يا هل البرادو Vx ولا مانع من دخول هل الباث فيندر ..طالبين مشورتكم

[الشقردي]

السلام عليكم ورحمة الله وبركاته

واحد من الزملاء يدور له جيب هالايام ويبي جديد وما عنده مانع يوصل الى حدود 120 الف ويسأل عن الجيوب وهو متحير بين ثلاثه سيارات
1- باث فيندر 2005 فل توماتيك:
وهذا أخذت عنه معلومات وافية في موضوع الاخ السياسي ما قصرو
http://www.mekshat.com/vb/showthread.php?t=41365

2- باث فيندر 2006 :
شكله جيد ولكن المشكله في هالسيارة انها مهيب نازله الا عقب 4 شهور على كلام الوكاله وفيه شائعات تقول انه بينزل فليورات ورا وقدام معناه ان الكفرات اللي ورى بتفحج مع الاستخدام زي ما هو واضح في الباجيرو والارمادا, وغير كذا سياره جديده ما جربت في ديرتنا.

3- برادو 6 سلندر VX 2006 :
الشكل الخارجي لك عليه شوي ومرتفع نوعا ما, لكن مواصفاته الداخليه ممتازه وزد على كذا انه تايوتا يعني لك وللزمن وانس القرقعه اللي بتسمعه في النيسان

قلت خل نطرح الموضوع في مكشات اللي بنلقى فيها راعين بخص بهالمواتر وهم اللي بيفيدوننا عن تجاربهم
بالدرجة الاولى, وارائهم حول السيارات أعلاه علما أن الرجال على وجه زواج ومكاشيته خفيفه 2-3 ايام ولا
يبعد.والسيارة يبيها حدود 10 سنين

يالله همتكم الله لا يهينكم ...

[جلاد الصحراء]

نصيحة خذ البرادو وبس.

[يوسف عبدالله]

من تجربة شخصية للباثفيندر 2003 والبرادو 2005 Vx ,, أنصحه بالبرادو

لكن الباثفيندر الجديد ,, مافيه أحد يقدر يعطيك معلومات أكثر من الي بالورق لأن ماحد جربه

[ق ن ص]

انصحك بالبرادو عن تجربه 2006 vx ممتاز بالحيل حتى ماشاءالله في البر ماتحس بالمطانيب ولاغيرها وراسي ومريح وفيه ثلاجه زياده على هذا صرفيته حليله.

[وثاب]

السلام عليكم ورحمة الله وبركاته

حقيقه الاخوان ما قصروا

ولان عندي برادو في اكس 3

ومن واقع تجربه فاني احب ان ادلي بدلوي معكم يا اخوان

بالاضافه الى ما ذكره الاخوان بخصوص البرادو

يتميز البرادو الفئه 3 بمثبت سرعه وهدروليك يرفع وينزل السياره ونظام حماية عند وجود بلل في الطريق او زلق ( مانع للانزلاق ) المرايات الجانبيه تنصفط من الداخل ريموت كنترول للرادو ( شاشه للعرض مثل اللي موجود باللكزس تبين حساب المسافات وحرارة الجوا وقياس الضغط الجوي ومعرفة البنزين بالاضافه الى عدو مميزات في هذه الشاشه ) يعني مواصفات ماهي موجود الا بالــ في اكس ار واللكزس من دون مبالغه هذا غير المواصفات اللي ذكروها الاخوان


محركها قوته نفس قوة اللاند كروزر جي اكس

تفلل تانكي البنزين اذا هو فاضي مره 70 ريال

ومن واقع تجربه انصح بأقتناء هذه السياره المميزه والرائعه

[الشقردي]

الله لا يهينكم ياجماعة ومشكورين كلن باسمه
لكن عندي سؤال للأخ يوسف عبد الله بحكم تجربته للسيارتين (ولا يهونون الربع)

وش لقيت فرق في البرادو عن الباث فيندر يعني
- هل البرادو متماسك أكثر؟
- هل البرادو أريح في المطب؟
- هل تحس ان البرادو أكبر في الحجم بحيث انه يزعج الشخص اللي ما معه عائلة من ناحية سواقته وتوقيفه؟
- هل تحس ان ارتفاع البرادو عن الارض مزعج أو مبالغ فيه أكثر من اللزوم؟

وبالنسبة للبنزين كم تعبيهم وكم يمشيك خط أو ديرة؟

[يوسف عبدالله]

أخي العزيز

سوف أجيب على أسئلتك على حسب تجربتي للسيارتين وعلى حسب مماشي عليهم لأن المشي تقريباً واحد

1- من ناحية التماسك في البر .. البرادو أفضل ,, تحسه قطعه وحده ومافيه أصوات صرصره او طققه ..
والباث وهو جديد حلو لكن بعد 50 الف كيلو بدأت بعض الأصوات تطلع .. صحيح ماهي قويه او مزعجه .. لكن أعتقد كانت بدايه لما ستكون عليه السياره .

2- من ناحية المطب ,,, إذا السياره فاضيه ,, الباث أريح على الخط وفي البر
لكن إذا السياره محملة .. البرادو أريح في المطب من الباث

3- أعتقد هذي اهم ميزه بالبرادو ... ماتحس معك سياره كبيره وتاخذ 7 أو 8 أشخاص ,, لأن التحكم فيها سهل جداً جداً ,,
والباث أيضاً سهل في التحكم .

4- أخوي إرتفاع السياره ميزه وعيب
بشرحلك كيف
في داخل البلد ,, إرتفاع السياره المباغ فيه ماله داعي .. وخصوصاً في ركوب والنزول من السياره
بالرغم من أن هذا الإرتفاع يخلي الطريق قدامك واضح وتحت عينك والسيارات الصغيره ماتحجب عنك الرؤية ,, يعني تشوف الي أمامها .
ومع كذا ,, الإرتفاع الزائد ماله داعي في البلد .

لكن في البر
ياخوي يازين البرادو ويازين إرتفاعه
ماتخاف من شيء يضرب بالسياره من تحت او من قدام او من الخلف
وتطلع طرق قليل جيوب تطلعها
ذكرتي بإجازة العيد الماضيه
كنت أطعس أنا وراعي باث
كلهم يعجبونك بالطعوس
لكن لما حان وقت الجد ,, وأنتهت الطعوس ,, وفيه جبل متوسط أمامنا ,,, راعي الباث وقف لأن سيارته حتضرب بصدامها الأمامي ويمكن تتعلق من النص ,
علشان كذا ماشاف إلا غبار البرادو من جنبه وثواني وأنا فوق الجبل ...

علشان كذا
أنا أفضل البرادو بالبر ,, لأنه بعد إذن الله مايخذلك بأي طريق ممكن سياره تمشيه

وأخيراً من ناحية البنزين
مافيه فرق كبير
لكن الأفضلية لصالح البرادو

×××××××××××××
معليش بزيد أشياء ثانيه
من تجربتي للبرادو vx1
ومن وجهة نظري فضلت البردو لأن :
1- وجود ثلاجة
2- الجير العادي 6 غيارات والأوتو 5 (( الي معي اوتو ))
3- وجود مرتبة ثالثه
4- وجود مكيف خلفي بتحكم مستقل
5- تتحكم بالدركسون بأربع إتجهات (( علشان تقدر تاخذ الوضع الي يريحك ))
6- تتحكم بنزول وإرتفاع الإضائه الأماميه (( علشان لما تحمل السياره ماتوذي خلق الله أو تضطر كل شوي تفتح الكبوت وتغير الوزنية ))
7- دفع رباعي مستمر (( وهذا يعطيك ثبات أفضل وخصوصاً في المنعطفات بسرعه متوسطه ))
8- وسائد هوائيه عدد 2
9- ABS
10- الوكيل أفضل
وغيرها من المميزات الي ماراح تكتشفها إلا لما تجرب هالسياره

على العموم
أنا أقول
لو تجرب البرادو يوم يومين وبعدها تجرب الباث
وبعدها راح تقدر تقرر مين الأفضل بالنسبه لك
لأن كل إنسان متطلبات وإحتياجاته من السياره تختلف عن الآخرين
(( لأني أشوف بعض الجيوب أصحابها ينزلوها مثل الكامري ؟؟؟؟ ))

وفي الختام
لك أجمل تحية

[salehhd]

السلام عليكم
اذا عنده قيمة البرادو يتوكل على الله ويشتري

بس لا ينسى يستخير ومبروك مقدماً

[الشقردي]

الله يجزاكم خير الجزاء

كفيتو ووفيتو

واللي عنده زود لا يبخل علينا

[أبو مسفر]

لوما يجيك من البرادو الا انه مكيفين
وبعدين ما ينتقارن التويوتا بالنيسان
والظاهر ان الاجماع كلنا على البرادو
البرادو لاندكروزر جيب المستقبل

[نمر بن حثلين]

طيب اخوي ورا ما يفكر باليوكن ؟

عملي ومريح ونظرته ازين من كل المواتر الي ذكرت
وسعره 113 الف

[هاوي الله]

برادو خليجي فل كامل استبنه علاق 2 تانكي بنزين لون ذهبي = 140000 ريال = أفضل سيارة دفع رباعي على الإطلاق

[الشقردي]

الاخ نمر بن حثلين

أذكر انه ما اقتنع باليوكن وان ابوه معه واحد 2005 يقول انه كبير علي مرة ولا هوب متماسك قطعة وحدة زي التايوتا

[ابوقاسم]

الباث من السيارات المجربة بالمدينة والبر ولا عليها كلام ولا تقدر تقارن عزمها بالبرادو لانها اخف واقوى ومن واقع تجربة لها اشوفها افضل الموجود واذا على المقعد الثالث تراه سهل و1000ريال تركب لك واحد والمكيف الخلفي تراه 2500 ريال وارتفاع الباث مناسب جدا ولا تحتاج ارفع .........ومن قال ان النيسان يتفكك تراه قديم بالحيل يخوك هذا ما شاف نيسان منذ مبطي يعني الثما نينات واوائل التسعينات والا بس يسمع من رواعي التيوتا 000000000000
انا انصحك بالباث وتراه فل تانكي 63ريال وتعبيه مرتين يمشيك حول 1100كيلو والبرادو فله 140ريال ويمشيك حول1100-1150كيلو والفارق في مصلحة الباث 000000000000عموما هذا اراء من تجارب والراي الاخير لك

[بو خليفه]

يفضل البرادو لأنه سبع أشخاص دفع رباعي دائم و ممكن يكون دفع رباعي بالنسبة 50 لكل كفر و يرتفع و ينزل مثل الأوروبي و تقنيته مثل الجيبات الأوروبية

[Abo Nader]

و الله ما قصروا الأخوان لكن هو أحتياجاته

بعدين أنت قلت يوصل إلى 120ألف أنا بنظري (و أسمحولي يا جماعه)كثيره على البرادو يعني يدور لاند مستعمل و لا باترول جديد

[ملك المجمعة]

السلام عليكم والله انصحك بالبرادو لان الباثفندر يتخرع يعني ما يقعد تيوتا احسن ابوي الحين عنده vxrموديل 99الحين بكمل 8سنين كانه جديد وهذا شوري لك.

[2bo_klod]

السلام عليكم وحمة الله وبركاته

والله انا شاري لي برادو في اكس الفل"3" 2006والله ما يحتاج ثلاجه ,هيدروليك,اضواء متحركه,تعليق يمكن ضبطه "سبورت.سيتي...." ,شاشه تبين لك درجه الحراره والبنزين والضغط.....,مرايات تتصفط من الداخل ,كشافات, دفع رباعي مستمر "يمكنك تغيره الي خلفي او امامي", مثبت سرعه,وخزان تعبيه بـ 75 ريال , و6سلندر ,وفتحه ,.............


والصراح انا طالع به الدهنا قبل كم يوم قعدت حول اسبوعين بر ما شا الله عليه ولا احلا منه


لكن لاحظت عليه انه يطلع صوت هوا من عند الطييق بعد ما رجعت.


وانا لي اخو معه باثفندر 2002 والله ما شاف عليه شي وهو دايم ما شا الله عليه بالبر ومريح ولا يحتاج لكن انا افضل البرادو لانه اريح وصرفيته مهيب واجد لكن يعطيك عزم.



واسمحولي ان كنت طولت عليكم

[riyadh3000]

انا معي برادو 2005 نصيحة خذ برادو ولا تفكر ......... وادع لي

[سدير2008]

أنا أشهد على كلام أخوي الغضي
أنا معي 2003 يمشيني 400كم
إذاكان البنزين فل معلومه
أنا أعبيه فل لايزيد عن 50 ريال
وشكرا....

[أبو الكيف]

لا تتعدى البرادو الخليجي

[slayman143]

برادو خليجي فل كامل استبنه علاق 2 تانكي بنزين لون ذهبي = 140000 ريال = أفضل سيارة دفع رباعي على الإطلاق
مو شرط ذهبي بس خليجي ويفضل (بريمي ) سعة تانكي البنزين 90ليتر 2xيعني 180 ليتر
غير المواصفات الداخليه
أتمنى مايكون ردي متأخر:rolleyes: