتك 3500) 3,5 ليتر مع 5 سلندرات بقوة 220 قوة حصانية على 5600 دورة وعزم بقوة 225 رطل /2800 دورة
ناقل الحركة (الجير) بـ 5 سرعات للجير العادي و أربع سرعات متغيرة للجير الأوتماتيكي
الدفع رباعي مستمر الكتروني بسرعتين - المكابح قرصية للعجلات الأربع
الكفرات بمقاس 16 أنش.
قدمت السيارة بمواصفات متدنية وسعر قليل مقارنة بالأحجام الأخرى لهمر (h1 وh2) وذلك لتكون بمتناول اليد لعاشقي أسم (همر)
هذه السيارة مع هذا السعر المتدني نسبيا عن بقية سيارات همر (أعتقد أنه سعر غالي لسيارة بهذه المواصفات )
بدأت سيارات همر تفقد بريقها بين المستهلكين الذين كانوا يعتقدون بقوة هذه السيارات الخارقة.
سيارات همر العسكرية (تسمى همفي) وهي تقريبا مشابهة من ناحية القوة لسيارات همر الأولى (h1) والذي يتعدى سعرها مبلغ 400000 ريال وهذا سعر خيالي لسيارة تستخدم للأستعمال المدني وذلك بمواصفات وتقنية قلية ، أما الهمر 2 (h2) فأعتقد إنها كانت القشة التي كسرت ظهر البعير فمع سعرها الغالي 250000 ريال ومواصفاتها العادية نوعا ما مع سيارة بهذا السعر ومع الشكل الناعم والقوي في نفس الوقت (فهذه السيارة لم تكن بمستوى الطموح للمستهلكين وذلك بسبب ضعف المحرك وضعف البدن للسيارة)
ويكفي أن تذهب للسوق وترى أن موديل 2003 من H2 لايتعدى الـ 140000 ريال حتى وإن كان غاية في النظافة (يفقد السعر بشكل كبير جدا)
أعتقد ان H3 سيكون الموديل الذي يغلق ويطوي صناعة سيارات همر في المستقبل وكل ذلك بسبب غلاء السعر مع تدني المواصفات الفنية والتقنية.
هذه وجهة نظر قد أكون مخطى وقد أكون مصيب فيها والله أعلم

[KEA2003]

تبي الصراحه واجد اشوف الهمر بالشوارع بس متعطل وشايله الونش 0 شكله حلو بس ماهو كفو من يشريه يعني مكاتب التأجير مليانه خذه وكسره بدون ماتخسر

[ولـد الدوادمي]

بكم استاجره ؟

[غالي]

عند المفتاح طريق العليا العام ايجار اتش2
ب2400 خبري به العام

[الشقردي]

مشكورين وما قصرتوا يالربع
وكلام أخونا القماري أميل له أكثر ولا تهونون ....

والظاهر الهمر بتصير من الروايات القديمة الي تنسى وتطير مع الزمن!

[غالي]

شباب سمعت ولا شفت
لكن سمعت ان الي ابو 119500 دفرنس واحد مافيه دبل صحيح هالكلام ؟

[فهد الرياض 00]

شباب ...... خصوصا اخوي الشقردي:
اتمنى تفرقون بين الهمرات
تراها انواع
الهمر الي موجود بكثره في شوارعنا انا معكم انه من جنبها (مقارونتاً بالقديم عند اعتقاد اغلب الناس)
الهمر يجي2005 H1
ويجي2005 H2
ويجي2005 H3
وبينزل يمكن السنه الجاية او الي بعدها H4 صندوق ونيت غمارة زي الشاص يعني
الهمر الي عليه الكلام والجباااااااااااااااااااااااااااااااار والي ماعليه غبار هو الهمر H1 واقبل التحدي في كلامي هذا
الهمر الي شوه سمعت الهمر H1 هو الهمر H2 .يعني عند المقارنة لاتعممون الهمرات كلها حددو
ارجع واقول الh2 طراز من طرازات الهمر الثلاثة
يعني لاحد يجي ويقول الهمر رواية قديمه...
ودمتم سالمين...
اخوكم مدمن ومتخصص همرات ..................... فهد

[الشقردي]

ما قصرت اخوي فهد الرياض على التوضيح
لكن اللي أقصده خوصا الهمر H3 ري ما هو مكتوب بالعنوان, أما H1 ما نختلف على قوته خصوصا ان اكثر استخداماته حربية
واللي قالوا الهمر رواية قديمة يقصدون الموديلات الجديدة منه وليس H1

وطالما انك مدمن ومتخصص همرات وشلون قطع الغيار للهمر بشكل عام من ناحية توفرها وسعرها ؟

واسلم وسلم

[فهد الرياض 00]

اذا قصدك H2 فهي متوفرة زيها زي الجمس وزي اي سياره ثانيه . ما اقول 100% وكل الشركات كذا . وحتى التويوتا مستحيل تتوفر القطع 100% . لكن القطع المهم مثل ماقلت مثلها مثل الجمس .
واذا تقصد H3 فالله أعلم . السيارة توها نازله السنه هذي ماأدري عن توفر قطعها. ولاننسى الارمادا (يالي تحبون النيسان وتقولون مامثله) الارمادا والمورانو أول مانزلت الي شروها بدري وخربت عليهم السياره وقفوها بالشهوووووووور بسبب عدم توفر قطع الغيار.
ومن ناحية الاسعار أغلى من الجمس بفرق بسيط. H2 اقصد
وعطني وش تقصد بالقطع وانا اقولك كم سعرها التقريبي.

(((( كلامي كله عن الh2 والh3 )))) لان الh1 يختلف الحكي.

[aljassas]

وش رايكم يا شباب في البي ام دبليو X5 في الطعوس

اما الهمر احس قوي في التطعيس بس الحقيقه ما جربت انا معي اكس فايف وخايف اطعس فيه وابلش

[فهد الرياض 00]

وش تعريفك للتطعيس اقولك نصيحتي

[الشقردي]

الاخ فهد الرياض
كفيت ووفيت
القطع اللي أقصد (الاستهلاكية مثلا)
الفحمات.فلتر الهواء فلتر البتزين البواجي العكوس وانت ماشي

[صيهد]

شباب سؤال
اذا واحد بيقسط 120000 ريال هل يقسطها على همر3 والا برادو vx2
قرار محير ارجوا المساعدة
ورجا ان تكونوا منطقيين

[الشقردي]

انا في رأيي الشخصي البرادو أكثر عملية وأقوى مكينة
أما الهمر اللي تقول أعتقد انه رزه وهذا السبب اللي خلاني أطرح الموضوع وزد على كذا انه خمسة سلندر والمكينة كبيرة على هالسيارة

أنا الصراحة تفاجأت انه خمسة سلندر

[جلاد الصحراء]

ترى مايزبن في البران مصنوع لشارع التحلية بالرياض .عمرك شفت همر بالصمان او النفود الكبير

[ولـد الدوادمي]

اخوي ابقضبك 140 الف ريال الف ينطح الف

وجبه لي بهذا السعر ؟

[الشقردي]

الاخ ولد الدوادمي
عشان توضح لك الصورة أكثر السعر اللي هو 119,500 للهمر فئه H3 وهو أصغر شئ في الهمر وهذا كان عرض لكميه محدوده وخلص يعني بدون كشافات وبدون اضافات
أما الان بـ 126 ألف قير عادي وأعتقد فيه مثبت

اذا انت على كلامك يالله توكل على الله وعطنا دراهمك نطلع لك واحد وناخذ الفرق

هاه وش قلت؟

قلبناها خيمة البيع والشراء على غفله :no2:

[الطير الأبرق]

يا ناس
هذا ههههههههههمممممممممممممررررررررررر
مهب لاند ولا سفاري

شف المدرعات حقت الجيش (كل جيوش العالم)
هموووووور


الموت كم مديله ويمكن مرشوش

حكمت اليوم
((اللي مايقدر يوصل للشيء يسبه))
سامحونا


الي تقصده هو الاتش ون مهب هذا

لان الاتش ون هو الي مصمم للجيش اما هذا تصميمه تجاري قد لا يفي بمتطلبات الجيش ولا يصل ايضا لمستوى الاتش ون الي هو مع الجيش كما ذكرت

من مميزات الاتش ون انه تقدر تنفخ الكفرات وتنسمها وانت تمشي واتحدى اذا فيه سياره بهالطريقه

[Rakeb Shabah]

السلام عليكم اخواني،

الهمر H3 جربتها وخلاصة القول انها ما تنفع:

- السيارة ثقيلة، ما بتونسك بدون سوبر او تيربو.
- قطع غيارها غالية.
- ما تقدر تصلحها الا في وكالتها أو كراج متخصص.

غفر الله لي ولكم ولوالدينا.

[طير استراحه]

ياشباب المشكله السائده فينا الحكم على السياره الجديده من الوكاله ؟؟؟؟
اكيد تبي تصير مسكته وزينه ولاتصرف ومريحه ... بس تعال احكم على السياره بعد خمس او ست سنوات هل بقيت على ماهي عليه ولا تغيرت مع المطامر والطعوس ؟؟؟
هنا المحك الرئيسي في الحكم على اي سياره ولا كان شفت كل الناس معهم جيوب صيني