استفسار يانشاما انا مسافر اليوم للامارات وش تنصحونا فيه مع الوسيع ولا مع حرض

[ملهوف البرق]

سلام عليكم ورحمة الله وبركاته
حيا الله المكشاتيين
اخوانا انا بأذن الله اليوم ماشي الامارات وودي بشورتكم
اروح مع منتزه سعد الهفوف ولا مع حرض وكم يطيح من كيلو مع حرض
وهل طريق حرض زين

[Al3rands]

نصيحة اخو اذاكنت مستعجل مرررررررررره عندك ط حرض بس ما انصحك فيه رمال وتريلات ومقطعه واقول لك ترا مافيه امن طرق لو لاقدر الله صار شي ماحد معطيك وجه وترجع لنا بالسلامه

[ملهوف البرق]

لا والله ياغالي منيب عجل ومعي عائلتي
بس تخبر يبي يختصر الواحد ودام المسألة فيه
تريلات ومضغوط وكثبان رملية اروح مع منتزه سعد
بارك الله فيك اخي

[غلطه ثمنهاروح]

السلام عليكم...
نصيحتي لك يالغالي طريق سعد حتى لو تزود عليك المسافه
بس تكون مرتاح وآمن لك . درب السلامه اخوي
وفالك الخير بوجهك .

[ملهوف البرق]

اشكرك اخي على النصيحه
وبارك الله فيك وهذا عين العقل
لو زياداه 200 كيلو بس امان وانت مرتاح افضل بمائة مره

[ولد جلاجل]

شف كانك عائلة رح مع الهفوف

وكانكم شباب رح مع حرض وما عليك ان شاء

والفرق ترى بسيط حول 100 كم

تروح وترجع بالسلامه وترفق بالخط

[الصمان 2]

مع الهفوف أفضل 100 مرة .


ولا تنسى تعبي بنزين قبل الدخول للإمارات .


موفق يالغالي .











.

[ابوضيف الله]

حرض يختصر عليك 100كيلو لكن الوقت اللي بتقطعه فيه اكثر من طريق الاحساء بسبب
1-كثرة التقاطعات الخطرة
2-الرمال الزاحفة لازم تكون حذر اذا بقى على الحدود 140كيلو
3-كثرة التريلات
4-الازفلت مكسر وحفر
5-مطبات بطريق دولي (كيف تجي مدري المهم اني كليتها لان مافيه لوح تحذيرية)
6-قلة المحطات والمحطات الموجودة مافيها بنزين الا91بس
7-مافيه مراكز لامن الطرق الا واحد بعد ماتطلع من الخرج بحدود 90كيلو اذا ماكنت غلطان
ماتشوف سيارات امن الطرق بالمرة
8-وفوق كله غير امن (موظف الجوزات قال لي من الرياض قلت له ايه قال نصيحة لوجة الله لا تروح مع حرض قلت ليه قال اكثر من شخص جاهم على الحدود مطرود من قطاعين طرق والله اعلم )
9-فيه مناطق مافيها تغطية جوال (ابراج)
طريق الاحساء سيدين محطات امن طرق صحيح انه زود ب100كيلو لاكن اريح وتاخذ المسافة اقل من طرق حرض لانك ثابت على نفس السرعه عكس طريق حرض

[ديرتي نجد 999]

انصحك بطريق الاحساء --- والفرق كله 100 كيلو

[koogak]

اطلع مع خط الشرقية لين يجيك مخرج جودة
بعدها افرق يمين للهفوف
بيجيك دوار قبل الهفوف خذ طريق المطار عشان ما تدخل البلد
وبعدين على سلوى من الهفوف الى سلوى خلك حذر من شباب قطر المتهوريين
ومن سلوى على البطحاء

درب السلامه ان شاء الله

[صقار الوشم]

يالغالي انا انصحك مع مفرق سعد ممتااااز جداً... وسبق ان رحت معه
وتروح وترجع بالسلامة انشاء الله

[سييرا2002]

الرجال سافر ورجع يمكن ثلاث مرات وما زال للحديث بقية :)

[سعد النفيعي]

السلام عليكم ورحمه الله وبركاته
كل عام وانتم بخير
فيه مثل يقول( ما خاب من استشار)
وانت انا شاء الله انت منت بخايب مادم انك في منتدى مكشات اللى كل العلوم الغانمه
لكن زي ما قالو الاخوان الهفوف افضل وانا و الله ما اعرف ذيك الديار لكن اسمع عنها
وخلك مع راع المثل اللى يقول ( الدرب السمح ولو طال )
وصلو النبي المختار
وتقبل مروري