الحل الجبار , بخصوص صوت الهواء في vxr

[مروق]

السلام عليكم ورحمة الله وبركاته ..

اهني نفسي بالانضمام الى هذا المنتدى الرائع , واتشرف بمعرفه الجميع

سبق ان شاهدت موضوع يتحدث عن وجود تسريب للهواء من ابواب الفكس ار او جميع فئات اللاندكروز

احب ان اوضح معانتي ايضاء من نفس المشكلة في موتري vxr 2005

وبعد تمحيص وتفحيص من قبلي , حيث اني لااعتمد على راي الخبراء لعدم وجودهم في ارضاينا

وجد العلة ليس لها علاقة بالابواب , اي الصوت ينتج من مكان ثاني

والمكان هو حافة الزجاج الامامي المجوفه , المقابله لحجاج السواق ( امحق وصف )

لاحظت ان الصوت لايسمع الا اذا كان اتجاه الريح جانبي , اي هابت عليك شماليه وانت مشرق

فيحث مايشبه الصفير

عموما حلها بسيط . مجرد تعبه التجويف بسيلكون اسود

شكراا والى اللقاء في تجاويف اخرى !!!

[الكونترولCONTROL]

قصدك حافة الزجاج الأمامي مما يالي الأبواب ..... أقدر اقول صح لسانك ........

[محمد التمامي]

أقتراحك جيد ورأيك على راسي ولكن

حرام 2005 احط فيه سيلكون

الصراحه لو اسمع الصوت بيشق راسي ما سويتها

وفالكم طيب

[الكونترولCONTROL]

يعني انا 98 عادي احط سيليكون ؟؟؟؟؟ ......!!!!!!!!!!!!!!!!!!!!!!!!!!!!1

[الشقردي]

الصراحة مافهمت وصفك مظبوط
لو تحط لنا صورة ولا عليك أمر

اقتراح ... المشكلة هذي ما يحلها لي مكيف الصحراوي اللي يحط داخل الجلب الأساسية للباب, أو الشريط اللاصق ؟

[ذرب المعاني]

هلا بك اخوي

بس ترا ان حطين سليكوزن زبعد فتره لابغيت تبيعه بيشكون ويحسبون انك مغير القزازه الاماميه ..
خلها يارجال على مبنى الشايب ( طمام المرحوم ) وماعليك من الصوت

[مروق]

هلا ومراحب بالجميع من اولهم لااخرهم ...

الكنترول .. صح بدنك يالغالي . واظنك وصفتها مضبوط

التمامي ... حيااك ربي

اقول السيلكون كا حل سريع , ولكن هنالك البديل ( حشوات اسفنجيه تباع عند ساكو ) تحل المشكلة ايضاء

الكنترول .. هلا بك مرتن ثانيه

بالنسبه للثمان وتسعون , ينصح بقص الحافه بصاروخ , يقولون ازين , عموما اللي متحمله من ثمان وتسعين كمل الباقي من عمره بدون سيلكون !!!!!!!!!

الشقردي ...

نأسف لعدم توفر الصور حاليا , لجهلي بادخال الصور للمنتدى ,

لكن لو راجعت رد الكنترول بيفيدك اكثر مني

ذرب المعاني ... هلا بيك

كلامك صحيح , لكن المهم من الموضوع معرفة مكان التصفير , لن كثير من الناس يحسبها من الابواب

شكرااا للجميع

[دحيم_1]

من واقع تجربة (vxr 2006) الصوت ما يطلع قبل سرعة 160 :(

فانصح انك تمشي 159 ونازل :p

[nasser200a]

لو فية صورة يكون افضل للشرح

[مروق]

رابط الصورة (http://www.mekshat.com/pix/upload/images12/mk21062_vxr.jpg)

[النجم الهاوي]

انا كانت عندي نفس المشكله وحطيت شريط لاصق على الباااااااااب

وصرت ماسمع شئ

جربووو واحكمو ترى مايكلفكم شئ


تحياااااااااتي


النجم الهاوي

[وحدانى]

السلام عليكم ورحمة الله وبركاته

والله ياخوان ان المشكلة لازالت مستمرة فى الجيب انا تونى شارى vxr 2006 ونفس المشكلة لازالت فيه صوت الهواء فالاحسن تحكلون

[مروق]

دحيم ون ..

الموضوع يوضح مكمن الازعاج ( اش رايك بمكمن !!) يعني القصد توضيح المشكلة لاغير

وعلى فكرة حتى لو كانت سرعتك اقل من 130 كم تبي تسمع صوت اذا كانت الريح جانبيه


ناصر ...
ابشرك قدرت احط صورة , شفها تحت ردك لاهنت , والقصد الحافه المجوفه

النجم الهاوي ...

لعلك ماصادفت رياح جانبيه , على شان توضح ل الصورة اكثررر

وحداني ....

راجع المقترحات اعلاه لعلها تفيدك

دمتم بخير وفكسرة

[كليجا]

انا معي Vxr 2006
والصوت مايطلع الا على السرعة 160
والى الان مالقينا الحل الشافي ؟؟؟؟

[فهد الرياض 00]

شباب فوق 150 حجز السيارة وراعيها لاحد يتتهور ....

[مروق]

هلا ورحب ...

كليجا ...

الموضوع يتحدث عن مكان الصفير , وهو حافة الزجاج الجانبيه المواليه لابواب
اي ان الابواب , ليس لها علاقة بالصفير , انصحك تملى التجويف بأي شيئ قابل للازالة بسهوله , وسترى الفرق بأذن الله


فهد الرياض ..

صح لسانك , السرعه الزايدة تهور , لكن بعض السيارات تغريك بالسرعة , وهناء المشكلة

[مزاجي]

مساكم الله بالخير ياشباب

انا معي في اكس ار جديد ويطلع عندي الصوت فوق 160 واحيان اذا الهوا جانبي يطاع على 130

لاكن الصوت اللي يطلع عندي تقول ذيب يعوي اب اسرع حل وياليت ياشباب

يكون الحل موضح بالصوره علشان للي مثلي فهمهم ثقيل يرتاحوووووون

[مروق]

هلا ورحب ...

مزاجي حياااك اخوي ... وفعلا جبتها صوته يشب عواء الذئب , والسبب طال عمرك الحافه الجانبيه للزجاج الامامي , وهذي الصورة


رابط الصوره (http://www.mekshat.com/pix/upload/images12/mk21062_hhh.jpg)

[دبارة]

مافهمت شي من الصور ممكن توضح اكثر الله يرحم والديك المشكلة غاثتني من مدة بالجي اكس ار والحل ماعلمتنا فية

[ابوقاسم]

يا جماعة الخير ............
الحافة هذي معموله علشان لما تشغل المساحة لتنظيف الزجاج على سرعة معتدلة ما يجيك الماي على الزجاج الجانبي وهذا يحجزه علشان ينزل اسفل الزجاج فأنت ان سكرته مثل ما يقول الاخ مروق المنجا راح يجيك على الابواب والزجاج الجانبي ..........
فالرجاء تدورون لكم حل ثاني...............

[مروق]

الاخ دبارة ... هلا بيك

اظن لو تقراء الردود رايح توضح لك الصورة اكثر

الغضي ..

هلا بيك , كلامك صحيح .. لكن ويش االعمل وهي مصدر الصفير ؟؟؟؟
انا اقول تملى التجويف الداخلي فقط , واظن ان المويه ستتجه الى اعلى ( مو معقول تبي تطمر الحافه )
واشير بتعبئتها بحشو اسفنجي قابل للازاله

وشكرررررررراااا

[كمشتكين]

حلوه جداً ((( حجاج السواق ))) يبي لها مترجم مصري

[نقا هشال]

كل الشكر ياغالي

ماقصرت

وبالفعل مشكله ومزعجه

مدري وش فيهم هاليبانيين قامو يخنبقون

طيب احد السيلكون من جهه وحده والا من كل الجهات

[المتليك]

ارى ان يوضع هوز الصرندل(( اسطوانة الغاز)) في التجويف المذكور وش رايكم

[حمد1234]

مشكور على المعلومه

[yaser_2000]

لا تحط سليكون ولا شي طول على صوت المسجلة بمحاضرة دينية او شريط اناشيد وخلاص لازم التشويه بكرة مع الحر بيطيح السلكون وعاد دور من يحكه دون مايخدش الصيغة او الزجاج

[ابو خطاب]

السلام عليكم ورحمة الله وبركاته

لكل سياره عيوب تصنيع وملاحظات مهما طالت وتشمخت شعبيتها والكمال لوجه الله.. وعيباً بنسم الهواء احسن من عيبا بتكيات البلوف(الباترول) ولا دفرنسات(الشروكي).

من واقع ماشهدت وجربت وقد عمل بهذه الطريقة كلا من وكالة العيسى للسيارات فذكر كان عندهم جهاز يزيد الضغط داخل السياره .. ورغوة الصابون على منافذ وابواب السيارة تبين جهة التنسيم.. دون الحاجة تهب شمالية ولا تشرق ولا تغرب ولا تصفط طبلونك.. بعدين تنحجز انت وموترك.. والله يحفظكم من كل مكروه.

وممكن انت تسويها بالبيت وتعرف بالضبط وين التنسيم..... تخيل سيارتك كفر تيوبلس :d ..اذا لقيت النسم حط عود.

سكر الابواب والزجاج وشغل مروحة المكيف على اعلى درجة.. وسكر فتحت دخول الهواء الخارجي (زر جمب المكيف عليه صورة سياره وداخلها سهم دائري).. بعد كيذا جبلك بخاخ رغوه الصابون حق غسيل السجاد.. وكحل البيبان والنوافذ والفتحة والقزاز الامامي.. وزيادة فقعات الصابون هي علامة كبر التنسيم... حط عود :D ......لالالالالا امزح ..علم الموقع ورح لراعي القزاز ..وحرص على الفني الدقيق والشاطر.. وخله يسد هل تنسيم..بسيلكون شفاف او اسود او غيره.

بعض السيارات فيها منافذ خروج هواء خلفيه ومداخل هوادء امامية.. تحت الرجلين مثل الامريكي.. فسدها بكيسه لزيادة الضغط داخل السيارة .

[مروق]

مرااااحب ...

كمشتكين ..

هلا بيك , الا ماتقولي ان اسمك هو اللي يبيله مترجم صينيني !!
عموما يكفي انه يقال (فلة حجاج ) واظن قليل اللي مايعرفها
اخيررا حياااك

نقال هشال ..
تسلم يالغالي وماسوينا شيء ( بالنسبه للسيلكون ارى استبداله باسفنج لاصق خاص بابواب المنازل ) يستحسن تعبيء الفتحتين

المتليك ..

حياااك ... والله فكره طيبه

حمد ...

حياااك ومشكور على الزيارة


ياسر ...

الله يجزاك خيررر نصيحه طيبه ( بس ماترى ان رفع الصوت لدى المحاضرين يشتت ذهن المستمع ؟؟؟ )

ابوخطاب ..

حياااك ربي ... ردك موضوع لوحده ( اقترح تنشره للفائده )

شكررا للجميع

[مزاجي]

والله احترنا ياجماعه ماندري وش الحل السهل والنافع

[مروق]

مزاجي ...

حيااك مرات ومرات .. الحل سهل وانا اخوك عبئ الفتحات بحشو اسفنجي اوشريط لاصق الخاص بابواب المنازل من النوع الثخين
او اي شيء يقوم بالمهمه , بعض الشباب اقترح هوز اسطوانه الغاز , وارى انها حل سريع وغير ضار
حاول وقلنا النتيجه ..... حياااك

[المموه]

يامروق المنجا .السلام عليكم
عملنا بأقتراحك على vxr 2005 .وحطينا سلقون ثم ربله والحقيقه الصوت ماراح . ونلاحظ انه اثناء ظهور الصوت نزل قزازة السواق شوي يخف الصوت ارفعها للأخير يزود الصوت . يعني المشكله بالقزاز ومادري فيه احد ركب ربلة لكزس للباب وراح الصوت وهل بالامكان تركيب ربلة لكزس لقزاز الـ vxr .

[مروق]

اخوي المموه ..

حياااك , بالنسبه للمشكلة عندي تلاشت بعد معالجه التجاويف , واقصد (الصوت اللذي يشبه عواء الذئب )
اما بالنسبه لك , فربما هناك تنسيم بالباب غير العواء المقصود..

شكراا لمرورك ودورياتك