أفضل إطارات للهايلوكس 4x4 موديل 2005 ؟؟

[أبو خالد 12]

السلام عليكم ...

أنا إن شاء الله ناوي أغير إطارات سيارتي لأن عرضهن صغير جداً مقاس 205 ولا تنفع للرمال أبداً وذلك بعد التجربة .

أبحث عن نوع عريض يناسب الرمال ويناسب السفر على الطرقات السريعة ويركب على جنط الوكالة .

وجدت عدة مقاسات فالمقاسات تبدأ من 205 إلى 275 على جنط 16 الموجود على السيارة .

هناك عدة أنواع :
الياباني مثل التويو والدينلوب والفايرستون وأسعارهن غالية بحدود 350 للإطار الواحد .

الكوري مثل الهانكوك وسعره أرخص قليلاً ولكن شدني أنه مشهور وكثير من الناس تمدحه .

التايواني نوع كينج وهو أرخص قليلاً .

الصيني ويأتي بمقاس واحد 255 وهو رخيص بالمقارنة مع غيره .

كل الأنواع ضمان سنة واحدة فقط .

أيهم أختار وأي مقاس أستخدم لجنط سيارتي وهو جنط وكالة مقاس 16 نفس الموجود في الصورة ؟ .

http://www.mekshat.com/pix/upload/images13/mk21082_hiweel2005.jpg

أرجوا الإجابة سريعاً لأني ناوي اغير الإطارات اليوم إن شاء الله .

ملاحظة : هل المقاس 275 آمن لأن عرض الجنط صغير نوعاً ما ؟

[محتري السيل]

أخوي أبو خالد

مساك الله بالخير

بالنسبة لي ما أستعمل الا كفرات ميشلان ضمان مفتوح وجودة لايعلى عليها

صحيح أن سعرهن غالي لاكن صدقني تجي بعد ماتشتريهن بسنتين تلاقيهن خوات الجداد

شف المقاس هاذا مركبه على الددسن 4x4

ولاتنسى ان ميشلان تصنع كفرات خاصة للدفع الباعي

لاكن شئ مضمون بأذن الله وتسوق على الخط وقلبك مرتاح

http://www.mekshat.com/pix/upload/images13/mk21540_mich.jpg

وبالتوفيق

[أبو خالد 12]

أشكرك يا محتري السيل على تجاوبك ونصيحتك في الحقيقة أنا ما همني السعر بقد ما همني الجودة والأمان خصوصاً للإطارات بس ما تعتقد إن مقاس 255 الموجود بالصورة صغير شوي ، وش رايك بالمقاس العريض 275؟ ينفع لجنط الهايلوكس؟؟

[محتري السيل]

يابو خالد

كفرات 275 يبغالها جنط عريض واجد أعتقد مثل اللي في الصورة التاليه :-

http://no7asy.com/up/no7/No_628988333.jpg

لأنه كما تتوقع انت ... لو تنسم الكفر 275 على جنط صغير خطر جدا ويمكن ينفسخ من الجنط بسهولة

فأذا أنت ودك بالكفر العريض غير الجنط معه أحسن

وأذا قصدك ان الكفر اللي أنا مركبه صغير أرتفاعه .. فهو نفس أرتفاع القديم
أما العرض فهو عريض ومناسب جدا والمهم يكون متوافق مع الجنط ولايحك في الرفارف مع االمطاب او اللفات

[راعي الكيف]

ابو خالد ...

حياك ربي ... فيه مسألتين مهمتين جدا لازم تنتبه لهن ... وهما :

1 - كل ماعرض الكفر زادت نسبة استهلاكه للبنزين .. وقل عزمه ... واذا زاد عرض الجنط عن 30 ملم عن المقياس المعتاد ... ترا بيحك بالرفرف ... وعاد انت ابخص
2 - للتغلب على مسألة قل العزم ... اشتر جنوط الومنيوم او كروم ... ولو ماكانت مزركشة .... عشان تتغلب على مسألة قل العزم .... لان كثافة الالومنيوم والكروم قليلة جدا ... مقارنة بجنط الحديد ... ولكل مزاياه وعيوبه

والله اعلم .... واسف على الاطالة

[البرحه]

سلام عليكم

عليك بالتويو الياباني الي جربوه فيالرمل يمدحونه بالحيل

وجربناه على سياره جمس مونتاز ولين على الخط

واما من وجهة نظري فالبالون وبس

[أبو خالد 12]

أشكر الإخوان محتري السيل وراعي الكيف والبرحه على نصايحهم الطيبة .
بالنسبة للمقاس 275 يا محتري السيل والله انك صادق اخاف ما يركب مضبوط على الجنط وينسم خصوصاً إذا كان تيوبلز ، اظن ان مقاسك 255 مناسب ولو ان طموحي كان اكبر بس الجنط هو اللي يحكم .
بالنسبة لجنوط الكروم يا راعي الكيف انا صرفت النظر عنها لأنها غالية جداً وبعدين جنط الوكالة اظن انه خفيف وماهو ثقيل .
البرحه التيو ما عليه كلام بس الميشيلان ضمانه خمس سنوات من الوكيل .
في الحقيقة أنا أمس حصلت جنوط باترول سفاري مستعمله للبيع مع الكفرات ، السعر 1300 ريال لأربع جنوط والكفرات نص عمر ، وش رايكم يا الربع .

[أبو خالد 12]

الأخوان الأعزاء اليوم ركبت كفرات فايرستون مقاس 255 على 70 الله يجعل فيهن البركة وذلك بعد بحث وتقصي عن أفضل الأنواع وسعر الكفر الواحد 420 ريال .

بالنسبة للميشلان يا محتري السيل في الحقيقة انا طبعت الصورة اللي انت وضعتها ورحت ابحث عن كفرات ميشيلان نفس المواصفات اللي في الصورة وحصلتهن وكان سعرهن غالي بحدود 500 ريال للكفر بس المشكلة الضمان فقط 6 شهور وهذا خلاني ابعد عنهن مقارنة بالفايرستون ضمانهن سنتين .

بالنسبة للتويو يا البرحه انا سألت عنهن عند محلات الكفرات وما مدحوهن يقولون انها قاسية مرة على السيارة مع المطبات وواحد قال لي ان التويو خطير ينصلخ مع الطريق!! .

بالنسبة لتحمل درجات الحرارة انا دورت كفرات فئة A في كل محلات الكفرات في حائل ( انا في حائل الآن للإجازة ) ولم اجد فئة A ولكن وجدت فئة B فقط ! وركبت فايرستون فئة B .
سؤال : كم أقصى درجة حرارة يتحملهن الكفر فئة B وهل هو آمن للقيادة في حر الرياض في عز الصيف؟؟ .

[ابومرتاح]

المقاس ممتاز .....بس لو انك مركب دنلوب 255\70\16 مثل خط الشاهين كان ازين وارخص وحلو بالرمل والقار..........عموما الله يبارك لك ......

[محتري السيل]

أبو خالد

الله يبارك لك فيها ويعطيك خيرها ويكفيك شرها
فايرستون اللي أسمع عنها أنها جدا ممتازة

وراعي المحل يوم يقول لك ميشلان ضمان سنتين ماعنده سالفة أو انها تجاري
ميشلان لايقل ضمان الأصلي ( فرنسي - أسباني ) عن 10 سنوات


وبالتوفيق

[أبو خالد 12]

الله يبارك فيكم ياالمرتاح ويا محتري السيل .
بالنسبة للميشيلان يا محتري السيل أنا رحت لوكيلهم وهو ما يبيع إلا كفرات ميشلان وضمانهن بس 6 شهور لو تراجع ردي السابق ، يمكن ضمانهن مفتوح في الرياض أو خارج المملكة بس هنا في حائل بس 6 شهور ضمان . على العموم أنا أشكرك على نصيحتك الطيبة وأعتقد والله ان كفرات ميشيلان ممتازة فعلاً لولا الضمان ، وانا اتبعت نصيحتك حول مقاس الكفر وطلع فعلاً راكب تمام ولو ركبت المقاس الأكبر يمكن يكون خطر شوي لذلك أشكرك مرة أخرى :good: .