لمبة السيرفس بالامريكي وش سالفتها

[أبوسيف]

السلام عليكم

اخواني ابغى استفسر عن لمبة الخدمة وش اسبابها لان السيارة لها سنتين تمام والان بدأت تنبهني هاللمبة مع ان السيارة صافيه وما فيها مشاكل ولا تقطيع وما تولع الا بعد ما يطول المشوار :)

[الخبير]

السلام عليكم
الصراحة يا ابو سيف انا اعتقد انه ما لها سنع ، لان واحد من الشباب مولعه في سيارته لها 6 شهور.
انا كان معي جمس دفرنسين 94 كانت كل 7000 كلم تولع و اوديها للوكالة ثم يطفونها.
لين مليت و تركتها و كل الامور تمام.
=======================

http://nobody.jeeran.com/jkduhpma1.gif

[القماري]

أخوي أبوسيف أعتقد ومثل ما تكرم الخبير (مالها سنع) وهذا حاصل مع جميع أو معظم السيارات الأمريكية الجديدة (GMC - يوكون - كابرس .... ألخ) وكل السالفة أن المصنع وده يذكرك بالصيانة وعدم إهمال السيارة وطبعا أفضل طريقة للصيانة بنظر المصنع أن يكون عن طريق الوكالة الرسمية للسيارة وزود على ذلك الوكالات عندنا طيبين زيادة وكل شيء عندهم ببلاش! فأفضل طريقة للربح لدبيهم أن اللمبة تضل تضوي بالأحمر في وجهك لين تمل وتروح الوكالة ويغيرون لك الزيت ويطفون اللمبة بمبلغ وقدره ...
السالفة وما فيها أن بكمبيوتر السيارة (جمبر) خاص بتلك الأنوار ويقومون بتفعيله وتغييرة من وقت لأخر .
واحد من الشباب من زمان كان عنده BMW وكان نفس السالفة فيه ، لين مانبهه أحد الميكانيكين وعلمه طريقة البرمجة وتغيير الجمبر بنفسه ، وصار بعد كذا الضوء االحمر مايعمل في سيارته ، وأرتاح من وجع الراس ووجع الجيب ، طبعا الطريقة مش صعبه وما أقدر أخبرك كيف تقوم بها ـ بس أعتقد أن فيه بعض الشباب معلومتهم أفضل مني في ذي السالفة.
إما تضع لك لأصق على موقع اللمبة أو تروح الوكالة وتدفع أو تبحث عن طريقة تغيير الجمبر

[أبوسيف]

الله لا يحرمنا منكم وتواضعكم انا اللي استغربته انها من اشتريت السياره من سنتين ما شفتها الا هاليومين توقعت ان فيه مشكله ومدامها كذا اجل بكيفها:)

بالنسبه للكابرس واحد من الشباب راح للوكاله اكثر من مرة يقول ياخذون 50 ريال ويطفونها ومع الوقت قدرت اتعرف على حركتهم .حسب كلامه يفتح السويش بدون تشغيل ثم يدعس الابنص ثلاث مرات وبعدها يطفي السويش ويشغل وتنعاد برمجتها وهذا كلام واحد معه كابرس 95 حبيت افيد اهل الكابرسات :) لكن هو يختلف عن وضعي لانه من يوم اشترى السياره وهي كل فترة تولع
الف شكر للاخوان

[القردوب]

المبة التي تقولون مولعه وهي في السيارات الامريكي وهي لمبة السيرفس
هاذي هي وضعة لنوع الوقود في السيارات الامركية الموصفات امركية
تعمل علي نوع وقود يوجد فيه رصاص والوقود الذي يوجد عندنا لايوجد فيه رصاص
فلاذالك تولع هاذهي المبه وهذاء هواالسبب

هذا ولكم مني جزيل الشكر

[ولد روضة سدير]

الصراحه هذي اللمبه مالها حاجه واحد من الشباب اعرفه عنده وانيت موديل 96 الاشاره شابه عنده من سنتين تقريبا ولا بالسياره اي شي بس اذا حبيت تشيلها تقلعها روح لأي كهربائي يشيلها ...............وبمبلغ بسيط..................وسلامتك

[ماجد الشمال 1]

ماوضعت عبث الى صنعوها هم اوكد
ولو حنا الى صنعناها قلنا ملها سنع
اوصنعناها عبث

[راكب الشفر]

عندي لومينا مزعجتني
ولاعرفت اشيلها ولازم برمجه بالوكالة وبمبلغ وقدرة وكل 5آلاف كيلو يطلع تنبيه لتشييك السيارة

فاللي عنده علم بها يعلمنا وش السوات معها