ابشركم السالمي جزم بس بلش بالمكينه افزعوله الله يوفقكم

[السالمي]

السلاااااااام عليكم


اخواني الاعزاء تخبروني انا من زمان من المحبين جداً للشروكي وبذات القراند

وجربت موديل 94 سلـ 6 ـندر وفي الحقيقه مايعلا عليه لافي بر ولا في خط

وكان في بالي الشكل الجديد من 99 وفوق لان اللي عندي للشايب

والحمدلله توفر المبلغ لاكن احترت وش اللي اخذ

في الحقيقه الـ 6 سلندر خراباته قليله وعزمه جيد ولايصرف بنزين

وفوق كذا والشي اللي اعتبره مهم فيه

ان الـ 6 سلندر يجي الدبل حقه عادي يعني مايكون الدبل الخفيف مشبوك على طول زي الـ 8 سلندر

واللي يقولون ان مشاكله كثيره وفوق هذا انا اللي سمعته ان دفرنس الشروكي العادي ومكينته وقيره ودبله

يركبن على القراند شروكي الـ 6 سلندر

هذي اعتبرها مميزات له لاكن تغريني مكينة الهيمي 5.7 خصوصا اني متعود على عزم اللومينا

وش رايكم احد جرب الـ 8 سلندر وهل فعلا يصرف بنزين ومشاكل اكثر والا اتوكل على الله وادور

ثاني شي لو ركبت للـ 6 سلندر مراوح كهربائيه مع فلتر هواء هل يزيد عزمه ويصل تقريبا الى عزم الـ 8 سلندر او حوله



وموضووووع اخر بالنسبه للفرق بين السعودي والامريكي

اللي انا جربته سعودي والصراحه اغلب ماهو اغلب الا ثلاثة ارباع اللي في السوق امريكيات

ما ادري هل الفرق شاسع بينهن والا بسيط انا اسمع ان الامريكي مشاكل التبريد فيه كثيره والسعودي افضل

وبعدين من وين تنصحوني اخذ انا في الحقيقه حصلت قراند شروكي 2004 في الكويت بـ 55 الف ريال 6 سلندر

يمكن يصل مع الجمرك الا 60 لاكن عندنا هنا في القيمه هذي ماتحصل ولا 2001 كيف عاد 2004


وهل الامارات افضل والا لا



كثرت عليكم الاسئــــله الصراحه لاكن ابي الفائــده منكم تكفووووون

[الوشاح]

انحش عن الـ8 سرندل تراه عله خراباته واجد وخلك بالسته سرندل :good:
كلامي هذا من تجربة احد المعارف ..

الفرق بين السعودي والامريكي ....... مافيه فرق واضح لاكن الرغبه لسعودي .....

وبعدين شوري عليك لايفوتك الجيب الي بالكويت تراه رخيص بالحيل 2004 بـ60 وين تلقاه؟؟
بالتوفيق ..

[nahham]

مبروك مقدما

الله يعطيك خيره ويكفيك شره

[ابو خطاب]

[QUOTE=السالمي]السلاااااااام عليكم


اخواني الاعزاء تخبروني انا من زمان من المحبين جداً للشروكي وبذات القراند

وجربت موديل 94 سلـ 6 ـندر وفي الحقيقه مايعلا عليه لافي بر ولا في خط

لاكن احترت وش اللي اخذ (1س)؟؟؟؟؟؟؟؟؟؟؟؟
جواب:
انصحك تاخذ القراند شروكي لاريدو 8 سلندر وهو الطراز الذي يمكن فصل دبله خلافا للطراز الافخم وهو اليمتد والذي دائم الدفع الرباعي .
في الحقيقه الـ 6 سلندر خراباته قليله وعزمه جيد ولايصرف بنزين (2س)؟؟؟؟؟؟؟؟؟؟؟؟؟
جواب :قد تستغرب لو اخبرك ان 8 سلندر اقل صرفية ويعود ذلك في القراند شروكي لسببين:الاول هو انخفاض عددورات المحرك بالدقيقة مقارنة بعدد دورات 6 سلندر وهو مايسمى ب RPM ومن المعروف ان المحرك كلما زادت سعته كلما امكن تحقيق عزم عالي على دورات منخفضة, بينما يجب الوصول الى دورات مرتفعة للمحرك 6 سلندر لتحقيق نفس العزم.. والثاني : ارقام تروس القير والدفرنس اكبر في 8 سلندر عنه في 6 سلندر.. يعني على قولتنا (يحن في الخط.. وتلاحظ دورات المكينه عند سرعة 120 اقل من دورات المكينة في 6سلندر.


ان الـ 6 سلندر يجي الدبل حقه عادي يعني مايكون الدبل الخفيف مشبوك على طول زي الـ 8 سلندر

واللي يقولون ان مشاكله كثيره وفوق هذا انا اللي سمعته ان دفرنس الشروكي العادي ومكينته وقيره ودبله

يركبن على القراند شروكي الـ 6 سلندر (3س)؟؟؟؟؟؟؟؟؟؟؟
جواب: تقصد الاريدو...وستجد لاريدو 8 سلندر يمكن فصل الدبل وشبكه... يقولون مشاكله كثيره.. غير صحيح افضل واجود مافي الجيب محركاتهم...اما تركيب القير والدفرنس والدبل....ممكن كلش يركب على كلش بالترهيم على غير سنع ودراسه...اما ان كنت تبحث عن اداء ممتاز وتناسق بين ارقام التروس ....فلكش له رقم.

تغريني مكينة الهيمي 5.7 خصوصا اني متعود على عزم اللومينا (4س)؟؟؟؟؟؟؟؟؟؟
جواب: مكينة الهيمي نزلت في موديل 2005 وما فوق وارد من غير وكيلنا......اما من وكيلنا فقد صرف مخزون موديلات2004 على انها 2005 ونزل الشكل الجديد على انه موديل 2006 ......حسبي الله ونعم الوكيل.
وش رايكم احد جرب الـ 8 سلندر وهل فعلا يصرف بنزين ومشاكل اكثر والا اتوكل على الله وادور (5س)؟؟؟؟؟؟؟
جواب:بامكانك تجربة القراند شروكي لدى الوكيل..... واحذر فلا مجال للمقارنة بالومينا لانك ستجلس خلف محرك خرافي 345 حصان بسيارة خفيفة الوزن مقارنة بعزم المحرك..وقد لا يضاهي هذا الاداء الا الرانج روفر او جيب البورش.

ثاني شي لو ركبت للـ 6 سلندر مراوح كهربائيه مع فلتر هواء هل يزيد عزمه ويصل تقريبا الى عزم الـ 8 سلندر او حوله (5س)؟؟؟؟؟؟؟؟؟؟
جواب:تقصد تزيد الاحصنه...ولكن لان تستطيع زيادة العزم......وهذا التعديل يعطي زيادات نسبيه.....واذا لك رغبه بالترهيم فيه محركات امريكيه سعه 350 معدله بالكامل مع قزوزها..تصل قوتها الى 450 حصان بدلا من 280 حصان للمحرك التقليدي.


وموضووووع اخر بالنسبه للفرق بين السعودي والامريكي (6س)؟؟؟؟؟؟؟؟؟؟؟؟
جواب: باختصار المواصفات الامريكية افضل..ولو سردت لك الفروق لحتجنا الى موضوع اخر مستقل.. وسلملي على هيئة المواصفات والمقاييس.
هل الفرق شاسع بينهن والا بسيط انا اسمع ان الامريكي مشاكل التبريد فيه كثيره والسعودي افضل (7س) ؟؟؟؟؟؟؟؟؟؟
جواب: اذا كان مستورد من ولايات بارده كبر الرديتور.
وبعدين من وين تنصحوني اخذ انا في الحقيقه حصلت قراند شروكي 2004 في الكويت بـ 55 الف ريال 6 سلندر

يمكن يصل مع الجمرك الا 60 لاكن عندنا هنا في القيمه هذي ماتحصل ولا 2001 كيف عاد 2004 (8س) ؟؟؟؟؟

جواب: تراك اصبت الهدف باسعار الكويت ونظافة بعض انواع السيارات عندهم.. وابحث تجد ارخص.. وخاصة مايعرضه البائعون مباشرة بدون صالات عرض او معارض وتجدها متوقفه في الميادين العامة وعليها هاتف صاحبها.
وهل الامارات افضل والا لا (9س)؟؟؟؟؟؟؟؟؟
جواب: شعبيتها في الامارات مثل شعبيتها عندنا......وستجد شعبيتها مرتفعة جدا في عمان والكويت وان بحثت في عمان فبكلف عليك تردلي خبر.خاصة اني لاحظتها بكثره وخاصة للديوان السلطاني في مدينة مسقط.

[السالمي]

ماقصرتم يالربع

وانت يابوخــطاب بالذات ماقصرت

عطيتني معلومه كنت محتار فيها

واللي هي الاريدو

يعني احط في بالي الاريدو سواء 6 او 8 سلندر

شكراً لكم يا اخوان

[salehhd]

السلام عليكم

احد زملائي عندة جراند شروكي 2002 ويمدح في قوة السيارة لاكن
يتعب في قطع الغيار لانه وارد امريكا فالقطع يشتريها من الوكالة ضعف سعر السعودية يعني القما السعودي لو ب200 ريال مثلاُ فالامريكي 400 ريال

ثانياً استهلاك البنزين يقول يصرف وهو كان عندة لاندكروزر موديل 96 ويقول نفس الصرفية

اخيراً الشابا ماقصرو وكفو ووفو

انصحك بالاستخارة وترى من استخار ما خاب