المساعد الشخصي الرقمي

مشاهدة النسخة كاملة : استفسااااار ... بخصوص التخلص من الشحطة في vxr


مروق
16/12/2005, 11:09 AM
السلام عليكم ..


..

من شريت الموتر وانا متضايق من سالفة انه اول مايشتغل , يشتغل مشحوط ( يعني مرتفعه سرعة المكينه ) , مادري هو خلل ولا هذا هوالنظام . الموتر وارد اليحي 2005 , ومن شريته وهو كذا , سوى كان بارد ولاساخن , علما بأنه يدق سلف ذاتيا , مجرد ماتلف المفتاح ,

رجاء اللي لديه معلومات يفيدنا ...!!!
قناص الليل
16/12/2005, 11:44 AM
يا خوي هذا الصوت طبيعي (( موجود في اغلب السيارات الحديثة ))
و تلاحظ انه ضغط المكينة مرتفع شوي اول ما تشغل و بعدين ينخفض (( هذه النقطه لها دور في مسئلة تسخين السياره اوتوماتيكياَ علشان تحتمي و تصير جاهزه للتحرك )) . عكس السيارات الموديلات القديمة لازم تدعس بنزين اول ما تشغلها علشان تعلق و تحتمي ثم تفصلها بدعسه ثانية .

هذا رئيي و تجربتي وضعتها لك و ارجو ان تكون وضحت الروئيا لديك ...
مروق
16/12/2005, 01:43 PM
هلا بقناص الليل

تسلم على الافادة وماقصرت ..
لكن الغريب اني قريت في كتيب الارشادت , التوصيه بعدم رفع سرعه المحرك عند بدء التشغيل , وخصوصا اذا كان الطقس باردااا

عموما اللي مشغلني هو ان الشحطة ماتروح حتى والموتر ساخن , يعني يفترض انه يفصل ذاتيا اذا كان الموتر ساخن , سؤلي تحديدا هل هناك طريقه لاالغاء هذه العمليه وهل من ضرر ؟؟؟

شاكر لك مرورك قناص
al-nashmi
17/12/2005, 12:25 AM
السلام عليكم ورحمة الله وبركاته:

اخونا مرؤ المنقا...


الوضع عندك طبيعي جدآ جدآ ولا تتعرض الموتر بشئ،،، وهذي في الفكسار من موديل 98 الى الان....

طع شوري لا تخلي احد يقرب الموتر ويتعبث فيه...

بالنسبة للمفتاح هذي ميزه جديده موضوعه حمايه للسلف .... فلا تقلق...


وتقبل تحياتي/ النشمي
Mohammad
17/12/2005, 08:39 AM
اذهب للوكاله واذا قالو عادى فهو عادى وانسى ولا توسوس وااعتقد ان هذا شىء عادى بل ان العكس غير عادى!!!
salehhd
17/12/2005, 10:48 AM
اذهب للوكاله واذا قالو عادى فهو عادى وانسى ولا توسوس وااعتقد ان هذا شىء عادى بل ان العكس غير عادى!!!
السلام عليكم

صحيح مالك حل الا الوكالة خاصة ان الموتر جديد وتحت الظمان

مر الوكالة وريح حالك وبالك :good:
مروق
17/12/2005, 12:28 PM
النشمي ...

هلا ورحب .. وكفو يالنشمي على النصيحة , وانشاءلله نبي نطيع شورك

محمد ..

هلا بيك .. راي مبروك وفعلا الوكالة ابخص

صالح ..

حياااك الله وبياك , ومثل ماقلت المرور على الوكالة اسنع


شاكررر للجميع المرور
الكاسر23
17/12/2005, 12:45 PM
أخوي مروق المنجا

انا عندي فيكسار 2003 وفيه الصوت اللي تقول عليه، وهذا طبيعي جدا، فالكلام اللي شرحه أخونا قناص صحيح ولا غبار عليه.
أما ما تفضلت فيه بأن كتالوج السيارة يقول عدم زيادة ضغط البنزين عند التشغيل خصوصا في الاجواء الباردة، فهذا طبيعي في كل السيارات بسبب أن الماكينة وهي باردة يكون الزيت أسفل الماكينة، وعند دوران المحرك يكون الزيت لسا بارد ولسا ما وصل إلى أعلى الماكينة، لذلك يحتاج إلى ضغط بنزين لا يتعدى 2000 دورة في الدقيقة، وعند زيادة دعسة البنزين ليصل الضغط إلى أعلى من 2000 دورة في الدقيقة، فإن ذلك سيتسبب في عطب راس الماكينة والسلندرات وأجزاء أخرى لم يصلها الزيت بسبب احتكاك جدار السلندرات بجدار الماكينة قبل ان يصل الزيت اليها بالكمية الكافية (تصل كمية الزيت إلى هذه الاجزاء بعد أن تسخن السيارة او بالاحرى يسخن الزيت مما يودي الى ارتفاعها الى الجدران العليا من الماكينة).
لذلك اخوي مروق .. روق المانجا ولا تقلق ما دام ضغط الماكينة عند تحمية السيارة لم يتعدى 2000 دورة في الدقيقة وهي مبينة لديك في الطبلون وتقدر تشوفها، اما في حال تعدى ضغط الماكينة 2000 دورة في الدقيقة فيجب عليك عرضها على الوكالة.

ملاحظة:
بقية السيارات أو غالبيتها ينصحون في حال استعجال السائق وحرك السيارة وهي باردة ان لا يتعدى ضغط الماكينة 2000 دورة في الدقيقة للاسباب اللي ذكرتها.

وإن شاء الله افدتك وافدت الجميع
وتقبلوا تحياتي
الشقردي
18/12/2005, 02:03 PM
كلام أخونا النشمي, والكاسر في محله
ومعي vxr98 ونفس الطريقة
مروق
18/12/2005, 10:14 PM
الكاسر

هلا وغلا , شرح وافي وكافي , لاهنت يابعدي



الشقردي

حياااك اخوووي , وماقصرت

شااكر للجميع الافادة ودمتم بخيررر
مزاجي
19/12/2005, 07:43 PM
مساكم الله بالخير

يامروق المنقا انا عندي اخو موترك 2005 وارد اليحي الشحطه اللي تقول يوصل الضغط فيها الي فوق 1000 دوره تقريبا وبعدين تنزل صح ولا لا والسلف يدق الحاله من اول لمسه صح اذا موترك كذا لاتشيل همه واذكر الله ولا توسوس واذا تبي عطيتك رقم صالح اليحي راعي المعرض تراه رجال شروى من عندي ونصوح وخبير جداً بالاند كروزر بشكل عام

والله يعطيك من خيره ويكفيك شره قل آآآمين ومن يسمع
مروق
20/12/2005, 03:43 PM
هلا ورحب بمزاجي ...


صح لسانك والموتر مثل ماذكرت تماما" ....


كما افيد الاخوان اللي تكرمو وطرحو ارائهم , بأنه لايجهلني نظام رفع سرعة السيارة , في حالة انخفاض درجة الحرارة

ولكن المشكلة ان الشحطة موجودة حتى والموتر ساخن , واكرر ساخن , يعني عند كل تشغيلة

وانا ارى انها مالها داعي عند كل تشغيلة , يكفي اذا كان الموتر ساخن

وسلامة الجميع ,,

الله يجزاك خيررر مزاجي , ويباركلك بما اعطاك
القصيم-الرس
21/12/2005, 02:29 PM
الشحطه اللي تقول


والموتر صاخن
لاحظ أنه تروح مباشره
بس مجرد التشغيل وأقعد 5 ثواني وتروح وينزل بعد حق الظغط
لمستواه العادي
مروق
22/12/2005, 10:15 AM
هلا بالرس واهلها ..

كلامك صحيح , وبالفعل تستمر تقريبا 5 ثواني , لكن اخوي انا ارى انها مالها داعي والموتر ساخن , تقريبا كل السيارات الحديثه
يتم فصل المسرع الي " , اذا سخن الموتر ,
والسوأل .. لماذا هذا النوع من الجيوب تستمر فيه الشحطة بكل تشغيله ؟؟؟؟

هلا فيك وحياااك
القصيم-الرس
24/12/2005, 10:19 PM
أنا أقول لأن السيارة
تشتغل بهدف التسخين
يعني السيارة تكون مطفيه ولا تدري عن نفسه
هم تشغله وهي على طول تبي تسخن
عندها تجد نفسها ساخنهويقوم ينزل حق الظغط

وبس
(تقل هرج محشش,,لكن عساك فهمت)
ابوقاسم
09/01/2006, 04:41 PM
الاخ مروق المنجا ...................
والموت ساخن الريس هذا علشان الوسائد الهوائية فهو يعبي في خزان هواء ليكون مستعدا للحوادث لا سمح الله ...........
وهذا موجود في السيارات الحديثة من ال2000 وطالع وتلاحظ الطبلون لمبة مكتوب عليها air bag تطفي بمجرد نزول الريس....
ارجواني افدتك
مروق
16/01/2006, 12:34 PM
القصيم - الرس


هههههههه والله ضحكتني وافدتني , عموما احتمال انها ماتدري انها ساخنه وارد ...

, وشرحك مايفهم الا كذا , يعني حسب ماشرحت , اقول ماتلاحظ اننا كلنا تقل محششين

عموما حياك .


الغضى ..

اسعد الله ايامك , يبدولي ان الامر كما شرحت بارك الله فيك ,

شكراااا للجميع
gx555
16/01/2006, 01:53 PM
السلام عليكم

الصوت اللي تسمعه والله العالم صوت المروحه خاصه في الفكسار واللكزس ولما يخف الكلتش يروح الصوت .

وإذ ماتبي تسمع هالصوت ركب مراوح كهرب .

مثل مراوح جمس او كابرس 2005 .

الريس يرتفع بدون صوت إذا ركبت المراوح وتخف صرفيه البنزين بشكل كبير خاصه في الصيف ويزيد العزم شي

بسيط لان مافيه مروحه تثقل على المكينه .
مروق
19/01/2006, 05:51 PM
هلا ورحب اخوي جي اكس ...

مافهمت بالزبط الطريقة ؟؟

يعني الغي المروحة الاصليه ولاكيف ؟

ايضاء سؤال يسدح نفسه ...

في حالة تركيب مراوح كهرب رايح يشتغل دينمو الكهرب بأستمرار صح !! , وبالتالي تثقل المكينه !!

وايضاء سؤال ثاني سادح نفسه بجنب الاول ..

اما ترى ان المراوح تبرد الاديتر فقط !! ويخرج الهواء ساخن للمكينه , سخونه المرواح والاديتر


<<<<< شكلي نشبه حلق
الكاسر23
21/01/2006, 11:33 PM
أخوي مروق المانجا

تبي نصيحتي لك .. لا تغير شي وخل السيارة على ما هي عليه، واذا المروحة مزعجتك حط سداده في اذنك والا شوف لك حل. ترا صوت المراوح العالي اللي انت تسمعه هو بسبب عدد ريش المروحة واذا حبيت تقلل من الصوت غيرها بمروحة ذات عدد ريش اقل من اللي جاي معها، لكن هذا سيؤثر على درجة تبريد الاديتر والمحرك.
هذا ما لدي واتمنى ان تبقي السيارة على حالها.
أخوك
أبو محمد
مروق
22/01/2006, 01:54 PM
حياك اخوي الكاسر ..


نصيحة طيبه .. والظاهر اني باسويها , عموما كان الموضوع مشغلني من فترة , وعقب كم مشوار طويل على الموتر , تعودنا على الوضع ..

شكر ااا للجميع ..
gx555
24/01/2006, 03:21 PM
السلام عليكم

اسف على التأخر بالرد رحت ساموده بعد المطر ومابغيت اعود.

1- نعم شيل مروحه الوكاله وتحط هذي المروحتين محلها.

2- لا الدينمو مايشتغل على طول يكون فيه حساس على كوع الماء والحراره عندك ثابته .

3- بعدين المروحه خاصه لتبريد الرديتر سواء الكلتش والا الكهرب .

4- انا ما جيت اتكلم وافول سو كذا وكذا انا مركب مراوح كهرب على موتري وعلى اللي قبله .
مروق
25/01/2006, 01:09 PM
هلا اخوي gx ..

حياك وصدقت من راح لسامودة .. غثه طاري الرجعه ..

وماقصرت شرح وافي وكافي .. والمعذرة على الجلافه معك ..

تسلم وماقصرت