المساعد الشخصي الرقمي

مشاهدة النسخة كاملة : استفسار


دسم الشوارب
10/12/2005, 09:29 AM
السلام عليكم ورحمة الله وبركاته
يا إخواني يا أهل الخبره واهل التجربه ايش رايكم في ونيت نيسان دفرنسين
جو الصمان
10/12/2005, 09:44 AM
السلام عليكم ورحمة الله وبركاته
جا سؤالك في وقته
انا من الناس الي ما انصح به ابد ابد
من عدة نواحي
الغماره
1-مايمشي خاصة اذا رفعته شوي
وواحد من اخوياي معه واحد وتونا جايين امس من الدهنا مايتعدا 140كم
وهو مركب فرارات واسلاك وبواجي قويه طبعا السرعه قبل وبعد التركيب نفس الشي
الغمارتتين:
مع واحد في حارتنا وطلعت انا وياه كم مره البر نفس الشي خجمه يالله يمشي والمرتبه الخلفيه ضيقه مره

وكانك بتشمع النصيحه كانك صامل على نيسان خذلك شاص نيسان مهوب بعبد سعره عن الددسن
وكانك بتقبل غيره عندك الهايلكس 2005 واشكاله مهوب صاحي وقوي كانك بتاخذ بنزين
وكانك بتاخذ ديزل وانصحك بذالك عندك ايسوزو ديماكس وانا معي واحد والله الددسن امس ما جابه وقوي وزين في الرمل
والراي الاول والاخير لك
وارجو ان اكون افدتك

اخوك :ابوسعد
دسم الشوارب
10/12/2005, 09:51 AM
اشكرك وما قصرت
الكونترولCONTROL
10/12/2005, 10:03 AM
ما ينفع .... اذا لك نية تشري من هالنوعيات لا تعدى (((( ايسوزو )))) يمدحونه اللي شروه كلهم ......
حر اليدين
10/12/2005, 10:47 AM
والله انا معي ددسن 97 دبل والله ماارى فيها شي غمارتين افضل شي في الرمل وامشي عليها 165 مع ان كفراتها كبية عليها
أبو أسامة
10/12/2005, 11:42 AM
السلام عليكم ورحمة الله وبركاته

أخي الكريم صاحب الموضوع : تحية طيبة لك ولجميع الأخوة الكرام ............

أخي الددسن الدفرنسين ...................... خير الكلام ماقل ودل ......... يعني الددسن الدفرنسين سيارة من جد بالبر وبالمدينه ........ وأنتظر ردود الأخوان اللي معهم مثلها ........ مثل الأخ راعي الوانيت وكثير من الأخوان معهم مثلها وكلهم يمدحونها ...........

والسلام عليكم ورحمة الله وبركاته .........
دسم الشوارب
11/12/2005, 02:57 AM
طيب ياللي يمدحه ايش مزاياه؟
وياللي تسبه ايش عذاريبه؟
علماً اني ابيه لي وللزمان
وانا بصراحه مافي قلبي رحمه على المواتر وآخذ اربع خمس شهور ما فتحت الكبوت ولا عايرت الزيت ولا الراديتر ولا حتى لبواجي
ومسك الخطوط عندي ادمان ولا اريحه بالرابع الا على 110كم
يعني جمعية الرفق بالمواتر راح تنشأ بسببي
الطير المهاجر
11/12/2005, 09:58 AM
الموضوع مايحتاج اي كلام زايد
انا ولد خالتي عنده الددسن 99 دفرنسين ومركب له جنوط باترول ومابقى ديرة ماطبها
واذا عن الطعوس نسم الكفرات ومايحتاج حتى تشغل الدبل
انا صراحة جربته سيارة جبارة في البر
وغض النظر عن الهايلكس
اما السوزو فما فيه اي مشكلة الا الوكالة حقته مايمدحونها بس
واذا تبي حقيقة سيارة ماتفتح كبوتها وتدوس عليه مالك الا الددسن
تحياتي
ع.ف.الدرويش
11/12/2005, 10:20 AM
السلام عليكم ورحمة الله وبركاته

واحد من الشباب إشترى ددسن دفرنسين موديله 2004
والآن ماشي فوق الـ 100 ألف وما أذكر إنه عابه بشئ أبد
بالعكس يثني عليه إلى أبعد حد
بدلالة إن واحد من اخوانه قابلته وقال لي إنه ناوي يشتري دفرنسين 2006
ولا أدري إشتراه أو لا..
غير كذا فيه اخ لنا هنا بالمنتديات إسمه حاتم ( الله يرده بالسلامة ) معاه غمارتين 2005 وما شاء الله تبارك الله
يثني عليه وتقدر تسوي بحث بمشاركاته وبتحصل كل شئ
أما الهايلكس فما لي به علم..!
فإن كنت ناوي فتوكل على الله
والله يطعمك خيرها ويكفيك شرها
.
.
أطيب تحية.. أبو فهــد
حر اليدين
12/12/2005, 10:07 AM
دسم الشوارب ههههههههههههه

الظاهر يصلحلك سيارة مصنوعة من حصى الدعوة اخذ وعطا الله يهديك
البر بريرة
12/12/2005, 10:30 AM
الأخ دسم الشوارب

اولأً الله يدسم شواربك بالعافية

ثانياً الددسن ممتاز جداً وعملي وسهل الوصول إلى قطع الغيار و ميكانيكا أسهل حسب مانسمع

ولاكن أنا لا افهم في الميكانيكا :no2: :confused:

ثالثاً رأيي من رأي أخونا كونترول أن الأسوزو قوي وثقيل ويتحمل اكثر من الددسن
رابعاً ورأي شخصي شاور عمرك في الأسوزو
دسم الشوارب
12/12/2005, 02:26 PM
حياك الله ياحر اليدين
المسأله مايبي لها مصنوع من حصى هذا الموتر اللي معي الآن اسوي به سوايا ولا اشتكى وانا اسأل لوكان الدفرنسين مثله ولا لا علماً ان سيارتي الحاليه ددسن غمارتين 97 بدون دبل
وشكراً لمرورك
وياعزيزي البر بربره حياك الله
وشكراً لنصيحتك اللي بجمل
لكن الايسوزو ديزل وانا من اشد الكارهين للديزل والزم ماعلي الفعل ولوكان اقتصادي والديزل ماهقيت يطلع منه
واكرر الشكر لك
nahham
12/12/2005, 02:33 PM
اخي الكريم

انا شخصيا اعتبر اي سياره اربع سلندر ودبل احس انها ضعيفه شوي وتصرف بنزين زياده نتيجة الحمل

لكن قيه ايسوزو سته سلندر غمارتين دبل بنزين

هذي السياره والا بلاش

تحيتي
حر اليدين
13/12/2005, 02:31 PM
ماتختلف بشي اللهم الكارتير اكبر بحيث يحتوي اكثر بنص او اكثر من نص العلبة زيت والجنط 15انش والباقي ددسنك اللي انت خابرها اما من ناحية الجووور والكرف نفسها لكن اهم شي الزيت والما يعني الحرارة والمكينة
والسعر الظاهر انها نفس سعر العايدية لكن انا شاريها من الامارات


تقبل تحياتي الله يدسم شاربك :good2: اخوك حر اليدين
دسم الشوارب
13/12/2005, 02:43 PM
حياك الله يا حراليدين
بس انت ماقلت لي اللي معك كان دبل ولابدون وتمدحه ولاما اعجبك ارجو الافاده لاهنت
وتراني ما شفت توقيعك اللي تقول عنه
تحياااااااتي
حر اليدين
13/12/2005, 06:31 PM
الله يسلمك دسم الشوارب اللي الحين معي من وكالتها دبل اما اللي قبلها ليست دبل ولكن مااخذتن حقها وزود من الكرف

هذي صورتها في الدهنا من جهة خريص
http://alshawi.jeeran.com/dleel113.jpg

وهذي صورتها من قريب ماتفرق شي
http://alshawi.jeeran.com/Image(013).jpg

اما التوقيع المقترح لي

هــــــــنـا (http://alshawi.jeeran.com/CART1.jpg)
طخيمان
13/12/2005, 08:05 PM
هذا الرابط ان شاء الله يبي يفيدك (http://mekshat.com/vb/showthread.php?t=34074) ولك مني التحية.
دسم الشوارب
14/12/2005, 05:31 AM
اشكرك ياحراليدين على تجاوبك وافادتك وتوقيعك الظريف جداً
وانت كذلك يابوالطواري فعلاً استفدت من الرابط وماقصرت
وتقبلو تحيات محبكم دسم الشوارب