استشاره للجميع لا تبخل برأيك ... مفاضله بين الجي اكس ار وبين التاهو [الأرشيف]

مشاهدة النسخة كاملة : استشاره للجميع لا تبخل برأيك ... مفاضله بين الجي اكس ار وبين التاهو

بيجي59

10/07/2011, 07:52 AM

السلام عليكم ورحمة الله وبركاته

اخوكم محتار بين نوعين من السيارات بين الجي اكس ار فل كامل وبين التاهو فل كامل والكمال لله

نعلم جميعاً ان المصانع اصبحت واحده وان المميزات تتشابه وان الاختلاف في الاسعار ارتفع رغم توحد اليد العامله والنوعيه في التأثيث والقطع والمواد ( نصب موزعين)

شيبان السيارات اول .... كانوا يقولون الفخامه امريكي والقوة الماني والصبر ياباني

الان اصبحت الفخامه تصنع في الصين واستراليا والقوة اصبحت ضعيفه والصبر نفذ مع تسابق الشركات على التقليل من التكاليف ولهف مافي الجيب من مصاريف

فمن هذا المنطلق الا وهو اشتراك الشركات في الجوده وتطور الخطوط لدينا حتى اصبحت كرستال وانشغالنا بالاعمال التي تتطلب العمل حتى يوم الخميس احيانا وعدم سفرنا بشكل دائم ما عدا اوقات العطل فماذا تنصحون اخوكم فيه من حيث المعطيات التاليه

المبلغ المتوفر/ 220000 تقريبا
توفر البديل الداخلي / يوجد سياره بديله للعمل والمشاوير الداخليه
حجم العائله / اب وام و3 اطفال والخادمه (شر لابد منه).ويمكن ابيعها لو الموتر غالي )):good2::f
مسافة السفر /تقريبا 500كم
الطقس والمناخ والتضاريس / مختلف اختلاف كلي فمن جو بارد بالجنوب وجباله الى تضاريس نجد ورماله وحرارته
التوجه والرغبات في التمشي والزيارات / البر,البحر العمره والحج

والرغبه في المفاضله من ناحية غلى قطع الغيار وخدمات ما بعد البيع وصبر السياره ورفاهيتها وفخامتها ورحابتها وجودتها وقوتها وعدم توهيقاتها (( توكف بك في نص الطريق يا سير يا كهربا))سعر الاطارات ومدى استهلاكها

الجني العبد

10/07/2011, 08:19 AM

كلهن حلوات والله ولكن أفضل التاهو
لكن ليش مايكون الباترول الجديد من ضمن خياراتك ؟؟
جامع بين الفخامه والقوة والسعر ( أرخص من الجكس وأغلى من التاهو )
وخدمات مابعد البيع ماهنا فرق ( زيد أخو عبيد )

موفق يابعدي

بيجي59

10/07/2011, 08:23 AM

راكب الشفر

10/07/2011, 08:46 AM

شف ان كنت راعي خطوط كثير ومشاوير بالمدينة وكشتات بالربيع خذ تاهو
تانكي كبير وصرفية البنزين بالخطوط ممتازة ومريحة جداً
ان كانك راعي كرف ودائما بالبر ومقناص خذ لاند g حرام تشري جكسار لشيء مخصص للبر

مسير عليهم

10/07/2011, 08:57 AM

دامك متزوج انت تبي تدور راحة المركب لك ولعيالك

خذ لك تاهو

نعلم جميعاً ان المصانع اصبحت واحده وان المميزات تتشابه وان الاختلاف في الاسعار

هل تقارن صناعة السيارة اليابانية بصناعة السيارة الامريكية بينهم فرق لصالح الامريكي

ومن ناحية الصيانه والاعطال في الوقت الحالي كل الوكالات تمشي على نظام معين

اسعار القطع اليباني في ارتفاع والامريكي سعره مناسب

الاطارات سعرهم واحد اللي تبي تشتريه للياباني هو نفسة اللي بتشتريه للأمريكي

بيجي59

10/07/2011, 08:59 AM

اخوي راكب الشفر حياك الله وبارك الله فيك
انا ماني راعي سفريات على طول (كداد خطوط ) ولاني راعي بر بالحيل لكن ما يمنع اروح للبر و اصلا الديرة كلها بر في بر يعني يا اسفلت يا رمل تغرس فيه الطيارات (عاد ها لاحدن يصدق).اما الرحلات البريه فلست من اهلها لعدم تفرغي وانشغالي بالعمل طيلة ايام السنه والرغبه بين الجكس ار والتاهو ماهو افضل وليه

بيجي59

10/07/2011, 09:07 AM

اخوي مسير عليهم حياك الله وبياك
المصنع واحد للامريكي ولغير الامريكي ولم يعد هناك افضليه بين التصنيع لان اليد العامله واحده ..... وشكرا على ترشيح التاهو

الى الان التاهو 3 والجكس ار1 فقط صوتي انا ولازال الترشيح قائم

بن سليمان

10/07/2011, 09:20 AM

اذا كان المساءله فل كامل خلنا ناخذها حبة حبة
اولا الشكل التاهو افضل لكن كفرات مقاس 20 غاليه

http://www.newroadsgm.com/uploads/images/images/Tahoe/2011-chevy-tahoe-a.jpg

وانتبه فيه تاهو اسمه Z71 مجهز للبر

http://doos2008.googlepages.com/1T_gallery_big5.jpg

نجي للديكورات الداخلية ونوعية البلاستيك المستخدم في الاند أفضل

الرفاهية والفخامة الداخلية في التاهو أفضل

نجي للوكيل اعتقد الكفة تميل لصالح وكيل الاند اذا كان عبداللطيف جميل من ناحية توفر قطع الغيار وليس من ناحية جودة العمل لكن قطع الغيار احتمال تكون مصنعة في الصين او في الهند او استراليا

نجي لاسعار القطع في الغالب وبشكل عام قطع الامريكي ارخص من الياباني

نجي من ناحية الرحابة وهي لمصلحة التاهو لكن مهوب بشكل كبير

نجي للجودة السيارات في الوقت الحالي تحتاج لصيانة دورية علشان تعمر معك ولا تنكبك في السفريات لكن الكفة هنا تميل لمصلحة الاند إلى حد ما

في النهاية اتمنى لك التوفيق

بيجي59

10/07/2011, 09:24 AM

بارك الله فيك يابن سليمان حكمت فعدلت والنتيجه منك تعتبر للتاهو

التاهو 4 واللاند1

* ابو باسل *

10/07/2011, 09:45 AM

عليك بالتاهو زد 71 ووفر في مخباك 35 الف من المبلغ الي معك قوة وخفه وفخامه وصراحه كان عيبه الوحيد نزول الوجهيه والحين اشوف اللاند نازل وجهيته نفس الامريكي او خذ التاهو العادي 138 الف ووفر 82 الف ريال وهو فرقه بين الزد 71 ان الزد 71 مخصص للطرقات الوعره اكثر من نظام تعليق ومساعدات وغيره وبالتوفيق ان شاء الله .

بيجي59

10/07/2011, 12:36 PM

بارك الله فيك اخوي ابو باسل تشوف كذا يعني نتوكل بصراحه الاراء كلها عندكم تصب في صالح التاهو ولكن الزملاء ذبحونا بقولة التاهو مثل القشطه الشكل زين والملمس زين والوزن خفيف لكن ثقيل على الكبد وييخرب بسرعه واللاند مثل الحنيني ثقيل وطعمه لازم معه حلا ولكن ينفع ويطول معك تفطر عليه وتتغدا وتتعشا ... وله فايده دايما ....... افكارهم وهم حرين لكن اعجبني التشبيه وحبيت انقله لكم
اشكرك اخي ابو باسل على المشاركه

سطام ابو سعود

10/07/2011, 03:54 PM

ياحبيبي خذلك جي اكس وريح نفسك شيك جيب التويوتا ومكده وراحه ولاتتوه مع التاهو التويوتا ما الشبهه الا با الجمل وانت وانا اخوك بسوق الخيار الله يوفقك للي فيه خير لك خذ رايي وخذلك ركعتين استخاره وقرر
موفق باذن لله

راعي عدلى

10/07/2011, 04:09 PM

اخوي انا ما جربت التاهو

لكني امس شريت جي اكس ار فل كامل

بـ 185 الف من اليحيى

الصراحه الموتر حلو لكن ما اقولك احسن من التاهو لاني ما جربته ولا عمري ركبته

أرمادا

10/07/2011, 04:38 PM

وليش ما تفكر بالارمادا ..

فل حول 175 الف .. شاشه خرائط ونظام بصمه وجلد وجنوط 20 ووسيع اوسع من التاهو واللاند مريح وراسي وفخم ومكينه قويه اقوى من افي اكس ار والتاهو 360 حصان ويصلح للبر والخط ..

معاي الحين موديله 2009 من الوكاله فل ماشي الان 95 الف ما غيرت فيه ولا شي لا فحمات ولا غيره بس فلتر مكيف وفلتر هوا المكينه ودخلته الصيانه على 20 الف و30 الف و40 الف وعقبها ما طب الوكاله انا مثلك وقتها كنت محتار بين اللاند واليوكن وشفت ان اللاند غالي ومافيه شي ابد وقطع غياره ناااار وضيق وبالطريق مناقز والتاهو اريح بس الجوده لك عليها ما يتحمل والحمد لله وفقني الله بالارمادا شفت الفخامه والرساوه والمكده ..

والله ييسرها لك

رفيع المقآم

10/07/2011, 05:00 PM

والله يالغالي
لومعي فلوسك
لاشري جيب
متى مانزلته جاب لي سعره
شيك بمخباك
والسفر والوعر وكل شي مايقول اح
بالتوفيق ياخلفهم

الجني العبد

10/07/2011, 07:34 PM

هلابك اخوي وشاكر لك على المشاركه وسرعة التجاوب ... ولكن اختلف معك في سعر الباترول الجديد اولا غااااالي مره بالحيل 300000 تقريبا وعلى ايش ولا شي ثانيا شي ماينباع الا طايح الربع بعد الاستخدام لكن الجكس والتاهو يعتبرو افضل نوعين من حيث البيع مستقبلا

هلا بك يابعدي ، شكلك من اللي يسمع للشيبان واااجد :D
أول شي الباترول الجديد فل كامل 320 حصان بـ 200 ألف ريال كاش
وجميع القطع المستخدمه ياباني × ياباني
وهو الأقوى مكينه والآكثر رحابه وفخامه داخليه أيضا والآقل صرفيه بعد
والبر يبيض الوجه ، وله سنه مع الخلق ولا أحد اشتكى منه
وإذا على البيع ، ادخل المعارض وشف كم يجيب لك وتأكد بنفسك ;)

ابن عكاش

10/07/2011, 08:35 PM

ماشاء الله عليك والله ان كلامك في الصميم ويدل على عقليه ناضجه
نصيحتي لك إذا منت راعي بر واجد يعني طلعات على خفيف او في الموسم خذ تاهو ال اس لكن التاهو ما انصحك تاخذ فل الأمريكي في الكهرباء ردي ووفر فلوسك
اللاند غالي ومبالغ فيه ومثل ماقلت السيارات اصبحت متقاربه في الجودة
اتمنى لك التوفيق والمشرى الطيب

ابن عكاش

10/07/2011, 08:38 PM

هلا بك يابعدي ، شكلك من اللي يسمع للشيبان واااجد :D
أول شي الباترول الجديد فل كامل 320 حصان بـ 200 ألف ريال كاش
وجميع القطع المستخدمه ياباني × ياباني
وهو الأقوى مكينه والآكثر رحابه وفخامه داخليه أيضا والآقل صرفيه بعد
والبر يبيض الوجه ، وله سنه مع الخلق ولا أحد اشتكى منه
وإذا على البيع ، ادخل المعارض وشف كم يجيب لك وتأكد بنفسك ;)
لاتقول محد اشتكى منه الجمعه الماضيه كنت جاي من الطايف وبعد القويعيه شفت باترول الجديد بطل الدروب متعطل والرجال منزل عياله ووجالسين جمب الشبك وبعدها شفت الموتر على مدخل الرياض فوق سطحه والله غبنه الله يبارك لراعيه ويعوضه

ذئب اليل

10/07/2011, 11:16 PM

تاهو z71 بنضري افضل وارخص من الفكس ار

قناص مزاجي

11/07/2011, 12:16 AM

مساء الخير

نصيحه لك غير الاند كروزر لا تشتري

شيك في مخباك على مستوى العالم بر وديره

والله ياتاهو وغيره من الامريكي ما اشوف يركبه الا السواقين

خذ لاند موتر يجمل

((ابوملاك))

11/07/2011, 01:09 AM

ليش ماتفكر بالسيكويا

ولا فورد اكسبدشن

بحدك يمديك تاخذ منها كلها فل كامل

Abo gssar

11/07/2011, 02:43 AM

على حسب ماذكرت حول استخدامك للسيارة انا ارجح لك التاهو وبقوة...
وانصحك انك تروح لمحلات ايجار السيارات وتستاجر لك واحد لمدة يوم او يومين وتجربه وتشوف كيف انطباعك عنه حتى تقدم وانت مرتاح ...
وقبل كل شي استخير الله ....

نفود بريدة

11/07/2011, 06:37 AM

لنوعية استخدامك خذ تاهو .. واسأل مجرب

ولا تنسى الاستخارة بعد الاستشارة ..

بيجي59

11/07/2011, 07:46 AM

بارك الله فيكم اخواني الاكارم من غير تخصيص والنتيجه الى الان

لايزال حسب ترشيحاتكم التاهو متقدما وحصل على 9 من مجموع 16 صوت
وحصل اللاند على مجموع 4 اصوات من 16
كما دخل في الترشيح الارمادا بصوت واحد فقط والسكويا والفورد اكسبدشن بصوت واحد

شاكرا للجميع الحرص على تقديم النصح والتوجيه وان دل ذلك على شي فانما يدل على جم اخلاقكم وطيبكم واهتمامكم والله الموفق والهادي

شكرا لكم من اخوكم بل اخوانكم بيجي

يوم السبت

11/07/2011, 11:10 AM

انا مع اللاند اذا كنت تقدر تدفع .

السياره قطع غيارها غويلية . بس ماتخرب

و بعد 6 سنين تروح للمعارض عقب عصر و تبيعه بسعر ممتاز مقارنه بسيارات

و تذكر ان فيه ثلاجه (ترا ماراح تستخدمها الا اذا سافرت) و تانكيين بنزين و بصمه

بيجي59

13/07/2011, 07:37 AM

هلا وغلا باطول يوم بالاسبوع
هلابك يوم السبت ... شكرا للمشاركه الغاليه وبصراحه انا معك ولكن الاراء كلها تنصح بالتاهو اقل سعر وقطع وراحه ولا من ناحية الاخوان فكلهم لاند الا انا سوف اخالفهم الرأي حسب النصيحه المكشاتيه

شكرا لمن شارك وابدا رأيه والشكر موصول للقسم الغالي والمنتدى الاغلى

باث 3

13/07/2011, 09:11 PM

حياك الله أخوي،،أولا الله يبارك لك مقدما ويعطيك من خيره ويكفيك شره،، ثاني شئ انصحك بالجي اكس لأنه على قولتهم كد ومد وبعدين أغلب السيارات الامريكيه بشكل عام بديها زي الورق وحساسه بزياده.. بعدين من ميزات الياباني صبوووور وماسك سعره. [هذي وجهة نظري] والله يكتب اللي فيه الخير

سما الهاوي

14/07/2011, 01:54 AM

والله من ناحيتي انا اذا انت بتستعمل فترة طويلة فخذ التاهو اوسفاري واذا بعد سنة اوسنتين بتبيع خذ اللاند ومنتب خسران ان شاء الله واذا محتار مثل ما قالوا الاخوان استاجر لك كل يوم موتر وكده وشف وش اللي يجوز لك
ولا تنسى تصلي الاستخارة