بخصوص الجركل اللي يركب في القاعدة الخلفيه

[Abu Msh3aL]

السـلام عليكم ورحمة الله وبركاته ..

حي الله كــلن بأســمه :) ..

ما ابي اطول عليكم .. انا صار لي فترة ادور الجركل اللي يركب في القاعدة مكان اللوحة الخلفية وشرط انه يكون نـيكل .. وما حـصلت :(
..
وقلت مالي الا اغطـسه نـيكل .. رحت سئلت عن الاسعار لقيت انها مبالغ فيها من 350 وانت طالع الى 550 :eek: .. الشغلة ما تستاهل واضافه على ذلك ما يضمن لي التغطيس لو حطيت فيه بنزين !!

الخلاصة حصلت هنا لأخونا ( المميز ) كان منزل موضوع قبل كم شهر لجركل للبيع منكل من المصنع من بلاده وهذي صورة له :
http://www.mekshat.com/pix/upload05/images204/mk14425_img_0008.jpg

وللاسف خاصية الرسائل الخاصة غير مفعل عندي بسبب المشاركات ولا كان راسلت الرجال وخذيت من راسة ..

يا ليت لو احد عندهـ علم وين احصل مثل هالنوعيه مستعمل ولا جديد موب مشكله بس اهم شي النظافة والجودة ..

والله يجزاء الجميع كل خـير ..

[YUKON_GMC]

والله يالغالي انا سبق وجربت واحد حديد وصدأ على طول الماء صار اصفر .. وجدعته بالحوش من خمس سنوات ..

وأظن حتى النيكل من الوقت يصدي .. لأنه مخصص للباترول .. ديزل - بنزين - قاز

لكن فيه جركل زيه بالضبط لكن بلاستيك مقوى كان حصلته افضل منهم كلهم يمكن تحصله في ساكو

[T A Y H]

أخوووي محلات خليجي أمتداد شارع المعارض النسيم مقابل المقبره

[Abu Msh3aL]

هلا فيك اخوي سفاري ..

صدقت بخصوص الجركل في الغالب انه مع المويه بيصدي .. بس انا ابيه زينة + بنزين احتياط ( دراجة نارية ) ..

وبخصوص اللي عند ساكو فكرت فيه وعندي واحد منه اللي يجي احمر وله مقظبين فوق ومن جنب بس ما يدخل في القاعدة للاسف ..

وبخصوص نفس الجركل اذا تبيه للمويه ما لك الا حداد يفصله لك اللمنيوم ولا ستـيل خذ الجركل الحديد اللي عندك وقل له ابي نفس المقاسات والموديل اتوقع انه ما يتعدى الـ 200 ريال لان 70 لتر الكبير اللي داخل الموتر بـ 600 ريال المنيوم والستيل اغلى

واشكر لك ردك :)

[Abu Msh3aL]

هـلا بك اخوي تــايه ..

الله يجزاك خـير بــشقر على المحـل وبشوف اللي موجود عندهم ..

والله لا يحرمك الاجر ويجعلها بميزان حسناتك هالافادة الطـيبه :good2:

[أبو مسفر]

اذا كنت تعرف البطحاء والغرابي زين رح لفندق ابا الخيل وتحت الفندق مباشرة محل يبيعهن على خمسين او ستين ريال فقط لا غير وما يميزه ان غطاه لها طريقة سهلة ومحكمة في الفتح والاغلاق .
بينما لو تروح شمال شوي في شارع الغرابي تجد فجأة ان سعره زاد مئة أو مئة وخمسين ويبيعونهن الزيود بـ 150 أو 200 ريال .
وبعضهن نفس الغطاء تقلبها وتركبها مقلوبة تصير محقان .
بس ماهو نيكل حديد وممكن على قولتك تغطسه ويصير نيكل .

[أميرالعشاق]

يا اخي معقوله هذي اسعارها؟؟؟؟
انا شاريه من تشاليح الطايف بـ 80 ريال.. نظيف...وأمريكي بعد...بالنسبه لي استخدمه للبنزين ..
من سنتين دايم احط فيه بنزين احتياط...لا صدى ..لا تغير لونه ..وفوق ذلك /لونه نيكل..

[YUKON_GMC]

إذا تبيه للبنزين ... عادي خذ لو حديد البنزين مايصدي لو حديد .. واصبغه من براء بلون جيشي او زيتي بعد التلميع طبعاً

لكن انا اقصد انه مايلصح للماء الا الباستيك

[المميـز]

:

هلابك اخوي Abu Msh3aL

اسف على التأخير بالرد .. مادريت عن الموضوع إلا عن طريق اخوي باترول 4500 ارسلي على الخاص الله يجزاه خير

بخصوص الجركل الفضي تم بيعه ولله الحمد مع القاعده

والجركل الفضي مع القاعده من الإمارات

ولكن يقولون الآن الجركل الفضي متوفر عند محل جراف بالرياض بسعر 300 ريال

وفيه قاعده جاهزه للبيع ...

والله يسهل أمرك وتلقى اللي تبي

وحنا تحت امرك طال عمرك

:

[Abu Msh3aL]

اشكر الجميع على الرد والتفاعل والله لا يحرمكم الأجر ، شريت واحد اخو اللي بالصورة ب 350 ريال

واكرر شكري للجميع