أســـعار الكفرات الآن تحتاج الى بورصة !! (شوفو بكم حصلتها بالغرابي) [الأرشيف]

ابوريناد1979

25/05/2011, 12:13 PM

الســــــــــلام عليكم
ما دعاني الى ان اكتب بهذا الموضوع هي الأسعار اللي وصلت لها الكفرات الحين :f ، واللي لم اجد لها مبرر لحد الآن سوى ازمة اليابان اللي يرددونها اصحاب المحلات.
قبل سنتين وصل سعر برميل النفط الى 150 دولار ولم تصل اسعار الكفرات الى ماوصلت اليه اليوم ، حيث ان النفط هي الماده الخام الاساسية لصنع الكفرات واللي تتدخل بشكل مباشر فيها.

طبعا انا معي فورنتشر وكفراتي لك عليها شوي وراح عليها سنتين قلت خلني اروح الغرابي اغيرها يمكن اسافر بعد اسبوعين
مالكم بالطويله كفري مقاسه 270/70R16 واول مادخلت المحل سألته عن حق الوكاله كم سعره قالي اليوم ب 750 (طبعا جتني شهقه شوي) :eek: قلت هانكوك طيب قال مافيه مقطوع من السوق قلت مارشال قال مافيه قلت ارخص شي قال صيني ب 480 ، وجع وجع وبعد المناقشات حصلت انسب شي دنلوب ب 550 بس انه اعرض شوي ، والمشكله اخاف يطيح عزم الموتر خصوصا انه 4 سلندر قلت بيصير ثقيل عليه الكفر .
ومريت كذا محل نفس الموال
اخر شي رجع للسياره وطلعت كرتون مناديل ونفخت عالكفر ومسحته بالمنديل قلت الله يطول بعمرك لين الله يفرجها بالسوق يمكن تنحل هالازمه .
ومن اليوم وطالع ان شالله مااتعدى سرعه 100 ولانيب ماشي الا بالليل :D عشان تصبرني كفراتي ههههههههه

اقتراحي لها المنتدى المبارك انهم يفتحون موضوع خاص بأسعار الكفرات وكل واحد يكتب بكم حصله (موب لازم يكتب وين محصله اهم شي السعر عشان ماتكون دعايه لمحل معين وومكن برضوا نفس المحل يرفع السعر لازاد الطلب عليه)
والله يفرج علينا وعلى المسلمين اجمعين

ابوصالح77

25/05/2011, 12:58 PM

إقتراح في محله
ووجهة نظري إنه يذكر اسم المحل ومكانه
لأنه زايد زايد
ماهي عاقيه ما دام جاره رافع السعر
و وزارة .......... أخخخخخ خخخخخششش

قرم العيال

25/05/2011, 01:04 PM

العماله اليمانيه رافعه الاسعار وبشكل جنوني .. وش قال لي ذاك اليوم

يجي زبون غيرك يشري بالسعر الي نبي

السومر

25/05/2011, 01:12 PM

الله يعين

اقولك المستثمرين الصغار يا حليلهم لا سمعوا ان الشعير ارتفع سعره

مدري وش دخلهم لدرجة حتى الحلاق يغلى موسه

بيني وبينك حلو توقيعك الامر بالمعروف والنهي عن المنكر

لكن لو كان من دون شعار

مسير عليهم

25/05/2011, 01:25 PM

انا لي شهر وكل كم يوم اطب الغرابي يقالك كود تغيرت الاسعار ونزلت

بالنسبه لي موتري جنطه 17 ولقيت ارخص شي كفرات بالون بـ450 ريال ولا تصلح لي

لقيت يوكوهاما مقاس 17- 265/70 بـ 650 عند محل نسيت اسمه وهو ارخص واحد

الاتصال السريع

25/05/2011, 01:44 PM

الله يعينا ياخي الكريم على هذه الاسعار
وانا صبرت مثلك حتى انتهت الكفرات وقامت السيارة تحذف وترج واقول لعلها ترخص ، وبالنهاية اكتشف اني احارب من هو اقوى مني ومهما قاطعت فلن يتضرر ، واخيرا قررت شراء اربع كفرات بريجستون بمبغ 590 ريال للكفر الواحد واخذت احسن القديمة استبنه

القناص-sniper

25/05/2011, 02:00 PM

والله ياهلكفرات سوتلي ازمه
ادور على كفرات لسيارتي الصغيره وابي نوع تويو ولفيت لف كل الموجود في المحلات من دفعة 2010 من اول الاسابيع واسعارها غاااااااااليه قلت نصبر لين تجي 2011 افضل وشكلنا بنبطي

على العموم اخوي اقتراحك في محله وانا اضم صوتي لصوتك وان شاء الله المشرفين والأخوان يخصصون خيمة للكفارات واسعارها وانواعها

تحياتي لك

مدمن فتك

25/05/2011, 02:33 PM

اذكر مريت الغرابي كله قبل شهر وادور هانكوك 17 /275/75
وبعد جهد جهيد حصلته والاسعار طايره عن العام بفرق 100 وزياده

فارس الحربي1

25/05/2011, 02:45 PM

ماقول الا الله يعين

900

25/05/2011, 02:57 PM

العماله اليمانيه رافعه الاسعار وبشكل جنوني .. وش قال لي ذاك اليوم

يجي زبون غيرك يشري بالسعر الي نبي

هلا بك اخوي

لاتعمم الله يرحم والديك
في كل جنس الصالح والطالح

ونصيحة لكل من اراد ان يشتري كفرات

الشراء من الوكيل مباشرة
والتركيب في اي محل مع الترصيص الطقم مع غيار البلوف بحدود 40 ريال
اولا ضمان افضل الاسعار
ثانيا ضمان ان المنتج جديد
ثالثا ضمان الوكيل مباشرة

والحمد لله عن نفسي من سنين ما اشتري الا من الوكالة مباشرة

متوسد جحه

25/05/2011, 03:05 PM

وعليكم السلام ورحمة الله وبركاته

موضوع رائع واول مشاركة لي في المنتدى الغني عن الوصف

بالنسبة لموضوع الكفرات فعلا الكفرات الواحد الحين يحسب لها حساب مو مثل اول

سبق شريت فايرستون ياباني من الوكيل 218 ريال للكفر الواحد قبل سنيتن ونص حلوه وهادي بس عيبها تزلق بالطريق اذا ضربت فرامل فجاة وتنحرف عليك السياره شوي

ضرب علي كفر خلفي على سرعه 160 والحمد الله ما دريت عنها ولاانحرفت ومستغرب ليه ما نحرفت ههههههه

امس رحت لبرجستون الوكيل على طريق خريص حصلت البرجستون الياباني اللي تحمل سرعة 190 بسعر 342 واللي تحمل سرعة اكثر بسعر 371 ريال

والبرجستون الاندونيسي 281 من واقع تجربة جدا ممتازه بس عيبها لها سرعه محدده 190

والبرجستون التيلاندي 275 بس مو متوفر حالياً

طبعا اتكلم عن كفر مقاس 14

وافكر حاليا في البرجستون لانها بنظري افضل الموجود بستخدمها على الطرقات فقط

نصيحة : ابتعد عن البطحاء شارع الغرابي لانه الغالبيه منهم نصابين وبعض الكفرات تجي من الامارات وتعال انصب على العالم

هذا ماعندي ووجهة نظري وبالتوفيق للجميع

وننتظر المزيد من نصائحكم

سدير سديرك

25/05/2011, 03:45 PM

ياناس ياعالم ذبحونى اليمنيه مع احترامي الشديد لهم اقسم بالله طفرو فينا اسعار دبل الدبل وكل واحد حاط السعر اللي يبي من راسه

شوفولنا حل مع ابو يمن

شكلي ابي اقاطعهم << هههههههههههههههه

النبع الصافي

25/05/2011, 03:49 PM

الأمانة

مدري وشلون بعض الناس يتحمل يلعب بها

hamido

25/05/2011, 04:00 PM

طيب هل الاسعار برا مقاربه لاسعارنا ولا حنا بس الي غادين تقول نفره كل يوم تزود

خليفان

25/05/2011, 05:58 PM

عليكم بالوكيل

الشهابة

25/05/2011, 06:43 PM

تبون النصيحه ابعدوا عن الغرابي بالبطحاء في الرياض و شارع النخيل بالنسيم بالرياض و محلات مخرج 14 في الربوة و المحلات اللي عند صناعية أم الحمام و بتفتكون من النصب و رفع الأسعار ..

الأسبوع اللي راح لفيت محلات الكفرات في الغرابي و شارع النخيل في النسيم و محلات مخرج 14 و المحلات اللي عند صناعية أم الحمام كلها محل .. محل ادور كفرات مقاس 275 / 65 / 17 اي نوع .. إن شاء الله لو حتى صناعة بنجلادش و مالقيت بسعر معقول ..

و كانت الأسعار :
1 . دنلوب ( شد بلد ) ياباني 275 / 65 / 17 تاريخ 2010 سعر الكفر الواحد 650 ريال
2 . بريجستون ياباني 275 / 65 / 17 تاريخ 2010 سعر الكفر الواحد 670 ريال
3 . ميشلان تايلندي 275 / 65 / 17 تاريخ 2010 سعر الكفر الواحد 680 ريال
4 . هانكوك كوري 275 / 65 / 17 تاريخ 2010 سعر الكفر الواحد 600 ريال
5 . فايرستون امريكي 275 / 65 / 17 تاريخ 2010 سعر الكفر الواحد 600 ريال

بعد الأسعار هذي صابني اليأس و الإحباط و خصوصاً إني محتاج ( 6 ) كفرات .. لأن السيارة اسبيرين و كانت الكفرات اللي عليها بالون و ابغير الطقم كامل عشان الصيف و افتك ..

و يوم الأربعاء من الأسبوع الماضي كنت رايح مشوار جهة حي المرسلات و حي المصيف و القى محل كفرات صغير .. قلت ابسأله بس استفسار .. قال عندي يوكوهاما ياباني 275 / 65 / 17 مقاس شد البلد بتاريخ 2010 بـ 580 ريال ؟؟!!!

قلت وينك يا ابن الناس من زمان دبر لي 6 كفرات و ركبها بسرعه و فكنا من اليمنيين لعبوا علينا و لعبوا في حسبتنا كل يوم يزيدون اسعار الزيوت و الكفرات و البطاريات و كان اللي يشتغل في المحل هندي .. و ركبتها و شكرت ربي .. مع العلم إني اول مره في حياتي اجرب اليوكوهاما بس نقول إن شاء الله خير .. بالتوفيق

محمد56

25/05/2011, 09:45 PM

اللى يرتفع عندنا مششششششششششششش خشتك ينزل

الله يعدلها

بـدر

26/05/2011, 05:14 AM

انا معك 100% في الاقتراح

ليه ما يكون هناك بورصة هنا في مكشات وتشهير باسماء المحلات التي ترفع الاسعار وذكر المحلات اللي تبيع باسعار منافسة

واقتراحي ليه ما يكون هنا زي المرجع لجميع قطع الغيار الاستهلاكية
مثلاً البطاريات انواعها واسعاراها واقل المحلات اسعار بكل منطقة
الكفرات نفس الشئ
والقطع الاخرى

يكون هناك قسم خاص ويكون عليه مشرفين والاسعار تحدث كل فترة شهر ولا اقل والاخوان مهوب مقصرين ان شاء الله

وبعدين ولو صارت دعاية للمحلات اللي يتقون الله في تجاراتهم ولا يبالغون في الاسعار فذلك اقل تقدير منا لهم

والله الموفق

sameer_1798

26/05/2011, 12:37 PM

ياولد ماحولك احد الاسعار كل يوم تزيد وماعمرها نزلت اللي بيشتري يلحق نفسه ويشتري الآن
التجار يرفعون الاسعار قبل نظام مكافحة الفساد عشان تكون الاسعار على السعر الجديد ..... وياقلب لاتحزن

أحد الامثله :
كفرات الجيبوب الدنلوب 275/70 16 كانت اسعارها قبل 5 سنوات 370 ريال وابتدأت اسعارها بالارتفاع التدريجي حتى وصلت الاسبوع الماضي إلى 550 ريال .

mifleh

26/05/2011, 01:43 PM

بارك الله فيك اخي الكريم

بحر يتلاطم

26/05/2011, 01:54 PM

والله العظيم ان الغلى عند اليمانيه سعرهم غير عن جميع الجنسيات الزيت سوبر جيتي الماني
16ريال وعند الهنود 13 واذا قلت له قال الزيت حقه ماهو اصلي وهوفوكس الاصلي وشف وسعر عند غيرهم وتشوف الفرق لكن الله يعين

ايقاع المطر

26/05/2011, 01:54 PM

265 65 17
قبل 3 شهور تصدق غيرنا يوكوهاما ب480 في كيلو 2 بجده
والاسعار للبرجيستون والدنلوب ماتفرق 20او30 ريال
الشكوى لله

YUKON_GMC

26/05/2011, 02:47 PM

اقتراح حلو .. واللي يضع اسعار ياليت يحط .. مقاس الكفرات

والدنيا كل يوم بغلا من كم سنه على هالموال والله يرحم الحال حتى المستعمل ممنوع

مرفا

26/05/2011, 02:57 PM

اما الزيوت فيه سعودي اسمه الشيخ عبدالاله المروان يبيعها في حراج بن قاسم وسعره ممتاز جدا انا شريت منه كرتون قبل كم سنه وكان سعره يباع برا 13 ريال تقريبا وخذيته من عنده 8.50 ريال فرق كبير تقريبا 4.50 او 5 في العلبه الوحده
تلقونه في الهناجر بعد حقين الاتصالات من جههة الجنوب محله داخل في الحارة شوي

ملك الفكتوريا

26/05/2011, 03:00 PM

أنا مغير كفرات صينيه للفكتوريا الواحد بـ180 ريال وكلها 540 ريال هههههههههههههه

وبصراحه ممتاز ومراعي انه يتحمل الحراراه العاليه ويتحمل 200 كم وانا ما اتعدى 140

وبعدين الحمد لله الفورد واطي وااذا ضرب كفر لا قدر الله احكم الطاره وابعد عن الفرامل وثقل الفورد ما بيقصر

خليفان

26/05/2011, 03:39 PM

ياناس انتبهو من الغش
الحين الغش بكل شيء من الكفرات الى الزيوت وقطع الغيار
الكفرات تغش بتغيير الدعسه في مصانع بدبي
الزيت وخاصة الزيوت المختلقه مثل موبيل ون يقومون بتعبئة زيوت رخيصه بعلبة زيوت غاليه وهذا ماحصل معي قمت بشراء كرتون ارخص من الاصلي ب 100 ريال واستغربت السعر وذهبت للوكيل وكشف عليه وقالي مغشوش قلت ابي تأكيد على كلامك واعطاني ورقه مختومه وذهبت للبلدية وقدمت شكوى وطالت المده واخيرا غرم المحل وتم تقفيله والثانيه قمت بشراء فلتر كابرس 2007 من محل وانا اعرف قيمته الاصلي وشكله واعطاني مغشوش بكرتون اصلي وعرفت اللعبه وطلبت فاتورة واعطاني فاتورة وكنت موثق العمليه بتصوير فديو بالجوال بدون مايحس الهندي
طبعا التصوير بالفديو تلافيا لشكوى الزيت لانه حاول يقلبها الي شكوى كيديه والحمدلله تم تغريم حل قطع الغيار وتقفيله 10 ايام
بعدها صرت ما اخذ اغراضي الا من وكيل السلعه حتي لو ارتفع شيء قليل

تأبط خيراً

26/05/2011, 04:07 PM

والله انا قبل كم شهر غيرت كفرات الجمس ولقيت تفاوت كبير في الأسواق
ونفس الماركة وإذا سألت ليس قال هذيك ماهي أصلية مع إنه مافيه شي يميز إنها أصلية أو ماهي أصلية لأنه \الوكيل نفسه ماقدر يجاوب عن الفرق إلا بالكلام وهذي والله مشكلة كبيرة

أبو هاجوس2000

26/05/2011, 08:33 PM

فعلا اسعار الكفرات تزود بواقع كل شهر . واذا سالت صاحب المحل يقول مكسبي ما يتجاوز 10 - 15 ريال . وانا ما ني مصدق ها الكلام . بس للأسف وين مكافحة الغش التجاري عنهم . ناس يلعبون على كيفهم . والله المستعان ..

رامي ع الموت

26/05/2011, 11:33 PM

هذي 5 كفرات هانكوك بالون جديدة6 غاط بـ1012 الف واثني عشرة ريالا فقط بس الشحن كم بيكلف !!؟
لو قدرنا نجيب كفراتنا من برا لابد ما يطيح السعر في الداخل
http://up.ql00p.com/files/ogmt228mls9dh9uhgr8u.png (http://up.ql00p.com/)
على العموم سمعت بانه يوجد بعض الشركات لشحن البضائع الكبيرة باسعار معقولة وبابحث عنها ان شاء الله

((ابوملاك))

27/05/2011, 01:55 AM

يعتمد على وزنهن الكلي
الرد هذا منقول تفضل

مده وصول الشحن 4 الي 5 ايام من تاريخ اعطاهم لك رقم التتبع توصل لك في السعوديه ولاحظ ان السبت والاحد عندهم اجازة فاحتمال اذا وصلت لهم بكرة ممكن يتم شحنها لك من يوم الاثنين
كل الشحنات الدوليه تكون شحن سريع اكسبرس
السعر اول نصف كيلو ب 73 ريال واذا زاد عن النصف الكيلو يحسبون علي كل نصف اخر 35 ريال ولاحظ اذا حجم الكرتون كبير راح يحسبون لك الوزن كالتالي بضرب الطول في العرض في الارتفاع واذاوصل لك في الدي اتش ال افتح حسابك في الموقع وراح تشوف كم السعر ... ولو تبغا نصيحتي اشترك مع ارمكس افضل واحسن وارخص في الشحن لان انا عندي اشتراك مع الدي اتش ال واحسن ماعندهم السرعه حيث ان الطرد ياخذ 4 ايام ويوصل عندي في السعوديه ونظاام الملاحه والتتبع عندهم جدا ممتاز بس اسعارهم غاليه وخصوصا اذا الكرتون كبير انا مرة اشتريت سلعه وزنها نصف كيلو والتاجر حطها بكرتون كبير والدي اتش ال حسبها بوزن 3 كيلو ودفعت شحن 3 اضعاف بسبب حجم الكرتون وبعدها بطلت اشحن اي شي معاهم هذا عيبهم الوحيد فقط وكذلك يحسبون عليك جمرك ... واي استفسار انا حاضر ....وتقبل تحياتي

هذا اذا مشترك في ايزي شيب

لكن نصيحه اشترك في ارامكس في خدمة Shop&Ship

Tamimi.fars

27/05/2011, 03:32 AM

لو يحطون نظام في البلديه بحيث ان رجل البلديه اذا راح لمحل وسألة مثلاً عن سعر الكفر دنلوب وصار السعر مرتفع يشتري الكفر وياخذ الفاتورة بعدين يودي الفاتورة للبلديه ويدخلها في الكمبيوتر بعدين الكمبيوتر اذا شاف ان الكفر دنلوب مقاس 17 سعر 600 وصار سعره مخالف يقوم الكمبيوتر تماتيك يحول لرجل البلديه وصل زي حق الصراف فيه ختم حق البلديه وامر بسحب الكفرات المخالفه بعدين يروح رجل البلديه ويسحب الكفرات المخالفه كلها وياخذها له عشان يتشجع ويصير يدور البضايع المخالفه بحماس و بشراهه هههههه على كذا ابن ام الي يرفع الاسعار والا

Tamimi.fars

27/05/2011, 03:38 AM

عمعوم

27/05/2011, 01:32 PM

يا اخواني العلة واضحه في هالمحلات و العلاج معروف (( وين التجارة عنهم )) حط تسعيرة موحده وخل الناس تشتري >>> لاكن الله يرحمنا برحمته و يرفع عنا الغلاء . اجل كفر بالون ماكسس جنط 15 قيمته 450 ريال شاريه قبل شهرين تقريبا طقم .
لاحول ولا قوة الا بالله لاكن غصب عننا نشتري . الكفرات هلكانه و العمر غالي ...

سوبر نيكل

27/05/2011, 01:37 PM

العماله اليمانيه رافعه الاسعار وبشكل جنوني .. وش قال لي ذاك اليوم

يجي زبون غيرك يشري بالسعر الي نبي

هذا الحاصل .. حسبي الله عليهم ..

ابوريناد1979

28/05/2011, 02:42 AM

هذي 5 كفرات هانكوك بالون جديدة6 غاط بـ1012 الف واثني عشرة ريالا فقط بس الشحن كم بيكلف !!؟

لو قدرنا نجيب كفراتنا من برا لابد ما يطيح السعر في الداخل
http://up.ql00p.com/files/ogmt228mls9dh9uhgr8u.png (http://up.ql00p.com/)

على العموم سمعت بانه يوجد بعض الشركات لشحن البضائع الكبيرة باسعار معقولة وبابحث عنها ان شاء الله

فكره ممتازه
بانتظارك اذا حصلت شركات نقل للبضائع الثقيله بسعر معقول.

عبدالرحمن السالم

28/05/2011, 02:34 PM

والله مشكله ، لكن ارسل واحد من جنسيته ان ماعطاه الكفر بسعر الجمله وانت ياسعودي يدبل عليك السعر ، انا مره رحت للغرابي عند محل افصل على المراتب ، قال كم باقي على الرواتب قلت ليه ، قال ياخي مافيه شغل ، قلت طيب قال اذا نزلت الرواتب يصير في حركه قلت من اى ناحيه قال بكل شى ، بتظليل بقراطيس وبتغير مسجلات وكفرات وجنوط وغيره ، يعني لاقيه ناس تدفع والا كان مارفعو السعر ، المشكله بعض الشباب إلى مسنتر هناك يفك ويركب
الله يكون بالعون لكن إلى يبط الكبد اصحاب هالمحلات السعوديين يأجرون عليهم ولا يلتفتون لهم
الله يكون بالعون

جيبي جايزلي

28/05/2011, 06:49 PM

مادام مافيه نظام صارم يطبق على اصحاب المحلات التجاريه وش تتوقعون راح يصير كل الاجانب يتنافسون على منهو يسرق اكثر ولو يحصله شق مخباتك وسرقك ومستحيل يتحسن الوضع لان فيه ناس عايشه من خيرات الاجنبي ومافيه مشكله وشلون جاب الفلوس اهم شي عطني واسكت وشارع الغرابي بالرياض كله عصابات

مااقول الاحسبي الله ونعم الوكيل

كفر ب600 ريال وما يكمل سنه الاوهو خربان ومتشقق على ايش 600 ريال الله يخلف بس

WWS

28/05/2011, 10:19 PM

ونصيحة لكل من اراد ان يشتري كفرات

الشراء من الوكيل مباشرة
والتركيب في اي محل مع الترصيص الطقم مع غيار البلوف بحدود 40 ريال
اولا ضمان افضل الاسعار
ثانيا ضمان ان المنتج جديد
ثالثا ضمان الوكيل مباشرة

والحمد لله عن نفسي من سنين ما اشتري الا من الوكالة مباشرة

كــــلآم سليم الله يجزآآك خير
:good2::good2::good2::good2:
هـــذآ آللي آسؤؤؤؤؤؤؤؤؤؤيه

>> تخيللللؤؤؤؤ كفر سآآلت عنه مقآآآس 255/60/17 لقيت مآآكسس قبل سنه ؤ نصف سعره 380 ريآل .. سآلت عنه يؤم آلخميس بآلغرآبي لقيته بـ 520 ريآل طبعآ من نظري مآآكسس مآآفضلهآآ لسؤءهآ حسب من آستخدم هآلمقآآس
كم آلفرق 200 ريال يعني 75% حسبي الله عليهم
الحمدلله ملتزم بالكؤري مــآ عدآ هآآنكؤؤك رفع سعره بشكل جنؤؤؤؤؤن لمــآ تمكن من آلسؤؤؤق > الله يرزقه
عليكم بآلؤكيل يركب ؤ يرصص

مدور المطر

28/05/2011, 11:16 PM

وين وكالة ميشلان اللي بالرياض ؟ أبي وصف واضح بارك الله فيكم

ALBDRANE

29/05/2011, 01:08 AM

الناس الي رفعو الاسعار
اذا أرتفع الطلب ارتفعت الاسعار
بعضهم يغير الكفرات فسقه وفقط للتغيير .....

آل مغيرة2011

29/05/2011, 01:29 AM

العماله اليمانيه رافعه الاسعار وبشكل جنوني .. وش قال لي ذاك اليوم

يجي زبون غيرك يشري بالسعر الي نبي
>>
أخالفك الرأي فالأسعار متقاربة عند جميع المحلات بغض النظر عن الجنسية

آل مغيرة2011

29/05/2011, 01:31 AM

وين وكالة ميشلان اللي بالرياض ؟ أبي وصف واضح بارك الله فيكم
......

وكيل ميشلان هو الجفالي ..وأنت على طريق خريص بعد ما تتعدى معارض النسيم بمسافة متوسطة تلقاه على اليمين

آل مغيرة2011

29/05/2011, 01:38 AM

انا كنت في الغرابي بالرياض من شهر تقريبا : سعر كفر هايلكس 98 وكالة يوكوهاما ب 295 ريال / يعني 295* 4 =1180 ريال .
وبعت 4 كفرات لها معي 3 سنوات ب 300 ريال .
فتكون التكلفة : 1180-300= 880 ريال .
علما أن سعر الكفر الوكالة من سنة ب 310 ريال ... يعني ماتغير .

موادع الشمال

04/06/2011, 10:23 AM

اسعار جنونيه بالكفرات لارقيب ولا حسيب

بس بالسعوديه الي اذا ارتفع مانزل

تخيلو بالجوف سعر كفر هانكوك 245_85 _16

قبل شهرين 420 مع الترصيص
وقبل شهر 460

واليوم سعرته عند وكالة هانكوك 560
وعند البناشر 570
زيادة اقل من شهر 100 ريال
اين انتم ياوزارة التجارة عن هذه الاسعار الجنونيه

الواحد اذا بغى يشتري سيارة يسأل عن الكفرات قبل السمكرة

البيـرق

04/06/2011, 11:01 AM

باخي العمالة اليمنية لعبوا فينا........والاخ الي يقول الزيادة من الوكيل لاتعمم

الوكالاء يمنية................وأنت يالسعودي فلوسك كثير وبتدفع

MماونشيM

04/06/2011, 11:53 AM

>>
أخالفك الرأي فالأسعار متقاربة عند جميع المحلات بغض النظر عن الجنسية

محلات الكفرات 90% يمني
الموزعين من الامارات يمني

عبدالله44

04/06/2011, 12:28 PM

اللهم ارحمنا برحمتك الواسعة ياارحم الراحمين
وياليت ماعندنا وزارة " تجار" قصدي وزآآآآآآآآآآآآرةةةةةةةةة تجآ ر ة
لانها مستقصدة الشعب بالخسارةههههههههههه
البائع السعودي محارب ومطبق عليه اكثر مما بالانظمة؛؛؛؛؛؛
والاجنبي مــــــــــسكـــين ويرحمونه"
اللهم ارفع رحمتك عن كل من لايرحم اخوانه المسلمين ويتهاون مع الاجانب الحاقدين"""""""(ســـأودي فلوس كآآآآآآآآتيييير )
محسودين على نعمة رب العالمين
لاحول ولاقوة الا بالله العلي العظيم

عبدالله44

04/06/2011, 12:32 PM

اللهم ارحمنا برحمتك الواسعة ياارحم الراحمين
وياليت ماعندنا وزارة " تـجـــــــــــــــــــــــــــــــــار"
قصدي وزآآآآآآآآآآآآرةةةةةةةةة تجآ ر ة
لانها مستقصدة الشعب بالخسارةههههههههههه
البائع السعودي محارب ومطبق عليه اكثر مما بالانظمة؛؛؛؛؛؛
والاجنبي مــــــــــسكـــين ويرحمونه"
اللهم ارفع رحمتك عن كل من لايرحم اخوانه المسلمين ويتهاون مع الاجانب الحاقدين"""""""(ســـأودي فلوس كآآآآآآآآتيييير )
محسودين على نعمة رب العالمين
لاحول ولاقوة الا بالله العلي العظيم

ابويزن2010

04/06/2011, 12:34 PM

اين انتم ياوزارة التجارة عن هذه الاسعار الجنونيه
اللهم ارفع رحمتك عن كل من
لايرحم اخوانه المسلمين ويتهاون
مع الاجانب الحاقدين
لاحول ولاقوة الا بالله العلي العظيم

ماون ماركز

04/06/2011, 07:43 PM

المشكلة في المشتري وليس البائع

البائع ما أحد أشتكاه ولا أحد قدم فيه أثبات لسعر غالي او قطعة مغشوشة

والمشتري بس يدفع ويروح بعدها يسولف مع ربعه عن غلاء الأسعار والغش

بياله شاي

11/07/2011, 06:46 PM

طيب مافيـه امكانيــة نشــتري مــن الأمــازون وكم اســعارها واصله الى البيت

ليت أحــدى مــن خــبراء الأمــازون يفيــدونا لأنـه بصراحه اسـعار الكفرات تزيد بأســـعار جــنونيــه :hot:

الحقيقه موضوع جيد جدا

الخفاره

13/07/2011, 04:54 AM

السلام عليكم -عندنا وعندكم خير قبل امس لقيت البريجستون ب57 دينار حجم 16 يعني 780 ريال واليوكوهاما مقطوع من السوق فالكويت كلهاوركبت نانكنج صيني ب40دينار وهذي الاسعار فالخليج كله

كريزي نت

13/07/2011, 05:45 AM

امس بتاريخ 11 / 8 / 1432 هـ .

في الغرابي سعر كفرات البالون ماكسس ابو جمل بـ 500 ريال جنط 16

وكل مالها ظني بزوووود سلاماااااااااااااااااااااات ووزارة التجارة في سابع نومه

حسبي الله ونعم الوكيل

تــــوني

13/07/2011, 06:28 AM

لقد أسمعت لو ناديت حياً ..... ولكن لا حياة لمن تنادي

والله أُصبنا بـ الإحباط ما عاد ندري من وين نلقاها

ملكنا يبني ....

وبعض الوزراء و التجار يهدمون

وين بتروحون من الله أمامكم حساب عسير

الله يحفظك لنا يا ملكنا والله ما قصرت كل شي له قرار واضح يصب في مصلحة المواطن