جي ام سيرا 2011

[بحر الاشواق]

السلام عليكم

كيف الحال ياشباب عسى الامور زينه ان شاء الله

يااخواني قضت لحيتي من كثر النتف والتفكير
والسبب هل غرنوق المزيون


http://im4.gulfup.com/2011-07-05/1309868640701.jpg


كثر الكلام عن هل سياره هذا يسب وهذا يمدح وضعت انا وضاعو معايا كثيرين
انا خاطري فيه وايضا استخدامي حشمه ماني راعي مراقى وتطعيس لكن احب الكشتات سواء بصيف او بالشتاء لكن ابستخدمه لين تنتهي اقصاده يعني حول الخمس سنوات
والله ياجماعه انه ضايق صدري مغير اروح للمعارض اتفرج عليه وارجع ولا تلوموني انسان على قد حالي ماعندي معرفه بسيارات ولا غيره
ياليت الي جرب السياره فتره طويل انه يذكر لي الاجابيات والسلبيات وهل ينصح بشراء من خلال تجربته ام لا "الاعطال + تماسك الموتر + تماسك الديكور+ الحراره وماشابه"
والى يدخل هل موضوع لا يقراء ويمشي ارجو ان يرد بدعوه صادقه واسئل الله له المثل

وذا فيه مواضيع تكلمت عن الموتر ياليت تحطون لي الروابط وجزاكم الله خير

[الشقردي 999]

عز الله انه موتر ما شاء الله
بس انصحك خذ اي لون الا الابيظ

[((ابوملاك))]

شف ياخوي بجيبها لك على بلااطه

ان كان على ما قلت راعي ركاده وتسايس النفود مسايس يعني ماتنطح الطعوس وتكسره

فهو يصلح لك وتوكل على الله

اما ان كان راعي مكده وتضرب الطعس ضرب ووادن اكثر وقتك كشتات ونفود خذ لك شاص

هذي باختصااااااااااار

واشوف ان اللؤلؤي والذهبي والفضي اجمل الالوان عليه

[ابن عكاش]

الموتر ماشاء الله نظره وفخامه وراحه ورساوه في الخط
لكن يبفى الميول والتحمل
اتمنى لك التوفيق والله يدلك ويسر امرك

[صر طاق]

الله يوفقك دنيا واخره

لكن الغرنوق ذا خاشن مزاجي منذ مبطي وهذا هو الموتر لا بغيت الصحيح

توكل على الله وادع لي بغرنوقن مثل غرنوقك .. ;)

[برهان1]

والله يالغالي ابد استخدامه طيب بس بالرفاقه والركاده ماعلى الموتر كلام بعدين ميزة الموتر اذا عندك مس خطوط ماعليه كلام واذا انت منت راعي تحميل برظو فهو غرضك لانه مركب ومكينه والله انا انصحك استخر وتوكل على الله ولا تعدى الغرنوق ابد

[درب الشمالي]

عزا الله انة موتر ما شاء الله تبارك الله
بس ممكن اخوي تعطين اسعاره مواري كم يعني الظاهر بالصورة
والله يكتب لنا ولك اللي فيه الخير

[AL -98RY]

هذا يوصل سلمك الله سعره 103000 عند الوكالة لاكن في الفتره الحاليه مقطوع من الوكالات
لذالك تجار المعارض وصولة الى 112000
لولا نقول الاحسبي الله ونعم الوكيل
والله يوفقك يابحر الاشواق ويكتب لك الصالح المبارك

[بيك اب 4X4]

والله انا اعطيك كلام عن تجربه
اللي يقولك ان الجمس و الشفر انتهى فهو غلطان
انا اقولك انهم رجعوا و بقوه من موديل 2000 وطالع
تحت يدي جمس حوض 2006 حجم 1500 بدون دبل ( حق العمل )
و اطلع فيه يومياً و زار عليه و مطامر فيه وماغير كل 5000 كيلو اوديه
للوكاله يغيرون الزيت مع السيفون فقط و الحين ماشي فوق 50 الف و اذكر اني وديته للوكاله
بسبب صوت طقه في المقص الايمن و صلحوها و غيره ما اشتكى ما شاء الله عليه
وهذا هو السبب الرئيسي اللي خلاني اشتري موتري اللي معي حالياً
جمس حوض 2005 حجم 1500 دبل ( طبعاً مستعمل )
طبعاً الموديل اللي انت حاط صورته فيه مواصفات افضل مثل القير 6 نمر و معلومات
في شاشة الطبلون و اشياء كثير و في الاول و الاخير موتر جديد و على يدك


وهذي تجربتي مع الجمس
بالتوفيق لك

[رسلان الوايلي]

يرجال خذه ولتشور

[أبلج]

انا جربت حجم 2500 قمارة ونص دبل ارضي موديل 2004 شريته مستعمل وارد امريكا سنة 2006 وبعته سنة 2010 ماشي ربع مليون :D 250 الف كم
ما اشتكيت منه اللهم لك الحمد فقط اعمل له صيانه دورية في الوكالة

ومره غيرت طرنمة الماء ومره طلع فيه صوت في الدبل بسبب قطعه معينه وظبطته والحين افكر اشتري مثله بس جديد مع اني شريت جيب اللهم لك الحمد

[أبو ياسر العمراني]

الله يكتب لك الخير وييسر أمورك

[ع العمرو]

عندي بارك الله فيك غمارتين م2009 ماشي 43000 كم ماشفت منه اي مشكلة راحة وهيبة والى 6 ركاب يركبون مرتاحين ( من تجربتي اقول توكل على مولاك وصلي صلاة الاستخارة ولن تندم ومبروك مقدما ) واي استفسار انا بالخدمة

[Bader-M]

سيارة رائعة بكل المقايس
تمتاز
1- سعر مناسب
2- مريحة
3- سعر مناسب جدا
4- قليلة استهلاك وقود

عندي اقتراح اخر
شف الفورد F150
سيارة رائعة بكل المقايس و هو افضل من GM شكل عام

تحياتي اليك

[asxz]

شف الافلانش

[راعي الpath]

السلام عليكم

ياخي هيضتني بهذي الصوره انا ناوي عليه ان شاء الله 2012

الموتر ما عليه كلام

[برق القصيم]

دامك مانتب راعي مراقا ومطامر فهالموتر يصلح لك
وتراه انواع فيه افخم شئ z71 مكينته 5300 والدبل ازرار وسعره بحراوي 108
وفيه مكينته 4800 والدبل قير ارضي وسعره حراوي84
وفيه 6 سلندر بدون دبل سعره 68
وانا استخدمت z71 موديل 2010 ماعليه كلام نشيط وراسي مثل السيدان ومتماسك
وحسب رايي الشخصي عذروبه الوحيد وجهيته هابطه شوي ,,صحيح ارسى للموتر بالخط
بس بالبر تحتاج يكون الموتر ارفع من كذا من قدام..وهذي امرها سهل المهم انت استخر الله..ولو يحصل لك تجرب الموتر لمدة يومين حتى لو تستاجره

[* ابو باسل *]

اقولك عن جد انا بعت موتري هايلكس 2010 وكنت ناوي اشتري ارض على شان العمار لان اسمي طلع بالبنك وكانت هايلكسي 2010 دبل قير تماتيك عانيت منها معانه عدم راحه وعدم عزم وضيق في المقصوره المهم بعد مابعت الهايلكس دورت ارض بالرياض وماحصلت الاسعار نار وفيه ارض عندي بالجنوب في قريه حاولت في البنك وحولي القرض عليها ولله الحمد وبعدها قمت ادور موتر وكنت افكر في هالموتر من زمان وخوفوني الناس مثلك واخذت الهايلكس عنه بس بعدها رجعت وشريت سيرا 2011 غمارتين صراحه لو خيروني ثاني مره اشتري موتر ما اشتري غيره ولو عندي فلوسه كاش ما اشتري غيره ابد موتر اذا قالو موتر ماشاء الله تبارك الله وانا حملت الى 800 كيلوا ولا نزل الموتر بالعكس يقول هات زود ومشيت عليه الى 190 ويقول ياولد دز بس على شان الحموله خفت على الكفارات لاقدر الله يصير لها شي والحمدلله يعني بيتحمل فوق الالاف وزياده بس حمل على اي سياره ثانيه وامش اتحدى توصل 150 وهي محمله الف كيلوا اتحداها وانا اشوف انه موتر كشخه وموتر تحميل وموتر جلد وموتر فخامه وتحس انك تسوق وحش من جد له هيبته اما الهايلكس والشاص والله اني اتفشل الى ركبتها خاصه في المدينه واني واقف مره عند فندق المرديان في الطايف ورايح ادسها في المواقف ماحطيتها قدام الباب اما مع الجمس ادخل على الرسبشن ياشيخ هههههههههه
توكل على الله وعشر سنوات بتكده ان شاء الله .

[علاوي المكاوي]

مادام إنك مقتنع فيه روح اشتريه ودلع روحك وماعليك من كلام الناس ولاتنسى إنه جمس وجديد بنفس الوقت

ولاتنسى صلاة الاستخارة وإن شاء الله يتغرنق عند باب بيتك.


وخذ هذي الأبيات هدية

المرعب اللي بقوته ارعب اجيوب
فيه المكينه تنتفض به رعانه

الجمس ماغيره أبد سيد دروب
يشق وجه القار لطلق عنانه

أنا اشهد انه ياهل الجود مركوب
وعند الذي يهواه قدر ومكانه

الجمس لامنّه خذا الخط مهيوب
كنه على السجات يملك حصانه

ياصاحبي عيبه ولا فيه عذروب
والعيب الآخر يرفع الراس شانه

[بحر الاشواق]

جزاكم الله خير ويسر امركم وفرج همكم

طيب هذا احد الاعضاء في منتدى الجمس يشتكي ويقول الاتي "منسوخ"

المشكله الثانيه .. وماادري هل هي مشكله او شي طبيعي
معي سييرا موديله 2011 الموتر ماشي 6000
الاحظ بعض المرات تصير طقه خلفيه مدري هل هي بالدفرنش ام القير .. والاحظها لما ترتفع عندي حرارة القير ل الثمانينات ... وتطلع الطقه في اغلب الاحيان لاصرت توني رافع رجلي عن الدعسه او بوسط زحمه والسياره تحبي وعشقت ل الثاني

طولت عليكم اخواني وياليت اللي عنده خلفيه يفيدني فيها

شاكر ومقدر لكم

[بحر الاشواق]

مادام إنك مقتنع فيه روح اشتريه ودلع روحك وماعليك من كلام الناس ولاتنسى إنه جمس وجديد بنفس الوقت

ولاتنسى صلاة الاستخارة وإن شاء الله يتغرنق عند باب بيتك.


وخذ هذي الأبيات هدية


المرعب اللي بقوته ارعب اجيوب
فيه المكينه تنتفض به رعانه


الجمس ماغيره أبد سيد دروب
يشق وجه القار لطلق عنانه


أنا اشهد انه ياهل الجود مركوب
وعند الذي يهواه قدر ومكانه


الجمس لامنّه خذا الخط مهيوب
كنه على السجات يملك حصانه


ياصاحبي عيبه ولا فيه عذروب
والعيب الآخر يرفع الراس شانه

ااااااااااااه
صح لسانك ياالغالي

[عالي الكيف]

الله يكتب لك الخير وش ماشريت

[مخاوي العشه]

ماشاء الله موتر رائع

الله يوفقك ويرزقك بالموتر اللي تبي

[شايب . نت]

الله يكتب لك اللي فيه خير

[عبدالعزيز بن احمد]

تحافظ على الموتر يعيش معك اي موتر
صراحه الموتر ممتاز ولا سمعت احد يسبه انا ابد
واتمنى لك التوفيق

[* ابو باسل *]

جزاكم الله خير ويسر امركم وفرج همكم

طيب هذا احد الاعضاء في منتدى الجمس يشتكي ويقول الاتي "منسوخ"

المشكله الثانيه .. وماادري هل هي مشكله او شي طبيعي
معي سييرا موديله 2011 الموتر ماشي 6000
الاحظ بعض المرات تصير طقه خلفيه مدري هل هي بالدفرنش ام القير .. والاحظها لما ترتفع عندي حرارة القير ل الثمانينات ... وتطلع الطقه في اغلب الاحيان لاصرت توني رافع رجلي عن الدعسه او بوسط زحمه والسياره تحبي وعشقت ل الثاني

طولت عليكم اخواني وياليت اللي عنده خلفيه يفيدني فيها

شاكر ومقدر لكم


هذا ماهو عيب هذي تقنيه جديده للمحافظه على الدفرنس من نتق العمود وهي فضاوه في العمود لامتصاص الضغط المباشر على الدفرنس وتسبب طلوع الصوت عند الدعس للسياره في سرعه بطيئه الى سرعه قويه يلف العمود بقوه وهنا فيه فضاوه تمتص النتقه القويه وتقلبها بخفه للدفرنس على شان ماتصير النتقه والضغط عليه مباشره وهي في جميع سيارات الجي ام سي والشفر اليوكن التاهو السيرا السلفرادو ولا تضهر الا وقت الدعسه بعد ضغط الفرمله لانها تحافظ على الدفرنس من القوة المباشره عليه ان شاء الله وضحت الفكره .

[مسير عليهم]

صدقني ان جربته بتشريه لك ولعيالك

عن تجربه موديل 2009 حجم 2500
عز الله انه موتر يطربك

اذا استخدامك مدينة وطلعاتك خفيفه خذ حجم 1500 z71 وتوكل على الله

[مصلح بن بيئي]

توكل على الله

مدام استخدامك لكم سنة ما يمدي الجديد يطلب قطع

توكل على الله الموتر مركب مع الخطوط السريعة ووسع غماره وقوة في النفود والوعر ورااااااااااحة ووسع صندوق

توكل على الله والابيض الابيض ارغب فالسوق

[طويق 2010]

حياك بحر الأشواق
أنا مريت الشركة المتحدة وكالة دوج قبل فترة وحصلت عندهم ونيت RAM نفس المقاس
2010 بواحد وتسعين ألف ميزته محرك ضخم 5.7 لتر 355 حصان
بصراحة وحـــــــــــــــــــش
وأنا مجرب الدوج موب سهل أبد وفوق ما تتصور
بالنسبة لقطع الغيار الوكالة بدأت تتوسع لكثرة سحب الناس لسياراتهم


متع ناظريك بالموقع وشاهد الفل كامل


http://www.assayyarat.com/forums/thread216971.html



بالأخير الله يوفقنا وأياك وكل مسلم

[الليث الذهبي]

الله يوفقك ويرزقك الي فيه صالح الخيره

[alrsash911]

إذا منت راعي طواري يعني بكرى تقول ببيع توكل على الله واطرب عمرك بالغرنوق ... أما إذا بعد سنه بتقول ببيع بيفرق معك السعر كثير

وبالتوفيق لنا ولك بإذن الله

[AUDIO]

السلام عليكم \

انا معي جمس 2010سييرا 1500 (5300 )ماشي معاي الان 26000الموتر هيبه وسافرت عليه وطلعت عليه للبر رمال وعره ,

الموتر قوي وماشاء الله , الموتر يعطيك لا عطيته , وانا اشوفه انتشر عندنا في القصيم انتشار مايقارب انتشار الهايلوكس , الحقيقيه ظهر بقوه فائقه.

توكل على الله يارجال .

[بحر الاشواق]

الله يجزاكم خير ويرحم والديني ووالديكم

[عمدة الحي]

منتب عايش اكثر من عمر واحد

سم بالله واشتر ولا تردها في خاطرك

[على رمشي تمشي]

هههه يازينه من غرنوق - ماشاء الله سياره رائعه
اتمني ان امتلكها

[Lover gmc]

صدقني يبي يعجبك

لكن عيب الجمس ديكوراته ضعيفه وعادي تسمع اصوات

[سيف الظفير]

هاليومين شرينا 2011 2500 HD

غمارة ونص ما شاء الله تبارك الرحمن شئ على كيفك

موتر حي وفخم ونشيط


http://blog-gmccars.com/files/gmc-sierra2500hd.jpg

[نايف الصقار]

يااخوان الله يجزاكم خيرعلى التوضيح انا مثل اخوي ودي اشتري سيارة ومحتار بيين السيارات
عيني على الجمس السيرا والاكسبدشن الفورد انا راعي طلعات خفيفة واستخدامي حشمه
بس السؤال هو كالتالي ::


امل من الاخوان المالكين للسيرا الدبل وغير الدبل الغمارة والنص او الغمارتين
ان يشرحوا لي جميع المميزات للسيارة من ناحية صرف البنزين والاستخدام بشكل عااااااااام ..

ولكم جزيل الشكر ........

[الريصي]

مساء الخير اخوي السيارات توافيق من رب العالمين واذا تبي تسمع تجارب الاخوان تبي تتعب جدا فكل واحد ينقلك تجربته سواء كانت ايجابية او سلبية اذكر اني حبيت اشتري وانيت فورد f150 واستشرت بعض الاشخاص وتعال شف السب والتحذير وفيه ناس تمدح وحيروني جدا وبالاخير استخرت الله بركعتين وارتحت لشراء الموتر وبالفعل اغتنيته ولله الحمد لي كم شهر والامور ممتازه اعقلها وتوكل على ربك وعليك بالاستخارة

[دايم العز22]

الله يرزق اللي في بالك وانا اخوك

[دايم العز22]

الله يرزق اللي في بالك وانا اخوك

[سما الهاوي]

ياشيخ لاتخلي شي في خاطرك في هالدنيا لكن استخر أولا ثم شف وش اللي يكتب لك الله وإذا كنت رجال ملول من السيارة مثل ما قالوا بعض الأخوان لاجى بكرا ولاك بايعه اشتر مستعمل عشان ماتخسر واجد وإذا بتستخدم الجديد و أنا أخوك يغنيك عن الورش سنين وتريح بالك

[البيضاني]

كل نفس وما تميل له أنا مجرب 2008 سييرا غمارتين أبيض فل كامل ولا عليه كلام مازال قيد الاستخدام

[ذئب اليل]

الجمس يطربك في الخط و البر وميقول اخ

[تناساني]

لو ما اثبت جداره ما كان شفته بكل شارع
وحتى ارامكوا يستخدومنه و اغلب الشركات

لكن استخير و اذا نفسك فيه لا تردها اشترهـ
واذا اشتريت اشتر.. وكالة الجميــح ابعد عن المستورد و باقي الوكلاء (عن تجربه)

سي يو

[Aقناص الجنوبA]

الله يبارك لك ولا تنسى صلاة الاستخاره

[العرض داري]

يا تل قلبي تلة الجمس مع خط ويصيح قلبي صحيت السير لا صاح

[الأديب]

الله يوفقك يارب ويكتب لك اللي فيه خير لك ولعيالك
بصراحه انا مثلك جايز لي بس متخوف لكن اشوفه انتشر بشكل كبير وهذا دليل على نجاحه
لكن ارجو من الاخوان توضيح الفرق بين السلفرادوا والسييرا وايهما افضل وهل ينفع الغمارتين لراعي العايله بالسفر والروحه والجيه والا هو موتر بر

[* ابو باسل *]

الله يوفقك يارب ويكتب لك اللي فيه خير لك ولعيالك
بصراحه انا مثلك جايز لي بس متخوف لكن اشوفه انتشر بشكل كبير وهذا دليل على نجاحه
لكن ارجو من الاخوان توضيح الفرق بين السلفرادوا والسييرا وايهما افضل وهل ينفع الغمارتين لراعي العايله بالسفر والروحه والجيه والا هو موتر بر



حياك الله انا عندي عائله وماخذ غمارتين وهو عز الطلب للعائله مرتبه اماميه متصل منفصل ياخذ 2 كبار و2 صغار قدرام وورى ياخذ اربعه كبار ماشاء الله والصغار ابد لو تحط درزن ماعندك مشكله هههههههههه
موفق خير وابد هو يصلح للعائله وللخط كأنك جالس على كنب في بيتكم ماشاء الله وللبر عز الطلب حمل عيالك وحمل عفشك واضرب اي ديره توكل على الله والله يوفق الجميع .
وبالنسبه للسيرا هو تصنيع شركة جي ام سي اما السلفرادو هذا شفر طال عمرك يعني مثل اليوكن والتاهو .
وعليك بالموديل الجديد 10 و 11 لانه اختلف فيه القير الى ست نمر وقير عادي اتوماتيك بدال اربع نمر في الموديلات السابقه وهذا سر النجاح .

[خوي الجمس]

بنسبة للجمس حوض ولا صالون ابرك من الفين سيارة
بس انت تقول ابي حوض لذالك ابعطيك المعلومات الي عندي
يجي منة 3 احجام تقدر تعرف الحجم من عدد مسامير الكفر او ارتفاع الموترعن الأرض او الرقم المكتوب على الباب

1500 عدد مسامير الجنط 6 وقريب من الارض زي الي انت حاط بصورة ويجي منة مكينتين 4.8 او5.3 وهي المنتشرة كثير

2500 عدد مسامير الجنط 8 وارتفاعة عن الارض ممتاز لراعين البر كثير ويجي علية مكينتين 6.0 او6.2 تجي على الدينالي منة

3500 عدد مسامير الجنط 8 وارتفاعة عن الارض زي2500 بس مايصلح لك لأنة مخصص للجر واحمال قوية وسعرة غالي

مميزات 1500
مريح جدا بلمدينة وخارج المدينة يتحمل احمال اكثر من الهايلوكس بكثير
يجي منة شاص طويل غمار وكذالك غمارة ونص وكذالك غمارتين
ويجي منة شاص قصير غمارة واحدة فقط
مكينة قوية توهمك انك تقدر تجيب 200 كم في 10 ثواني
قير اوتوماتيك في موديل 2009 ومافوق 6 سرعات وفي موديل 2008 وماقبل 4 سرعات
اكسسوارت السيارة مغرية جدا للذين يبحثون عن الفخامة
سعر السيارة مناسب جدا بلمقارنة بسيارات من ماركات اخرى لاتحمل نصف مميزات الجمس
مثبت السرعة متوفر في 95 % من كمياتة في السوق ماعدى ما صدر لشركات
الدبل اختياري

العيوب
مشاكل الحسسات لمن يستخدم السيارة بدون تشييك
1500 لايتحمل الأوزان الثقيلة جدا اكثر من طن ونص
وجهيت السيارة قريبة من الأرض
تفكك الديكور الداخلي للذين يستخدمون السيارة بلبر طوال السنة

المشكلة الوحيدة والذي لم تستطيع الشركة حله انك اذا استخدمت الموتر لايمكن تبيعة واذا بعتة لازم ترجع تشتري واحد ثاني


واخيرا
مافية فرق بين الجمس (سيرا) والشفر (سلفرادو) في القطع الميكانيكية الا اذا اختلف طوال الشاصي وليس في كل القطع في بعض القطع
الأختلاف في الوجهية وعلامة الماركة على الدركسيون والكتابات على الباب الخلفي

ولاكن شعبية الجمس في السعودية تجعلة اغلى من الشفر ب4الاف ريال بعض الاحيان

[* ابو باسل *]

المشكلة الوحيدة والذي لم تستطيع الشركة حله انك اذا استخدمت الموتر لايمكن تبيعة واذا بعتة لازم ترجع تشتري واحد ثاني










الله يسعد ايامك كلامك صحيح 100 بالميه واعرف واحد كان ابد يبيع جمس ويشتري جمس واخر شي شراء هايلكس وباعها وشراء شاص وباعه ورجع شرى جمس ويقول لعن ابو مخي مدري وين راح يوم اشتري غير الجمس توي احصل عمري ياناس به هههههه

[عكس التيار]

ابد اذا هو في نفسك خذه ولاتشاور

واذا على كلامك راكد ولانت راعي مطامر وقبلك كاشت فهو عز الطلب لك

والله انه موتر لكن يبي من يسايسه وينتبه له واذا طلع فيه صوت ولا اي شي لازم تتابعه

[الأديب]

ابو باسل وخوي الجمس بيض الله وجيهكم يوم تبيض وجوه وتسود وجوه وكل من يقرا

[خليفان]

الجمس ماعليه كلام
ابعد عن النيسان وانت بخير

[sa-z71]

أخوي إشتر ولا تشاور بإذن الله لن تندم .

ولكن بما إنك أول مره تستخدم الجمس ودي لشريت تشري موتر عليه الكلام .

مثل Z71 ومكينه حجم 5.3 على مقاس 1500 أو 6.0على مقاس 2500

لأن الموديل الأخير إنتشرت بقوه على مقاس 1500 مكينه 4.8وكثير من اللي يشتري سييرا جديد يجهل هذي النقطه
صحيح إنها إقتصاديه وعزم حلو
ولكن الفئات السابقه هي الأمثل .

كيف تعرف حجم مكينة الموتر إنظر الى الخانه الثامنه من اليسار برقم الشاصي يكون الحرف :
مكينه حجم 4.8 (( C ))
وميكنه حجم 5.3 (( J) )
ومكينه حجم 6.0 (( K ))

ولا تنسى الأستخاره