المساعد الشخصي الرقمي

مشاهدة النسخة كاملة : حرارة الأرضيه بالسياره.


أبوفهد7
14/05/2011, 03:29 AM
السلام عليكم جميعاً أعضاء ووزوار...

صباح الخير / مساء الخير كلن وحزته:)

يالربع ابي فزعتكم أنا اداوم خارج ديرتي وكل يو سرداد مرداد بهالخطوط
وعندي مشكله فااقعتن مرارة سبدي وخاصتن وانا راجع للديرتي العزيزه الظهر :(
وبعز الحر وعلى موتري الباترول (ربع _ سلقه) أشكي واعاني من الحراره بأرضية السياره ’ تكرمون ’ الحراره الي تجي من القير والشكمان خاصه وفكرت احط عازل تحت الفرشه وتوكلت على ورحت لمحلات التنجيد و ركبت العازل بس مافاد .
فا تخبرون لي عازل يمنع الحراره لو انه بأي مكان اجيبه واشتغل به انا ولا اي محل اهم شي عااازل قوي وبس.

أنتظر ردودكم وافادتكم يالنشاما.


...
volcano
14/05/2011, 04:40 AM
وعليكم السلام ورحمة الله وبركاته

اخوي تحسس الحرارة ببطن وظهر يدك اذا كانت خفيفة عادية فياريت تراجع الطبيب لن احتمال عندك التهاب الاعصاب الطرفية وهي تخلي الواحد يحس بحرارة في القدم ويعتقد انها من الارضية وصارت مع كذا شخص ..

بالتوفيق
المصباح السحر
14/05/2011, 05:43 AM
هذي المشكلة بسيارات نيسان لان العزل فيها اي كلام

واحس فيها عندي بالكابرس بس مو بالشكل اللي يفقع المراره
(ابو عبدالله)
14/05/2011, 06:35 AM
اخوي شيل دبات الحراره ( التلوث) الي بالاسفل اما بالتفريق او بالقص وتوصيل ماصوره
وان شالله تروح الحراره
سفاري959
14/05/2011, 06:56 AM
هذي المشكلة بسيارات نيسان لان العزل فيها اي كلام

واحس فيها عندي بالكابرس بس مو بالشكل اللي يفقع المراره

راجع معلوماتك الله يجزاك الجنه اكثر من 10 باترولات جت معي ما عمري اشتكيت من حراره في اسفل السياره لو كان العازل في نيسان اي كلام مثل ما تقول كان اشتكت الناس كلها هذا من حاجتين فيه دبه تجي تحت رجول السواق اعزكم الله وفوقها صاجه عازل حديد اذا الموتر مستعمل يمكن مشيوله والي تجي من القير هذي من ربلات القير متأكله وتدخل حراره تأكد من هالحاجتين يا صاحب السياره وان شاء المسأله بسيطه
قرم العيال
14/05/2011, 11:24 AM
انت مركب هدرز !!
باترول 4500
14/05/2011, 01:43 PM
هذا من حاجتين فيه دبه تجي تحت رجول السواق اعزكم الله وفوقها صاجه عازل حديد اذا الموتر مستعمل يمكن مشيوله والي تجي من القير هذي من ربلات القير متأكله وتدخل حراره تأكد من هالحاجتين يا صاحب السياره وان شاء المسأله بسيطه

مثل ماقال اخوي سفاري


انت مركب هدرز !!


انا مركب هدرز ومافيه حراره
((ابوملاك))
14/05/2011, 01:53 PM
طيب ليه ماتركب عازل على الشكمان نفسه

يبيعونها بمحلات الدبابات اللفه بـ 200 الظاهر

يحطونها على هدرز الدباب اللي يصير جنب رجلك بالضبط وتروح الحراره

بس يبيلك مبلغ لانه مو قصير احسب لك كم لفه

يجيك لونه ابيض

ومع الحراره والوقت تحتاج تغيره بس مو علطول

لان كل الحراره عليه
zulfi
14/05/2011, 01:58 PM
لا تامن راعي التنجيد يمكن شغله خرطي شيك عليه مره ثانيه او ادبل العازل..
hamido
14/05/2011, 02:01 PM
اناكان معي ربع وكنت اعاني وركبت دبل عازل من عند الشلال وصار على كيفك
ولا عندي حل ثاني دور صالون وخذ العازل حقه من التشليح وقصه يطبق 100ب
100لان السلقه ماحطو عازل ابد ابد مادري وش يبي يخسرون
أبوفهد7
14/05/2011, 11:04 PM
الله يجزاكم خير .
الغالي ابو عبدالله ممكن توضح أكثر وهل فيه تغيرات غير انخفاض الحراره
أبوفهد7
14/05/2011, 11:07 PM
أخوي سفاري 959
هل تغير ربلات القير مكلفه وهل تحتاج فك للقير؟
وبالنسبه للصاجه بكم احصلها وهل اجدها بمحلات قطع الغيار ولا بالتشاليح بس

الله لا يهينك يابعدي انتظر ردك
أبوفهد7
14/05/2011, 11:11 PM
يابن الاجواد يا hamido (http://www.mekshat.com/vb/member.php?u=71308)
وشو ذا الشلال ووينه هو الي بالرس وعنيزه وكم كلف وش احسن احط الأرضيه فرشه قماش ومعه بلاستك ؟ولا جلد؟
الصاحب الغالي
14/05/2011, 11:22 PM
انصحك
تمر محل الشلال ببريده
انا مركبه وشغله ممتاز وادور لك رقمه وارسله لك
ومده التركيب م3 الى 4 ساعاات
والحراااره انساها
سفاري959
14/05/2011, 11:44 PM
أخوي سفاري 959

هل تغير ربلات القير مكلفه وهل تحتاج فك للقير؟
وبالنسبه للصاجه بكم احصلها وهل اجدها بمحلات قطع الغيار ولا بالتشاليح بس



الله لا يهينك يابعدي انتظر ردك


اخوي ابو فهد شريتهن قبل 5 سنوات من الوكاله بس والله ما اتذكر سعرها بالضبط ولا تحتاج لفك القير لأنها خارجيه تنفك من عند عصا القير والصاجه اتوقع تحصلها بالوكاله وعلى حسب ما سمعت ان سعرها ماهو غالي بس تأكد قبل رح للبنشر وانزل للحفره وطالع المحل الي مكان رجول السائق اعزك الله ومن يقرىء اذا ما فيه صاجه حديد بين الشكمان والبودي فمعناه منها وبالنسبه لربلات القير تراها ما تطلع حراره الا اذا فتحت الشباك وانت ماشي اما الحراره اذا كانت تطلع عندك وانت مقفل الشبابيك معناها مو منها اتمنى اكون افدتك واي استفسار او تبي ورشه زينه اذا كنت بالرياض علمني وابشر وفقك الله
(ابو عبدالله)
15/05/2011, 01:50 AM
ابو فهد
ارسلت لك الرابط علي الخاصه
http://www.assayyarat.com/forums/thread196106.html
أبوفهد7
15/05/2011, 02:51 PM
سفاري 959
عز الله أنك كفيت ووفيت بييض الله وجهك وجزاك الله الف خير.


ابوعبدالله واصل مرسالك يالغالي ويعطيك ربي الف عافي عز الله انك ماقصرت أنت والأخوان جزاكم الله خير
رعب الصحراء
15/05/2011, 03:13 PM
شف يا اخيي الله يبارك لك
خذ لك من عند محلات الموكيت لباد بطول مير واحد أو أكثر اللي تشوفه يكفيك و خذ منه قطيعة موكيت طبعا ً على ذوقك و لزق باتكس الاصلي و لزق اللباد بالموكيت و حطها تحت رجيلاتك و سم بالله و توكل على الباري

صارت عندي نفس المشكلة و الحمد لله خفت كثيييييييييييييييير ( سيارتي وحش الصحراء " باجيرو ")
سفاري959
15/05/2011, 04:37 PM
سفاري 959

عز الله أنك كفيت ووفيت بييض الله وجهك وجزاك الله الف خير.







اخوي ابوفهد ماسوينا غير الواجب كلن اخوان وهذا هو الهدف من وجودنا في هالمنتدى المبارك نخدم بعض ونفزع بالي نقدر عليه واي شي تحتاجه انا بالخدمه اخ عزيز وغالي واان شاء الله تبشرنا عن قريب بزوال هالمشكله تقبل تحياتي
بانتيوم فور
20/05/2011, 04:42 PM
انا نفس مشكلتك غيرت الدبه الي تحت وركت عازل ودبلته حول القير الحمد لله الان الوضع عال العال
Abo gssar
20/05/2011, 11:13 PM
هذا الرابط لاحد الاخوان في رابطة ملاك باترول القديم مسوي حركة حلوة لعزل الحرارة عن الغمارة اكيد بتستفيد منه ................
http://www.mekshat.com/vb/showthread.php?t=378262&page=28 (http://www.mekshat.com/vb/showthread.php?t=378262&page=28)
فيصل السند
21/05/2011, 01:45 AM
الله يوفقك
منصور القريشي
21/05/2011, 02:09 AM
والله ياخوك انا كنت اعاني نفس المشكله وكانت الحراره شوي وتحرق ركبتي << سيقااانه طوااال :D
وكانت تجيني الحراره من عند الدبل ووقفت عند اقرب محل زينه على خط الحجاز وخذيت لي تلبيسه حقت القير
اللي فيها مخابي وحركات وابشرك ماعاد احس بشيء وراس مالها 25 ريال وصلى الله وسلم على نبينا محمد
ومتري سفاري 92 للمعلوميه
تحياتي لسموووووكــ..