مقناص حبارىومكشات جنوب القاعيه وحومة النقيان بالدهنا/12-14/11

[المترو]

السلام عليكم ورحمة الله وبركاته

مساكم الله بالخير جميعا
هذه الله يسلمكم رحله الاربعاء و الخميس والجمعه 12-14/11/1426 الى الدهنا واطراف العرمه من الشرق
طبعا خط رحلة ربعنا اللى جايين من القصيم (القصيم -الزلفي -الارطاويه -القاعيه- ثم الى لغف النفود من الغرب جنوب وشرق قرية القاعيه والدخول الى الدهنا من الغرب)
واخوكم طريق رحلته كالاتي (الرياض- المجمعه- الارطاويه- جنوبا الى القاعيه وكله زفلت) تلبيتاً لرغبة حبيب القلب وخوي الرحله المكشاتي الثاني بالرحله ولد سليمان بيض الله وجهه والا لو علي انا من تمير نزلت قطوع الى النفود لكن ترى بطريق العوده عصر الجمعه وافق مشكوراً على حوالي 26 كلم قطوع من الدهنا الى( قرية الشحمه -مبايض- تمير طريق القصيم السريع )بالاضافه الى الابن ناصر الله يصلحه (استاذنا له يوم الاربعاء من المدرسه )

المهم يا الربع ما ودي اطول عليكم بكثر الهذره
علوم الرحله هدد على حبارى وافلس الطير منها للاسف واخفت بالارض بصعافيق شينه بالحيل غرب حومة النقيان (واخوكم ابو ناصر الحبارى ما بينه وبينها الا 10 متر ونسيت التصوير وعيونه بالسماء ؟؟؟؟؟؟؟؟؟؟؟؟؟
وخويانا المجموعه الثانيه هدوا على خرب ودجاجه وافلسو من الخرب وجاب الله لهم الدجاجه
وسوف ينزل موضوع بصورة اثرة الحبارى بخيمة الصيد بالصقور اخاف يزعلون علينا اهل الخيمه ليش الموضوع ماهو عندهم لكن بما انه لم يتم تصوير الهدد والحبارى صارت رحله هنيا !! هذا وانا ماطولت عليكم !!!

واليكم مقتطفات صور من الرحله

الاولى اول لقاء لنا مع ربعنا غرب النفود (منطقة ابواب) الساعه 12 الظهر يوم الاربعاء



http://www.mekshat.com/pix/upload/images12/mk3016_dhanaone.jpg




الثانيه
صباح الخميس وشروق الشمس على مكان المبيت بالنفود



http://www.mekshat.com/pix/upload/images12/mk3016_dhanatreecamping.jpg








الثالثه بعد مالقينا جرة الحبارى وعملية القص للاثره وقد اجتمع اغلب افراد المجموعتين لمشاهدة الهدد (عطو الطير عين)؟؟؟؟


http://www.mekshat.com/pix/upload/images12/mk3016_dhanatow-step.jpg









الرابعه انواع الزحمه



http://www.mekshat.com/pix/upload/images12/mk3016_crowded.jpg











الخامسه اخرى



http://www.mekshat.com/pix/upload/images12/mk3016_dhanaflowing.jpg










السادسه
غروب شمس يوم الخميس بحومة النقيان


http://www.mekshat.com/pix/upload/images12/mk3016_dhanasunsit.jpg







السابعه
شروق شمس يوم الجمعه وكان طول الليل هبوب هواء قوي جداً وصاحبه خيال وسحب على المنطقه



http://www.mekshat.com/pix/upload/images12/mk3016_dhanafivecamping.jpg



الثامنه
اخر حل لللسافي عند ابو عبدالله
وهو كذلك شاعر الرحله ابو عبدالله بيض الله وجهه وقد غطى وجهه عن العجاج وهذا كان يوم الجمعه يوم مغبر ومعجعج وسافي الله لا يوريك وقد هجاء ابو محمد بقصيده طويله ومنها ((((امس عند الدكاتره ت.......... ))))) نسيت القصيده


http://www.mekshat.com/pix/upload/images12/mk3016_dhanaaboabdullah.jpg










التاسعه
ابو سليمان مجلعد بطريق العوده الى قرية الشحمه وخوينا ابو محمد الذي خاوانا الى الرياض راعي الاملاح والمغص الكلوي؟؟؟


http://www.mekshat.com/pix/upload/images12/mk3016_dhanasixwayback.jpg










العاشره
محطة بمبايض وتحمل اسم عزيز علينا جميعا وهو مكشات الجميع



http://www.mekshat.com/pix/upload/images12/mk3016_dhanasevenmekshattag.jpg


وختاما لكم وافر التحايا وصادق الود يا اهل مكشات الكرام


المترو ابو ناصر

[رسلان]

ماشاء الله تبارك الله ...
عافاكم الله أخي : المترو ...
رحلة جميلة ... وزحمة :) ...
يعوضكم الله بصيد أفضل ....
بورك فيكم ...
وجزيتم خيراً على الموضوع الرررائع ...

[nahham]

ماشاء الله تبارك الله

جمعه طيبه ورحله ممتعه

سلم على افراد الرجله وخاصة ابو سليمان وابو محمد والحمد لله على سلامته

تحيتي

[أبوأحمد98]

الحمد لله على السلامه ((أبوناصر)) والله يجزاك خير أنت و ((أبوسليمان))في طريق الثمامه يوم الجمعه العصر يوم تاشر لي ان الاريل حق الجهاز طايح ((أنا المعاون في الهايلكس 2006 الديزل الغمارتين))

[شويح]

السلام عليكم
الحمد لله على السلامه ورحله ما شاء الله موفقه ويعوضكم الله خير بالجاي
وبأنتضارالصور في خيمة الصقور

وتقبل مني جزيل الشكر

[صفوان]

عليكم السلام ورحمة الله وبركاته

والحمدلله على السلامة

عندي سؤال محيرني لأهل الطيور وكشتاتهم! :rolleyes:

ليه دايم عندهم زحمة!؟ :(

يعني كل رحلة تلقى عدد السيارات فوق 8 والطيور يمكن 10 وعدد النشامى حول 15 :no:

ما أدري هل فيها وناسة اذا كثر العدد :confused:

على العموم.. الله يوفقكم وينور دربكم

صفوان

[سمنان]

السلام عليكم

ما شاء الله تبارك الله يالمترو .. يازين هالطلعات
جمعةٍ طيبة ومباركة

الله يعوضكم باللي راح ...ويرزقنا وياكم باللي جاي

والعج اللي نكد عليكم امس.. نكد علينا بالدهناء .. والشكوى لله

ومشكور على هالتقرير المصور

[أبو فراس]

السلام عليكم ورحمة الله وبركاته

ابو ناصر

حياك الله من زمان ما سمعنا صوت ولا شفنا زول

ولكن الله متعكم برحلتكم وجمعتكم ولو انكم ما صدتوا شي ولكن الجمعة مباركة ان شاء الله

[المترو]

السلام عليكم ورحمة الله وبركاته

هلا بكم جميعا وتسلمون للمرور على الموضوع والتعليق الطيب وهلا بكم جميعا

اخي الكريم رسلان تسلم للمرور
وجمل الله حالك واما زحمه فهي زحمه بالذات عند الهدد لكن رجاجيل شرواك ولحوات غانمه كما يسميها بعض الناس؟
تسلم للمرور
nahham
هلا ابو هشام ومرحبا بك وتسلم للمرور على الموضوع ويبلغ السلام وابشرك ابو سليمان يطري شريت الطير !!!

أبوأحمد98
هلا وغلا ومرحبا بك ولا شكر على واجب ولو دريت انك مكشاتي كان وقفتك بالقوه عشان تصلح الانتل ونسلم عليك ونتعرف بالوجيه الطيبه
لكن سؤالي هو كيف عرفت انه انا اللي امس ؟؟؟؟؟؟؟؟؟؟


شويح
هلا بك ومرحبا وتسلم للمرور لكن الصور يا خوك للهدد ماهي موجوده اما الاثره ان شالله انزلها
والله انها ما تجمل معكم بخيمة الصقور لكن الجود من الماجود يا خلفهم

صفوان هلا وغلا ومرحبا بك
وتسلم يا غالي

وموضوع الزحمه عند الهدد دائما اهل المقناص يكثرون السيارات وتلقى كل سياره فيها واحد فقط بدون راكب ليش اقولك
عشان كل ما كثرت السيارات غطت منطقه كبيره من قص الاثر ومسح المنطقه

وثانيا الوناسه دامك بالبر فأنت مستانس لو انك لحالك

للعلم هالسيارات اللي تشوف تجتمع فقط عند الهدد اما باقي الوقت كل واحد بجهه مثلا تجد 12 سياره عباره عن 3 مجموعات كل مجموعه 4 سيارات لهم عزبتهم وشغلهم منفصل ومراحهم وسمرتهم منفصله عن الاخرين ولو كانو يعرفون بعضهم وربع مثل حالتنا بالرحله هاذي لكن منفصلين بالمراح والتكيه
عسى فهمت السبب هالحين


هلا اخوي سمنان ومرحبا
والحمدلله على الامر والعجاج فعلا نكد لكن حنا طلعنا من النفود الى الحجره والقرشع وخف السافي ولو انا ما قنصنا الجمعه لكن يومين يكفي وبعض الربع مازالو هناك الى يوم الثلاثا ء القادم

وتسلم ياغالي

ابو فراس
هلا بالعمده ومرحبا بك وقريبين منكم ياعمدة مكشات وتسلم للمرور والصيد اللي عند خويانا عندنا بالخررررج
والله يمتعك بالصحه والعافيه ونشوفك ان شالله عما قريب
ولك وافر التحايا

والسلام

[عاشق هدوء]

رحله ممتعه حتى حنا استمتعنا بها وحنا مارحنا شكرا اخونا المترو على النقل والوصف الرائع

[أبوأحمد98]

هلا والله بأبوناصر ..الله يجزاك خير ويسلمك ..والله عرفتك من موترك الله يخليه لك وعرفت وجهك الصبوووح الجميل ...والولد ناصر على باب يمين الله يخليه لك ويصلحه

[صقر]

ماشاء الله عليك يالمترو ... صاير كوكتيل مكشاتي ... مرة رحال ومرة صقار ومرة صياد سمك .. هههههههه

بس والله رحلاتك كلها متعة وخفة دم .... وتعلقيك على الرحلة جعلني أعيش أجواء الرحلة .

ننتظر منك الجزء الخاص بالهدد اللي صدتوا وفقكم الله..

وبارك الله فيك.

[نقا هشال]

ابو ناصر

هلا ومسهلا

ويعطيك الف عافيه

صور رائعه

وعلوم سنعه

كل الشكر لك

تقبل تحيتي

[المشراق]

السلام عليكم ورحمة الله وبركاته

الأخ أبو ناصر مريت على الموضوع وكان مرور كله وناسة والله يهنيك بكل رحلاتك وربعك ويخليلك ناصر وكل من تحب0

[العزوم]

رحله موفقه يابوناصر
مقناص x مكشات
عشنا اجواء الرحله معك من تعليقك على الصور
تسلم وماقصرت

[مهراس]

السلام عليكم ورحمة الله وبركاته:

الأخ المترو:

الحمد لله اللي سخر لنا هذا الكم من الاتصالات وخاصة الصور المرسله بالنت علشان نشوفكم في رحلاتكم وكأننا معاكم والمتوجه بالتعليق والايضاح حول الصور الممتعه واللتي اعطت الموضوع نكهه غير شكل، الحمد لله على السلامه انت واللي معكم الرفقه الطيبه واللحى الغانمه، عسانا دوم نشوف جديد رحلاتكم ومغامراتكم، وصورة محل مكشات صراحه ظريفه بالحيل، عسى بس عنده تخفيض خاص لأعضاء مكشات. تحياتي والى لقاء.

أبو فهد

[رحال الخبر]

ابو ناصر
السلام عليكم ورحمة الله وبركاته
والله الساعة المباركة لو شفناك كنا حولكم لكننا كشاته ومرينا التنهاة ومحارق والشوكي وطبينا الشعبة ومبايض ولكن مالله كتب اننا نتشاوف .
ورحلة هنية ولو ماكتب الله صيد وفير (عشرين سيارة على حباريتين ..)
الله يعوض بغيرها ونصيدكم ونتشرف بلقاكم .
وتقبل تحياتي والسلام

[شايب الصمان]

هلا أبوناصر وولد سليمان

رحله موفقه والجايات أكثر بأذن الله .

[سلطان الوايلي]

(( يعطيك العافية اخوي أبو ناصر ))

صور وتعليقات تخلي الواحد http://www.asmilies.com/smiliespic/happy/011.gif (http://www.asmilies.com)

وهذا عن العين الي صابت طيرك http://www.asmilies.com/smiliespic/crazy/018.gif (http://www.asmilies.com)

,,,,, ألف شكر ,,,,,

[ابوذيب]

ماشاء الله يابو ناصر الحمد لله عللى السلامه
خوش شرح موثق ،، بس تراني بجنبكم وماعرفة اي سياره ويوم هديتوا على الخرب انا سيارتي فوق النقا معي الدربيل ويم ان طيركم عود عقب تلويحم له واجتمع عنده 3 سيارات اول وبعدين يوم تبرقعونه انا اخذت شيهانتي الحديديه ورحت بساقة الخرب ولحقته على نزلته بروض الحمض و وبرقم واحد شوزنته الا ريشه مثل ريش الهمرات بالرمادي
وذليت انكم تشوفوني وانحشت من الموقع كله ،ن وبالماريه نداي بالرادو صقار خندريس وراسلتكم ،، عموما اوريك صوركم بعدين


تحياتي يالمترو لك ولابو سليمان الي ظبط مرقة الحبارى

[ولد سليمان]

السلام عليكم ورحمة الله وبركاته

تسلم يابوناصر على التقرير والله ياجلسه مع اهل الطيور تنشرا بغالي الاثمان ورفقه معك لها طعم غير .
والمره الثانيه اباخذ معي الشوزن علشان اذا مرت من فوق راسي مثل هالمره صكيتها بفشقه وخليناهم يضحون ويريحون مواترهم من المنابط من فوق السيوف وقت الطرد .هذا وانا بعيد عنهم بغيت اروح فيها .

ليت يابوناصر ان الكميرا معي كان صورت ال15 سياره الي هجمت بوقت واحد وجت باتجاهي مدري وين انحاش منهم ماشاء الله تسنهم في بدايه انطلاقه للراليات الله لايضرهم .

اخوي نهام الله يسلمك وياعلك دوم سالم وغانم . ولاتصدق ابو ناصر تراي انا والصقور مثل الخطين المتوازيين لايمكن ان يلتقيا ولكن جلسه مع اهل الصقور ماتنتفوت

شايب الصمان ترانا نحتري الجايات ولازم نشوفك
اخوي ابو ذيب الحين عرفت ليش طيور الربع افلست بعضها والسبب كله من برج الجوال الي فوق موترك وقاعد ترسل موجات تشويش على الارايل الي موجوده على ظهور الصقور الين جبت لها الخبال.

[كشات]

http://www.geocities.com/hraaar_1/1100218787_starting_word.gif

تسلم يابو ناصر على هالصور والتعليق اللي تخلي الواحد تقل كاشت معكم

والله يعوضكم خير بالجايات

والقصد الوناسه وتوسيع الصدر لو مابه الا سواة ولد سليمان تكفي


سلم لي على ابو فيصل