المساعد الشخصي الرقمي

مشاهدة النسخة كاملة : تجهيزات الهايلوكس (( تفضل عطنا رايك ))


جديد على البر
19/12/2005, 07:29 PM
بسم الله الرحمن الرحيم

السلام عليكم ورحمة الله وبركاته

لوتمحتوا يالربع ، أبي تجهيزات للهايلوكس مديل 97 من ناحيه البر + المكينه ..
الرجاء الرد على عجل قبل لأطير القروش بالفاضي ..
جديد على البر
19/12/2005, 07:51 PM
............................ز
هواي البر
20/12/2005, 02:04 AM
هلا حياك الله اخوي

كانك راعي بر ومشاوير فخذ نصائح ؟؟؟

1- ركب شد على الصندوق .

2- ركب صاجه علشان الاديتر .

3- ركب كفرات عراض مقاسها 225\70\15 يوكوهاما . وانصحك فيها لاني مجربها

4- وجنوط مرسدس لانها احسن جنوط على الاطلاق ومركبها في موتري .

5- تانكي مويه .

هذا الي جاء في بالي ...

وشكرا
جديد على البر
20/12/2005, 08:00 AM
يعطيك ألف عافيه نعناع الجبل ...
هاه ياشباب هل من جديد ، ومن ناحيه تانكي الماء هل يوجد له مكان تحت عند الاستبنه لأني بصراحه ماودي أضيق على الصندوق
غيّام
20/12/2005, 09:36 AM
حياك الله والله يبارك لك فيه

انا ودي ابد باللي انصحك انك ماتركبه وهو الفلتر والبواجي لانها بتعدم مكينة موترك على المدى المتوسط

اما من ناحية اللي تركب فأول شئ انصحك فيه المراوح والمساعدات الاماميه ركب مرسيدس بلستاين عشان ما تقعد تحك خشة الموتر كل شوي

من ناحية مكان التانكي نعم يوجد لكن ما انصحك فيه لانه يفقد السياره توازنها لان الهايلكس خفيف مهوب مثل الجيب ركبه في الصندوق والشكوى على الله بس لاتخليه كبير مره 120 لتر تكفيك وزياده

والله يسهل عليك وانا اخوك
أبو رشود
20/12/2005, 10:02 AM
ركب كفرات عراض مقاسها 225\70\15 يوكوهاما . وانصحك فيها لاني مجربها وطقمها بـ880
وميزتها انها قوية في الشعبان ولا تتشقق ولينة في الرمل وتفرش مضبوط
لكن الهنكوك الي طايحين فيها اخواننا القصمان ميزتها انها لينة في الرمل وتفرش أزين من الهنكوك لكن عيبها انها أي شيء يشقها
وما تنفع بريال في الشعبان ..

مساعدات بلاستين قدام ومساعدات فكسار 97 ورا ( تحتاج ترهيم حلقت عند مبارك اليمني بالصناعية القديمة ) ... يا شيخ ما يتحرك موترك سنتي ... لكن بيكون مطبه قوي وكانك راعي شعبان فما أتوقع انك بتحتاج مساعدات خلفية .. ركب بلاستين قدام فقط ..
والبلاستين سعر طقمها بـ200 ريال

وعند رفعة الموتر .. يبيلك ترفعه عشانك بتطب في شعبان وبتحول مع جروف وبتسير على النفد ..
وكانك بترفع الموتر ..

من قدام يبيلك تلقب العمدان عشان ترفع الموتر ... أو انك تغير مسامير الوكالة وتجيب مسامير طوال
ومن ورا يبيلك لعّابات مقاس 18 سنتي وركبها مكان لعّابات الوكالة ( اللعّابات هي الحديدتين الي تمسك السست )
وأيظاً بإمكانك تقوس السست ... لكن طريقة اللعّابات أنا مجربها وغيري جربها ..... وأنصحك بها
تفصيل اللعّابات بـ 25 ريال تقريباً والتركيب عند أي محل ميزان يزينها لك
وبيكلفك رفع الموتر مع التفصيل بحدود الـ100 ريال (أكثر شيء )


وبالنسبة للمكينة بتركب بواجي وأسلاك بواجي خسارة 550 ريال ثمن في الأخير ما تفرق واجد

لكن مثل ما قالوا الذيابة .. ركب مراوح سوبارو على الهايلكس ..
وسعرها مع التركيب وتفصيل القواعد على الأديتر بـ550 تقريباً
وميزتها انها تبرد المكينة - تنشط العزم - تبرد المكيف - تشيل الحنة في الموتر - والباقي ما يحظرني ..
ومن الناس المضبوطين في تركيبها هو أبو ناصر - ولد المبارك .. بحي الشفا بالرياض

وكانك راعي رمل ونفود ركب صاجة حامية للأديتر بـ120 مع التركيب .. تلقاها مفصله وجاهزة بمحلات الزينة بحي السلام - الرياض

ويبيلك شد تحط فيه عفشك .. ماني متأكد من سعره لكن الظاه انه بـ300

هذا الي يحظرني .. والتكلفة كلها يا طويل العمر بحدود 2100 تقريباً


وشكراً






أخوكم/ أبو رشود
جديد على البر
20/12/2005, 02:39 PM
كفو والله بالذيابة والله ماقصرتوا كفيتوا ووفيتوا جزاكم الله خير يالربع ...
قصيمي والهوى شرقي
21/12/2005, 04:06 PM
مع الذيب أبوسليمان لاتخاف أدخل على الرابط www.efi4500.com وتلقى فوق الصفحه محل 4500 وأضغط عليه ويجيك الزبده وتره فاهم وكم مره اجيه انا ولد عمي ويركب لي اللهلي وخوي يركب لي الربعى والله شغل مزبوط ولللي المعلوميه ترى المحل بي الرياض وشكرااااااااااااااااااا
جديد على البر
22/12/2005, 12:06 PM
يعطيك العافيه