ياراعين الهايلكسات....... ادخلوا ابيكم بكلمة راس.......

[نقا خريم]

السلام عليكم ورحمة الله وبركاته
الكثير من راعين الهايلكسات اللي دايم بالبران وبها النفود وانا واحد منهم
يركبون الكفرات العراض او المعروفه حاليا بــ(كفرات الخط)
وانها هي مفيدة فعلا وترقيك وتطامر بك وتعبر حالك احسن من حقات الوكاله
لكن فيه ناس من الخبرة من طول السنين يقولون ان الكفرات العراض تعدم عليك
الصليبات حق الكفرات وغيرهن كثير ولله.. واضن انه قال العكوس بعد
اللي عنده علم اوخبر عن هالمشكله يدلي بدلوه. ويعلمنا اذا فيه اضرار والا لا
والسلام عليكم

[هاوي الصمان]

السلام عليكم

اول شي يا خوي الجنوط حقات المرسدس اخف من حقات الوكاله بس عيبهن انهم يتعفطون بسرعه والكفرات عرضها ما يضر الموتر والكفر من متى وله صلبان؟؟ والهايلكس ما يجيك عكس

ركب وانبسط بس لا تتعدى مقاس 225/70/15 بس تراهن ما يزينن الا بجنوط مرسدس 7 انش / 15

[نقا خريم]

طيب خل نقول جميع انواع السيارات
ربع باترول
ربع تويوتا
وغيرهن كثير
لو تبي تاطا حصاة فقع الكفر ؟؟؟؟؟
ونا تراي ما عنيت ان الكفر له صليبات
اعني صليبات السيارة
وتراي انا سمعت كلام واحد راعي ورشه
يعني لاتحطون السالفه عليّ
وننتضر المزيد من الاخوة
ولك اف شكر اخوي هاوي الصمان

[نقا خريم]

رحت لم واحد اليوم راعي ورشه وسألته نفس السؤال وقال...
بعض المواتر يضرنهن الكفرات العراض مثل الددسن والهايلكس بعض المرات.. فقاطعته..
وش يضر بالموتر قال......
يضر الصليب حق عمود الكردان ويضر الدركسون وبعض المرات يثّر على القير
قلت وش السبب
قال ماتحملهن السياره اوهن يحملن على السياره وبعض الجنوط ينعفطن
وكان معنا واحد واقف وايّد كلام راعي الورشه(السعودي)
وش قلتوا ياجماعة؟
ترا انا انصدمت من هالكلام وما صدقت صراحه
واليوم ناضرت باحد احيا بريدة هايلكس غمارة2004مركب لها كفرات ربع باترول لاوعراض بعد
يعني تخيلوا مايضر على هالهايلكس الصغيره؟
وننتضر تعليقا تكم
والسلام

[أبو رشود]

والله بالنسبة للميكايكا ما أظن ان لها خرابات ..

لو كان لها خرابات كان ما نصحونا بها مكيانيكيين نعرفهم ..


هاوي الصمان / جنط المرسدس الي يتعفط هو 6.5 انش .. ويسمونه ( الدمعة ) لكن الـ 7 انش يتعفط مع المطامر والطمر العالي ..

هذا الي أخبره


ألف شكر يالذيب






أخوك/ أبو رشود

[كبريت]

والله اللي اخبره انها ماقد سمعت واحد قال انها تضر

وانا من يوم طلعت المزيونه اللي تحت وهي بالخط ولا صار شي الحمد لله

[نقا خريم]

ابو رشود
مشكور على التوضيح, وكلامك نفس كلامي
ابو محمد
حيّاك الله
وهذا من حضك ولا ترا انا مثلك الى هالحين ما صار شي

[abo rawan]

انا ولله الحمد والمنه

معي 2001 من يوم وكالته وبه كفرات خط ومقاسها 225

ولا احلى منها ولا شفت منها شي

والحين طايحين بجنوط جديده جي تي

تجي لونها نيكل وعريضه مرره ممتازه على الجيوب والهايلوكسات :-)

وانبسط يا سنايدي

[هاوي الصمان]

السلام عليكم

ابو رشود هل تقارن تحمل جنط المرسدس بتحمل جنط الوكاله؟؟
حتى لو كان 7 انش
انا اقارنها لك كذا

[جو الصمان]

المتعارف عليه اي شي تغيره عن الوكاله ياثر على الموتر والسبب ان الوكاله حاطين المواصفات على الشكل والحجم والقوه
ولو كان التاثير غير ملحوض مره مثل ثقل الموتر وغيره حتى لو جا الموتر شي وانت مغير فيه شي ما يشمله الضمان إذا كان السبب التغيير
وارجو اني افدتكم وشكرا

[نقا خريم]

ابو روان
جزاك اللله خير على المرور والتعليق
هاوي الصمان
حياك الله مره اخرى ومافيه احد يقارن تحمّل جنط الوكاله باي جنط
icm
حياك الله ومشكور على الافادة

[عبــادي]

طيب . ركب كفر عريض على جنوط الوكالة وش المشكلة
انا مسوي كذا ولا عندك احسن منه.

[سفاح-زهران]

السلام عليكم
يا شباب انا من يوم طلعت هايلكسي وانا مركب جنوط فورد اللي ماهنا اثقل منها ومركب عليها كفرات شاهين
وما قد شفت احد مركب زيها ومقاسها 215-70-15ولا ضرت الموتر ولا شي وعلى قولتهم ما يهزها ريح

[نقا خريم]

طيب اخوي الزعيم 505
لو ابي احط جنط الوكالة على الكفر العريض وش لون؟
اصير دااايم منسّم الكفر ولا كيف ترا انا ماجربت
علشان يفرش على مقاس الجنط والله اعلم......
اخويسفاح-زهران
مشكور على مرورك وافادتك والله يباركلك بموترك

[تايوتا]

بصراحه ردود الشباب ما خلت قاصر مشكوري يااخوان

[تايوتا]

بصراحه ردود الشباب ما خلت قاصر مشكورين يااخوان

[ابو ناصر2020]

العلم الأكيد بأذن الله هو أن مارح نصير أذهن من الفنس(اليابانين)
وماحطوه كذا الأهم أخبر.
هأذي وجهة نظر وشكرن.
محاكيكم معي هايلكس 4*4
ركبة جنوط فكسار وفكيته همن جنوط جي تي وفكيته والحين شد باد ولا احسن بس كفر عريض
شوي عن الوكاله يعني 245 .

[الرهدن]

ركب من خلال تجارب الآخرين00
لكن غالب نصائح أصحاب المحلات لترويج بضاعاتهم ولأخذ عمولة من الشركة 00
واليابانيين أبخص00



.

[الرهدن]

من المهم معرفة00
غالب نصائح أصحاب المحلات من أجل الترويج لبضائعهم ولأخذ عمولة من الشركة00


.

[نايف الدهيمان]

السلام عليكم ورحمة الله وبركااااته

بالنسبه لجنوط المرسدس 7 انش اذا لقيت شي نضيف مافيه هااك الرجه القويه خذه ونت مغمض وطقلك عليهن كفرات هانكوك (225/70/15) وماجاك علي والله مايجي موترك الا العاااافيه ,, اما القير بالعكس جنوط المرسدس اخف للموتر يعني مايضر القير الا شين وهن اهم شي كثر فصلة القير بالمرقى بالنسبه للغماره’’’’ وذا كنت بترقى مرقى طويل يعني لازم تجي بنمره ثلاثه ثمن بنص المرقى تلقمه اثنين بسرعه وتسمع قره القيربالنسبه للغماره والغمارتين ’’’’’ وبنسبه للدركسون شي طبيعي اذا انت راعي مسااايف يبيلك كل فتره توزن اذرعه ,,,, المهم مالك بالطويله الهلي من المراقي ماتملي ماهوب جااايه الا العااافيه وآآآسف على الاطاااله :good:

[الشيروكي]

طيب انا معي شيروكي 96 ومقاس كفراته البلد 235 وابي اركب مقاس 255 عادي والا لا........
وسمعت واحد يقول ان الكفرات اللي قدام يحكن بالرفارف اذا ركبت مقاس كبير 255 صحيح والا لا ....

[مدور ربيع]

حسب الخبرة ... ارى ان كفرات الخط من اسواء الكفرات !!!!

اولا ... يتورم من الجنب ودايما" بعد كم شهر من التركيب .. تلاقي معك كفر او اثنين متورمين من الجنب على شكل نفيخه

ثانيا ... الكفر غير مأمون اذا ضرب .. تلقاه صاير كله خيوط

ثالثا ... ماينفع ابد بالحصى ... ادناة حصاة تخرمه لانه فرشه كبير ولين

رابعا ... ماهو مخصص للاحمال الثقيله ... فقط للرمل

خامسا ... سريع الاستهلاك .. ويتأكل بسرعة

سادسا ... ثقيله على الاذرعه

سابعا ... غير ثابته على الاسفلت ... فيها مروجه






الحل ....!!!



كفرات بلده من احسن الكفرات ولجميع الحالات ... برضه حسب التجربه

كفرات يوكوهاما مقاس 195 ( تجي شد بلد بالهايلكس 2005 وتحت )

مميزاتها ...

اولا ... خفيفه على الدريكسون والاذرعه

ثانيا ... ثابته بالاسفلت وغير متمايله

ثالثا ... لايضرب الكفر الا نادرا" ... واذا ضرب لايتمزق

رابعا ... مخصصه للاحمال الثقيله

خامسا ... في حالة تنسيمها الى 15 يفرش الكفر تلقائيا ويصبح عرض الكفر زايد عشر سم على الاقل ( يقوم مقام كفر ابو خط)

سادسا ... مناسبه للصحراء .. لعدم الانزلاق .. ولا قلة احتكاكها بالحصى ( نظرا لصغر فرشة الكفر )

سابعا ... مرنه جدا .. وتسحب نصف المطب تقريبا



واهم من ذلك تعمر طويلا .. وتعطيك امان بالقيادة

[الربيع وبس]

السلام عليكم ورحمة الله وبركاته

أخوي انا معي هايلكس وجيت مليت من كفرات الوكاله السلق قاسيه وهي زينه للحصى وولزفللت اما اذاكآنك رآعي تطعيس وتروح منآطق فيها حصى وكفرات الوكاله بغيت أغيرها مليت منها تعبتني في النفود وكل ما أروح للنفود ينصلخ علي كفر وأنا انسان مآني أجلد الموتر هم التويوتا صنعوها موب للتطعيس ولا للحصيان لاهم صنعوها للتحميل وهي اسمها سيارة نقل يعني تكرب الاغراض وتجيب اغراض البيت الخ المهم قعدت حول شهرين وأنا ادور وأسئل وش أشتري جنوط نيترو ولا مرسيدس يعيني شكلها أجمل وسألت الوكاله يقولون لاتركبها ورحت سألت ورشات كثيرة وكلهم يقولون نفس الشي مافيه أزين من جنوط الوكالة وقلت طيب أنا أبي شييصلح للنفود وولبر ونفس الوقت تصلح للزفلت قالوا لي خل جنوط الوكاله وركب كفرات وركبت أعرض كفر موجود بالسوق على جنوط الوكاله وهي كفرات خط لينة ووقاسيه ونوعها يوكاهاما بنفس الوقت تصلح للنفود وولحصى وأنا مجربها بالحصى ولا أحلى بس لاتخلي الكفر اقل شي35 وفوق في الشوكي مجربها ولاتخلي كفراتك اقل من 35 عشان ماينشق الكفر وللنفود تصلح وجربتها في الثمامه خلها الكفرات على 20 عشان ماينصلخ عليك بعض الأخوان يحط الكفر على 5 ولا 10 ويقول الكفرات موب زينه لا خلها على 20 وطع شوري ومجرب انا وارحت أجربها بالنفود ولا أحلى أدخل وأنا مرتاح والكفرات على 20 ومريحه بنفس الوقت ومافيها رجه ولا تسبب خرابات للسيارة بتقولي ليش لأني كلمة ورشات وقالوا نفس الكلام وأعرف واحد له ورشة من أعرفه حول 15 سنة ووثقت فيه وقالي نفس الكلام

أما لجنوط المرسديس والنيترو ما أنصحك فيها لأنها خفيفه وعلى طول تخرب وتسبب رجه بالسيارة وتأثر عليها
والله يعينك اذا أنصلخ على الكفر ولا انفقع عليك يمكن تقلب لاقدر الله ولا شي
والكلام ماجبتاه من قالوا لي أخوياي مجربين للجنطين الثنين

وومالك الا كفرات خط على جنط الوكاله شرط ان تدعي لي والله يآخوك أنصحك انك تركبها والله اني مجرب الكفرات اللي ركبتها اما للمشكلات في المرسيدس والنيترو من أصدقائي وسألت أقولك فوق 13 محل أول أكثر وسألت الوكاله وأبي لك الخير ما أبي لك الغثا وهي أوفر لك




والسلام عليكم ورحمة الله وبركاته

[DAWRD]

السلام عليكم ورحمة الله وبركاتة
أنا كان عندي ددسن من زمان و كانت جاية من الوكالة بمقاس 185/80/14
جيت وغيرت المقاس 215/75/14 و مشت السيارة معي 250 الف كلم و ما كان عندي أي مشكلة
الحين عندي جيب تروبر مقاس بلادة 235/70/16
و ركبت عليه 275/75/16 وماشي عليه 97 الف كلم والحمدلله مافيه مشاكل
حتى للعلم أن الكفر الى يجي أكبر من ناحية الإرتفاع أقل تحميل على السيارة
لان الدورة تكون أكبر و بالتالى يقل التحميل على العكوس و الكرونة و القير والمكينة
لاكن يقل العزم شوي
ملاحظة إذا بغيت تخلي الكفر عريض
لأزم تكبر مقاس إرتفاعة بعد عشان ما يحمل على العكوس

[الكاسر23]

اخواني

الكفرات العريضة لها محاسنها ولها عيوبها

من محاسنها :

1- رساوة السيارة في الطريق
2- قوة اضافية في حال الحاجة الى التوقف فجأة
3- تعطي شكل جذاب ومتانة للسيارة
4- تساعد على التطعيس
هذه من بعض محاسنها ....

من مساؤها:

1- تثقل على أجزاء الحركة في السيارة مثل (الجير والدفرنس والصليب ) بسبب زيادة قوة احتكاك الكفرات بالأرض، مما يتطلب زيادة قوة الدفع لتقليل عامل الاحتكاك بالأرض، ولهذا تجد أن المصنع يضع لك ملصق (تلقاه في الدرج او في داخل باب السواق) يوضح لك مقاسات الكفرات التي ينصح بتركيبها وكذلك ضغط الهواء المناسب في الكفرات الأمامية والخلفية، حتى تحافظ على الكفرات وأجزاء الحركة في السيارة.
2- المطب فيها يكون قوي اكثر من الكفرات اللي جاية من الوكالة، بحيث ان المطب يرجف السيارة رجف.
3- الاضرار التي قد تسببها عند انفجار او انسلاخ الكفر بالرفرف من الداخل والخارج

ولكن يمكن تفادي المساوي بمعادلة ضغط الهواء مع حجم الكفر، بحيث تقلل قوة الاحتكاك بالاسفلت وتخفف الحمل على الجير والدفرنس والصليب.
هذا ما لدي والله اعلم
اخوكم
الكاسر 23

[saeed g]

الله يعين الكفارات العراض كلها شقاء

[راع الابل]

جيتكم يا اهل الهيلوكسات .... جاكم راع البل والخلافات
ما جيت ادور الفزعات .... تبون اباعر بدال الكفرات

عليكم بالهانكو رخيص وصبور ولين ما يفكك الموتر