المساعد الشخصي الرقمي

مشاهدة النسخة كاملة : محتار بين تاهو او gxr v8


بو شوق
23/06/2011, 01:09 AM
السلام عليكم ورحمة الله وبركاتة
العنوان واضح ياأخوان ودي بموتر مريح ورزه وخاطري فيgxr.
وعندي خويي جرب gxr2003 والحين معه تاهو2011وينصحني بتاهو.
والمبلغ الي معي يجيب لي تاهو جديد .لكن gxr لازم أكمل المبلغ أقساط.
وش نصيحتكم ياأخوان
مسير عليهم
23/06/2011, 11:45 AM
اذا تبي راحة نفسك ومركب مريح خذ تاهو وابعد عن اللاند
الحمدآن
26/06/2011, 05:56 PM
الاند تاخذه غالي وتبيعه غالي !

اذاا انت راعي بـر خذ الاند ... لكن اذا راعي مدينه خذ التاهو ... وكلهن زينات
الحزوبر
26/06/2011, 05:59 PM
خذ التاهو ونحش عن الاقساط
بو شوق
01/07/2011, 02:29 AM
الخاطر لاندكروزر هل فيه عيوب
mhmd nor
02/07/2011, 09:06 PM
خذ التاهو ونحش عن الاقساط

رآآيي من رآآي اخوي
زيــآدِ
02/07/2011, 10:04 PM
تبي موتر صح GXR v8 كمل المبلغ وتوكل على الله ( الجيب شيك تشريه غالي وتبيعه غالي )

التاهو ما انصحك تآخذه والرأي الأول والاخير لك
بو شوق
22/07/2011, 03:40 AM
أنا شفت ردودكم اوكي نقول تاهو هل فيه عيوب مصنعيه
* ابو باسل *
22/07/2011, 01:16 PM
والله يدوخونك العالم خذ الي رغبتك انت فيه شخصياً .
وبخصوص الامريكي اذا فيه عيوب ياخي شركة تويوتا الحين عيبوها اكثر من اي شركة اخرى وكفايه انها صيني في صيني .
بو شوق
24/07/2011, 02:27 PM
تبي موتر صح GXR v8 كمل المبلغ وتوكل على الله ( الجيب شيك تشريه غالي وتبيعه غالي )

التاهو ما انصحك تآخذه والرأي الأول والاخير لك

كلامك صحيح الله ماشفنا بالعقل عرفناه.
شوف رابطة التاهو واليوكن كله مشاكل.
شوف رابطة GXR لهم أيام مافي مشاركات الا الموديلات القديمة.
مسير عليهم
25/07/2011, 10:28 AM
مع احترامي لك وش المشاكل اللي تشوفها في التاهو وتعتبر مشاكل ميكانيكية
تاهو ياهو
01/08/2012, 10:26 AM
تفكر بالبيع لاند
ما تفكر بالبيع تاهو

السيارات الأمركية خاصة الجمس ومن بعده شفر تاهو وسلفرادو
ماحد يقدر يطلع عليهم عيوب تقلل من الجودة

خذ تاهو وإذا لك خاطر يوكن أرز
وسلامتك
ابو الجموس
04/08/2012, 05:19 PM
اللاند طاحت هيبته خلاص صار زي الزفت الحين خذلك تاهو وريح نفسك
Lover gmc
04/08/2012, 06:17 PM
اذا على السعر عند البيع

يوم كنت ادور سياره , لقيت تاهو ماشي 70 الف موديل 2011 اسود

ماجاه شي على كلامه ومسيوم بـ 134 الف , يعني ماطاح كثير سعره جديد على وقته ب 140

طبعا دبل ,,

الامريكي الحين مكتسح السوق ويمسك سعره زين , ولو خسرت بالكثير 5 الاف حقت الاستخدام

التاهو فيه كل مميزات الجي اكس ار واكثر بكثير

لكن ميزه الجي اكس ار بالنفود احسن , الباقي تاهو
لسان الحقيقة
04/08/2012, 06:27 PM
اذا انت راعي بر و خلافه فلا تتعدى اللاند ويفضل الخليجي ..
التاهو سيارة مدينة وسفر وبر على خفيف ..
تميم2222
04/08/2012, 06:35 PM
وانا اخوك ..... وبصراحه هذا زمن .. لا لكزس ولا باترول ولا يوكن.... اللي يبي يكشخ صدق .. ياخذ من هالمواتر المميزه يا مرسدس ولا الشركات الفاخره .. السياره اذا انتشرت معد لها الا معنى .... انها الكل يطولها يعني قوله كشخه راااحت ... وسلااامتك
سعد القاسم
05/08/2012, 09:56 AM
التاهو بدون مقارنه

استخدمه لي ازود من سنتين وفي البر والمدينه بس مجهزه لهذا الغرض ولي موضوع كاتبه قبل فتره لعله يفيدك

طرحت فيه تجربتي وخلاصه كامله
على هذا الرابط

http://mekshat.com/vb/showthread.php?t=515756

وفقنا الله واياك
تيرنيدو
15/08/2012, 02:56 PM
اللاند مشاكله خفيفه وسهله وقطعه بكل مكان ونوعا ما سعرها معقول
التاهو قطعه نااااار وخذ العلم
وقبل تشتري
رح للقطع الغيار واسال عن القطع اللي ممكن تتغير مثل دينمو سلف طرمبه مسساعدات جلد وخلافه وقارن بين الاثنين وراح تعرف الفرق

غير كذا اللاند متمااااااسك ويعطيك جوك بغيته بر والا مدينه

والراي لك
أطلال نجد
16/08/2012, 04:35 AM
إذا أنت راعي بر و خلافه فلا تتعدى اللاند ويفضل الخليجي ..
التاهو سيارة مدينة وسفر وبر على خفيف ..

كلام خبير وفاهم :good::good::good:
سلطان1977
21/08/2012, 03:50 AM
كل عام وأنت وبخير
وعسى الله يوفقك للي فيه خير لك ولعيالك

شوف أخوي أنا بعطيك تجربة شخص مجرب المواتر والله الشاهد

اللاند سيارة سعرها غالي وتبيع بغالي ولكن (وحط تحتها مليون خط)
في الراحة دمار والله يتعبك ويكسر ظهرك وإذا معك عائلة فمالهم إلا الضيق والحشرة ولو معك شايبك ولا عجوزك ما راح يرتاحون فيه خصوصاً في المشاوير الطويلة. والموديلات الجديدة والله وأنا أخوك الجودة من جنبها وهذا اللي شفته في وارد عبداللطيف جميل وأبسط مثال، أنواره اللي تهتز لا مشيت على عيون البس ولا على ردميه ولا أكلت لك مطب!. أما في البر الموتر بكل تأكيد زين (((((لكن))))) ثقيل بالحيل وعلى إن الكفر حقه عريض 285 مم إلا إنك لابد تنسم غصب عنك.

التاهو، موتر ينشد به الظهر وخصوصاً من 2009 وأنت طالع. قوة وفخامة ورحابة وللعائلة ما في مثله، وإن بغيته بالبر أبشر بسعدك وخله على يمناك وما يخذلك بإذن الله، أنا معي يوكن 2011 وتوني مسوي له صيانة 50 ألف والحمد لله من يوم طلعته ما لاحظت عليه مشكلة وحده تعذرب بالموتر. وللعلم أنا راعي بر وكشتات وعزبتي بالسيارة ما تنزل لا بصيف ولا بشتاء وأستخدمه للداوم وللبيت وللسفريات. يعني من جد محلل والدينه. أعيب فيه شيء واحد بس وهو أن الصدام الأمامي نازل شوي فإن كنت تبي تستخدمه في طرق صخريه يبغالك تاخذ حذرك. وبنفس الوقت تقدر تاخذ تاهو z71 المخصص للطرق الوعرة أرفع بشوي من الاستاندرد لكن طبعاً المساعدات حقته والهيئة السفلية تختلف عن الاستاندرد وهو نوعاً ما أقسى من الاستاندرد

من جهة ثانية ال GXR V8 مكينته أضعف من مكينة التاهو وهنا من واقع تجربة تفرق معك كثير سواء على خط سريع ولا بالبر ومرقى الطعوس

وفي الأول والأخير، القرار بيدك أنت صل لك ركعتين استخاره وتوكل على الله. وبالتوفيق في جيمع الأحوال.
GABER65
26/08/2012, 01:21 PM
اذا انت راعي بر و خلافه فلا تتعدى اللاند ويفضل الخليجي ..
التاهو سيارة مدينة وسفر وبر على خفيف ..
adel337
02/09/2012, 03:59 PM
أقول يالحبيب ترا رضاء الناس غاية لاتدرك ...وكل واحد له رائ حسب تجربه ..أو سمع من الناس
عليك بالأستخاره وان شاءالله ماتخسر ...هدا أهم شي
اما ادا انت تبغى السياره لطلعات البر والهجوله المستمره خد لاند ولاتشاور
.وادا انت صاحب عائلة وسفر وروحات وجيات لمسافات طويلة انت والأهل وطلعات بر حتى لو باستمرار بس بعقل مهو زي شغل المتهورين خد التاهو والله انك ماتندم تراه سياره ماعليها غبار ..والرائ لك
adel337
02/09/2012, 04:03 PM
نسيت أقولك ترا مافينا واحد يدفع الأف مألفه عشان يرز خشته في السياره لوحده ههههه ترا الهدف راحة اهلك عشان يدعوا لك أن شاءالله بالخير ...تاهو وبس الله يختار لك الخير ويحفظك باللي تاخده انت ومن يعز عليك ....
خالد الحفر
02/09/2012, 05:05 PM
الحمد لله موتري يوكن ومرتاح عليه ماحطيت به شي لهلحين واكده كد

اما بالنسبه تبي تشوف راينا فالراي لك بالاول والاخير يعني روح محل تاجير سيارات
الجمس ب 500 ريال يوم كامل
والاند ب 600 ريال يوم كامل
وكلها 1100 ريال احسن لك من خساره كبيره جرب الموترين وشوف بنفسك ايهن اللي ترتاح له
سارق الكحل
10/09/2012, 01:18 PM
انا جربت الاثنين

اليوكون مريح لابعد حد في السفر ( ماشاء الله من الدمام ماطفى إلى في مكة ومكيفه ماطفى طول الخط ) لاحرارة ولا إزعاج وعيالك مرتاحين توصل وانت باقي نشيط ماهو متكسر ولا تحس بتعب الخط
وبالبر حق خذ موتر بس نسم هواء والله مايرده شي لكن فك اللحية الي تحت لانها تحك

نجي للاند بالخط عشان مانظلمه الصراحه مريح ويمشي بالخط لكن الاسيات ماهي ذيك الراحه وخاصة وراء
بالبر ثقيل شوي وخاصة 6 سلندر بس يحن مكانه
اذا بتاخذ لاند خذ 8 سلندر

ترى انا مثلك كنت محتار وش أخذ لاند والا يوكن وبالاخير رسيت على اليوكن ولكن ندمت على اللون اني مازدت الفلوس وأخذت لولؤي