صوت لسيارتك ... واذكر مميزاتها

[المطلق]

بسم الله الرحمن الرحيم

السلام عليكم ورحمة الله وبركاته

أحببت طرح هذا الموضوع لمعرفة أجود أنواع السيارات بالذات للكشاته لأنهم أصحاب كرف للسيارات

ولكي يستفيد المشاهد للموضوع عندما يشتري سيارة أي الشركات المصنعة للسيارت أفضل من ناحية كثرة استعمالكم

(( لنوضح أي النوعيات أجود )) للبران والكرف

وشكراً

أريد ممن يرد على الموضوع ذكر المميزات والسلبيات للسيارة

[عاشق النفد]

النيسان
باترول
1- سعره معقول.
2- مكينته قوية 4800 .
3- مصمم للبران شفه من وكالته رفيع اما باقي السيارات طامنات .
4-ياباني يعني لك ولزمن

والي يقول انه يتفكك
قله الحمدلله الذي عافاني مما ابتلاك به من نقل للكلام بدون علم

والي يقول ان التويوتا اقوى منه قله الوعد البر الكلام للبزرانوالفعل للرجاجيل واكبر دليل قوة مكينته و التجربة خير برهان

مع العلم اني معي يوكون وقبله هلي

لاكن الحقيقة تطرح نفسها وبدون مجاملة

[راعــي النــفــود]

السلام عليكم ورحمة الله وبركاته
نيســــــــــــــــــــــــــان
انا بالنسبة لي اقول الباث فايندر وما أدراك ما الباث

محرك اقدر اقول عنه انه جبار 3500 / 250 حصان
رساوة في الخط وهذا طبع النيسان

مريح تقول راكب فورد والا كادلك بدون مبالغة

سيارة بر ومدينة إذا بغيت البر فهو مايحتاج ذيب واذا بغيت المدينة فهو كشخة

الجنوط كبار 17 انش والكفرات 245 وهذي بحد ذاتها ميزة في البر والمدينة

احسن مافيه انه خفيف بالقومة يعني روحه خفيفة مهوب مثل بعض السيارات يالله تشيل نفسها


هذا رأيي الشخصي في السيارة .................... وسلامتكم

[المطلق]

أخي عاشق النفد و راعي النفود

شكراً على طرح أراءكم في السيارات التي ذكرتموها

وأتمنى من الجميع التفاعل

(منتب خسران شي إذا ظغطت بزر الفارة مرتين) = تصويت : نبي تصويت

[anas]

بالنسبة لي طعست واجد gxr موديل 99 وما يسوا قرش على الطعوس .. وطعست بالباترول 2004 4800vtc قيرين وآخخخخخخ ليته معاي من عام 2002 يوم تغيرت الماكينة .

[ولـد الدوادمي]

ددسن غماره 86 والله انها موتر ان بغيت بر وطعوس

[حر اليدين]

ددسن الدفرنسين
ميزتها خفتها في الرمل وسهولة اصلاحها وسعرها المناسب وقطعها مع العجز اللي في المباسط مع البيزة والبراقع
مرونتها صرفيتها جمال مظهرها تصلح للكبير والصغير يعدين شركة ارامكو صرفتها لموضفينها مع الجمس والفورد اكسبدشن في الربع الخالي

اثناء الاحتطاب (http://alshawi.jeeran.com/dleel113.jpg)

[(ابوسعد)]

انوووووووووووووووووووووواع الحقران للفووووووووووووووورد




طيب
طيب



لالا عادي ادري ان الفورد ماله شعبيه خاصة الجيووب !!




http://www.twa9ef.com/uploads/fc7239f406.jpg

[دسم الشوارب]

انا معي ددسن غمارتين 97 عادي ماهوب جي ال ولاهوبدفرنسين وفعلا موتر كد وكرف وبر بمعنى الكلمه
مايعرف الحراره ولا الخراب ولا التعب على الرغم من اني دائماً اختار اعسر الدروب واترك الممهده وابلع به من الجروف والحصيان مالله به عليم
واللي يقول لك ان النيسان يخرب ويتفكك كذاااااااب ولا عنده سالفه
النيسان سيارة عمليه من الدرجه الاولى
وقبله كان معي 98جي ال مهوب دفرنسين ونفس الحكايه كرف في كرف واذكر مره اني قطعت به سيل يمشي والما يغطي الشمعات الاماميه ولاطرى له يطفي هذا غير اني كذا مره بلعت لي منقع عمق مائه يزيد عن الشبر وانا امشي مالا يقل عن 90كم ولا حاص ولاطفى مع اني اسمع صوت الما يضرب بطن الموتر ضرب غير طبيعي
يعني برمائي
وقبله كان معي ددسن 83 غماره سير واحد
سقا الله هذيك الايام
ايام محمد سليم و ميحد حمد وثاني متوسط والسجاده الخضرااللي احط فيها دروسي ايـيـيـيـيـيـيـيـيـيـيـيـيـه
ياتل قلبي على ذاك الموتر وايامه موتر والمواتر قليل
لا وذاليومين اشوفه مع هندي وكل ما شفته احس ان داخله روح تدب فيه وانه يناديني ويعاتبني علي بيعتي له المهم
غير النيسان لاتدور وغير ارضك لاتسور

[الكونترولCONTROL]

انا معي vxr 98 أدري قديم شوي لكن رزق واجد علي من رب العالمين ..... كل ما تم 6 أشهر أكل له بين 1000 و 1500 صيانة عامة !!!!!!
=====================
طبعا اوتوماتيك و يطربك بالخط و بالبر و بالديرة !!!!! مشكلته الوحيدة : قطع غياره نيران و ليست نار واحدة !!!!!
----------------------------------------------------------------------------
و أحسن شي فيه : مريح بالسفر و بالبر ....
و أشين ما فيه : وكيله عبد اللطيف جميل

[دسم الشوارب]

السلام عليكم يا أخ كونترول
أولاً الله يبارك لك فيه
ثم الVXR كما لا يخفاك هو افضل سيارات الصالون على الاطلاق
لكن نحن هنا بصدد سياره بريه بحته
وحقيقتاً ال VXR ليس كذلك
وحتى إن حاولت إثبات غير ذلك فإن هذا لن يدوم طويلاً
اما إذا كنت داخل المدينه ولاتذهب للبر إلا عدة مرات تعد على رؤوس الأصابع فأنا أقول لك نعم مااخترت
ولك وللزمان
والدايم الله سبحانه

[محب الشمال]

شوف اخوي اعطيك الزبدة في الباترول
بالنسبه انه يتفكك هذا غير صحيح
وابي بل واترجى وآمل من كل عضو هنا يكتب طريقة كرف تطري على باله او سواها
وانا برد عليه ولا شي على الي سويته بالباترول وكان معي موديل 97
يا ناس يا انا كرفته كرف غير طبيعي ولا هو صاحي ولا اعتقد سوا احد مثلي بالباترول
ما شاء الله تبارك الله على الباترول والنسيان يطربك
قوي
متين
لاااااااااااااااااا يتفكك
طعوس
مدينه
جبل

4800


هذا الي عندي واكرر ارجوكم

[الكونترولCONTROL]

ضحكتني يا دسم الشوارب الله يعافيك ..... اذا ال Vxr ما يصلح للبر خلاص اروح ابيع و اشري لي شيروكي او سوزوكي .... او لادا !!!!!!!
ما عندك للبر مضمون غير 4 سيارات ((( حتى و ان حاولت اثبات غير ذلك ))) :
1- اللاندكروزر بجميع درجاته حتى جيب اللكزس دخله معها !!!! لأنه لاندكوزر
2- الباترول بجميع درجاته
3- اليوكن و هو بعد لك عليه !!!
4- الددسن و الهلي و السوزو الجديدة ( ديماكس ) !!!!
و غير ذولي الله يعين اللي يقرب البر !!!!!!
و لا تزعل علي !!!!!!!!!!!!!

[دسم الشوارب]

عزيز وغالي يالكونترول
بس انا اتكلم عن ال VXR فقط وليس اللاندكروزر ككل يعني عندك الGXRراح يكون افضل منه ..ليش؟
لأن الGXRمافيه أنظمة هيدروليك ولا ABS ولايخفاك ان الانظمه هذي راح تتعطل مع الزمن وخشونة الاستعمال
هذا اذاكان الاستعمال بري بحت كما سبق وذكرت لك
اذا قلنا انك راح تسوي له صيانه دوريه فهذا مكلف مادياً ويأخذحيز من نمط حياتك .وانت شاري موتر علشان تريحه ولا هو اللي يريحك؟
لنقل انك ماراح تلتفت لها الا إذاتعطلت ؛ما يخفاك ان اصلاحها مكلف ؛يعني ماسوينا شي ؛الاّ‘ذا كنت مستغني عنها فهذا موضوع ثاني
وعندك الGXاللي هو اقل فأه انا ارى انه صبور متماسك قوي يبري الجرح
ولك مني احلى سلام واحلى تحيه واستحمل سخونة الكلام وعزيز وغالي
علماً ان هذا الكلام ليس من فراغ بل من تجربة احد الاصدقاء المقربين الي
واتمنى الاّتقتلني

[ع.ف.الدرويش]

السلام عليكم ورحمة الله وبركاته

شكراً لك على هالمشاركة الطيبة.. واسحمي لي بالرد
بالنسبة لي فموتري نيســـان ربع موديله 2004 بالطبع بخـــــاخ ;) وما أقول إلا الله يطعمني خيره ويكفيني شره
خفيف بالبر ويمشي والله لو ترص بشرية والا عدة فيه.. وغير كذا مهنا صرفية.. أبفهم بعض الناس كيف يقولون يصرف وعلى أي أساس يمكن كان معاه آكسنت ومباشرة طق له جيب واشتكى من الصرفية..!
أما اللي بيتكلم عنه.. فـ أقول له اسمح لي عاد (( اللي ما يعرف الصقر يشويه ))
وأخيراً.. نيســــــان وبس.. والباقي ........!
.
.
أبو فهـــد..

[دسم الشوارب]

يسلم راسك يابوفهد بردت على قلبي
ماتلاحظ ان الحملات المغرضه على النيسان كثيره؟
وان الاعتقاد السائد هو ان النيسان مجرد كمالة عدد وانه كثير الخراب وانه غير عملي بينما هو عكس ذلك تماماً
انا صراحه من عشاق النيسان كنت وما زلت وسأبقى بإذن الله أحبه
وخاصةً الددسن .الوانيت .
لأنه صنع ليبقى

[محب الشمال]

ممكن سؤال للجميع
الاخ فلان ....
لو كنت في البر وشفت لاندكروزر صالون وباترول صالون توهم داخلين البر والطعوس
في نظرك وش تتوقع يتفوق على الثاني ؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟

[كبريت]

الهايلوكس

صراحة سياره عمليه للبر وتتحمل الكد والكرف ويشهد الله اني من يوم ما شريته ما دخلته الوكاله الا مره واحده فقط لني توني شاريه مستعمل وبغيت اتاكد فيه شي موب زين بس

والرجال صبوووووووووووووووووووووووووووووووور

وثاني شي اقتصادي يعني صرفيته فطع غياره

وانا من النوع اللي كل اسبوع في البر والحمدلله ما قد شكيت منه ابد ابد

وشوفو الرجال تحت
7
7
7
7

[الشقردي]

Vxr98

لك وللزمن

[دسم الشوارب]

السلام عليكم يا محب الشمال
ما اقول لك من خلال تجربتي علشان ما اكذب بل من خلال حضوري ومشاهداتي الغير قليله الباترل راح يتفوق
ويا أخ ابومحمد
السلام عليكم والهايلوكس ممتاز ما عليه كلام لكن انت قلت كل اسبوع تروح للبر والموتر جديد ما يمديه يصير له شي
لكن انا سيارتي ددسن 97 مشري على جدته وكل اربع خمس ايام اعذبه تعذيب في البر
والله العظيم ما سبق ووديته للورش بسبب خراب ميكانيكا ولاكهربا الا مره اغير القفل
مع العلم اني ما اغير الزيت الا كل ست سبع آلاف كيلو
وتلومني فيه!

[sultan8861]

انا مع راعي النفود الباث وبس

[أبوغمارة]

نيسااااااااااااااااااااان وبس


اللي يقول نيسان يتفكك يروح يشتري له واحد ويكرفه الين يتفكك ،، لكن أتوقع ان الرجال بيموت ما تفكك النيسان


نيسااااااااااااااااان وبس

[حاكم المقناص]

بانسبة لي ياخوان

مالك الى الله ثم باترول باب واحدمن موديل 2002الى 2006
مممممممتاز جدآ لطعوس ولابغيتة للقنص والبر
خذه موصفات عادية ومراح تندم

[الربذي]

السلام عليكم جميعا (من اول واحد صاحب الموضوع الى اخر واحد بصراحه
جميعكم كلامكم في محله ولاتبعد عن التويوتا بانواعه ونيسان بانواعه اما غير في تمشي وتروح وقويه واخص الامريكي بس لازم يبلشك بالاعطال
وانا ارشح نيسان الفان ورثمان انا ماتكتب الارقام عندي ليش ياناس

[دسم الشوارب]

والله معك حق ياخوي الربذي
غير التويوتا والنيسان لاتدور وبالنسبه للامريكي ماينفع ابد الاكسيارة عائليه ولالها شغل بالكرف
صحيح عشقوها الاولين ايام الستينات لانها كانت عمليه ومتينه حتى مافيها شي يخرب
لانه بودي ومكينه بس . يعني تفتح الكبوت ماتلقى الا مكينه واللي حواليها فاضي ان بغيت ركبت معك ناس في الكبوت
اما الجيل التالي مااااااااش علم يعني لا تعدى الاسفلت هذا بانسبه للـGMCوالفورد
اما الشيفروليه فهذي مخصصه لامريكا واوروبا فقط
يعني ما يستحمل الاجواء الحاره في ديرتك هنا
الدليل على صحة كلامي انك ماتلقاها هنا الا استعمال امريكي
زبدة الكلام اذا كنت راعي بر ابعد عنه وخاصهً خاصةً الشيفروليت
ولك ازكى واعطر تحيه