تكفون يالربع

[ذهلان 1]

سلام عليكم جميعاً
الله لا يهينكم أبي فزعتكم يالنشاما
عندي V X R 2000
حصل له مشكلة تقطيع بالسرعات المنخفضة خاصة داخل المدينة أما السرعات العالية لا توجد
المشكلة حدثت بعد ما عبيت بنزين من محطة الله لا يوفق راعيها
غيرت بواجي <<<<<<<على بالي مهندس طلعت ؟؟؟؟؟سليمة
نظفت صفاية البنزين ما فيه فايدة لا تزال المشكلة قائمة<<<<<<<<مدرس عربي
قال لي واحد من الشباب <<<<<<مسوي نفسه مهندس علي المشكلة بالبخاخات
محتار أبي فزعتكم وإذا أحد يعرف ورشة مظبوطة بالرياض يدلني عليها وله صادق دعواتي
شكلي بروح فيها بين الورش والوكالات
تحياتي للجميع

[السكروب]

لا تستعجل على الفك والربط اصبر شوي الين يخلص تانكي البنزيين وبعدها عب من محطه تثق فيها وانشالله تضبط الامور

[محتري السيل]

عز الله الي بيشرشحون موترك ذالميكانيكيه هذا أذا ماغيرو لك المكينة ههههههههههه

وأن طعتني وده للوكالة هم ادرى بالمشكلة

أو وده للوكالة وخذ المهندس على أنك بتصلحه عندهم وأذا عرفت المشكلة بالضبط

قله أجيكم بكره أن شاء الله .... وأطرف ورشة وصلح عندهم أرخص

وترى هذي طريقتي دائما مع الوكالات ... آخذ منهم الأستشارة المجانية وأعطيهم ركبه

وأعتقد ان البنزين اللي عبيته وسخ وآخر التانكي حق المحطة ..... الله يبلاهم

ففيه أحتمال سدد في مكان ما ... وكان الله في عونك

[نمر بن حثلين]

في الليل وقف الموتر بمكان اظلم وافتح الكبوت
وناظر اسلاك البواجي يطلع منهن تهريب ولا لا ؟؟

يمكن هن السبب

[ابن بدران]

وعليكم السلام

إن كانك ياخوك محدود على الورش عندك ورشة الضحيان بالصناعية القديمة
على الشارع العام (تفتح غرب) بعد السالم للزجاج ..
لي أكثر من 12 سنة معاملهم ما شكيت منهم ولا مرة ولا يشتغلون الا تويوتا بس .
والقطع منهم بعد اصلية مضمونة ..
مديرها سوداني اسمع عبد الرحمن عطه الموتر بس وازهله .
إذا ما عرفوا وش العلة قالوا لك ما نعرف دور غيرنا ..

يعلم الله مالي بهم أي علاقة الا سابق تجربة بس وحبيت افيدك..

[ذهلان 1]

الأخوة الأعزاء:
السكروب
محتري السيل
نمر بن حثلين
ما قصرتو وبيض الله وجيهكم على شعوركم الطيب
تحياتي لكم جميعاً

[ذهلان 1]

الأخ العزيز:
ابن بدران
للأمانة رحت لورشة الضحيان على نصيحتك وقابلت السوداني وفحص السيارة مع المهندس الباكستاني وقال وقف السيارة وتعال العصر تلقاها جاهزة وفعلاً رجعت على كلامه ولقيت سيارتي تمام والحمد لله
والشغلة كلها كويل واحد من البواجي غيره وياسلام سلم 280 ريال بس
بيض الله وجهك على النصيحة ورحم الله والديك
تحياتي لك

[ابن بدران]

ووجهك أبيض وجزاك الله خير على دعواتك

مانصحت لك ياخوك الا نصيحة اخو مجرب

واذكر مرة واحد من الربع كان عنده رجة بجيب تويوتا 93 ما عرف وش علتها
صفت له ورشة الضحيان وراح لهم وغيروا له العمود بحوالي الف وخمس مية ولكن
الرجة ماراحت رجع لهم فكوا العمود ورجعوا له عموده الاول وعطوه قروشة على طول ...

الله لا يهينك والحمد لله اللي انحلت مشكلتك وعساك ما تشوف شر ياخوك