استفسار مهم بخصوص الطريق من مكه المكرمه الى مدينة ابها

[عقدني النك]

السلام عليكم ورحمة الله وبركاته

اسعد الله ايامكم
عندي استفسار مهم ارجو الرد علي بالاجابه الواضحه لا الاجابه اللي تشتتني

انا بأذن الله بعد كم يوم بطلع لمكه المكرمه من الرياض وناوي بعدها اطلع لمدينة ابها البهيه

استفساري اولا سمعت ان فيه طريقين من مكه لابها طريق ساحلي وطريق سياحي


مدري وش الافضل بالتفصيل الممل مع ملاحظة اني معي عائله واول مره اطلع الجنوب

وسيارتي صغيره مازدا زوم 3 موديل 2007

والسياره الحمدلله شيكت عليها ونفضتها

مدري عن الطريق وعن نصائحكم وهل السياره بتقوم بالواجب
والا الطرق وعره تحتاج لسيارات اقوى تحمل

فعلا انا محتاج مشورتكم بعد توفيق الله

جزاكم الله خير ووفقني واياكم لما فيه الخير

[سهيل تميم]

اذا تبي المناظر والامطار والجو الزين اطلع مع الطايف..تمر على الباحه النماص وتنومه وبالحمر وبالسمر..

واذا تبي السافي والحر اطلع مع طريق الليث ..الطريق مافيه مشاكل الا انه ممل و يوصلك للدرب ومن عقبة ضلع توصل ابها..

انا ارشح الطريق الاول اذا رايح تمشيه

واذا رايح عجل وبس تبي توصل الطريق الثاني .. والخيار لك

[عقدني النك]

اشكرك على مرورك اخوي سهيل تميم

بس اخوي استفساري بخصوص السياره الطريق فيه وعوره
او هل سيارتي بتوفي بالغرض

انا افضل الاول ابرد واجمل

لكن يهمني في المقام الاول الطريق من ناحية الامان والخدمات والسهوله خاصه ان سيارتي صغيره

[سهيل تميم]

اشكرك على مرورك اخوي سهيل تميم

بس اخوي استفساري بخصوص السياره الطريق فيه وعوره
او هل سيارتي بتوفي بالغرض

انا افضل الاول ابرد واجمل

لكن يهمني في المقام الاول الطريق من ناحية الامان والخدمات والسهوله خاصه ان سيارتي صغيره


كل الطريقين امان ..والطريق الاول فيه مرتفعات لكن ماعندك مشكله سيارتك تجمل وزياده..لكن انتبه اذكر فيه تحويلات بين النماص وتنومه.خبري بها قبل سنه

الخدمات متوفره وانت اساسا رايح تتمشى ..تنومه حلوه ممكن تقضي فيها يوم.

وعلى فكره طرق الجنوب وخاصه بالصيف تكون الحركه فيها كثيره ..يعني ماعليك خوف

[عقدني النك]

يعطيك الف عافيه اخوي واكرر لك شكري

مشكور وماقصرت كنت شايل هم السياره

وخفت من الطريق الاول لاني قريت كثيرين يحذرون منه في المنتديات

ومدري عن الطريق مزدوج او رايح جاي

وكم الفرق في المسافه بين هذا الطريق والطريق الساحلي بين مكه وابها


ومايمنع اني استأنس باراء بقية الاعضاء

وياليت يكون فيه تفصيل للطريقين من ناحية المسافه والمناطق والايجابيات والسلبيات والنصائح بشكل عام

[سهيل تميم]

يعطيك الف عافيه اخوي واكرر لك شكري

مشكور وماقصرت كنت شايل هم السياره

وخفت من الطريق الاول لاني قريت كثيرين يحذرون منه في المنتديات

ومدري عن الطريق مزدوج او رايح جاي

وكم الفرق في المسافه بين هذا الطريق والطريق الساحلي بين مكه وابها


ومايمنع اني استأنس باراء بقية الاعضاء

وياليت يكون فيه تفصيل للطريقين من ناحية المسافه والمناطق والايجابيات والسلبيات والنصائح بشكل عام

طريق الليث اول 80 كيلو تقريبا رايح جاي..والباقي سريع الى جيزان..طوله تقريبا 600 يمكن اقل.

انا رحت معه يمكن اربع مرات ما اشوف انه خطير..لكنه ممل جداً .. والي يبي التمشيه نصيحه لايروح معه كله سافي يلعب بسيارتك .

طريق الطايف ما اذكر بالضبط كم المسافه الاعضاء مايقصرون.

انا ارشح طريق الطايف بنسبة 90%

[طويق 2010]

1- طريق الساحل مكه - الليث - محايل - عقبة شعار - أبها تقريباً 600 ك م
طريق زين مشكلته أنه ممل والعجاج والسوافي أفضل وقت تمشي معه بعد الفجر ولا ينمشى بالليل
2- طريق السياحة مكه - الطائف - الباحة - تنومه - أبها 500-600 ك م طريق حيوي ومنعش
ومناظرة حلوة ويبي له سيارة تتحمل لانه طلوع ونزول وملفات يحتاج إلى التركيز والأنتباه

والله يحفظ الجميع ,,,,,

[عقدني النك]

اكرر لك شكري ماقصرت كفيت ووفيت واشغلتك معي

وفقك الله

وانتظر رد الاخوان بخصوص الطريق السياحي من ناحية المسافه والوعوره لاني ارجع اركز على سيارتي هل توفي بالغرض مع هالطريق الجبلي

لانك بصراحه حمستني لهذا الطريق خاصه اني رايح تمشيه

[عقدني النك]

اشكرك اخوي طويق على مرورك وافادتك

طيب اخوي معنى كلامك بخصوص الطريق السياحي اللي عن طريق الطائف الاخ سهيل تميم يقول ان سيارتي بتجمل وتوفي بالغرض

وانت تقول الطريق يبغى سياره تتحمل يعني سيارتي بتوفي بالغرض في هالطريق ولا مخاطره اني اروح بها

وهل الطريق السياحي عن طريق الطائف مزدوج سيدين ولا رايح جاي

وماهي النصيحه ؟

[الورّاق]

اخوي عقدني النك

ماقصر اخوي سهيل تميم وطويق 2010 كفوا ووفوا .... والطريق الاول اللي من عند الطايف أحلى

انا العام رايح معه بالعائلة وسيارتي النترا ولا أحلى واستمتعنا بالخط والرحلة كانت موفقة

بس نصيحة ياغالي ترا ممشاه في النهار ازين لثلاثة اسباب
- الاستمتاع بالمناظر في الخط
- بعض المرتفعات فيها ضباب إضافةً لكثرة اللفات والمنعطفات
- المسافة من الطائف للباحة من 200 إلى 250 كيلو تقريباً بس بتقطعها في حدود اربع ساعات
الخط ممتع جداً من عقب ماتطلع من الطائف بشوي إلى أن توصل ابها

من أبها ممكن انك تنزل إلى شاطئ الشقيق يبعد عن ابها في حدود السبعين او اقل ما اذكر

ملاحظة
من أبها إلى الرياض حوالي 1000 كيلو وهذا الخط افضل لك من الرجعة للباحة والطائف
الرجعة طال عمرك من ابها إلى خميس مشيط ثم إلى الرياض
الخط سريع مثل طريق مكة بس لاتمشيه في الليل لكثرة الابل خاصةً عند وادي الدواسر والافلاج

والله يحفظكم ويستر عليكم

[عقدني النك]

اشكرك اخوي الوراق على مرورك المتميز

وانا بتجه من الرياض لمكه للعمره وبطلع من هناك لابها والرجعه للرياض من ابها

ان شاء الله

[عقدني النك]

اكرر شكري لكم بس حبيت اتاكد من نقطه ماوضحت لي

الطريق السياحي عن طريق الطائف هل هو مزدوج سيدين ولا رايح جاي

[اشهب .]

الله يوفقك بإذن الله نفس فكرتك

لاكن حنا عزاااب :)