اصعب المواقف اثناء القنص

[مخاوي الصقور]

بسم الله
شباب لكل منا حدث له موقف او لأحد من ربعه اثناء القنص
ونريد في هذا الموضوع ان نذكر بعض القصص للإستفاده والمتعه
اما قصتي انا فهي كالتالي :
طلعت انا والعيال للقنص في احد الأماكن الوعره
وحنا كنا اربعه اشخاص
وكانت طلعتنا من يوم ركبنا السياره وحنا فاكينها ضحك مو طبيعي
واللي عالطاره سواق ومايحتاج ومعروف بسواقته
المهم الكلام ذا على طريق الجنوب طالعين من الطائف وبعد مامشانا مسافه
خرجنا من على الخط ودخلنا خبوت بعيده عن الخط يمكن 30 كيلو المهم جينا في منطقه دايم نحصل الأعاقيب والحجل والقهد في هذي المنطقه وهذي المنطقه وعره بشكل ماتتخيله
المهم طلعنا فوق صخره يمكن ارتفاعه 5 متر او اكثر مسطحه بحيث تقدر تطلعها ولكن المشكله في النزول
وسيارتنا كبسوله سريع الانقلاب المهم يوم قربنا بننزل فيه ميله في الصخره وجينا نازلين من عليها
الا والجيب على جنب يوم انسدح والله ياشباب
انا ماعاد يهمني الا خوياي اللي معي ماابي يجيهم ولو مغز ابره يوم انقلب ماقدرنا نطلع الا مع القزازه اللي ورى كسرناها وطلعنا الا وكلنا الحمدلله مافينا ولا شي
جلس واحد من العيال يقول احس بدوخه الا وشوي يوم قال ابي ماي ياشباب
المهم اعطيناه الماي وشرب قلنا يالله ياشباب خلونا نعدل الموتر والله عدلناه بعد ماتعبنا تعب مايعلمه الا ربي
وانا دقني قلبي على خويي هذا اللي جاته دوخه
لان القلبه جات يمه مع انها بسيطه يعني ماكنا مسرعين
قلنا ياعيال اقرب مستوصف او مستشفى والله ونجي في مستوصف ويسوي اشعه وما اشعه ويطلع معاه نزيف داخلي ونقلناه لمستشفى الملك فيصل وتنوم واخذ العلاج اللازم وليومك ذا ماحد درى عن السالفه واذا ساله احد يقول طحت على ظهري وانا جالس عالكبوت حق السياره
والجيب دخلناه محل سمكره لواحد من المعارف وضبطوه وطوالي على الحراج
وقام خوينا بالسلامه
والحمدلله على كل شي
وسلامتكم ,,,
يالله ياشباب نبي مواقفكم.

[عاشق الصحراء]

الحمد لله على سلامتك و سلامة خوياك.
و انتبهو للاماكن الوعرة.

[مخاوي الصقور]

عاشق ماعليك ياخوي جات سليمه بس لايهمك ومشكور يالغالي عالرد
شباب وينكم يعني ماصار عليكم مواقف
:(
:(
:(
:(
:(

[ابو عمر اللاحم]

هلا فيك اخوي مخاوي الصقور :

هذي قصة حلصت لشباب نعرفهم والقصه ما ساوية حقيقه وهي ان ثلاثه من الشاب كانوا في رحلة لصيد الجوني وفي اثناء استعدادهم للصيد وهم يمشون في ارض وعره وكانت معهم شوزن ام خمس كان يسمكها اللي على الباب وكانت الشوزن مشحونه وفي اثناء المشي ومع اهتزاز السيارة ثارت الشوزل فأصابت هذا الشاب الذي كان يمسكها في رأسة اهتال اصحابه واغمي على السائق قام الثالث بقيادة السيارة الى المستشفى ولاكن المصاب فارق الحياة قبل ان يصل الى المستشفى . رحمه الله

وقصص ام خمس الماسوية كثير نأسل الله السلامه .

فلحذر الحذر من التهاون فيها فهي قد تثور من اهتزاز السيارة اذا كانت مشحونه .

وللجميع التحيه والتقدير

[الشيخ]

يا اخ مخاوي الصقور اولا الحمدلله على سلامة خويك موقفكم صعب جدا والحمدلله انكم تداركتم المشلكة بسرعة
بالنسبة لي صار لنا موقف مشابه انا وخوينا هنا بمكشات راعي الحمره وكان معنا ثلاثه بعد على سيارتي جيب شيروكي 2001 كنا في منطة بشمال الكويت ينقال لها الصبية مع شد الصاد وليست الصبية اي البنت وتعني المصب
ما اطولها عليكم انقلبت فينا السيارة لان الارض كانت طين واختل التوازن وطلع الكفر من الجنط وهذا الي قلبنا اول شي سويته تطمنت على خوياي كلهم ثم كل طلع من شباك بابه :) لان القلبة كانت على قمارة السيارة والله عيال الحلال ما خلونا ما اخذنا خمس دقايق الا القوانيص الي بالبر كلهم عندنا وبيننا واحد حس بدوخه ويحس بعوار بالظهر المهم اخذهم واحد ابن حلال وطار فيهم لاقرب مستشفى(والحمدلله بس دوخته جته من الدب الي كان جنبه طاح عليه :) ) وانا بقيت عند السيارة لكن ارتبكت غلطة كبيرة اني بمساعدة الموجودين عدلت السيارة على الجهة الثانية مو على نفس الجهة الي انقلبت منها وهذا تسبب بتلفيات اكثر المهم السيارة راحت تفداك وصلحتها وبعتها

لذلك انصح اي واحد يتعرض لنفس الموقف الله يكافيكم الشر يحاول يعدل السيارة من نفس الجهة الي قلبت عليها

ونتمنى محد يتعرض لنفس الموقف
والله هو الحافظ

[مخاوي الصقور]

الحمدلله على سلامتكم ياشباب ولا بد
يصير كم موقف ماراح تنساهم
وانشاءلله مايصير عليكم موقف يكدر خواطركم يالغالين
اما مسألة البندق انك تخليها على اتم الاستعداد
في السياره فهذا اكبر خطا اما اذا مسكت معك انك تخلي الطلقه في حجرة النار
فلا هنت انك تطلع الماصوره مع القزازه ..
وسلامتكم