غسيل المكينة وتلميعها

[أبو مسفر]

السلام عليكم
بعض البناشر يعرض خدمات ربما مجانية لغسيل المكينة ويتم غسلها عندهم بالديزل .
احذركم من غسلها بالديزل لان الديزل يجمع الاتربة والغبار وبدال ما نكحلها اعميناها .
وبعضهم يستعمل القاز لكنهم قلة جداً وهو بلا شك افضل من الديزل .
وبعضهم يغسلها بالماء عند مغاسل السيارات وهو بلا شك غير مفيد ويمكن يضر السيارة

اخواني اسألكم عن من جرب غسيل المكينة وتلميعها تلميع ساطع كأنها جديدة ؟؟؟
وين مكانهم وبكم ؟؟

[البقمي911]

اخوي نصيحه لاتغسل المكينه ابد
انا معي جمس مره غسلت المكينه وبعدها الموتر صار يكتم وعزمه ضعيف واعاني من المشكله هذي حول السنه ولا لقيت حل
ورحت الصناعيه وكل واحد يقولي عله وانا والله محتار ولا ادري وش اسوي

وهذي نصيحه مجرب وانت حر

[السومر]

اخوي الغسيل بالماء لا ضرر منه وأزود على ذلك يحط شوي صابون

احسن من الديزل ومن القاز

لكن اهم شي اذا جيت تغسل المكينه وقف السياره عند المغسله اقل شي ساعتين علشان تبرد المكينه

وبعدين شغل ودخلها المغسله على طول

وفيه بخاخات توجد عن ساكو تستخدم لتلميع قيمتها بحدود 35 ريال

[ابوصالح77]

ما مثل القاز لولا خطورته سواء بالإشتعال أو على الليات والربات
أما التلميع فيوجد لدى ساكو بخاخات واجد طب وتخير

[سوبر VTC]

ابو مسفر
احد الاعضاء يداعبك يقوم
تبي تنام مع المكينة

.......

بالنسبة لي شريت غسالة من ساكو المانية ب1600تقريبا
و ما شاء الله تطير الزيوت و الشحم
سواء بالمكينة او على القير او على الشاصي او على الدفرنس
او حتى الطين يروح
عملية جدا و لا صابون و لا ديزل و لا قاز
انصحك به

شف صورته على الرابط
رد كديان

تنظيف المكينة من الغبار والأتربة - منتديات مكشات (http://www.mekshat.com/vb/showthread.php?t=401531)

[أبو مسفر]

البقمي
السومر
ابو صالح
بيض الله وجيهكم على نصائحكم

سوبر فتك
اللي يمزح اخ ويمون
وجزاك الله خير هذه مكينة هواء مثل اللي عند البناشر
لكن سؤالي ما فيه محلات تنظف المكينة وتلمعها تلميع يدوي ؟؟

انا شفت برنامج عن محل في امريكا ورشة لشباب هواة ياخذون الموتر قرنبع ويعيدون تأهيله ومن ضمن اللقطات لقطة شفتهم يفركون محتويات الكبوت الليات والمكينة وجميع القطع يدوي .

سؤالي ما فيه محلات مثل هالشباب عمالهم ينظفون ويلمعون جميع القطع تنظيف يدوي ؟

[Abo gssar]

تلقى طلبك عند محلات التلميع الساطع ينضف لك المكينة مثل ماتقول شغل يدوي ...

[خليفان]

صار لنا ثلاث سنوات نغسل مكاين السيارات بالماء فقط ولاصارلها شي لاكن لها شروط
اولا المكينه تكون بارده وثانيا بعد الغسيل لاتشغل على طول انما بعد ساعه
الجهاز موجود عند ساكو ويستخدم لعدة استخدامات والميزة الحسنه توفير الماء
كذلك الجهاز افضل شيء للمكيف الصحراوي للتنظيف
الخطورة فيه لاتقربه لايدك والا تمزح فيه لانه يقطع اليد اشد من الموس صورة الجهاز

http://www.acornonline.co.uk/image_library/library/a/aco/acornonline.co.uk/orig_cold_pressure.jpg

[السومر]

انا بنفسي كان عندي شروكي كلاسيك ومن داخل الظاهر ما عمره تنظف

رحت لساكو وأخذت منه بخاخ تلميع المكينه وتلقى عليه صورة مكينه

وبخيت على المكينه والاجزاء الثانيه مثل ما تقول فضيت البخاخ كله

وبعدين اخذت مكنسه صغيره يدويه علشان سهل تدخل من تحت الاسلاك وتوصل للأماكن الصعبه اثناء التنظيف

وبعدها غطيت الكمبيوتر بكيس وعلبة الفيوز .

وأخذت هوز الماء وفتحته وضغطت على راس الهوز علشان احدد قوة الماء وغسلت المكينه وما حولها من رديتر وغيره وبعدين سكرته

وجبت منشفه لانها تمتص الماء وتمسح مضبوط ونشفت وبنفس الوقت نضفت

وكانت النتيجه ممتازه .

مع العلم الشروكي كان طافي اكثر من 5 ساعات وبعد ما غسلته ما شغلته الا ثاني يوم

لان تنظيفي له كان الساعه 12 بالليل بس النتيجه كانت حلوه وهو كان متراكمه عليه الزيوت

[west]

اخوي ابومسفر

السلام عليكم ورحمة الله


عندي سؤال خارج الموضوع لو سمحت لي

ابي استفسر عن المكان الي ضبطت فيه مسجل اليوكن لان مع موديل 2007 امريكي وابي ابرمج الراديوا


ياليت تقولي مكانه بالرياض الله يجزاك الجنه ويرحم والديك


ما اقدر ارسل لك على الخاص لان لازم مشاركات فوق ال 50

ياليت تفيدني ولك الشكر

[abo_hoor]

وعليكم السلام اخوي ابو مسفر جزاك الله خير علي نصيحه وفيه طريقة سمعت عنها عن طريق بخار وفيه شي دايم اسويه بدون ماي او ديزل بس هوا بروحه ونافع معاي ونشوف طرق شباب وموضوع مفيد ياليت يتم تثبيتة

[ماهقيت]

السلام عليكم
كيفكم يالربع
يالغالي وش يحدك تغسلها ؟؟؟؟ خلها برشتها وعلى فكره كذا مره اشوف الشريطيه بالمعارض يتجنبون اللي تلق نظافه ويروحون للي مغبره.... وعلى ماسمعت انها تضر طبعا من نصايح احد الميكانيكيين السعوديين اللس لهم باع طويل بهالشغله يقول لي حتى اذا جا يرشها العامل عند المغسله ووصل الشبك الامامي لاتخليه يرشها بطريقه عاموديه يعني من الوجه لالالا خله يشطف الشبك بشكل مائل من فوقه او من الجواني لكي لايتعرض الرديتر بشكل مباشر للماء
والله اعلم
تقبل مروري

[ماون ماركز]

السلام عليكم
بعض البناشر يعرض خدمات ربما مجانية لغسيل المكينة ويتم غسلها عندهم بالديزل .
احذركم من غسلها بالديزل لان الديزل يجمع الاتربة والغبار وبدال ما نكحلها اعميناها .


الديزل ممنوع بالمغاسل من زمان !! كيف حصلته ؟؟
http://www.alriyadh.com/2007/07/11/article264003.html
ممنوع من 1433 يوم بأمر الدولة ..



رحت لساكو وأخذت منه بخاخ تلميع المكينه وتلقى عليه صورة مكينه


أنا أستخدمه وهو رائع .. وآمن ..

http://www.shrpic.com/mx/image-52C4_4DF6870A.jpg (http://www.shrpic.com/mx/share-52C4_4DF6870A.html)

ولا يحتاج ماء مضغوط ولا دلك ولا تعب .. بخ وأغسل با اللي

[دل البحار]

التغسيل ينشف بالمكينه لليات والجلد ويخليها ناشفه ويعطبها ويقلل من عمرها الافتراضي والماء يصدي بالمكينه ويتجمع في بعض الاماكن صعب خروجه الا بعد فتره يمديه صدا بالسياره ويبداء الصدا في الانتشار
وغسيله بالديزل خطير حتى من كلام الغسال بنفسه ياكل الديزل الليات والجلد ويسبب فيها عاهه
كمان وقفة السياراه لفترات طويله ينشف الليات والطرمبات والاسلاك والجلد

[* ابو باسل *]

جهاز ضغط الماء ممتاز لداخل الرفارف حق الكفارات وايضا لبتن الموتر يشيل الطين وغيرها بس المشكله هي كيف ترف السياره على شان تنظف بطنها .