رجاء للجميع وبالاخص راعين الجمس الحوض شرفونا

[ذيب اللابه]

السلام عليكم ورحمة الله وبركاته

اسعد الله اوقاتكم جميع

انا باذن الله تقريبا بعد شهر وحولها ناوي اشتري جمس حوض فبغيت شور المجربين للجمس الجديد
طبعا الاستعمال في المدينه وفي الخطوط وفي البر وفي المقانيص
اهو يتحمل يتفكفك يتكسر اما لا طبعا بغينا الغمارتين دبل وليس الغماره
وكلي امل فيكم ان تعطوني الشور الصحيح

واذا احد عنده بديل غير الجمس يعطينا اياه وندرسه لسع تو السيارة ما طبخناها نبيها على نار هاديه :) قدامنا اكثر من شهر

والله يسعد الجميع سواء رد ولا يتفرج

[ذيب اللابه]

افا وين الناس !! :(

[ديوان العرب]

الشاص اطلق من الجمس اذ رغبتك حوض واذ رغبتك جيب عليك بالفتك

[ذيب اللابه]

ديوان العرب الله يسعد هالوجه

لكن حنا بغينا حوض وغمارتين معلوم صديق :)

[فتك ب ص ع]

ممتاز جداً بناء على تجربه أنا عندي حوض ٢٠١١ دبل ارضي خط وبر ممتاز لكن ماينفع للمهابد. في البر يبي ركاده ولك تحياتي

[ذيب اللابه]

فتك ب ص ع
الله يسعد وجهك قل امين

ووش الفرق بين الدبل الارضي والفرار الله يسلمك ايات الافضل

[فتك ب ص ع]

الفرافير كهرب ممكن بعلق معك لكن الارضي تعسفت انت بيدك مع العلم ان موديل ٢٠١١ جاء نفس المكينه العادي والفل كلها ٥.٣ في القطع الصغير السته مسامير غير كذا الارضي مو اكتروني يكون عادي وارجو أني اكون قدمة لك الفايده واذا حاب نتقابل وتشوفه على الواقع حاضر وتحت أمرك

[rpk]

اذا انت راعي بر اكثر انصحك ب 2500 اما اذا انت اغلب وقتك في الديره وخطوط خذ 1500
انا شاري 2500 غمارتين والحمد لله مستانس عليه علما ان اغلب وقتي في الديره وخطوط بس يعجبني 2500 عشان كذا شريته قير ومكينه ودفرنسات كد ومد

[ذيب اللابه]

فتك ب ص ع عز الله انك كفيت ووفيت
الله يجزاك خير ولله يكفيك شر جهنم

[ذيب اللابه]

rpk الله يجزاك خير وش الفرق بين الـ 2500 والـ1500

[لحظةوداع]

يارجال شف سيارات شركة ارامكو واحكم بنفسك

[فتك ب ص ع]

الفرق قوة المكينه والارتفاع مع العلم ان ١٥٠٠ قوي بمافيه الكفايه وماسويت شي وانا اخوك هذا واجب

[بيك اب 4X4]

rpk الله يجزاك خير وش الفرق بين الـ 2500 والـ1500

الفرق في القير و الدفرنش الـ 2500 اقوى من الـ 1500 لانه حق تحميل
و الحجم 2500 يجي ارفع و اكبر من حجم 1500
بالنسبه لحجم المكينه يجي حسب طلبك سواء كان 1500 او 2500

[rpk]

الفرق في القير و الدفرنش الـ 2500 اقوى من الـ 1500 لانه حق تحميل
و الحجم 2500 يجي ارفع و اكبر من حجم 1500
بالنسبه لحجم المكينه يجي حسب طلبك سواء كان 1500 او 2500
كلامك على متمه لاكن مالك لوا لحجم المكينه انه على حسب الطلب بالنسبه 2500 في السوق السعوديه مالك الا 6لتر فقط ولا يتوفر محرك الديزل كما هو في امريكا ولي تقرير ان شاء الله عن هذا الموضوع والشهر عليكم مبارك قبل الزحمه:D

[نفود بريدة]

اقتباس لي من مشاركة سابقة :





السلام عليكم ورحمة الله وبركاته .. وحياك الله أخوي:)

أبعطيك معلومات بسيطة عن الجموس الحوض .. وعسى الله ينفع بها ..:)




- الجموس الحوض من موديلات 2007 فما فوق .. جاءت بـ 3 أحجام .. :

1- حجم 1500
2- حجم 2500
3- حجم 3500 .. وهذا الي يجي بأربع كفرات خلفية .. ويسمونه غالبا ( دبل تاير ) ..


- بالتفصيل :

1- حجم 1500 :

وجاء بـ 3 مكائن .. :
1- 6 سلندر .. 4300 .. وهذي تجي على السيااااحي مره .. الي ما فيه مواصفات أبد .. وتسمى بالغالب سيارات خدمة ..او نقل بضائع .. وهي نادره عندنا بالسعودية ... وهالمكينة ما تنفع الا للبضائع فقط . لأنها مافيها عزم .
2- 8 سلندر .. 4800 .. وتجي غالبا على الي فوق السياحي على طول .. وبالغالب تحصل جنوطة حديد ماهي كروم .. وطبعا المكينة كويسة .. لكن في أفضل منها .
3- 8 سلندر .. 5300 .. :good:وتجي غالبا على الي مكتوب عليه z71 .. وهذي افضل انواع المكائن لحجم 1500 .. وهي قوية باللحيل عليه .. وعملية ومافيها خلاف أبد .. وأنا أنصحك فيها ..:good2:


- اما المواصفات :

طبعا حجم 1500 هو الوحيد الي يتوفر بصندوق طويل وصندوق قصير .. واذا بغيت تشتري حجم 1500 .. لا تفكر اطلاقا الا بالنوع الي يجي مكتوب عليه .. z71 .. :good:وصندوقة قصير .. لأن هذا النوع يجي فل كامل ومكينة 5300 قوية جدا .. ونظام المساعدات فيه ممتاز للبر .. وفيه دفلوك .. ويجي داخليته لونها بيج .. وليست رصاصي أو أسود .. وفيه قفل مركزي .. وقزاز كهرباء ومثبت ... الخ ..... بالعربي فل كامل .. وممتاز جدا . وعزمة جبار .

لكن فيه شيء لابد تعرفه بنوع z71 .. انه ما يجي الا بدبل كهرباء .. وفيه بعض الناس يعتبرها ميزة .. وبعضهم يعتبرها عيب .. ولولا اختلاف الأذواق لبارت السلع .;)

لكن لابد تعرف كيف تتعامل مع الدبل الكهربائي .. كي تتجنب اعطاله .. لأن استخدامه يفرق عن استخدام الدبل الأرضي .

واذا عرفت كيف تستعمله .. فـ ان شاء الله انه بيعيش معاك وما يخرب .


هذا بالنسبة لحجم 1500 .:)

- اما حجم 2500 :

فما يتوفر عندنا بالسعودية الا بمكينة واحدة فقط .. وهي 6000 .. وعملية جدا هالمكينة لأنها مخصصة للاستعمال الشاق . :good:




المواصفات :

يتميز حجم 2500 ان شاصه كبير وقوي جدا .. ومحركاته من مكينة وقير ودفرنس .. قويات ويتحملن وبالنادر يتعطلن .. :good2:

وما يتوفر حجم 2500 للغمارة الى بصندوق طويل فقط . اما الغمارتين والغمارة ونصف .. يتوفر بصندوق متوسط وصندوق طويل .
وباختصار .. اذا أنت راعي بعارين وتحميل وتنزيل .. وكرف بالبران .. واستخدامك بالمدينة نادر للسياره .. فأنا أنصحك بهذا الحجم ... لأن باختصار حمار مكدة - الله يكرمك والسامعين - ولا عليه غبار من هالناحية . وعزمه ممتاز

وطبعا 2011 نزل z71 من حجم 2500 عندنا بالسعودية .. وهو ممتاز جدا .. ومثل ما ذكرنا بحجم 1500 انه يجي فل كامل ونظام مساعداته يختلف عن العادي .:good:


هذا بالنسبة لحجم 2500 ..:)

- اما حجم 3500 :

فهو يتوفر عندنا بالسعودية بمكينة واحدة فقط وهي 6000 .. مثل مكينة حجم 2500 .

طبعا هذا الحجم يأتي بأربع كفرات خلفية .. وهذا الي يميزة .
طبعا محركات الموتر وشاصي الموتر .. قويات جدا ومخصصات للسحب ..

فاذا أنت راعب سحب مقطورات وما أشبة ذلك .. وتبي موتر جبار من هالناحية .. فعليك بهذا الحجم .:good:



-- مهم --


- س : كيف تفرق بين حجم 1500 و 2500 ؟

ج : اول شي انظر الى مسامير الجنوط .. اذا كانت 8 مسامير .. فهذا حجم 2500 واذا كانت 6 مسامير فهذا حجم 1500 .

- س : ما هو أفضل موديل نزل الشكل الجديد الغمارة لحجم 1500 z71 ؟
ج : أفضل موديل نزل هو 2010 و 2011 .. لأن القير نزل فيها 6 غيارات وهو قير جبار ويتحمل وقوي .. بعكس السابق الـ 4 غيارات .. فهو مع الكرف يبدأ بالخراب تدريجيا .

وفيه فروقات أخرى بسيطة غير القير .



أسأل الله ان أكون أفدتك وجميع الأعضاء بما هو مفيد عن هذه السيارات ..:)
ولا تنسانا من دعائك الله يعافيك ..:good2:

وشكرا لك ..

[ذيب اللابه]

عز الله انكم كفيتو ووفيتو الله يبعد ووجيهكم عن النار والله لا يشغلكم الا بطاعته سبحانه وتعالى

[فتك ب ص ع]

للعلم حجم ١٥٠٠ في ٢٠١١ z71 والاستندر جاء نفس المكينه 5300 وانا متأكد من هذي المعلومه لأني املك حوض ٢٠١١ استندر جنوط حديد

[ضاري الشمري]

اخوي انا مثلك ناوي على جمس حوض 2011 فل غماره < خااق معوه ـهههـ .. صرااحه ما عليه كلام
وسعره الحين حالياً بتاريخ 1 رمضان بـ111 ألف ريال فل كامل دبل غماره صندوق قصير واللون ما يفرق بالسعر .. اما الـ2500 سعره حوالي 117 ألف ريال للغمارتين أما الغماره بـ107 ألف ريال وكلهن فل كامل
لكن من ناحية الراحة لا تاكل هم راااحه لا مثيل لها هههـ .. واسعارهن معقوله ويصبر معك واللي يقولك ان الـ1500 شين ويعذرب بوه < انا اقوله اللي ما يعرف الصقر يشويه .. من واقع تجربه شفت الموتر وركبته لا غبار عليه . اللي يعيبه اذا صار غمارتين حجمه يأثر على مكينته ويضعف العزم فإذا انت تبي غماره خذ 1500 وبيرضيك ان شاء الله وفوق رضااك لانه جباار بقوته يبهر بجماله وشكله الجذاب .
اما اذا بتاخذ غمارتين بالـ2500 أفضل < لكن دبر لك موقف بالمشاوير وداخل المدينه كككككك