من يعرف محل بيع قطع غيار مستعمله رخيصة بالرياض للسييرا

[طير العشاء]

السلام عليكم كما هو واضح من العنوان ارغب في محلات لبيع قطع غيار السييرا

[الشهابة]

لا تدور يا الغالي غير الوكالة الجميح او العيسى او التوكيلات العالميه او بالبيد ..

و بخصوص السييرا في الرياض .. التوكيلات ماعندنا لها فروع .. و العيسى ما يوفر كثير من قطع الغيار .. و الجميح غالي جداً و لا تقدر تروح له إلا برقم الهيكل و إلا أصلاً ما يكلمك .. و بالبيد يعتر ارخصهم و له ثلاث فروع .. فرع في الصناعية القديمة و فرع في صناعية النسيم و فرع في صناعية أم الحمام ..

و إذا تبغى قطع غيار مستعمله و من التشليح في الرياض .. عندك في الصناعية القديمة شارع يسمونه شارع الجمعية في نهاية قريب من صناعية العويضة تلقى محلات مثل البيان و العجمي و غيرها توفر بعض قطع الغيار الخارجيه و الداخليه من امريكا مستخدمه و بعضها اصليه و نظيفه بس الاسعار نار ..

و اذا كان موديل السييرا اللي عندك من 2006 و تحت فيه محل في صناعية حي الخليج في شرق الرياض اسمه العديليه يجيب لك قطع غيار خارجيه و داخليه تجاريه امريكيه درجه اولى و عنده درجه ثانيه و اسعارها معقوله و تمشي الحال بس لا تاخذ قطع كهربائيه إلا أصليه حتى و لو كانت غاليه ..

بالتوفيق ..

[رسلان الوايلي]

والله مثال مقال الرجال ان معي سييرا بعض القطع متلقه العند الوكاله

[مسير عليهم]

حدد نوع القطع اللي غير متوفره بمحلات القطع

والتشليح موجود لكن غالي اجل عفريته جمس 2009 بـ 650 ريال

[الشهابة]

خذ عندك مثال على أسعار بعض القطع اللي مادري من اللي مسعرها ..

صدام أمامي كامل جمس سييرا HD2500 موديل 2004 ثلاث قطع خارجيه ( قطعتين فيبر + قطعه نيكل ) = السعر 2800 ريال من الوكيل الجميح و الطلب بعد 9 أيام يكون متوفر

اسطب خلفي يمين جمس سييرا HD2500 موديل 2004 = السعر 1050 ريال من الوكيل الجميح و الطلب بعد 3 ايام يكون متوفر ( اللي قاهرني إن الاسطب اليسار أغلى من اليمين بـ 70 ريال مادري ليش !! )

صدام خلفي جمس سييرا 2008 بدون حساسات و لا ربل فيبر علوي او اللي في المنتصف بس الحديد النيكل من الوكيل الجميح = السعر 1950 ريال و الطلب بعد اسبوع على الاقل يكون متوفر

استكر كتابة Z71 اللي على الرفارف الخلفيه قيمة الواحد 400 ريال و ابشركم متوفر و جاهز

التشليح ..

صدام خلفي لجمس سييرا 2004 معفط و مشهب و رايح في ستين داهيه يقول تبيه بـ 500 ريال و الا خله

كشافات اماميه لجمس سييرا 2008 تجي تحت في الصدام مشهبه و مصفره و ممخشه و مشطبه و كل عله فيها يقول الحبتين بـ 400 ريال و لازم تاخذها كلها

التجاري ( ماركة ابو كلب << مع الاعتذار )

صدام امامي ثلاث قطع + شمعات علويه + شمعات الاشارات + شبك + قفل الكبوت + علامه GMC في الشبك + فيبر صدام خلفي + مساطر للزجاج السائق و الراكب = كلها بـ 1800 ريال و فوقها حبة خشم لجمس سييرا 2004

[مقلع الرمث]

فيه محل بدويرة الخرج الموقع الرياض

عنده قطع ويبيع رخيص مره مقارنه بمحلات القطع الثانيه

اول ماتديور من تحت الكبري حق دويرة الخرج ووجهك جنوب ولا ديورت صار وجهك شمال

يجيك مدخل على اليمين على طول خش معه ورح سيده ووجهك الان شرق

بعدين يطلع الخط بيجيك محلات مسامير المهم لا طلع شف فيه دخله على اليمين

لا دخلت من هناء شفهم على يمينك ويسارك على شكل مستودع كلهم يبيعون قطع امريكي ورخيص

مره انا مره كان معي سيرا ومنصدم ومالقيت الاعندهم ورخيص مره مقارنه

باسعار الوكاالات والمحلات الثانيه

بالتوفيق دعواتك لي

طبعا

[الروتي]

ممكن رقم تلفون المحل اللي يعرفه لاني بجده ومحتاج قطع من عندهم جزاكم الله خير