وش رأيكم بــ الباثفندر بصراحة << فزعتكم ...

[السياسي]

السلام عليكم ....
صباح الخير ..
كيف حالكم ..


نخش بالموضوع بدون مقدمات ... يله مشينا ..

يا شباب وش رايكم بــ الباثفندر ؟؟


الأول :

روعة ... وحلو ... وعلى كيفك ..


الثاني :

هج عنه ...!! يتفكفك ,,

الثالث :

ما شاء الله .. زين مررررة
طلعنا عليه للبر ... وسافرنا عليه هناك وهناك ... منتاز

الرابع :

نيسان ..!! لا يقربك ولا تقربه ..


وانا اقول وش رايكم ؟؟

نبي كلام صحيح و واقعي ...
خصوصا من أهل الخبرة والتجربة ...
واللي معه باثفندر ...

يعني وش رايكم بالباثفندر ... من ناحية :

--الصبر والتحمل ؟

--القوة والعزم ؟

-- الممشى -- بالطعوس -- والخطوط , والسفريات ؟

--السرعة ؟

--صرفية البنزين ؟

--الصيانة وقطع الغيار ؟؟

-- العادي أو التوماتيك أحسن وأفضل ؟؟


-- اللي عنده خبره عن انواعه واسعاره .. لا يبخل علينا ...

وشكرا للجميع مقدما
وجزاكم الله خيرا

[bo_s3ayed]

حياك الله اخوي السياسي

صراحه ومن واقع تجربة انا عندي باثفايندر 2002 الموتر في مميزات وفيه عيوب من وجهة نظري ان عيوبه غطت على مميزاته نبدأ بالمميزات :
1- سعره معقول
2- عزمه لابأس فيه
3- سعته من الداخل معقوله
4- ...............اممممممممم بس ما فيه مميزات ثانية

العيوب :
1- يصرف بانزين بشكل غير طبيعي
2- قطع الغيار غاليه
3- ممشاه ثقيل
4- المكيف غير بارد
5- لايوجد تكييف للركاب اللي في الخلف
6- بعد فترة راح تسمع اصوات صرصره بالسياره
7- الاضاءه الاماميه ما تبرد القلب
8- في البيع سعره مو فيه

هذه ابرز الاشياء اللي تحضرني حاليا وهذا رايي الشخصي يمكن ما يعجب البعض لكن يتم هو راي شخصي............وتقبل تحياتي

[طخيمان]

بس حقك يا
bo_s3ayed
موديله 2002 يعني 180 حصان أما من 2003 وفوق فزادوه60 حصان يعني طلع 240 حصان وترا هذه الزياده مهيب بسيطة
الشيء الثاني:-
عمي يعبيه بـ60 ويالله يمشيه 400 بالطقاق
وبعدين من ناحية العزم فيه شيء غريب اللي هو انه اذا مشى في النفود يحفر ما أدري ليش يمكن عشان وزنه خفيف وعشان عزمه قوي ماأدري
وترا 2006 يبي يتغير تغير كامل
ولكن اذا كان عندك خيار ثاني >>>>(خيار ولا جزر ههههه ) اذا كان عندك خيار ثاني يعني سيارة ثانيه بداله علمنا و ان شاء الله مانقصر .

[بواسامه]

انا شريته وكديته اربع سنين ومشى معي 200000 الف
لاتفكك
قطعه معقوله المستهلكه
تكييفه روعه وجامد بس ليت فيه خلفي لان خشمي شمر من برودته
مطلوب بالسوق وماسك سعره شريته 72000 وبعته بعد اربع سنين 42000 نزول معقول جدا كنه كامري
انواره الاماميه لك عليها مهيب قويه
الصرصره من الباب الخلفي فقط ورهم له ربل دبل وبتخف كثير
صرفيته معقوله جدا يمشيني الله يذكره بالخير 450 كيلو بس مانيب راعي سرعه 130 وتحت واعبيه ب60 ريال
ونصيحه لالالالالالالالالا تتعدى التماتيك وهو المرغوب بالسوق والعادي له زبونه بس اقل من التماتيك
واحرص على الوان الثلاثه لاتتعدهن ابيض لؤلؤي او فضي او بيج وهذي رغبة السوق في البيع واذا انت تبي اسود اشتر اللي تبيه ولاى همك السوق اطرب عمرك باللي تهواه

الله يدلك على اللي فيه خير لك

[ولد الشايب]

أنا ودي أشارك معكم و أسجل رايي . معي باث موديل 2003 تماتيك


--صرفية البنزين ؟
400 كلم داخل الديرة بالدعسة المعقولة بس انتبة ترى دعسته طربة لا تتعود عليها لأنك تحس أنك تسوق ماكسيما وعلى فكرة هو أقل الجيوب صرفاً إذا قارنه فيها ( الفل إذا هو يكح 60 )

--الصيانة وقطع الغيار ؟؟
ما يطلب قطع غيار غير الإستهلاكية وهي غالية نوعاً ما بس الحق أنها تعمر معك

-- العادي أو التوماتيك أحسن وأفضل ؟؟
أنا معي تماتيك وزي الحلاوة من ناحية العزم . العادي عزمه أقوى شوي ولكن كلاتشة مهنا زود . (عموما القير حسب ميولك وقناعتك الشخصية )

--الصبر والتحمل ؟
أنا أقولك ومتسغرب غريب أنا نيسان تطلع سيارة ماتتفك بسرعة يعني ما تسمع منها أي أصوات بالاستعمال الطبيعي

--القوة والعزم ؟
ما يحتاج مشهود له طال عمرك 3500 ما حطوها عبث على 1750 كلم

-- الممشى -- بالطعوس -- والخطوط , والسفريات ؟
الممشى والرساوه عاد هذي أنا سقت جيوب واجد بس مثل رساوته ما شفت وبالطعوس ما شاء الله

--السرعة ؟
ممتاز يجيط طبلونه كامل 200


العيوب :
1- ضيق من ورا يعني ثلاثة متزاحمين اثنين مرتاحين
2- الشنطة الخلفية ما تشيل أغراض واجد فيلزمك سلة
3- ضعف المساعدات واليايات وهذي حلولها كثيره
.
.
.
.

انتظر مشاركات الأخوان

[salehhd]

السلام عليكم

كلام ولد الشابي صحيح وانا عندي تماتيك 2004 وموتر بصراحة يطرب

اما السعر فهو يمسك سعرة كثير بعكس السفاري وعلية طلب واجد

[anas]

كان معاي واحد موديل 2002 فل كامل شريته في نفس السنة وجلس معاي 6 اشهر فقط وبعته .... وفي هذه الفترة فقط طعست به في الثمامة وسافرت الى الدمام وطعست هناك وسافرت الى الباحة وصعدت به جبال لدرجة انني شغلت الدبل الثقيل وسافرت الى جده وطعست به هناك على طريق مكة جدة السريع بعد الكوبري الميت على اليمين ...... جيد جدا في كل شيء ما عدا ما ذكر اخونا ولد الشايب ينزل مع التحميل من الخلف والركاب في الخلف تتكسر ظهورهم من قساوة اليايات الخلفية وكفراته غالية 470ريال للواحد ولا يوجد مكيف في الخلف اما بالنسبة للقير اوتوماتيك فعيبه النمر p-r-n-d-2-1 اي لا يوجد مكان للترس الثالث وهذا مهم خاصة في النزول الطويل مثل الهدا وعقبة الباحة .
وبصراحة لو اني اشتريت موديل 2003 ذاك الزمان كان ما بعته الى الآن لأن اللي كان معاي مكينته ضعيفة جدا 180 حصان فقط وهذا سبب البيع .

[الربذي]

يعني وش رايكم بالباثفندر ... من ناحية :

--الصبر والتحمل ؟

--القوة والعزم ؟

-- الممشى -- بالطعوس -- والخطوط , والسفريات ؟

--السرعة ؟

--صرفية البنزين ؟

--الصيانة وقطع الغيار ؟؟

-- العادي أو التوماتيك أحسن وأفضل ؟؟
هلا بالسياسي ويامرحى بك (اسمك يخوف !!!!!)
المهم ,انا معى 98 ماشي 212000وماسويت لها تربيط ولله الحمد بس طلعاتي للبر قليله جدا فل كامل بس قير عادي (استعمال امريكي) وانا اتكلم عن بافيندر من نيسان بس مجلوبه من هناك واخذتها باسمى اوراق جمرك
الصبر ماتصبر مثل تويوتا اول ماهو الحين بصراحه خربت تويوتا وصارت مثل النيسان
اذا انك راعي طلعات بر كثيره مره تتفكك مثل السفاري وذا ان طلعاتك شوي وتنزل الهواء اذا بغيت تطلع بر مسافات طويله مره فهي رهيبه وتتحمل نوع ما ((العزم حلو حلو اذا دعست قوه حلو وترضيك حتما والاحسن 2500 سي سي الي هي 2003 فما فوق ))
فهي رهيبه وراسيه بس الموديل القديم اقصد من 98 الى 2002 بها ثقل شوي بس تمشي بصراحه تنزل عن 180 ذا الهواء ماهو بوجهك لاني ملاحظ ان الهواء عدوها اللدود

الخطوط البر اقصد الجلد يعني المسحياط والبران حلو ه وتطربك لو مطابها تضرب بقوه يعمي مثلا حفره وانت مسرع تسمعها تضرب بقوه وبكل السيارات ليس هي فقط
مع السفر مريحه وخصوصا بالمثبت وراسيه مره وحلوه
الطعوس لك عليها يعني ماهي قويه بذيك القوة الا 2003 فما فوق فالكل يمدحها
السرعه تنزل تحت الميتين وسبق وان حط احد الاعضاء صوره لطبلون وهي نازله تحت المئتان يمكن حول 230 تخيل لانه نازل تحت مره راس الابره تحت تماما
يعني ماعليه نقس سرعه حتى القديم يسفط طبلونه بشرط الهواء تكون خفيفه مره او خلفك ولا انصح بالسرعه ياخيي يالسياسي

صرفية البانزين امشي من القصيم الى المدينه المنوره بحوالي 80 ريال توصلك لو تبي تحسب وهذا من ان تمسك السريع من بريدة بس السرعه على 130 بس المشكله ماتشيل 80 ريال لان تانكيه صغير وصرفها صدقونن معقول ياناس لاتنسون انها جيب وسته سلندر قارنوه بالجيوب ماهي بالصغر سافرت انا واحد بسفاري فرقي عنه حوالى 28 ريال بكل تعبيه وهو باب واحد
قطع غيارها غويليه شوي !!! بس ماهو هاكا الغلا اشتريت من الوكاله عمود يجي قدام طوله حوالى 25 سم وروسه كبس وفيهن رمان داخلي لعمود التوازن الامامي لانه قام يطلع صوت مع المطاب الصناعيه بالاسفلت وياكثرهن عندنا بالكوم !!!!!!ومن الوكاله سعره 52 ريال فقط بصراحه رخيص القماشات الاماميه وكاله اصلى 140 ريال بس ماهو من الوكاله من محل كل الي عنده اصلى وتجد تجاري يباني بس يعلمك يقول هذا بكذا وهذا بكذا
الربله السوداء اللي تغطي العكس الامامي اشتريته وكاله ب135 على ماعتقد ويعني ماتفرق عن قطع الجيوب الثانيه والتويوتا اغلى ولا لا ياخوان
والصيانه ماعمري دخلتها لتشييك فقط غيرت جميع السوائل يوم اشتريتها كل السوائل
زيت الدفرنس
زيت القير
زيت قير الدبل
ماء الاديتر حتى هواء الكفرات نسمته وعبيته من جديد !!!!!!!! لانه امريكي !!!!!!!!!!!
ذكرت واحد عشاص مغرس ورافض ينزل الهواء يقول هذا هواء المصنع وهو مشتريه موديل السنه وماله معه الا كم يوم وعمره تقريبا الخمسينيات وطلع بعد جهد جهيد والمكان النفود
والاخوان واجد اللي معهم باث
اذكرلك
الاخ ولد الشايب
الاخ قرم
ولاخ بلاك باث !!! كذا اسمه
وانا !!!
وابو ريم
وكم من الاخوان لاتحضرني اسماءهم الان وجميعهم بهذا المنتدى القيم

[عبد الله 3]

السلام عليكم

حياك الله أخوي

أنا عندي 2005

العزم : ممتاز

المكيف / ممتاز
بس مشكلته ما فيه ورا

والقير اللي عندي عادي وماشي تمام

أما البانزين أعبيه إذا فضى مررره بأقل من 60 ريال ويمشيني داخل المدينه 500 كيلو
بعضهم يقول عشانه توه جديد معك مايصرف .. الله وأعلم

وشكراً

[الربذي]

نسيت اقول والمكيف ثلج
بارد بصراحه مره والقير الاتومتيك احسن اذا طلعاتك للبر نادره لانه ماتقدر تجر فيه وغير مرغوب لحقين اللبر

[السياسي]

يا اخوان .. بيض الله وجيهكم .. ما قصرتوا ... وجزاكم الله خير .. والله يوفقكم .. ويسعدكم .... آمين ..
واللي عنده زيادة معلومات وإضافات .. لا يبخل علينا ...

------
والصلراحة يا اخوان اني محتار ...
احيانا اقول باثفندر 2005 ..
ثم تمسك معي هايلوكس 2006 دفرنسين ..
ثم اقول .. سوزو ديماكس 2005 ..!!

مشورتكم يا اخوان ..
والله ييسر الله فيه الخير ...

[salehhd]

السلام عليكم

الباث 6 سلندر وعزم مشهود له

اما الثاني 4 سلندر ولك تتخيل فرق القوة ولاتنسى انهم على 133 حصان والثاني 157 اذا ماني غلطان

وما الباث 250 حصان والاتماتيك 240 حصان

ولاتنسى رحة الجيب احسن من الونيت

ولاتنسى تستخير والله يوفقك

[aziz2727]

انا وانا اخوك كنت بااااااااخذه الا شوي
بس شار علي خالي لي كان مطلعه ووما قدعد معه شي الا وباعه

الا وهي المكيف انه لا يوجد فيه مكيف خلفي ومثلك عارف الصيف عندنا يشوي العصافير وانت بكيفك
والله يدبرنا واياك على الصالح

[اورنس الشرق]

معي 2003 الموتر ممتاز جداً داخل المدينه وفي البر

ولكن اذ انت راعي مطامر فى البر وتبي تقضي نص عمرك مقانبص ما يصلح

هو موتر ناس عاقله مهى راعيت مطامر للمعلوميه تامتيك الى معي

بنسبه لموضوع المكيف ثلج وارهن عليه

تحياتي

[السياسي]

وعليكم السلام

جزاكم الله خير ... والله يبارك فيكم ...

[أبشر بي]

السلام عليكم ورحمة الله وبركاته
صبحكم الله بالخير جميع
اخوي السياسي ولا يهون باقي الاخوان
كنت في وكالة نيسان صباح امس عشان اشوف الارمادا
وتكلمت مع الشباب ونصحوني انتظر لين يوصل الباثفايندر الجديد
خلال ثلاثة شهور تقريبا لان راح يكون فيه تغييرات كثيره اذكر لك منها
الشكل مختلف-مكينه 4ليتر-6 سيلندر-270 حصان-فرامل اي بي إس
-مكيف خلفي-مقاعد خلفيه بالاضافه للكثير من الاكسسوارات حسب الفئه
وحصلت على بعض الصور اعرضها هنا وان شاء الله اني قدرت افيدك وباقي الاخوان
وفق الله الجميع لما يحبه ويرضاه
http://www.mekshat.com/pix/upload/images12/mk2129_path1 copy.jpg

http://www.mekshat.com/pix/upload/images12/mk2129_path2 copy.jpg

http://www.mekshat.com/pix/upload/images12/mk2129_path4 copy.jpg

http://www.mekshat.com/pix/upload/images12/mk2129_path5 copy.jpg


http://www.mekshat.com/pix/upload/images12/mk2129_path6 copy.jpg

http://www.mekshat.com/pix/upload/images12/mk2129_path7 copy.jpg

http://www.mekshat.com/pix/upload/images12/mk2129_path8 copy.jpg

[العشة]

شف وانا اخوك انا رايي من راي الاخ ابشر بي ,,

اصبر الين يجي 2006 اول شي انك معك جديد موديل وجديد شكل ويبي يمسك قيمته ويبي يصير احسن من الاول

لو ان يبي يصير بوه زود قرشين ,,

اما كونك تبي تشري وكاله من الموديل 2005 لا مااانصحك ,,

لاكن عندي لك راي كانك عجل وقريشاتك على قدك هذا طال عمرك نسيبنا قبل امس طق له جيب جديد 2006 من الوكالة

وستة سلندر وبابين وشكله حلو مره لا وتاخذه من وكالته ..

فقط 58000 لاغير .بس اكيد مايقارن بالباثفايندر.

وسلامتكم .

[العشة]

نسيت اقولك وش نوع اللي شرا نسيبنا ,,

نوع السيارة : هونداي
الموديل : 2006
المكينة : ستة سلندر
القيمة : 58 الف ريال فقط لاغير .
وطبعا دفع رباعي .

[أبوبندر 2005]

وعليكم السلام ورحمة الله وبركاته
الصراحه ماانصحك فيه :no2:
لأن مثلك عارف السيارة توها نازله السوق :confused: واول دفعه من الشركه
يعني اتوقع خراباتها واجد
وشكرا

[السياسي]

جزاكم الله خيرا

==========

حبيت اعلمكم عن سعره .. اليوم اخوي راح للمعارض ... بالرياض

وحصل الباثفندر السياحي موديل 2005 بـــ 75500 ريال .. تقريبا ,,

وما نستغني عن توجيهاتكم ..

[Barq al7'eel]

يعطيكم العافيه على المشاركات والتوضيح وانا معي باث 2005 اتوماتيك ابي اشارككم في تجربتي مع الياث
1- اشوف ان عيبة الكبير هو صرف البانزين على سرعة 140- 160 مايودي ديره 250 - 280 كلم وهذا عيب اشوفه كبير
2- الضيق بالقبر وهو ضيق من الامام سواء للسائق او الراكب وخصوصا منطقة الاقدام
3- المكيف جيد وبارد ليلا لاكن بنهار الصيف المهفّه احس انها اصرف

والله يكتب اجر الجميع

[وش احط]

السلام عليكم اخوي.....انا توني شاريه من شهر تقريبا والموتر وكالة ومعجبني...وان امسكت ولا اعجبك بعه بعدين قيمته فيه ومن وجهة نظري اذا عائلتك اقل من خمسة....ممتاز.وشف كل العيوب اللي سمعتها من الشباب على حسب الاستخدام....وعلى حسب البركة...والله ان الموتر اذا طرح الله فيه البركة ريحك والموتر المنحوس منحوس لو كان رنج..وشكرا.

[السياسي]

شكرا لكم

وجزاكم الله خيرا

[السياسي]

يأ أصحاب الخبرة ... ويا أهل الباثفندر خصوصا ....
سؤال تهمني إجابته ... وأبغى إجابة عن تجربة وخبرة ... الله يجزاكم خير ..

أيهم أزين عادي ولا توماتيك .. ؟

[الربذي]

السلام عليكم
اخوي السياسي
شف مسالة ايهم افضل فاقولك ..........
هذا انت من يحدد ذلك كيف ؟ هي مساله رغبه يعني انت ترتاح تسوق جيب وليس صغيره بقير عادي او تماتيك لاي واحد ترتاح له اكثر
عني !!! لو تعطيني وزني ذهب ما اشتريت جيب تماتيك ياخي مافيه متعه عشان كذا لاحظ بعض السيارات الفارهه قامت تحط قيرين لان في البر لايعلى على العادي تقدر تجر فيه بكل حريه وتعش بكل حريه ايضا وتساع اكثر
ثاني حاجه القير الاتوماتيك يبي معامله خاصه لكي تبتعد عن الخرابات يعني تغير زيته كل 8000 كم او اقل تغير فلتره كل تغييرتين وايضا يحتاج ماء لتبريده يحتاج انك تخلي السياره تسخن قبل الممشى عليه لانه يضره وهكذا
البعض يقول لو تعطيني ايش ماشتري سياره الا توماتيك ياخي تحطه على دي وبس اما العادي فهو ان ان ان !!! عشق بواحد بثنين ثالث خامس واحد اثنين !!! شغله
واخيرا يحدده خروجك للبر اذا قليل واكثر مشاويرك في المدينه فالاتوماتيك افضل لانه هو الموضه الحين حق الكسالى وايضا مريح في زحمة المدن
كان معي مرسيدس وبعد مده بعتته و اشتريت جيب اشتقت له المهم كنت ابي اخذ من الا شاره يو تيرن فوق تحت ومعي بنيتي عمرها
كم شهر وعصير باحدى يدي وكانت بنيتي بحضني تصدق كنت متعود على التوماتيك وابي الف اضطررت اني ارمي العصير وينتثر داخل السياره ولاتقع بنيتي منى وبلشت بين التعشيق واللفه بغيت ادخل في السيد الثاني وتمنيت التوماتيك والعادي قبل ان ياتي القيرين ياهن رهيبات
للبر افضل العادي بفرق
للمدينه مايقال للعادي بكم يفضل الاوتوماتيك
والباث اللي معي هي عادي ورهيبه مره
دمت بود

[salehhd]

السلام عليكم

حسب علمي الباث الجديد ما يجي الا تماتيك
الباث القديم العادي اقوى من التماتيك ب10 احصنة زيادة

[السياسي]

وعليكما السلام ورحمة الله وبركاته ,,
وجزاكما الله خيرا

-----------
وننتظر آراء بقية الاخوان ...

[][عزام][]

السلام عليكم

ابعطيكم رأيي بما اني من اصحاب الباثفيندر معي باث موديل 2005 سياحي توماتيك يغني فرق بينه وبين المواصفات الوسك الجنوط فقط ومطلعه بـ76 علما اني كنت ابحث عن عادي ولم اجد في الرياض وبعد ما شريت قال لي كم شخص احمد ربك انك ما شريت عادي لأنه دماااار اول ما تدخل البر تشم ريحة الكلتش اما المشاكل صراحه موتري ماشي الان 11000 وما اقدر احكم عليه لكن الى الان تمام مع العلم ان نص ممشاه من مطامر بالصمان وصراحه يكفي للبر 4 اشخاص مع اغراضهم لمدة ليلتين بالراحه(طبعن على حسب الاغراض)ايه صح فيه مشكله معروفه بالثفندر هي صرصرة القزاز اللي ورا ولها حل ايضا كما قال اللي قبلي المساععدات لأن يوم وصل موتري 6000 تقريبا واشوف المساعد الخلفي ولاه منفقع بس مثل ما قلت لك تراي غشيم بسوافة البر

[همّام]

السلام عليكم

اخوي السياسي وباقي الأحبة الكرام :

أنقل لكم تجربتي البسيطة مع الباث فايندر

أنا معي موديل 2003 تماتيك له ست شهور تقريبا

شريته مستعمل بس ((حشمة))


بالنسبة لسؤالك عن التماتيك والا العايدي
شوري عليك خذ تماتيك واترك عنك العايدي خصوصا كان ما عندك غيره للمدينة وزحمتها لأن عليه عزم ما شاء الله يسحب نفسه مهوب مثل 2002 وتحت ، يعني لا تخاف على القير .


وبالنسبة لصرف البنزين التانك أذكر أني عبيته مرة بـ 68ريال ومشاني على الخط أكثر من 530 كيلو
وباقي فيه بس ما هنا سرعة 130 مع المكيف .


-------------

وعلى طاري المكيف مكيفه بارد جدا . يعني اللي ورا ما عليهم قاصر براد بس اللي قدام قوالب ثلج


ومن العيوب كذلك أن مشبك الواير فيه مرتفع جدا من الأمام ومن الخلف
يعني لو تسحب واحد أو يسحبك يتأثر الصدام بشكل كبير


أما أكثر ما يشتكي منه أهل الفايندر هو الباب الخلفي و ((قربعته)) المزعجة ومالقيت لها حل .


وكذلك لازم تفك صاجة البلاستيك اللي تحت المكينة كلما أردت تغيير السيفون . وكلها كم تغييره مع السيفون وتنقطع.


أتمنى لك الاختيار الموفق .


أخوك / / همّام

[salehhd]

السلام عليكم الاخ همام كلامه سليم

بالنسبة للقرقة الي بالخفل نصحوني ادبل الجلد وراي يروح الصوت بس بصراحة ماجربتها

اما مشكلة الغطا البلاستك فحلها لي البنشري بعص فتحة صغيرة تكفي مرور يده وفك السيفون من غير فك للبلاستك

[فتى الدهناء]

طلّع الهايلكس 2006 من المعادلة ....
وأنت تقدر تحكم على الموتر اللي يبي يصلح لك من ناحية الاستخدام ( ديماكس ) أو ( باث فاندر )

[السياسي]

جزاكم الله خير ...

مشكورين

[Abo Nader]

السلام عليكم



أخوي أنا معي باثفندر 2005 قير عادي

الشباب ما قصرو معك أبد لكن بزودك عن الصرفيه و القير العادي

بالنسبه لي ما يتم شهر إلى و ما سك خط الرياض الشرقيه أعبي من أول الخط و معدل السرعه 160 أوصل شمال الرياض و تولع المبه و صراحه بالسرعه يصرف لكن و الله يشهد أنواع الرساوه مشاء الله

بالنسبه للعادي طلعاتي للبر تقريبا كل أسبوع لكن ترا ما يبين القير إلا بالنفود و الله العادي طرب صراحه تحكم فيه زي الحلاوه و الي يقول يحفر نسم له و خفف الدعسه لكن المشكله الكبيره بالعادي أن موتري ماشي 30000 بس لا دخلت النفود بدون تنسيم و أحرقت عليه ولا لا نسمت وقمت أراقي الله لا يوريك ريحة الكلتش بس صراحه هي من السواق يعني لا تدبل ونسم و تفاهم مع التغريز زين و ان شاء الله ما تطلع الريحه

بالنسبه لشنطه الخلفيه بأنزل فيها موضوع إن شاء الله لحلها


بالنسبه ل2006 كنت ناوي أبيع موتري و أشريه لكن هونت

طبعا أقوى لكن أثقل بوااااجد كبير ما أحد جربه بالبر(أصلا ما نزلوه إلا الحين للبيع)غالي السياحي ب90000
و الشكل عاد أنت و ذوقك يعني الجديد إذا صار شنب يجي الذوق

و أعذرن من كل قصور و أستخر و شاور توكل على الله

[السياسي]

وعليكم السلام ورحمة الله وبركاته

مشكووور ما قصرت ,,,
جزاك الله خيرا

[خبراوي]

السلام عليكم ورحمة الله وبركاته

حبيت افيدك اخوي انا كان معي باثفندر 2003 مطلعه وكاله فل اوبشن ماغير الغير عادي

الموتر ماعليه كلام ولا عمري غيرت فيه خراب ولا حتى اشياء استهلاكيه غيره بس مرتين اقمشه للبريك قدام علمن انه ماشي عندي كان 170كم

وماشاء الله عليه ماعمره تعطل علي سافرت عليه بلاد كثيره سافرت عليه سوريا مرتين والى جميع بلاد الخليج خصوص الامارات كان كل اسبوع اروح عليه والى مكه الكرمه الحمد لله ماعمره اشتكى من شي علمن انه السواقه بالطرق اقل ممشى 160 وفوق

وبالنسبه لشرب البنزين اذا ممشى فوق 160 يمشي 350 كم طبعا يختلف شرب البنزين ع حسب الجو اذا الرياح في وجه الموتر يزيد الاستهلاك للوقود والعكس صحيح

وبالنسبه للعيوب انه مافي مكيف خلفي والمساعدات الخلفيه تغيرها لانها تتعب وهب حق استخدام مثل اسختدامي في البر والسواقه الي خبري

وخذ غير اتماتك افضل من العادي بلميون مره بصرحه القير العادي كان عندي يكرهك في الموتر مايصلح الباثفندر الا اتماتك مايصلح قير عادي


وانت الخيار لك وانا عندي الشكل الجديد اغلى وغير عملي من شكله فيه علل وخربات


واتمنى اني قد افدتك بشي


تحياتي لك