لا يجاوب الا الخبير

[nashmi]

ولا يهونوا الباقين بس انا ودي اختصر وأقصر الموضوع على اهل الخبرة :

يا جماعة انا ودي بموتر ( هدد ) لكن اللي اشوفه هنا غير واللي معروف عند اغلب الناس غير ,,,

فمثلا المواصفات المعروفة لمعروف عن الهدد سابقا انه قير عادي - نوافذ يدوي - صدامات سود - مكيف وزاحد - جنوطه غير .... وغير كذا من المواصفات اللي تعرفونها ...

والسؤال ... وش هي مواصفات الهدد ذي الايام ... وش يميزه .. وايش اسباب تسميته بالهدد الحين ماهو زمان ..

[مجهول القنص]

الهدد هوو الجي اكس من 2005 الى 2007 ويتنوع من عده انواع يعني مهوو محدد لنوع واحد
يجي اسبيرين ويجي ونش ودفلوك ويجي فتحه ويجي قزاز كهرب ويجي مكيفين اما الي ذكرتهن انت هذا الجي
يجي ساده مافيه شي
وهذا الي اعرف عن الهدد لاني انا معي واحد وتخبر الي معه جيب زي كذا يكون خبرته اكثر ولاكن مايقصرون الاخوان الي عنده خبره اكثر مني

[تناساني]

الهدد السعودي الي هو الـ gx
الي يكون عادي بدون مكيف خلفي.. ويكون مكيف خلفي للمطور
وهذا قليل تحصله لان السعودي ماله رغبه
يكون مواصفاته خايسه واقل نوع هو

لكن الهدد الخليجي ( قطري )
يكون مواصفات الفكسـار لكن مكينه 6 سلندر
مكيف الكتروني.. قير اوتوماتيك او عايدي
مكيف خلفي و فتحه . ونش . خلفية
يعني مواصفات عاليه

واعتقد تسميته بالهدد.. لأنه خفيف وينطلق بسرعه مثل هد الطير

هذا مالدي

[ياسر 97]

المشكلة فية واحد معة جي اكس موديل 90 لونة بيج ومسمية هدد ؟؟؟؟؟؟

والمكينة 12 بلف اخس نوع صح ماتصرف بنزين لكن تسمع صوتة من بعد 4 كيلوا ...

[معدن ذهب]

انا ياخوي من ملاك الهدد سابقا وحبيت اوضح بعض الاخطاء او المفاهيم عند اخوي مجهول القنص واخوي تناساني


اول شي اخوي مجهول ..الهدد اطلق عليه هالاسم من ايام 98 وهو الجي اكس وكان يجي بعدت مواصفات مابي ادخل بتفاصيلها .
واخوي تناساني موصفات الهدد القطري تقريبا مثل الهدد السعودي لاكن يفرق بالاكسسوارت الداخلي اما المكيف عادي مايجي لمس
لاكن الي يبي الهدد الي عليه العلم فهو الجي القطري موصفات الجي تكون
ازرق من داخل وبدون ثلاجه ومكيف واحد والقزاز اوتوماتيك . هذا الخفه وهو يستاهل اسم الهدد والي يبي زود موصفات ياخذ الجي اكس


واختلاف الرأي لايفسد للود قضيه
موفقين خير

[nashmi]

الف شكر لكل من مجهول وتناساني والاخ ياسر وأخص بالشكر الاخ معدن ذهب ....

وأتمنى مشاركات أكثر من أهل التجربة والخبرة لاثراء الموضوع أكثر ولبيان معلومات أعتقد انها مجهولة عند الكثيرين .

حبيت أضيف معلومة .. البعض عندنا يسميه ( السّلق )

[معدن ذهب]

العفو ياخوي يالنشمي
حنا ماجينا هنا الا نبي نفيد ونستفيد وانا اخوك .
ومسمى السلق فهو لنيسان السياحي هذا على حسب علمي يالغالي
واحب اشكرك على موضوعك بصراحه الي جا في محله وزي ماقلت لتوضيح المعلومات المجهوله