المساعد الشخصي الرقمي

مشاهدة النسخة كاملة : رايكم في كروزر الشكل الجديد


الفارس3
01/04/2011, 11:10 PM
يا شباب ايش رايكم ب لاندكروزر فوق ال 2008 الشكل الجديد صحيح انه ما يتحمل في البر وصداماته تتفكك انا بصراحة جربت ال 2007 ما عليه كلام وناوي ع واحد من 2009 وفوق بس بعض الناس يقول ما يسوى عند 2007 وما يتحمل في البر
اللي جربه الشكل الجديد في البر سنتين او ثلاث يعطينا رايه
البرتقالي
01/04/2011, 11:36 PM
انا ماجاز لي من ناحية الراحة وسلاسة القيادة
والسبب أني تعودت على الفورد

بالنفود جربته على خفيف بنفود مهوب عسر
الهواء ثلاثين تمشي بدون دبل
عاشق الvx
02/04/2011, 01:09 AM
اخوي بالنسبة للجديد افضل بمراحل من القديم
القديم يتميز بشي واحد فقط ان الدبل فيه عايدي(عصا)
والجديد كهرب بس مافيه مشاكل ,,
اما في الراحة والصرفية والمركب مافي مقارنه ابد ,,
القديم زين وموتر وشهادتي فيه مجروحه وما ارضى فيه
بس بعد ماجربت المفخرة صعبة ارجع للقديم
الكلام هذا عن ال8 سرندل
لكن تبي نصيحة استاجر الموتر وجرب وانت الي احكم بنفسك
لان كل شخص وله وجهة نظره وموفق يالغالي
الهاجر 7002
02/04/2011, 01:11 AM
آنآ آفضل 2007 وتحت...


صل آلآستخآرهـ وآللي كآتبهـ ربكـ بيصير
اللاند
02/04/2011, 01:13 AM
انا معي2006والدبل كهرب والله ماشفت منه الا الزين والموديلات الجديده مادخلت راسي
رهيبXرهيب
02/04/2011, 08:24 AM
انا عندي الجديد والقديم الجديد 8 سلندر والقديم 6 سلندر
الفرق:
القديم اريح في البر
القديم متماسك ما يتفكك بسرعه
القديم كل شيئ فيه عادي يعني الدبل والسلف والتكيف
القديم التكيف ابرد من الجديد وغير الثلاجه تعمل من غير تشغيل المكيف
القديم قوه انبعاث الهواء التكيف اقوى
القديم ما دخلت فيه التكلولوجيا
القديم نظام المكينه راسي نظام عادي صوت المحرك ناعم الجديد نظام V صوت المحرك مزعج
محرك القديم من معدن حديد الجديد المعدن مخلوط حديد وماده اخرى
القديم الهيكل الخارجي اقوه من هيكل الجديد
القديم يوجد فيه خزانين الجديد خزان واحد للبنزين لاكن كبير

في الختاااااااااام اترككم مع مقاطع الفيديو مطارحه بين القديم والجديد

ta_59LcONwk


nT9K3VjevAo

المسامحه على الاطاله
ALBDRANE
02/04/2011, 08:46 AM
بالشكل الجديد أجمل .
سيف الظفير
02/04/2011, 08:52 AM
ونن يالغالي شكل جديد من عام 2008 وحنا نتفلا عليه
بومحيمل الخالدي
02/04/2011, 09:08 AM
السلام عليكم ورحمة الله وبركاتة , ,

عسـاك على القـوة أخوي الفـارس , ,

وربي يوفقـك على الطيـب , ,

بصراحـة أنا أول شيء ما كـان عاجبني الجـديد , ,,

بسماعي أنه سفتي وحساس بكل شيء , ,,

لكني جـربته ومعي 2008 ومعي من أحسن مايكون , ,

ماشكيت منه بشيء ,, و الراحة أبد مريح , ,

لكن مثل مانزل موديل 98 وبتغيير الشكل الناس ماحبوهـ

وقالـو عنه نفس الكـلام بخصوص البر والتطعيـس , ,

و اللحين مويل 97 ونازل نـادر المهتم فيه صحيح سعرهـ فيه

لكن تلاقي الواحد يقولك زمـانه راح ;)

فـ نفس الموال يكون على ال 2008 أنا أقولك فيه ثقل بالبر

لكن نسم هـواك وأمورك تزيين والسواق له سبب زود عن السيارة

ولو بأمكانك تأخذ لك 8 سرندل يكون أفضلك وأريح لك , ,

أنا اللي معي 6 ,, :D ودخولي ل البر قليل مرة

فـ عاجبني شكله ماشاء الله فخـم ومنـظر ,, بأختصار هيبـة

كلـن ينـاظر فيك لامن مريت ههههههههه :good2:

وعنـدك اليحيى تقدر تأخذ من عنده Gx 8 سرندل

و الله يوفقـك ومثل ماعلمـوك الربـع ,, ,

خذ لك موتر أستأجره وجربه من عزم وطعوس

لك يومين أو يوم وبيكفيك تجربه ,, ,

وأستخيـر وربي يكتب لك اللي فيه الخيـر , ,,

ـأحترامي
بن سليمان
02/04/2011, 09:58 AM
شكلك من اللي يفكر في القرقعة والتفكك
يا أبن الحلال كلها تقرقع الموديلات الجديدة والقديمة وجربت القديم والجديد جربت 2006 هدد وااللي يقولون عنه أنه مخصص للبر ويتحمل البطناج والله أنواع القرقعة من قوة القرقعة السلف طايح
إذا تقدر على الجديد خذ لك واحد وأستانس أزين لك من المستعمل المؤكل خيره
.أبوعبدالرحمن
02/04/2011, 01:24 PM
جربت القديم وجربت الجديد

السيارتين كلها ما عليها خلاف ولكن أنت فكر بعد 5 سنين الى 8 سنين وش بيصير الوضع معك

إذا أنت من الناس إللي تبطي السيارة معه أرى إن من 2008 أفضل بكثير وإن كنت حدك سنة بالكثير دور لك نظيف من 2006 و 2007

مع العلم العزل الداخلي الجديد أفضل
العزم الجديد أفضل
فخامة المركب الجديد أفضل
الوسع الجديد أفضل
الشكل والله ما أقدر أعطيك رايي وفعلا شيء محير مرة أقول القديم أفضل ومرة أقول الجديد أفضل


والله يوفقك باللي يرضيك ولا تنسى الاستخارة و خل عندك بعد نظر
الفارس3
02/04/2011, 07:20 PM
شكرا للجميع ع الردود
بس محد جاوبني عن الصدامات هل هي صحيح تتفكك من المطناج والمطامر
الفارس3
02/04/2011, 10:20 PM
تسلم اخوي بوعبدالرحن الصفيان عالمعلومات
بس صحيح ان صداماته تتفكك مع كثر المطامر
البرتقالي
02/04/2011, 11:53 PM
شكرا للجميع ع الردود
بس محد جاوبني عن الصدامات هل هي صحيح تتفكك من المطناج والمطامر
وشلون تتفكك الصدامات يابعدي ؟؟
البرتقالي
02/04/2011, 11:58 PM
تسلم اخوي بوعبدالرحن الصفيان عالمعلومات
بس صحيح ان صداماته تتفكك مع كثر المطامر
الصدامات ماتتفكك المشكله بالزوائد الفيبر اللي عليه اللوحه
اذا خليته وانت راعي بر يعدم عليك بوية الصدام
وأي استفسار طلباتك اوامر
.أبوعبدالرحمن
03/04/2011, 09:15 AM
تسلم اخوي بوعبدالرحن الصفيان عالمعلومات
بس صحيح ان صداماته تتفكك مع كثر المطامر



سلمت يالغالي


وش اللي يفككها ،،، أعرف لي واحد معه 2009 GX والله ما قصر فيه


مقناص وطعوس وخطوط وبطانيج ومطامر والموتر ما شاء الله تبارك الله ما تفكك ولا جاه شي


وباعه الان وشرا 2011 GXR
الفارس3
10/04/2011, 10:10 PM
وشلون تتفكك الصدامات يابعدي ؟؟
يعني تنفك كلبساتها من الجوانب ولازم تروح تكرب عليها او تركب سيم من داخل علشان ما ينفك طبعا هذا كلام واحد من الشباب جربهه في البر والمطامر
الفارس3
16/04/2011, 11:04 AM
شكرا للجميع ع المشاركة
ابوحمدان1
04/05/2011, 06:12 AM
ta_59LcONwk




nT9K3VjevAo




المسامحه على الاطاله

اتحداك تحدي كان موترك الجديد 8 سلندر ..
وش ذا العزم .. والله اني مجرب الجديد والقديم .. والجديد اقوى بواجد ..
قنوع
04/05/2011, 12:00 PM
خذ الجديد ولا تشيل هم

تجربه 3 سنوات

6سلندر و8 سلندر

وموفق للخير
الفارس3
23/05/2011, 08:06 PM
شكرا للجميع
سآبق الطير
24/05/2011, 01:48 AM
ta_59LcONwk




nT9K3VjevAo




المسامحه على الاطاله



واضح انه مرهم ومفصول الدفع الرباعي
موسيقار زماني
24/05/2011, 02:03 AM
انا معي 2008

والحمد لله ما شاء الله

ما عمري اشتكيت منه

مع اني شبه اسبوعي بالبرر

وخل عنك بعض الناس اللي تقوول 2007

هذا ولى زمانه

وخذ العلم من اللي جربووه واستعملووه فووق 3 سنيين

ما قد شفنا منه شي