المساعد الشخصي الرقمي

مشاهدة النسخة كاملة : تجربتي مع الجيب اللاند كروزر الـ 6 سلندر و 8 سلندر.


بر وعزبة
20/06/2011, 01:14 PM
السلام عليكم ورحمة الله وبركاته

الصراحة والدافع لهذا الموضوع كثرة الكتابات حول الفرق بين 6 و8 سلندر
وكل يوم طالع لنا موضوع جديد وكل يوم واحد كاتب لنا ودي أشتري جيب
6 سلندر أو 8 سلندر ومحتار وش رايكم وش آخذ والصراحة أنا عشت نفس
التجربة يوم جيت أباخذ جيب موديل 2000م قبل ثلاث سنوات
وسألت أهل الشور الطيب ونصحوني بالـ 8 وبعدها بعت الـ 8 وشريت 6 سلندر
ومن خلال تجربتي للسته والثمانية راح ألخص بعض الأمور المهمة ..

وراح نبدأ بالفرق الأول وهو ( السعر )

الـ 6 سلندر أرخص من الـ 8 سلندر بحوالي 15 ألف ريال والصراحة بعد الاستعمال
وعند البيع ما في فرق كلهم ما شاء الله يمشون بسرعة وماهي من السيارات الي
تنشب بالحلق وتغص وأنت ما بعتها الله يذكر بالخير الباجيرو الي كان معي غصه
والله شهرين إلى ان بعته .

الفرق الثاني :( الراحة والقوة وصرفية البنزين )

نجد في الخطوط الـ8 سلندر ملك الجيوب في الراحة والقوة وشيخ ولا يوجد له مثيل
طبعاً مقارنة بالجيوب الي مثله مو يجي واحد ويقول اللكزس هذا شيء ثاني.
والصراحة أنا ماني راعي سرعة الـ 6 سلندر حلو مش بطال لكنه شوي مزعج
إذا تعديت 140ك .
وبحكم إني ماني راعي سفريات كثيرة يمكن تكون مره بالسنة أو مرتين الصراحة
فرق معي السته سلندر داخل الديرة بالخفة والراحة وصرفية البنزين أقل من
الـ 8 داخل الديرة فقط أما الخطوط فالـ 8 أحسن بكثير حوالي 20 ريال لطريق مكة
وإذا عرفنا سرعة الرياض لا تتعدى الـ 80 بسبب ساهر فالـ 6 سلندر أحسن .
أما العزم فالأكيد أن الـ 8 أقوى بكثير من الـ 6 لكن الواحد يفكر إذا ماكان راعي
سرعة يمشي على هونه .

الفرق الثالث : ( قطع الغيار )

الصراحة هذا الفرق الي يستاهل والي جرب مو مثل الي ما جرب الـ 8 سلندر
قطع غياره أغلى بكثير من الـ 6 سلندر وفرق واضح للعيان نبدأ
& بـ الفحمات فرق حوالي 80 ريال .
& الزيت ما في فرق .
& سير التايمن الـ 8 سلندر كل 100 ألف وسعره حوالي مع شغل اليد 1500ريال
أما الـ 6سلندر كل 300 ألف يتم تغيره .
& المساعدات الـ 6 سلندر أرخص بحوالي 50 ريال .
& الهوبات الـ 6 سلندر أرخص بحوالي 130 ريال .
& السيور بأنواعها الـ 6 سلندر أرخص بحوالي 20 ريال .
& عموما الـ 6 سلندر أقل خربات من الـ 8 والي جرب أكيد بيتكلم .

الفرق الرابع : ( الصبر والمطبات والمشي بالطرق الصحراوية والنفود )

الصراحة الـ 6 سلندر زين تحس إنه ددسن تكرفه ما يضره شيء عكس
الـ8 سلندر حساساته كثيرة ويخوف مو زي الـ 6 سلندر أقل حساسات
اما في البر عز الله الـ 8 ماله مثيل لكن الـ 6 مش بطال يجي منه ونفس المطب
ما فيه فرق يسن الـ 6 و الـ 8 سلندر .

وفي الختام الصراحة اتمنى أن أكون رجل محايد بين الـ 6 والـ 8 سلندر
ولا أكون رجال متعصب للـ 6 سلندر أو الـ 8 سلندر
لكن هذه تجربة أحببت أن أنقلها لكم
ولا تنسوني من دعائكم
برق الشمال-
20/06/2011, 01:17 PM
بيض الله وجهك ومقارنة ممتازة جداااااااااااا تقبل مروري
سيف الظفير
20/06/2011, 01:25 PM
كفيت ووفيت يالغالي ولكن بالنسبة لي انا جربت 6 سلندر موديل 2009 ممشاه اقل من 50.000 قير عادي

ما كمل 6 شهور الا وابيعه واشتري 2009 فل الفل 8 سلندر وكلها لاندكروزر طبعاً


والنية على بركة الله بـ 5.7 الجديد

جربته وكرهت موتري
سليمان الربيعان
20/06/2011, 01:41 PM
بارك الله فيك وجزاك الله كل خير ما قصرت
ما شاء الله تبارك الله اسلوب الشرح رائع وجميل
alkitbee
20/06/2011, 01:54 PM
انا لا اوافق في الراي حيث انه لا يوجد وجهه مقارنه بين 6 و 8 من ناحية صرف البنزين والقوه والتحمل والعزم. 8 سيلندر الماكينه تمشي 500000 بدون صرفيه زيت ملحوضه و ذا سافرت مسافات وخصوصا في الصيف بتلاحظ الحراره ثابته......
الصراحه هذا راي من واقع تجربه..
درب الشمالي
20/06/2011, 01:55 PM
الله يعطيك العافية على المقارنة
بس ولو الـ 8 سلندر لحــــــــالة
الجال الطويل
20/06/2011, 02:14 PM
تحياتي للجميع -----انا اقول لاتوجد مقارنه فرق بين الثرى والثريا على شي حصل معنا--مره كنا برحله الى المناطق الجبليه في سوريا ومعنا ال6وال8 والله يابو سته في بعض المرتفعات قعد يباحث بمكانه قلنا الله يستر مايجيبنا عكبسي وعطي الله ابو ثمان يتنقز تقل يمشي حدور فرق واضح ----ترو سيارتي ابو سته-- عن لااحد يحسب ---والسلام
بر وعزبة
20/06/2011, 02:28 PM
انا لا اوافق في الراي حيث انه لا يوجد وجهه مقارنه بين 6 و 8 من ناحية صرف البنزين والقوه والتحمل والعزم. 8 سيلندر الماكينه تمشي 500000 بدون صرفيه زيت ملحوضه و ذا سافرت مسافات وخصوصا في الصيف بتلاحظ الحراره ثابته......
الصراحه هذا راي من واقع تجربه..

حبيبنا أنا ما أقول أن السته أفضل من الثمانية من ناحية القوة لكن من ناحية التحمل أختلف معك
الثمانية حساساته كثيره وتخرب على طول في الطرق الصحراوية
لأنه مهيئ لمدن وليس للصحراء والبر عكس GXR مهيئ للبر والصحراء ونفسه الهدد
قرم العيال
20/06/2011, 02:36 PM
تجربه حلوه .. لكن الكلام هذا عن الجيل القديم .. اعلوم الجيل الجديد !!
ABO AL-HESH
20/06/2011, 05:21 PM
الزين سعره فيه ... وبعد بالمرتفعات ما فيه مقارنه ابد بين 6 و 8 وايضا لا منه نطحك الهواء..
abuslman88
20/06/2011, 05:31 PM
أخوي بارك الله فيك
مجرب 8 سلندر راحة وقلة صرفية وخوي ما شاء الله تبارك الله
6 سلندر زين لكن ثقيل بالحيل
أبو غدي1432
20/06/2011, 06:45 PM
أنا عندي gxr موديل (99)

بصراحة في نظري كرسيدا

ياني أروح عليه وأجي وأطلع فيه أماكن ما تتخيلها .

بسم الله ما شاء الله بعدين خفيف مو ثقيل.

صح ال vxr أقوى منه.

بس بصراحة عاجبني
أطلال نجد
20/06/2011, 07:00 PM
بارك الله فيك أخي بر وعزبة
عز الله أنك ما قصرت كفيت ووفيت
عبادل المالكي
20/06/2011, 08:18 PM
مشكووووووووووووووووو اخوي على الموضوع الرائع
قناص مزاجي
20/06/2011, 10:36 PM
اخي العزيز

ال 6 سلندر افضــــــل اذا كان قير عادي

وال 8 سلندر افضل اذا قير تماتيك

وبحكم تجربتي انا افضل القير العادي
HAS5SAN
21/06/2011, 02:31 AM
بارك الله فيك عندي ملاحظات اهمها =
& سير التايمن الـ 8 سلندر كل 100 ألف وسعره حوالي مع شغل اليد 1500ريال

أما الـ 6سلندر كل 300 ألف يتم تغيره .

موديل 1998 وحتى 2007الـ6 سلندر
لا يوجد فيها سير تايمن فهي ذات مكائن طولية برأس واحد
وفيها ( التورك ) قوة السحب أفضل من مكائن الامريكي
فالامريكي التورك فيه عالي غالبا فتلقاه غالبا 8 سلندر
لكن تلاحظ مافيه زود قوه لكن العزم غالبا ممتاره فيها
بر وعزبة
21/06/2011, 11:36 AM
بارك الله فيك عندي ملاحظات اهمها =
& سير التايمن الـ 8 سلندر كل 100 ألف وسعره حوالي مع شغل اليد 1500ريال

أما الـ 6سلندر كل 300 ألف يتم تغيره .

موديل 1998 وحتى 2007الـ6 سلندر
لا يوجد فيها سير تايمن فهي ذات مكائن طولية برأس واحد
وفيها ( التورك ) قوة السحب أفضل من مكائن الامريكي
فالامريكي التورك فيه عالي غالبا فتلقاه غالبا 8 سلندر
لكن تلاحظ مافيه زود قوه لكن العزم غالبا ممتاره فيها

أخوي has5san
بارك الله فيك على المعلومة الصراحة أنا ما غيرته لكن على كلام واحد من الشباب معه 2002م ويقول غيره بألف ريال والصراحة أحس أن المعلومة جديدة علي لأن كل السيارات الجديدة فيها سير تايمن .

حبيبنا قناص مزاجي

ال 6 سلندر افضــــــل اذا كان قير عادي

وال 8 سلندر افضل اذا قير تماتيك

وبحكم تجربتي انا افضل القير العادي

أوافقك الرأي بقوة ونفس الي معي قير عادي 2006م وسابقأ 2000م VXR تماتيك
imas200
25/06/2011, 12:08 AM
هلا بالشباب
فيه أشياء لازم تتوضح خصوصا في الاندكروزر من موديل ٩٨ إلى ٢٠٠٧

١- القير التماتيك
يمكن يظن البعض أن الاندكروزر قيره واحد سواء كان ٦سلندر ولا ٨سلندر، لكن الأصل فيه أختلاف حتى في الموديلات وبيانها كالتالي

الـ VXR من ٩٨ إلى ٢٠٠٢ قيره أربع تغيرات فقط وكان يخذل قوة المكينة خصوصا في البر.
الـ VXR من ٢٠٠٣ إلى ٢٠٠٧ قيره خمس تغيرات وكان هو القير المناسب والقوي للمكينة في أي الحالات بر ولا خط ولا فزه وكل شي، لدرجه أنه يفز على الثمانيه سلندر قير عادي.
الـ GXR من ٩٨ إلى ٢٠٠٧ قيره واحد ماتغير وهو عباره عن ٤ تغيرات وكان حلو في الخطوط لكن في البر مع إحترامي له كان بايخ (:.


٢- المكينه
نبدأ في المكينة السته سلندر. خلونا نكون صريحين وواضحين، أغلب من كان معه ٦سلندر ومكينته مشت فوق ٢٥٠ ألف دايم يشتكي من جلد البلوف ومشكلة الدخان، ومشكلة الورشة المناسبه لتغيرها بدون فك راس عشان ضعف الشنبر وغيره وشغله يكلف مع القطع حول ٨٠٠ ريال، وبعضهم يضطر يوضب بسبب نقص الزيت، في المقابل مكينة الـ ٨ سلندر نلقاها تمشي ٥٠٠ ألف وفي المقابل لا نقص زيت وولا دخان خصوصا لما نشوف موديلات قديمه مثل ٩٨، الله يعينك بس على سير التيمن تغيره وتشوف لك واحد يوزنه صح. "مع العلم أنا معي ٦ سلندر وأنصح بـ٨"


٣- الاستخدام
دايم سيارات لاندكروزر مضرب مثل في الاستخدام القاسي مثل خصوصا لرحلات الطويله والبر وغيره لكن لما نزلت مكينة الـ ٨ سلندر تخوف الناس منها وأنها حساسات ومن السواليف هذي، والصراحه إلي غنم من شرا VXR وقتها لإنها من جد ماتختلف عن الـ GXR من ناحية الإستخدام بل أفضل منها من ناحية الصرفيه ومن ناحية الراح خصوصا إذا صارت هيدورليك.

بالنسبة للهيدروليك إلي ناس تخاف منه وتحسبه مثل الهمر يطيح على بطنه أنا أقولكم ترا الوضع يختلف تمتا في التايوتا لأن ال VXR معتمد نظام الزيت في المساعدات ويوجد ياي يدعم المساعد عكس النظام الامريكي إلي يعتمد على البالونات، وماننسى الميزه الرهيبة في نظام الـ VXR وهي وجود ميزانيات لإرتفاع السياره، وشرحها كالتالي:
يوجد في اللاندكروزر ثلاث أوضع أرتفاع:
١- نازل جدا
٢- الوضع العادي
٣- الوضع المرتفع

في الوضع العادي تقدر تتحكم بإرتفاع السياره بأي إتفاع ولو تحمل من هنا إلى الخرخير بيكون إرتفاع السياره واحد وتمشي فيها بأي سرعة لكن في الوضع النازل والمرتفع لك سرعه محدد ويرجع على الوضع العادي.

وأيضا يوجد ثلاث أوضاع لوقة ضغط المساعدات:

١- العادي.
٢- المريح.
٣- الرياضي ويستخدم في النفود وغيره.


إن شاء الله لي عوده قريبه للموضوع، تصبحون على خير (:
بر وعزبة
25/06/2011, 10:04 AM
أخوي
imas200
يعطيعك العافية على الإضافة الحلوة
الصراحة معلومات حلوة أول مرة أسمعها
aliwww
02/12/2011, 09:51 PM
يا أخوان ماحد تكلم عن 6 سلندر الجديد ماهو القديم
عشق البر
02/12/2011, 10:54 PM
imas200 كلامك صحيح 100%
انا كان معي vxr 2003 وواحد من اخوياي كان معه vxr 2001 كان موتره بالنسبه لموتري بطه اقوم عليه وانا اضحك وبفرق شاسع
اما ال 2001 ماغير تسمع حنة المروحه وبدون لاعزم ولا فزه
لذلك نصيحه اللي يبي vxr ياخذ 2003 وانت طالع او خذلك قير عادي
HAS5SAN
02/12/2011, 11:04 PM
هلا بالشباب
فيه أشياء لازم تتوضح خصوصا في الاندكروزر من موديل ٩٨ إلى ٢٠٠٧

٢- المكينه
نبدأ في المكينة السته سلندر. خلونا نكون صريحين وواضحين، أغلب من كان معه ٦سلندر ومكينته مشت فوق ٢٥٠ ألف دايم يشتكي من جلد البلوف ومشكلة الدخان، ومشكلة الورشة المناسبه لتغيرها بدون فك راس عشان ضعف الشنبر وغيره وشغله يكلف مع القطع حول ٨٠٠ ريال، وبعضهم يضطر يوضب بسبب نقص الزيت، في المقابل مكينة الـ ٨ سلندر نلقاها تمشي ٥٠٠ ألف وفي المقابل لا نقص زيت وولا دخان خصوصا لما نشوف موديلات قديمه مثل ٩٨، الله يعينك بس على سير التيمن تغيره وتشوف لك واحد يوزنه صح. "مع العلم أنا معي ٦ سلندر وأنصح بـ٨"
(:

الله يعطيك العافيه على كل حال
بالنسبة لما لونته بالازرق
فأنا أخالفك 100% انت كاتب
أغلب لو كتبت بعض ممكن اوافقك
لكن انا اعرف اكثر من شخص
مواترهم مشت فوق 400كم
ماسمعتهم شكو من ها الشيء
ممكن تقصد مكينة الـ1997
ممكن لأنها مشهورة بالدخان
لكن 1998 وحتى 2007
من افضل مكائن تويوتا
والاقل صيانة وكانت تركبها شركة تويوتا
على سياراتها حتى عام 2009
(اقصد الشاص والربع )
لكن بسياسة اقتصادية بحته
إستبدلتها بمكينة الـV6
وهي أنشط من القديمة لكنها
ليست أقوى أسأل أهل البر والحمولات
HAS5SAN
02/12/2011, 11:09 PM
يا أخوان ماحد تكلم عن 6 سلندر الجديد ماهو القديم

القديمة =
قوية , أقل صيانة , أعلى حرارة (تعتمد على الحديد )
أقل صوت , أطول عمر , تستهلك زيت أكثر
الجديدة =
نشيطه , أكثر صيانة ( بسبب أنها V) رأسين يربطهما سير تايمن
أقل حرارة ( تعتمد على الالمنيوم ) , أعلى صوت وأكثر أحصنة
ولا تصلح للاندكروزر
وهي مركبه على =
الأف جي
البرادو
الفورتشنر
الشاص
الربع
ابوسليمان12
02/12/2011, 11:13 PM
انا جربت الست والثمان. بطلعة الغاط الست سرندل اطلع الطلعه وانا مثبت السرعه علا طول يرد نمره والسرعه تقل عن اللي كنت مثبت السرعه عليها اما الثمان والله لاحنه ولا شي ولا يرد نمره ولا يمكن تنزل السرعه عن اللي انا مثبت عليها
HAS5SAN
02/12/2011, 11:15 PM
imas200 كلامك صحيح 100%
انا كان معي vxr 2003 وواحد من اخوياي كان معه vxr 2001 كان موتره بالنسبه لموتري بطه اقوم عليه وانا اضحك وبفرق شاسع
اما ال 2001 ماغير تسمع حنة المروحه وبدون لاعزم ولا فزه
لذلك نصيحه اللي يبي vxr ياخذ 2003 وانت طالع او خذلك قير عادي
الـVXR
من 2003 وحتى 2007
يزيد عن من قبله بـ40 حصان
القير فيه يتكون من 5 نسب قصيرة
وإلي قبله 4 نسب طويله
القير العادي من 1998 وحتى 2007
لا يختلف على قوته إثنان
لكن من 2003 وجاي
اصبح الاوتو يجاريه في القوة
ولمن يرغب في السرعه
عليه بفصل الدفع الرباعي المستمر
وسوف يختلف الـVXR عنده بنسبة 180 درجة
HAS5SAN
02/12/2011, 11:20 PM
على فكرة ,,,,,, مكينة الـVXR
من 1998 وحتى 2011
هي نفسها مع بعض التعديلات
لزيادة عدد الأحصنة
بالاضافة لإختلاف القير لزيادة القوة
وهي موجوده على الـGXR الـV8
من 2008 وحتى 2011
أيضاً على جيب اللكزس LX
من 1998 وحتى 2007
أبوعلي 503
06/12/2011, 02:52 PM
كلام سليم 100%
- النشمي -
06/12/2011, 03:19 PM
اخي العزيز

ال 6 سلندر افضــــــل اذا كان قير عادي

وال 8 سلندر افضل اذا قير تماتيك

وبحكم تجربتي انا افضل القير العادي




+1

هذا هو الكلام الـ 6 سلندر القير العادي طير بر وافضل من الـ 8 سلندر :good2:
عشق البر
07/12/2011, 12:18 AM
الـVXR
من 2003 وحتى 2007
يزيد عن من قبله بـ40 حصان
القير فيه يتكون من 5 نسب قصيرة
وإلي قبله 4 نسب طويله
القير العادي من 1998 وحتى 2007
لا يختلف على قوته إثنان
لكن من 2003 وجاي
اصبح الاوتو يجاريه في القوة
ولمن يرغب في السرعه
عليه بفصل الدفع الرباعي المستمر
وسوف يختلف الـVXR عنده بنسبة 180 درجة

نفس خويي اللي معه VXR 2001 فصل الدبل وخلاه خلفي بس وصار الدبل يشبكه من الزر
ولكن يقولي انه الموتر مافرق ذاك الفرق اللي يسوى شي مايذكر يعني (ممكن بسبب قيره المخيس)

الشي الوحيد الايجابي فيها على كلام الرجال الصرفيه قلت بشكل نسبي
ولكن مهي بشكل 180 درجه وانا اخوك :)

انا اقولك الكلام هذا ومهب انا اللي جربت هذا كلام واحد مجرب

وسلامتك....
مزدهر
07/12/2011, 09:25 AM
القديمة =
قوية , أقل صيانة , أعلى حرارة (تعتمد على الحديد )
أقل صوت , أطول عمر , تستهلك زيت أكثر
الجديدة =
نشيطه , أكثر صيانة ( بسبب أنها V) رأسين يربطهما سير تايمن
أقل حرارة ( تعتمد على الالمنيوم ) , أعلى صوت وأكثر أحصنة
ولا تصلح للاندكروزر
وهي مركبه على =
الأف جي
البرادو
الفورتشنر
الشاص
الربع


أخالفك أخي المحرك الجديد الستة سرندل للاندكرزو والأفجي والبرادو وغيره لايوجد فيها سير تيمن وإنما جنزير لايغير
مشعل 884
07/12/2011, 09:45 AM
شريت اثنين ست سرندل وثمان سرندل

بصراااااااااااااااحه لاتعليق ولايوجد مقارنه بينهن

ال 8 سرندل شيخ بكل شي وصرفية البانزين على الدعسه وال8 سرندل على الخط مايصرف بانزين

وانشط وافضل واخف اما ال6 سرندل انصح الي يبي 6 سرندل انه يشتري برادو افضل واخف واقسط بانزين



بصراااااااااااااااااحه لحد يقارن ويقنعن الثمان افضل بكل شي
المحجوبي
07/12/2011, 10:19 AM
بيض الله وجهك ومقارنة ممتازة جداااااااااااا تقبل مروري
ابو محمد 2011
07/12/2011, 03:37 PM
اسمحلي يا الغالي يعني تبي تثبتلي

ان 8 سلندر خرباته واجده وان 6 سلندر افضل منه
اسمحلي انا معي واحد والله الحمد لله ما اشتكيت منه

ومشكلة 6 سلندر ازززعاج ويالله يمشي

وفيه ميزة عند الفي اكس ار اللي هو نظام الزحف هذا يعتبر افضل من الدفلوك
الذيب 502
08/12/2011, 04:35 AM
كلش مع العافية زين

سواء السته ولا الثمانية

وكل شخص له معايير و مقاييس تختلف من شخص لآخر

وكل منا له استخدامة و طريقة تفكيره ,

لكن الثمانية شيخ
YUKON_GMC
08/12/2011, 06:28 AM
ماقريت الردود ... لكن العزم في النفود والقوه للـ 8 سلندر السته احيانا يطفي في التغاريز

لكن للمدينه السته افضل وارخص قطع

يقولون توضيب الـ 8 سلندر يكلف 12 ألف وال 6 سلندر يكلف 7
مخطط 2008
08/12/2011, 08:50 AM
يعطيك العافية على التوضيح
والحقيقة لو تصنع شركة تايوتا سيكل كان استعملنة وفية دعاية طلعت قبل 20 سنة تقول تايوتا وبس
وانا استعملت حوالي 6او 7 سيارات تايوتا ماشكيت منها ابداً كرسيدا هايلوكس جيب جي اكس
ام الموضوع الفرق بين ال 6 وال 8 ماجربت ال 8 والحقيقة ال 6 ثقيل دم شوي خاصة التماتيك الا في حالة التحميل يعني انا سافرت العام الماضي وحطيت شبك في الخلف ياخذ 700 ك ومع الخطوط مريح جد اً صحيح مايمشي الا 160 لكن مرتاح ام اذكان فاضي وقدام هواء يمكن توقف وتخلية
volcano
08/12/2011, 11:03 PM
القديمة =

قوية , أقل صيانة , أعلى حرارة (تعتمد على الحديد )
أقل صوت , أطول عمر , تستهلك زيت أكثر
الجديدة =
نشيطه , أكثر صيانة ( بسبب أنها V) رأسين يربطهما سير تايمن
أقل حرارة ( تعتمد على الالمنيوم ) , أعلى صوت وأكثر أحصنة
ولا تصلح للاندكروزر
وهي مركبه على =
الأف جي
البرادو
الفورتشنر
الشاص

الربع


ياخوي مدري من وين جايب الكلام هذا .. مافي محرك قديم او جديد وحتى مكينة الدباب الا وفيه سير تايمنغ بعضها ربر وبعضها حديد جنزير واسأل اي ميكانيكي وظيفة السير ربط حركة صمامات الراس البلوف وتوقيت الاشعال مع حركة المكابس ..
ابو رائد نت
08/12/2011, 11:24 PM
الله يكتب الخيره والله كلا يمدح وكلا يسب لكن مافهمت شي انلحس مخي
HAS5SAN
09/12/2011, 12:11 AM
ياخوي مدري من وين جايب الكلام هذا .. مافي محرك قديم او جديد وحتى مكينة الدباب الا وفيه سير تايمنغ بعضها ربر وبعضها حديد جنزير واسأل اي ميكانيكي وظيفة السير ربط حركة صمامات الراس البلوف وتوقيت الاشعال مع حركة المكابس ..


إييييييييييييه
اجل صحح معلوماتك أنت وأي ميكانيكي
الهايلكس الـ1979 مايجي في مكينتها
http://im10.gulfup.com/2011-12-08/1323378485151.jpg
لا جنزير ولا سير تايمن
هذا هو الرابط
http://t2.gstatic.com/images?q=tbn:ANd9GcRd2hzzJKyNxv4PRm1h30tOdi0qJ-kh_-PJzQZpAoQFhTkQijLUEDm1tOt6oA
يعني طلعت افضل من دبابك :good2:
رياح الشرق1
09/12/2011, 02:13 AM
انا اقول بما انك مجرب ال6 و8 ما ادري والله وشلون اقتنعت ب6 فعلا وش جاب الثريا للثرى يا رجال انا مجرب ال6 وال8 صدقني يا ال8 اقل اعطال من ال6 بعدين ابي اسالك انت جربت ال8 با الطعوس او باي ارض غراز وجربت 6 بــــــــــــــــــس هذي تكفي
volcano
09/12/2011, 03:52 AM
إييييييييييييه





اجل صحح معلوماتك أنت وأي ميكانيكي
الهايلكس الـ1979 مايجي في مكينتها
http://im10.gulfup.com/2011-12-08/1323378485151.jpg
لا جنزير ولا سير تايمن
هذا هو الرابط
http://t2.gstatic.com/images?q=tbn:ANd9GcRd2hzzJKyNxv4PRm1h30tOdi0qJ-kh_-PJzQZpAoQFhTkQijLUEDm1tOt6oA


يعني طلعت افضل من دبابك :good2:


متوكد يالحبيب ;)
http://store2.up-00.com/Dec11/H6f91034.jpg (http://www.up-00.com/)

http://store2.up-00.com/Dec11/lZo91034.jpg (http://www.up-00.com/)
YUKON_GMC
09/12/2011, 02:11 PM
يعني توقفت المقارنه على سير او جنزير او ترس تايمن ؟؟ هذه غير مهمه وأغلب السيارات فيها احد النوعين .. وماتفرق كثير ..


السير او الجنزير يكد ويمد وتغيره سهل عند ادنى ميكانيكي يفك الصدر ويركبه
عريدان
14/12/2011, 08:25 AM
الزبده هنا كما قال أخونا قناص مزاجي
ال 6 سلندر افضــــــل اذا كان قير عادي

وال 8 سلندر افضل اذا قير تماتيك

وبحكم تجربتي انا افضل القير العادي
aliwww
30/03/2012, 01:39 PM
كفيت ووفيت يالغالي ولكن بالنسبة لي انا جربت 6 سلندر موديل 2009 ممشاه اقل من 50.000 قير عادي

ما كمل 6 شهور الا وابيعه واشتري 2009 فل الفل 8 سلندر وكلها لاندكروزر طبعاً


والنية على بركة الله بـ 5.7 الجديد

جربته وكرهت موتري

ممكن تعطينا الاسباب اللي خلتك تغير وهل جربت الاثنين في البر وصعود الجبال
aliwww
05/06/2014, 09:48 AM
لازلنا ننتظر الرد
أنصر نبيك
05/06/2014, 11:11 AM
موضوع جميل لكن عن موديلات 2011 المعلومات تحتاج ابديتنق
أنصر نبيك
22/08/2014, 01:28 AM
موضوع رائع يستحق الرفع لتحديثه والاستفادة منه
أحمد أبوعلي
22/08/2014, 05:58 AM
بالنسبة ل ستة سرندل جربت تماتيك gxrوجربت العايديGX
الفرق بينها في القوة والعزم واضح جداً
الGX انشط بكثير
وأما ثمانية سرندل vxr ما فيها كلام إنه إنشط منها كلها
وخاصة في المرتفعات والعقبات
والسلام عليكم
BoFlanQ
22/08/2014, 10:27 AM
معاي vxr 99 وارد اليابان 8 سنلدر

شو رايكم افصل الدبل المستمر ولا اخليه ؟


وكيف انزل او ارفع الموتر .. هل بتبديل الجاميين او في طريقه معينه مثل الجمس تشد مسمار من قدام
هارون97
22/08/2014, 01:33 PM
اخي العزيز

ال 6 سلندر افضــــــل اذا كان قير عادي

وال 8 سلندر افضل اذا قير تماتيك

وبحكم تجربتي انا افضل القير العادي
صقر العثمور
22/08/2014, 01:52 PM
شكرا اخي على هذا التوضيح وربي يعافيك ويجزاك خير الجزاء