المساعد الشخصي الرقمي

مشاهدة النسخة كاملة : مساعدة يالربع هذا ماحصل في طعس الهاف مون .. أكسبلورر .


اسير الشرقية
08/04/2011, 04:02 AM
السلام عليكم ورحمة الله وبركاته

كيفكم شباب

الخميس واول تجربة بالنسبة للسيارة اكسبلورر 2010 افي طعس الهاف مون

طبعاًّ بصراحة ما شاء الله عليه تنسيم كفرات وبدون دبل .

بس ياشباب بعد المغرب الشاشة الخضراء فجأة ترن وصارت حمرا ومكتوب

يجب صيانة الآن rsc مدري rcs ماني متأكد من الاسبلنق بس زي كذا .

طبعاً انا كنت فاصل مانع الانزلاق بس شميت ريحة زي الفحمات وبعدها صار هالانذار . ونزلت على طول .

ومن نزلت وانا اسمع صوت زي الحكة في الكفرة الخلفية على اليسار امشي بشويش واتسمع من الدريشة صوت كأن الكفر يحك في شي داخل .

قد صار معكم زي كذا .

او اروح للوكالة اصرف . وهل الوكالة بيسوون صيانة على طول والا سراء ومواعيد .؟

بعدين وش الافضل اني اطلع بدون دبل او اخلي الدبل الصغير شابك افضل يريح السيارة .؟

خبراتكم يالربع ..
ميندو
08/04/2011, 04:18 AM
هلا

ياولد انت مو كاتب قبل فتره تسأل عن الموتر وتوك مطلعه
ياولد تراني بستلمه بعد اسبووع اسحب عربوني ولا وش الدعوه
لاني ماحصلت شي ارخص من عرضهم 91900 موديل 2010 طبعا جديد
لاتوهقووني اهج عنهم ولا اكمل المبلغ تراني ماعمري سقته

انصحوني وبسألك وشلونه معك في الخط والمدينه وهل ركبت شاشات انا باخذ الاستاندر

لا تتركووني تراني ماعمري سقته بس اشووفه بهالشووراع واحس انه مرغووب لكثرته

ارجو الرد بسرعه
اسير الشرقية
08/04/2011, 04:28 AM
هلا

ياولد انت مو كاتب قبل فتره تسأل عن الموتر وتوك مطلعه
ياولد تراني بستلمه بعد اسبووع اسحب عربوني ولا وش الدعوه
لاني ماحصلت شي ارخص من عرضهم 91900 موديل 2010 طبعا جديد
لاتوهقووني اهج عنهم ولا اكمل المبلغ تراني ماعمري سقته

انصحوني وبسألك وشلونه معك في الخط والمدينه وهل ركبت شاشات انا باخذ الاستاندر

لا تتركووني تراني ماعمري سقته بس اشووفه بهالشووراع واحس انه مرغووب لكثرته

ارجو الرد بسرعه



شوف يالحبيب انا توني مطلعة ماله عشرة ايام معي

وامس الخميس في الهاف مون بصراحة موتر يجمل والله فيه طعوس طلعت معها بدون دبل نسمت الكفر وفصلت مانع الانزلاق .

انا ماقول فيه شي الموتر قوي .

بس فيه شوي الهوى وانت ماشي العزل الصوتي لك عليه . بس ما يعيبه .

وان كان انت راعي عايله كبيرة فهو تراه شوي ضيق .

يعني حق عايله 5 اشخاص بالكثير عشان يشيل عفشهم .

بس تراه يسع لسبع الى 8 ركاب .

والموتر عزمه قوي وبالبر ماعليه كلام .

لكن من ناحيتي اعجبني بس عاد هالمشكلة وبروح الصيانة اشوف شكلي جبت العيد فيه .
قلت يمكن تكون بسيطة . ومرت على احد قبلي .

ماركبت فيه ولا شاشات ولا اي شي . باقي . الشاشة افكر اركبها من الوكالة عشان ضمان الكهربه لا يروح علي في حالة لو ركبتها برى وصار عطل بالكهرب . فقط .

بالتوفيق .

صلااااااااااااه ..

تصبح على خير .
Ss7
08/04/2011, 04:33 AM
السيارة تحت التمرين شلون تدخل بها طعوس
خلها تتعود على الشوارع بعدين طعس فيها , رح للوكاله وش جاها
ford f150
11/04/2011, 09:24 PM
تصير دايم اخوي يصير التراب داخل بالهوب او بين الهوب والفحمات رح اقرب مغسله وغسله وانشاء الله تروح
والله يوفقك ويطعمك من خيره ويكفيك شره..
allaa.hassan
02/05/2011, 03:40 AM
الانذار اللي طلع لك حصل لأن الرمل دخل ما بين حساس التراكشن وبين ترس مغناطيس الحساس(على كل كفر فيه نرس وحساس من الجهة الداخلية)

الحل طفي السيارة وعيد تشغيلها يروح الانذار على طول


والصوت حصل لأن الرمل دخل ما بين الهوب والفحمات بمجرد ما تغسل السيارة يروح الصوت
عبدالله الموسي
02/05/2011, 03:50 AM
الله يعين على هالسيارات الحساسة

ياعمار ياتويوتا ماتمل ولاتكل ولاتتعب راعية
اسير الشرقية
04/05/2011, 11:49 PM
الف شكر على مروركم . جميعاً

ومن خلال التجربة مثل ماقلتكم رمل دخل في الكفر . وطلع صوت الحكة . وراح على طول .

الله يعطيكم العافية .
ميسار
21/06/2011, 09:19 AM
ما فيه مشكله هذا حساس مانع الانزلاق جاه غبار او تراب الله يحفظك فك الكفرات ونظف جوه بالمنفاخ وراح تروح انا من عشاق الاكسبلورر والحمد لله دايم تجي وتروح هذه بسيطة جدا جدا
خشم العرمة
09/07/2011, 01:14 PM
طبيعي جدا طف السيارة وشغلها ويرجع كل شي كما كان باذن الله

هاذي الحساسات مع فصل مانع الانزلاق وتشغيل الدبل ودخول الرمل في الهوبات لاتدقق اذا طفيت وشغلت برجع كل شي كما كان
موفق