اليوم هو عيد الميلاد الثاني لسيارتي

[قرم]

بسم الله الرحمن الرحيم
السلام عليكم ورحمة الله وبركاته

إخواني اليوم هو عيد الميلاد الثاني
لسيارتي واللتي هي عزيزه على قلبي الا وهي ال باثفندر ولن ابدأ إحتفالي بإضاءة شمعتين بل سيكون بكتابه بعض إنطباعاتي عن هذه السياره خلال هذه المده وعن بعض مزاياها وبعض العيوب وبكل تجرد ودون عنصريه وليدرك الجميع بأن كل السيارات لها ماهوسلبي وماهو إجابي وأتمنى من الجميع المشاركه وطرح إنطباعاتهم عن السياره عيباً ومزيه أما انا لا اعبر إلا عن نفسي وماإرتأيته من سيارتي
وليس بالضروره ان يكون كل عيب اومزيه في سيارتي معمم على كل باثفندر هذاليس عدلاً.تعريف الباثفندر Pathfinder وتعني ( مستكشف الطريق ) من منضومة نيسان للسيارات الوعريه بدأ إنتاجها في بدايه التسعينات ولم تلقى إقبالاً بسبب ضعف المحرك حتى تم تغييرها كلياً في نهايه التسعينات وزودت بمحرك اكبر ذو6 اسطوانات 3 ليترات وبشكل جديد فلاقت رواجاً نسبياً وحتي عام2003 فقدتم تزويد هذه السيار بمحرك 6 اسطوانات و 3.5 لتر وبذلك إرتفعت كفائة المحرك وأصبح اكثر توثباً وأسرع إستجابه من سابقه و لم يتغير المحرك حتى موديل 2005 لذلك من يرغب شراء باثفندر يحرص على ان يكون من2003 وطالع .


الباثفندر ما له

سيارتي ماشيه فقط 50000 كم فقط لكنها كلها جلد بالبران وأنا يشهد الله إني قاسي القلب عليها وعديم الرحمه
المحرك . Vq قوي سريع الإستجابه حتى في السرعات العاليه بمعنى تدعس يعطيك والسرعه القصوى 200 يجيبها بسهوله وهومرتاح ويمتاز المحرك بهدوء وحتى صوت جرس التحذير من السرعه غير موجود وهذا شيء مريح

ودائماَحرارته ثابته على الربع وفي بعض الحالات اعلى قليلاً وفي الرمال تتجلى قوة المحرك الحقيقيه فهو بالفعل جدير بالإحترام لكن ضروري تنسيم الكفرات
إلى 20 او اقل في بعض الحالات . والدبل قوي ويتحمل الجور والقير فيه عزم بالنمره يعني ياكل نمر وهذا ينفع بالمراقى والصعود والسياره عز الله راسيه في الأسفلت على الرغم من إرتفاعها وهي كذلك خفيفة الوزن حيث يبلغ وزنها فقط 1700 كيلو هذا اللي خلاها مهبوله مكيفها جيدجداَ خاصه بعد ال( في كول ) السياره ماتتفكك
غريبه هاه!! نعم نيسان تداركت هالمسأله في السيارات الحديثه للعلم ما عليه
ضعف المساعدات خاصه الخلفيه . العلاج حبتين مساعدات إستراليه بعدالغدا !!! قصدي يركبن ورا اما قدام غالباً مايحتاجن مع الراكد .
سماع صوت حنه خاصه بالثالث لكن ماعليك طبيعي جداَ بالقير العايدي لاتهتم يذكرني بسيارات الرالي .
قزازالراكب والسائق عندمحاولة غلقه في السرعات العاليه يخرج قليلاَ عن مجراه ثم يرجع إلى الأسفل مره أخرى . العلاج خفف السرعه ثم اعد غلق الزجاج .
لمبة الدبل ضئيله ومكانها اسفل الطبلون من يمين مما يجعلها غير واضحه يا كم مره نسيت الخفيف ولا ذكرته إلا بعدمسافه ولوإنها كانت في مكان واضح وكبيره زي اللي في البجيرو كان يصعب نسيان الدبل شغال .
العلاج. فتح عينك
وضع الدواسات غير مريح على الأقل بالنسبه لي انا اتكلم عن القير العايدي
عيب في تحويل هواء المكيف يصير المكيف يثلج رجولك يعني يبيلك كنادر خلطه تلبسهن إذا متقدر تتحمل .
العلاج إذهب للمختص .
صوت صرصره الزجاج الخلفي في البطناج الباب اللي عليه المساحات .
العلاج . حاول توزن الزجاج من خلال الميزانيه وربط مساميرها .
صعوبه وزن الأنوار الأماميه لصعوبة مكان الميزانيه .. الحل إعرف الطريقه ثم اوزن بحذر حتى لاتكسر تروس الميزانيه
نظام الفرامل الخلفيه من طراز طبله وليس على هيئة قرص وهذا طرازقديم عفى عليه الزمن ولكنه ليس عيباً
السيفون واويلاه من مكانه جاب الرعب للبنشريه صاجه تفكه فيها حوالي 8 مسامير وبعدين تشوف السيفون وطلعته البهيه.
العلاج . خل السياره عند ابو يمن وهج عنه كنك منتب مهتم
صعوبة تركيب البواجي خاصه الإثنين من جهة السائق
صوت طقطقه اسفل خاصه في الطرق الغير معبده حيرني هبلبي جنني صرت احلم به باليل واقوم واقول اللهم اجعله خير لكن انا اتوقع انه صادر من داخل القير .
العلاج. عاد هذا مرض مستعصي ! لازم يكون القير بنمره وانت ماشي في الطرق الوعره لا تخليه فاضي وهو
يمشي على الوعر .
اخيراَ الطقه المهوله اللي تجي الى منك عاجلت الموتر بثنين وهو على وشك يغرز !!! أما هذي والله مالها طب عند قرم تطببوا فيها ياقروم مكشات .

هاذه والله العيوب والمميزات بسيارتي الباثفندر وبكل صراحه فليطرح كل مالك لمثل هذه السياره عيوبها وكيف تم إصلاحها اوتلافيها وماهي الأشياء اللتي يعتبرها ميزه في نضره والله يغفر لي ولكم ولأمه سيدي محمد عليه الصلاه والسلام. أخيكم الصغير قرم

[أبوناصر]

هلا وسهلا براعي الباث وكل الباثيين الكرام والجميع طبعا

أنا راح أطرح كل ما عندي ممكن فيه أحد يخالفني مدري

أولا المزايا :--

مثل ما قال حبيبنا قرم وأزيد كبر مساحة الشنطه الخلفيه وتقدر تركب فيها عفوش إلى قبل


من العيوب :--

تقطع الصاجه البلاستيك الي تحت المكينه وحلها سهل عند المواهب صاجه حديد على كيف كيفك

لا وفيها فتحت سيفون للغيار يفك مسمار ويبرم الحديدة وتطلع عسل ولا تروح من عند ابويمن اذا بغى يغير الزيت لأنه ما راح يطول


من العيوب طقه في الخلف مع قومت السيارة والله ثم والله ثم والله إني أحلم بها بالليل والنهار مثل قرم الله يطول عمره ولا لقيت حل غيرت كل الربلات الخلفيه والمساعدات واليايات ولا راحت آخر الظن إنها إما عمود الكردان أو في عكوس الدفرنس والله أعلم


قرقعه بالباب الخلفي وحله تيب أسود على الحلقه الي ركب عليه الباب الخلفي وراح تنساها


فيه نقص بزيت المكينة لاحظته من تالي لكنه بسيط ممكن نصف علبه بالخمس آلاف كيلو مدري عندي لحالي ولا لا


نزول السيارة بشكل كبير وواضح من التحميل والركوب والحل إلي أنصح به كل واحد راعي باث إنه يغيرها بيايات استراليه ولو ارتفع الموتر شوي وأهم شي تخلي مساعدات شد البلد \\\\\ قلت لي ليه لأن مساعدات شد البلد راح تريح مطب الموتر وما راح تحس بتغير أبد في مطب السيارة


حدايد السحب الي قدام وفي الخلف مخفيه وإذا سحبت بها راح تضغط الصداد وممكن تعفطه وحلها ركبت حديدة في الخلف أطول شوي وراح المشكلة (( ملاحظه في كتالوج السيارة ينصحون بالسحب من الجهه الخلفيه اليسرى ولا تسحب باليمنى ومدري ليه )))


والسيارة حلوه بالحيل ولوها تماتيك كان ما جرت عليها كثير :)



وتقبلوا أجمل تحياتي


أخوكم أبوناصر

[أبوناصر]

نسيت أقولكم سيارتي موديل 2003

[نمر بن حثلين]

الله يطعمكم من خيرهن ويكفيكم شرهن

وعندي لكم نصيحه
حساس الهوا بالباثفيندر 2003 وطالع حساس للغبار جدا واذا خرب يعينك الله تبدله وقيمته تقص الظهر ثلاثة الاف :(
لذلك الله الله بتبديل فلتر الهوا كل سنه
واحرصو على تنظيف الفلتر دايم


الاخ ابو ناصر
ما عندك ياخوي صورة للصاجه ؟ وكم كلفتك

[قرم]

يالله حي الشباب الحمد لله الموضوع بدأ يؤتي اكله ابوناصر والله توي ادري عن موضوع الصاجه لكن إنشاء اللله نشريها عن قريب والتيب امره سهل . ابوناصر تقول إن السياره زيتها ينقص !!! إذاكنت مركب اليايات الإستراليه قديكون إرتفاع السياره من الخلف وهبوطها اماماً يجعل الزيت يتجمع في مقدمة المكينه والعيار ما يلحق كل الزيت
وأما مسأله الجهه الصحيحه للسحب توي ادري عنها ! لكن يمكن علشان تكون بعيد عن إرتطام الواير في حال لو إنقطع .

شايب الصمان يالله حيه
مشكور على هالمعلومه . وترى للمعلوميه الفلتر يغير كل 40000 كم وهنالك نوعين من الفلاتر النوع اللزج وهو غيرقابل للنفخ والتنضيف يعني اتركه وبعد ال40000 كم غيره وهذا انا ما احبه والأخرالجاف المعتاد وهوقابل للتنظيف والنفخ وهو الزين

وينكم يا اهل الباثات شاركونا الرأي إطرح مشكلتك ويمكن تلقى لها الحل وقديكون مشكلتي حلها عندك ليش لا. :burnout2: :good2:

[أبو أسامة]

السلام عليكم ورحمة الله وبركاته....
الله يعطي كل واحد منكم خير موتره ويكفيه شره ...............
الباث فيندر جيب وفعله يشهده ومايحتاج أني أمدحه ماشاء الله عليه ........................
أخوي أبو ناصر الصوت حق الطقه اللي في الخلف يمكن من الأستبنه أو من السلسله اللي ترفع الأستبنه ..... يعني لو تندفع بالجيب بسرعه للأمام راح تندفع السلسله للخلف وتضرب بالجنط حق الأستبنه ........... هذا اللي أتوقع .......... والله أعلم .........

والسلام عليكم ورحمة الله وبركاته

[قناص الليل]

الايجابيات :
_ محرك قوي متناسب مع السيارة بقوة 250 حصان .
_ السياره خفيفه الوزن و حجمها مناسب (( في الزحمه ما تواجه اي مشاكل )) .
_ ارتفاعها عن الأرض ممتاز .
_ مساحة تحميل الأغراض مناسب (( اذا كانك راعي ترتيب تضبط أمورك و تقدر تحط لك تانكي مويه و شناط للعزبه )) .
_ الحمد لله ما فيه مكان ابيه الا و وصلته بحمد الله و فضله (( سواء رمال او شعبان او وديان بين الجبال ))
_ ماشاء الله راسيه على الخطوط و جنوطها 17 لها دور .

السلبيات :
_ مشكلة نزول السياره بعد التحميل (( و الحل موجود و سهل ركب يايات استراليه و تنحل المشكلة )) .
_ الصاجة تتقطع مطامر القشع و الحرمل (( و الحل موجود فصل صاجه حديد نفس المقاس و نفس عدد المسامير و انسى الوضع ))
_ مكان فلتر الزيت >>>> فعلاَ مضيق صدر ابو يمن (( لازم تفك الصاجه ، لاكن اثني على فكرة الأخ ابو ناصر بوضع فتحه للفلتر داخل الصاجة و تربط بمسامير )) ..

هذا و الله اعلم ..