وشلون نقدر نخلي عده البر (صغير ومريحه وفعاله )

[كاشت من زمــان]

السلام عليكم ورحمه الله وبركات

الصراحه عجبني المنتدى.. بكل مافيه وقلت لنفسي ... خليني اشارك معكم ممكن فيه اشياء تعرفونها اكثر
مني بخصوص عده البر .. لاكن بقول وش عندي ... وكل واحد يقول وش عنده علشان نتبادل خبرات

وتصير عددتنا حقت البر .. فعاله ومريحه

لان اهم شىء بنسبه لي في عده البر ان تكون صغيره قدر الامكان
ومريحه وفعاله في نفس الوقت..

طبعا اهم شىء والمتعارف عليه في اي عمل هو عده السلامه ( السيفتي )

من المتعارف عليه
لصاق الجروح ... ومرهم الحروق والمطهر وغيره ,,,,

لاكن اللي يهمني كثير ويسوى في وقته الكثير اللي هو نازع .. السم !!!
والصراحه .. انه حصل لواحد من الزملا ء يبي يصيد له حيه والتفت حول نفسهاا وانطلقت عليه
وعظته .. وعلى طول استخدم زميله نازع .. السم .. والصراحه استفادو منها استفاده عظيمه
لان اقرب مستشفى بعيد عنهم .. وقعدو 3 ساعات على بال ماوصلو عند الدكتور ..
واستغرب الدكتور وقال وش سويتو له ... وقالو استخدمنا نازع السم ... قال الدكتور لو ما استخدمتوه
كان .... الرجال .. في خبر كان !!!!

هذا شكل نازع السم اذا حطيته على جلدك يمصه مص الين مايطلع يدك

http://tiger.yousif15.com/wm/mkshat/naz3sem.jpg

الشىء الثاني .. يفضل انك تاخذ معك للاحطياط مظاد حيوي .. لانه فعال في اكثر الامراض
صيح انه لازم ياخذ استشاره الطبيب ... بس الصراحه بعد كل طبيب تروح
لمه ,.. في اي مرض هو اول شىء يكتبه لك ...
اهم شىء مايكون قوي مرره يعني مايكون 500 ملي خذ 250 ملي




نبدا في العده
بنسبه لي عندي شنطه .. وكل مرره اطلع .. استفيد من الطلعه الاخيره
واحاول في كل مرره ان عدتي تكون صغيره قدر الامكان .. وفي نفس الوقت فعاله
مثلا ..

--------------
القدور ..
استخدم قدرين دائما.. قدر فسط قدر وفي القدر الاخير احط اشىء يستغل فيها
المساحه الفاضيه ..
ويفضل ان القدر مدهون من نوع تيفال .. على شان مايلصق الرز في القدر
ويصير سهل التنظيف ولا يحتاج وقت طويل لتنظيف...

( يمكن واحد يقول .. وش هذا الخكري اللي عندا في المنتدى:D )

بس فيه سبب مهم
ما يستهلك مويه في عمليه التغسيل ..... وها الشىء اعتقد انه مهم في البر

---------------------

لي المويه

افضل طريقه بنسبه لتجربتي في استخراج المويه .. (بنسبه اللي ماعنده تانكي ومفصل له بزبوز )

هو استخدام لي المكيف الصحراوي لانه فعلا . اقتصادي مرره للمويه
وتستخدم معه بزبوب صغير زي اللي في الصوره
وتقدر تحط معه مغناطيس على شان تحطه باي مكان في السياره
بطريقه هذي .. لاحد يمسك معك اللي ولاتعطل البشر على شان تغسل !!

وهذي الصوره

http://tiger.yousif15.com/wm/mkshat/leemoaiah.jpg []

[كاشت من زمــان]

هذا شكل العده حقتي .....

http://tiger.yousif15.com/wm/mkshat/9andog.jpg

القدر فسطه قدر .... وفسطه بهارات
وغاز
والقز
وشنطه الشاهي والقهوه على شان لو اطلع طلعه خفيفه
اخذ الشنطه على طول ... بدون العده كلهااا


بس فيه اربع جيوب والمشكله اني ماصورت اللي فيه

الجيب الفوقاني
فيه عدد ع تبسي من نوع ستايل ستيل على شان مايصدي وفيه سفر للاكل
ولي الغاز ... وحبل

والجيب اللي على اليمين
فيه الادوات الاسعافيه مثل المظاد الحيوي ولصقات ومطهر ومعجون للحروق
ونازع السم

والجيب اللي على اليسار
فيه سكاكين حاده وساطور صغير ودرازن فتايل للاتريك وقطع وليف للغسيل
وقفاز طويل ..لتحطيب

الجيب الامامي
اسياخ ... لشوي .. قصدير ,, ملاقيط صغيره وكبيره ..اسيام مطويه ... زراديه ومفك
صابون غسيل ..توصيله لتعبئه الغاز الصغير مع مفكاته ...وقطع غيار بسيطه



وهذا جزء من العده


http://tiger.yousif15.com/wm/mkshat/3edah.jpg

على اليمين قفاز طويل .. لان القفازات القصيره ماتصلح خصوصا اذا دخلت يدك في كومه
حطب واثل .

واللي حق المويه مع البزبوز الصغير والثقاله الخلفيه على شان مايطوي اللي في جالون المويه

ونازع السم .. اللي بالاصفر

التريك وبداخله وخارجه قماش قطني على شان ماينكسر القزازه وجمبه .. الجراب حقه
على شان لو طاح ماينكسر ..

[راعي الجيوب]

الصراحة الموضوع جميل ومبدع ومشكور وماقصرت

على هذا المعلومات المفيدة ونتمنى من المزيد

اخوك:راعي الجيوب

[ab240]

الاخ كاشت من زمــان
السلام عليكم ورحمه الله وبركاته :-
الصراحه اعجبني طرحك لهذا الموضوع والذي اعجبني بكثرة نازع السم :good:
وآمل ان ترشدنا الى مكان بيعه في مدينة الرياض 0
وشكراً

[الأشهـــــب]

الأخ الفاضل:كاشت من زمان
الحقيقة ماقصرت وبيض الله وجهك ياغالي.
الحقيقة ليست كل عزبة عزبة.العزبة يحتاج لها ترتيب و تنظيم.
بالنسبة للأخ ab240 وللذي يسأل عن أداة مص أو سحب السم فهي متواجدة في بعض الصيدليات،كما توجد في أماكن بيع المعدات والمستلزمات الطبية.
مع تمنياتي للجميع بالسلامة................

ولكم خالص تحياتي،،،،،،،،،،،،،،،،،،،،،،

[ab240]

الاخ الأشهـــــب
السلام عليكم ورحمه الله وبركاته :-
مشكور وماقصرت على الرد
ولك خالص تحياتي ،،،

[راعي بر]

الله يعطيك الف عافية

على هذا الموضوع الجميل والصور الممتازة وماشاء الله مشاركات جديدة وجميلة وموفقه انشاء الله .


والف شكر لك

[كاشت من زمــان]

راعي بر

اهليييييين ... واشكرك على المشاركه
والصراحه .. انت نشيط ومعطي للمنتدى نكهه خاصه
وماقصرت ويعطيك العافيه


ab240
اشكرك على مشاركتك .. وبنسبه لسؤالك
ماقصر اخوي الأشهـــــب .. اعطاك الاماكن اللي ممكن
تلقاه فيه .
واتمنى انك بتلقاه انشاء الله
ويعطيك العافيه على المشاركه



الأشهـــــب

صدقت يا خوي .. والله
مهوب كل عزبه عزبه العزبة يحتاج لها ترتيب و تنظيم.
كلامك صحيح .. على شان كذا .. نبغى نتبادل معلومات مفيده بين
الاعضاء ... ونستفيد من بعض مهما كانت صغيره
واللي عنده اي معلومه .. يشارك فيهاا ..
ماقصرت اخوي ويعطيك الف عافيه


راعي الجيوب

هلا باخوي ...
اشكرك جزيل الشكر على المشاركه
وان شاء الله اذا عندي اي معلومه مفيده للعزبه
اباشارك فيه ...
ويعطيك الف عافيه
وشكرا

[كاشت من زمــان]

اتمنى من الاخوان .. المشاركه في اي معلومه ممكن تفيد العزبه
مهما كانت صغيره .. او يحس مهم للاستخدام في البر

وكل واحد يدلو بدلوه ....
على شان نستفيد من بعض

واشكركم ... واشكر القائمين على المنتدى والمشرفين عليهاا
ويعطيكم الف عافيه

[السرحان]

موضوع جميل ومشاركه فعاله ,,,,, تشكر على الطرح ,,,,, وبانتظار المزيد

[الحزين]

الله يعطيك العافيه ,, موضوع مفيد جدا جدا خاصة هاليام ,,,

مشكور وماقصرت على مجهودك الواضح ,, تقبل تحياتي

اخوك ابو محمد

[الواضح]

وعليكم السلام ورحمه الله وبركاته
الأخ الكريم : كاشت من زمان حياك الله
موضوع جميل ومشاركة فعالة وصور ممتازة ، اعجبني في هذا الموضوع نازع السم ، ولكن ألا ترى أن حقيبة الأسعافات الأولية ضرورية في كل سيارة ، وهذا يساعد على أن تبقي عدة البر ( صغير ومريحه وفعاله ) ، الحقيقة ماقصرت وبيض الله وجهك يالغالي .

وتقبل تحياتي

[السمح]

أخي العزيز كاشت من زمان .. هلا بك وإن شاء الله إننا كسبنا عضواً جديداً فاعلا .. فإذا كانت هذه المشاركة الأولى فلنا أن نتخيل بقية المشاركات من قبلك في المستقبل القريب إن شاء الله ..
لا أنكر إعجابي بهذا الموضوع الرائع بروعة كاتبه والمدعم بالصور الواضحة ..
دعني اشارك بالموضوع وأقول أنا معك في أن أدوات البر يجب أن تكون عملية وتلبي متطلبات الكاشت دون مبالغة .. ولكن أتصور أنه لا يجب أن يكون على حساب نقص أشياء أساسية ، فأنت مثلاً لم تتطرق إلى أدوات الشاهي والقهوة بالتفصيل .. ولم تذكر أين تضع كيس الرز مثلاً هل هو داخل العزبة أم خارجها .. هنا إبريق للتفويح لا بد من وجوده في العزبة ..
بالنسبة لي فلدي عدة الطبخ منفصلة عن أدوات الشاهي والقهوة ..
فعدة الطبخ لدي تتكون من قدرين أحدهما قدر كاتم مقاس 10 وهو كما تعلم يكاد يكون ضرورياً لصاحب الرحلات ، وهذا القدر يكون في وسط قدر أكبر منه قليلاً بحيث أضع القدرين في وسط بعضهما وبداخل الكاتم أغراض أخرى مثل الملح والبهارات ومفك الصلصة . .. إلخ من الأشياء الصغيرة .. وبجانب القدور هناك الإبريق الفواح الذي أستخدمه لأني لا أطبخ بالماء البارد ابداً حيث يخرج رغوة بعد الغليان ثم إنه اسرع للطبخ إذا استخدمنا ماء ساخنا أو مغلياً .. ثم يوجد الزيت وبعض السكاكين التي في داخل جراب مع ساطور صغير ..
أما عزبة الشاي والقهوة فهي أصغر من السابقة وتتكون من ابريقين للشاي احدهما يكفي لثلاثة أشخاص والآخر أكبر ويكفي لستة أشخاص .. وهناك ابريق للقهوة ودلة وعلب السكر والشاي والقهوة والهيل وعلبة صغيرة للزعفران وفوق كل ذلك يوجد حقيبة صغيرة تباع في محلات الرحلات تتسع لستة بيالات وفناجيل القهوة وبداخلها ليفة زائدة للقهوة ..
مع الأسف أن الكثير منا يهتم بالحجم على حساب المتطلبات .. ياأخي الكريم هل الواحد منا سوف يحمل العزبة على ظهره ؟؟ :D حتى يضيق على نفسه ولا يحمل كل متطلباته أم أن الجيب سيقول لا لن أحمل هذه الأشياء :D ، فمن رأيي أن تحمل ما تريد ولكن ليس بشكل مبالغ فيه .. فخير الأمور أوسطها ..
لا خلاف أن أدوات السلامة شيء ضروري وفي غاية الأهمية .. ولا على كلامك معقب ما شاء الله ما خليت شي ..

[ذيب البر]

السلام عليكم ورحمة الله وبركاته

حقيقه موضوع رائع ومتعوب عليه ومشكور على المجهود هذا

[الشاص]

والله الصراحه موضوع جميل

والله يعطيك العافيه اخوي :good:

[فتى الوادي]

السلام عليكم ورحمة الله وبركاته
لموضوع جميل جداً .. وخاصة عندما يكون بالصور ...
عندي سؤال للأخ ( كاشت من زمان ) : وين ألقى نازع السم يباع فيه ؟!
والسلام عليكم

[كاشت من زمــان]

السرحان

مشكور يا خوي على المشاركه
وماقصرت



الحزين
صادقت يا خوي الايام هذي مفيده في تبادل المعلومات
ومشكور على المشاركه





الواضح
نعم ... كلامك صحيح
حقيبة الأسعافات الأولية ضرورية في كل سيارة
وخصوصا في الرحلات البرية
مشكور يا خوي على المشاركه
ويعطيك العافيه



السمح
معلومات قيمة ...ومفيده جدا يا خوي
وكلامك صحيح .. ماتطرقت لعده الشاهي والقهوه مع انها موجوده في الصوره دخل الصندوق
لاكن انشاء الله ... المشاركات القادمة اقدر اصور عده القهوه والشاهي ونشرح عنها
اما الرز وباقي الماكولات ..
فهي بنسبه لي .. خارج العزبه.. لاسباب منها
لانها غير ثابته لانها تختلف الكمية و نوعيه الاكل مع اختلاف عدد الاشخاص اللي معك في طلعه البر
وعدد الايام .. اللي يقضيها على شان كذا دائما اضعها خارج العزبه
صحيح ان الرز يعتبر من الثوابت بنسبه لنا ولانقدر نصبر عنها لاكن الكمية لابد ان تختلف على حسب
عدد الاشخاص اللي معك .
بنسبه لادوات السلامه لاحظت الاخوان متفاعلين من هذه الناحيه وهذا شىء ممتاز
وعلى شان كذا انشاء الله مستقبل اشارك في مواضيع تتكلم عن السلامه

الصراحه معلوماتك قيمة ومشاركه وتفاعل .. جدا ممتازه
اشكرك جزيل الشكر ياخوي ..
ويعطيك الف عافيه وما قصرت


ذيب البر

اشكرك على مشاركتك ويعطيك العافيه


الشاص
مشكور وماقصرت على المشاركه
ويعطيك العافيه



فتى الوادي

بنسبه لنازع السم
زي ماقال اخوي الاشهب
متواجدة في بعض الصيدليات،كما توجد في أماكن بيع المعدات والمستلزمات الطبية.
ومعدات المستلزمات الطبية متواجدين في شارع الضباب في مدينه الرياض
واشكرك يا خوي على المشاركه

[فرد حمزة]

جزاك الله خير
بارك الله فيك
صراحه أعجبني كثر نازع السم أول مره أسمع عنه ..:)

[ابو عمر اللاحم]

الاخ كاشت من زمان اشكرك على المعلومات القيمة والمفيدة والحقيقة فكرة اللي والمغنطيس ممتازة جداً وانا معك كل ما كان العفش والاغراض قليله متكامله ومرتبه كان ذلك احسن لأنه يقولون بالمثل العامي (( الزود اخو النقص )) بارك الله فيك ولا تحرمنا من مشاركاتك المميزه .

وتقبل تحياتي ،،،

[العازمي]

اخوي كاشت من زمان (وين كاشت من زمان)ماكشت هالسنة:D
اللة يعطيك ألف عافية على هالمعلومات ألي تصدق باللة أن فية أشياء بسيطة غايبة عن الذهن وقت طلعاتنا للبر. مثل (نازع السم ) أول مرة اسمع عنة ومثل المغناطيس الي يلصق بالهوز المي وتلصقة على السيارة
بدل مايطيح وتضيع المية ..وفية أشياء الحقيقة أستفدنا منها .جزاك اللة كل خير.

[كاشت من زمــان]

فرد حمزة

الشكرك على المشاركه
ويعطيك العافية


نهار
ياهلا باخوي نهار الصراحه انا ووانت وغيرنا من الشباب
نشكر ا لقائمين المنتدى اللي جمعنا وخلانا نتبادل معلومات على شان
يستفيدون الكشاتة من ها المعلومات..
ومشكور ياخوي على المشاركه ويعطيك العافية

العازمي

هههههههههه
انا كاشت من زمان بس مارجعت الى الحين :D
ولو مافيه دوام كان مارجعت :)
صادق يا اخوي العازمي فية اشياء بسيطه ومهمه غايبه عن الذهن
وزين الواحد انه ينتبه منها ويتاكد انه موجوده معه
على سبيل المثال
لي الموية بدال ماتكون كبيره وتسرف موية خصوصا اذا انتهم كثرين
تستخدم لي صغير .. مثل لي المكيفات الصحراوية على شان تقتصد في الموية
ولاتخلص مويتك بسرعه .

اشكرك على المشاركه
ويعطيك العافية

[نقا هشال]

اخوي كاشت من زمــان

بصراحه موضوعك رايق واستفدت منه

مشكووووور

وتقبل تحياتي ,,,,,,

[راعي عنيزة]

مشالله عليك يا كاشت من زمان عزبتك مثاليه وافكارك رهيبه وممتازه ولو نتشارك انا وياك ونفتح محل رحلات عزالله ما وقف سوقنا :)

اعجبتني فكرة لي الماء جدا لكن مدري وين نحصل البزبوز الصغير ؟

ومشكور يا غالي

[ألغيم]

أحمس ثلاث يانديمي على ســــاق ريحه على جمر الغضى يفضح السـوق
وياك والنيه وبالك والاحـــــــــراق واصحا تصير ابحمسة البن مطفـــــوق
الى اصفر لونه ثم بشت بالاعراق صفرا كما الياقوت يطرب لها المـــــوق
وعطت بريح فاخر فاضح فـــــــاق ريحه كما العنبر بالانفاس منشــــــــوق
دقه بنجر يسمعه كل مشتـــــــــاق راع الهوى يطرب الى دق بخفــــــــوق

حقيقه حبيت ابداء بهذه الأبيات وصف لقهوه فنجالها بمية فنجال

وقد وجدة طريقه مريحه وسريعه لمن يهوى عمل القهوه بهذه الطريقه ولو انهاء تخالف عاداة العرب سابقا
حيث محد بيسمع دنة النجر وتقهو لوحدك وخذ راحتك
وهي بدل النجر خذ معك طحانة قهوة وشغلها على محول الكهربه على الولاعه( 140 وات واكثر)
وبكذا تجمع الماضي مع الحاضر
وتسلمون
عاشق مهيله بالطريق القديمه

[الطبيب]

المضاد الحيوي ماهو لازم
لان افظل مضاد حيوي طبيعي هو المره (تلقاها عند العطارين ورخيصه)
فقط نقعها بما او حط قطعه صغيره مع فنجال القهوه وشف النتيجه ولا تنساني من الدعاء


هذا والله اعلم


والسلام ختام

[كاشت من زمــان]

نقا هشال

مشكور يا خوي على المشاركه
ويعطيك العافية


راعي عنيزة
هههههههههههههههههههه
والله فكره مهيب شينه الصراحه انا مفتون في العدة وحركاتها
الى درجه اني لو اروح لصناعية ولا شارع الريل يروح يومي عندهم

وبنسبه للبزبوز الصغير تلقاه
في محلات العدد الكبيرة ..
فيه محل في البديعه اسمه العوشن تلقاه عنده
وفي شارع الريل
وتقدر تركب فيه مغناطيس على شان يلصق في بودي
السيارة
واشكرك على المشاركه
ويعطيك العافية

[علي الشهري]

ما شاء الله عليك يا كاشت من زمان

أفدتنا كثيراً وأمتعتنا كذلك بارك الله فيك.

وأستأذنك في هذه المداخلات:
1-بالنسبة للي الماء فهناك نوع مشهور ومعروف من ليات المكيف اصحراوي وهو الشفاف 100% وهذا حتى وإن كانت صناعته جيدة إلا أنه لا ينفع للرحلات البرية لأنه ييبس بسرعة من الشمس.
والنوع الجيد الذي يدوم طويلاً هو الواضح في صورك المرفقة وهونفس مقاس لي المكيف الصحراوي لكنه متين لوجود الخيوط داخل البلاستيك ويدوم طويلاً.

2- بالنسبة للثقال الذي يثبت اللي داخل التانكي أو جركن الماء فلابد يكون من ستانسيل أو البلاتين المقاوم للصدأ لأن كثيراً من محلات لوازم الرحلات تضع حديد عادي(شريط) أو (وصله) وهذه بالتجربة تصدأ بسرعة وتلوث الماء.

وأكرر شكري لك على امتاعنا بموضوعك المفيد

أسأل الله أن يجزيك خير الجزاء

[عاشق الصقور]

ــ موضوع جميل
ــ و تفصيل بالصور أجمل
ــ ومشكور يا حبيبي
************* أخوك عاشق الصقور *****************

[أيمن]

( لقد تم إضافة هذا الموضوع إلى المواضيع المميزة والشيقة في هذه الخيمة (http://www.mekshat.com/vb/showthread.php?s=&threadid=8691) )
مع الشكر للجميع ،،
http://www.mekshat.com/pix/upload/images/flow12.gif

مشرف الخيمة

[كاشت من زمــان]

ألغيم

اولا
صح السانك

ثانيا
ماشاء الله عليك باين عليك انك كييف قهوه
لانك تطحن القهوه في وقتها مهوب زينا ناخذها مطحونه
وتفقد نكهتها ..
اشكرك على المشاركه وماقصرت


الطبيب

الله يجزاك خير ويطول في عمرك انشاء الله
وماقصرت على ها المعلومه المفيده
وباين عليك طيب على اسمك ..
والطيب طيب بمعلوماتك
وشكرا على ها المعلومه الطيبه


التنهات

هلا باخوي التنهات الصراحه لما اشوف اسمك
يديني ورجولي تقترص ... لان التنهات من احلا الكشتات القريبه وتبرد قلبي
لانه قريبه من الرياض .. خصوصا .. في ايام الدوام اذا ما اقدر اروح بعيد
وبنسبه لتعليقك
باين عليك راعي تكتكه .. عجبني كثير مداخلاتك
ويعجبني الدقه والجوده في اختيارك للعده
وبيني وبينك اشتقت اشوف عدتك
ماقصرت والف شكر على مداخلاتك القيمة


أيمن

مدري من وين ابدا
بس الصراحه مجهوداتك في الخيمة مجهود قيم ومفيد
للغاية ومشاركاتك تشهد بذلك
والصراحه احس بتانيب الضمير لان مشاركاتي قليله
بحكم الظروف ولو عندي وقت ودي اجيب فراشي التنزاني
وانام في خيمه العدد وادوات المقانيص بس علموني كم قطتكم ..
على شان اجيبه معي .

اشكرك جزيل الشكر وما قصرت
واشكر جميع الاخوان القائمين على هذا المنتدى الطيب

[معمرها]

........بسم الله الرحمن الرحيم........



السلام عليكم ورحمة الله وبركاته .............


يعطيك ألف عافيه ومشكور ماقصرت



شكراُ

[المغترب]

أخوي كاشت من زمــان..

بصراحه انا ماطلعت من زمان للبر عشان ضروف صحيه ..

لاكن انشاء الله الربع الجاي ابي اكشت ويبيلي عزبه تبيعني عزيتك ..

الانها ماشاء الله كامله ..

[كاشت من زمــان]

معمرها

وعليكم السلام ورحمه الله وبركاته
ياهلا فيك وبمشاركاتك وماقصرت
ويعطيك العافية


المغترب

ماتشوف شر انشاء الله
والحمد الله على السلامه
والعزبه وصاحب العزبه حلالك
واذا تبي اي استفسار انت امر وانا اطامر
وماقصر وشكر علىالمشاركه

[المغترب]

أخوي كاشت من زمــان..

ردطيب من رجل اطيب ..

ولا هي غريبه منك..

[بركان]

يرفع للفائده.
مع الشكر لكاتب الموضوع الاخ/ كاشت من زمان.

[ابوحازم]

كاشت من زمان الله يعطيك العافية
افكار جميلة ومفيدة
ومشكور وما قصرت

[صدى الهوجاس]

الله يعطيك العافيه بس عندي اسئلة
اولاا...وين القا نازع السم لاني ماتركت محل الا وسالت عنه؟؟؟

[سكّين]

انا ما ادري يمكن ايمن ما شاف هالموضوع :D
مهب تقل يستاهل التميز :confused:

[سرهيد]

السلام عليكم

اشكر صاحب الموضوع على طرح هذ الموضوع الشيق والجميل والذي اعتقد انه يروق للكشاته

المهم انا عني لدي عزبتين عزبة مخصصة للقهوة والشاي وكأنها عزبة الاخ السمح وكانه شايفه معي

حتى سالفة القدر وسط القدر هذي نفس اللي عندي ، والله يا خوفتي انه واحد من ربعي بس وانا مو داري :) امزح

وبخصوص سالفة اللي اشوف الربع حريصين على سالفة الثقالة مع انه مسوي بزبوز في اسفل البرميل وشابك فيه لي وموصلة حتى صدام السيارة ، وسالفة المغناطيس هذه حلوة وانا مسويها بس للاسف المغناطيس ضعيف وما يمسك ، حتى اني فكيت رادو قديم عندي وشلحت منه مغناطيس علشان اقوية ولكن ما زال ضعيف اذا فكيته او ربطته تحرك ما يثبت .

وان كان فيه احد يعرف محل يبيع المغناطيس يتكرم علي ويعلمني وين هو فيه .

تحياتي لكم

http://www.mekshat.com/pix/upload/images26/mk22112_u.jpg

[باثفندر]

http://www.mekshat.com/pix/upload/sign/images/mk41765.gif


يعطيك الف عافية على طرحك الموضوع اللي الكل تفاعل وياه
وارفاقك الصور ,
عندي ملاحظة لاحظتها على نفسي اولا واتوقع باقي الشباب مثلي وهي ان الواحد في بداية الطلعات اغراضة ناقصة واحجامها كبيرة وتدريجياً تزيد الاغراض وتخف الاوزان ,
يمكن الواحد اول مايقدر يشيل اغراض البر الا بونيت او ددسن الحين الخيمة والمعاميل والعزبة كاملة في شنطة الجيب الصغيرة مع الخزان الاقتصادي وباقي الاغراض
والصراحة شكر لكل من ساهم في ذلك من محلات الرحلات واعضاء مكشات اللذين كان لهم دور بارز في الاختراعات المكشاتية.
لنجعل شعارنا ( اكبر طلعة باقل وزن ) هههههههههههههه وشكرا ,,

[ابوعزيزm]

مشكور على العرض الرااائع

صراحة نازع السم جميل بالمرة

ما قصرت . . بارك الله فيك

[خادم الإسلام]

حقيقة موضوع تشكر عليه وخاصة نازع السم :good:

وأما العزبة فالله المستعان والله عند أخوك 5 شنط :confused:

1- للمواعين من قدور وصحون وأباريق الشاي والحليب والقطاعات وقدر الضغط وقدر عاي .



2- السكر والشاهي والملح والبهارات والرز والزيت ..الخ .

3-شنطة الإسعافات الأولية .

4- شنطة قطع الغيار للمعدات البحرية .

5- شنطة خاصة لطلعات الخفافي تخص الشاي والقهوة .

[NuMaS]

يعـطـيـك العافية أخـوي عـلى هـ الموضـوع

وإذا أمكن تعطـيني إسـم نازع السـم بارك الله فيك
أجـارنا وأياك وجميع أخوانـنـا المسـلـمين من كل شـر

تقبل مـروري و تحـياتي

سـبحانك أللهم لا إلـه إلا أنت أسـتغفرك وأتـوب إلـيــك ،،،

[رؤى المستقبل]

ماشالله عليك


بالنسبة لنازع السم فين احصلة


ياليت تدلني بارك الله فيك

[المجمعه]

اخى العزيز تسلم على هالترتيب

بس المشكله الصور ما طلعت

[بدوية نجد]

مشكور على هذه المعلومات المفيدة ..

[خبير البران]

الله يعطيك العافيه

[ونيس البرق]

الاخ كاشت من زمــان
السلام عليكم ورحمه الله وبركاته :-
الصراحه اعجبني طرحك لهذا الموضوع والذي اعجبني بكثرة نازع السم :good:
وآمل ان ترشدنا الى مكان بيعه في مدينة الرياض 0
وشكراً

[haza]

مشكووور والله يعافيك على التصاميم الرائعة

[sul574]

شي جميل ...................

[عاشق الفرعه]

كفيت ووفيت

[رااعي الفزعات]

الســـلام عليكم ورحمه الله وبركاااته
الصراااااحه ماقصررررت وبيض الله وجهك ..
عـــده كامله مكــمله ماشاء الله ..
جـــزااك الله خير ..
دمتـــــم برعايه الله ...
أأأخوووكم رااااعي الفزعااات

[طير الهدادي]

الحقيقه موضوع جميل ولا هنت والي عجبني فيه اكثر نازع السم واضنه يباع بعد في شارع الضباب عند حقين الادوات الطبيه ومستلزماتها وانت وجهك جنوب

[ERIC7]

يا اخزان الموضوع صار له ست سنوات وعدد مشاركات صاحبه 20 ما اتوقع يرد على احد فمافيه داعي رفع المواضيع القديمه جدا