مصطلحات ميكانيكية ابغى اعرف معناها ؟

[anas]

السلام عليكم
اليوم باشتغل مدرس معاكم المعذرة
س1- ما معنى وايش الفايدة من : -
اللهات -
الثروتل -
السده -
كت باك -
كت كامل -
تبريزة -
فلنجة -
عمود السرعة -
الظفيرة -
سبرنقات واصياخ -
رقليتر -
نسمع بعضها في السيارات المرهمة او المعدلة
وشكرا ،،،

[ولدحمد]

طيب انا بنصحك بشي افضلك واحسن لك ..
ادخل ع قوقل صور واكتب كل شي لحاله وبتشوفه بصورته وكذا تستفيد انك عرفت شكله وعرفت اسمه ..

[فارس المدى]

اللهات - ماصورت هوا الداخل للمكينة
الثروتل - مدري ولله اول مره اسمعها
السده - فتحه قبل الدبه من لم المكينه تصير لها سده تفتحها يطلع صوت تسكرها يروح الصوت
كت باك - مدري ولله
كت كامل - مدري ولله
تبريزة - حديده تحطها مابين الهوبات والجنط عشان يبرز الكفر بمكان صواميل لكفر يعني تفك الكفر وتركبها بمكانه وتركب عليهن الكفر وتختلف تبريزه عن بريزه
فلنجة - برضوه مدري
عمود السرعة - عمود السرعه مدري ولله لاكن فيه عمود التيمن اللي داخل المكينه اللي يدور البساتم وفيه عمود الكردان اللي يدوره القير عشان يدور الكارونه
الظفيرة - اسلاك الكهرب
سبرنقات واصياخ - سبرنقات الياي واصياخ السست
رقليتر - مابعرفشي

[فارس الحربي1]

من ناحية الفلنجه هي غطاء الاقمشه والهوبات بالدفرنس لما تفك الكفر تحصل تقول صحن هذا هو الفلنجه
والاخو فارس المدى ماقصر بالباقي

[anas]

مشكورين يا اخوان وما قصرتوا
باقي : لعابات - الثروتل - الرقليتر - عمود السرعة - السبرنقات واسياخ<<<<<وهذه الاخيرة اقصد بها اللي داخل المكينة

[كم كيلو باقي]

اللعابات .. قطعة ما أعرفها بالضبط تركب بين السست لرفع السيارة
الثروتل .. باختصار .. بوابة البنزين للمكينة .. ولو تفكه تركب واحد أكبر يزيد نشاط الموتر وكذا

الرقليتر .. ماعرفه واعتقد انه حول البنزين وطرمبته

عمود السرعة .. ما اعرف

السبرنقات والاسياخ .. قطع داخل السرندل

[كم كيلو باقي]

كت باك .. والكت الكامل ..

يركب مكان الشكمان نفس فكرة الهدرز
((
الكت باك .. من المكينة لين الدبة الثالثة .. والكت الكامل من المكينة لين نهاية الشكمان
))


اللي بين القوسين ماني متأكد منه

[وبل نجد]

اللهات - قطعة داخل الكلبليتر تسمح بدخول الهواء الى الكبليتر
الثروتل - مدري
السده - فتحه في الشكمان بعد القزوز وهي نفس السده حقت مواصير السباكه الحديد
كت باك - مدري
كت كامل - بعد ما ادري
تبريزة - قطعه تكون بين الجنط والهوب علشان يبرز الكفر على برا
فلنجة - هي القطعة اللي تكون في طرف الدفرنس ويركب عليها الهوب وداخلها الرمان
عمود السرعة - هو العمود اللي يكون بين القير والدفرنس ويسمى عمود الكردان
الظفيرة - اسلاك الكهرب كامله
سبرنقات واصياخ - السبرنق هو الياي واذا كنت تقصد اللي داخل المكينه فالمقصود سبرنقات البلوف
والأصياخ مدري
رقليتر - مدري


وبس
تقبل مروري

[الكلاسك]

الثروتل :
مصطلح غريب اول مره اسمعه :(:(
اللي قاله لو تسئله هو نفسه فق ثمه :eek::eek:
ولا عرف وش معناه :p:D
عشان كذا الغيه من القائمه اصرف :good2:

[N أبورغد N]

الثروتل يا اخوان يركب على اللهات شغل ترهيم يساعد على دخول الهواء اكثر للمكينه على حد علمي

[bader7787]

الثروتل هو نفسه اللهات واللعابات الي على شكل U تركب في السست السبرنقات داخل راس المكينه تركب على البلوف عشان يرجع البلف لمكانه وقت الانفجار :D

[مركب الجمس]

الهات : هي فتحت الدعسه اذا دعست تفتح وتسكر هذي الهات
الثروتل - هو نفسه الهات
السده - فتحه قبل الدبه من لم المكينه تصير لها سده تفتحها يطلع صوت تسكرها يروح الصوت
كت باك - وصله الهدرز الي بعد القزوز الى الدبه الوسطى
كت كامل - وصله الهدرز بعد القزوز كامله الى اخر شي
تبريزة - حديده تحطها مابين الهوبات والجنط عشان يبرز الكفر بمكان صواميل لكفر يعني تفك الكفر وتركبها بمكانه وتركب عليهن الكفر وتختلف تبريزه عن بريزه
فلنجة - الصحن الي يغطي الهوب
عمود السرعة - عمود السرعه هذي تجي بوسط القير والشباب الي قالو وسط المكينه اسمه عمود تيمن او تيمنق او كام اما عمود السرعه فهو بالقير .
الظفيرة - تمديدات كهرب السياره
سبرنقات واصياخ - السبرنقات هي سبرنقات البلوف والاصياخ اصياخ البلوف
رقليتر - تركب عن الطرمبه البنزين فايدتها يزيد من ضخ البنزين وينظمها

وهذا الي عندي وان شاء الله اني متأكد منها ومتاكد من مسمياتها ووظائفها

[mobe]

الرقليتر من إسمه يكون (منظم)
عاد انتم شوفو وين ينحط فيه
هو منظم ضغط
او منظم وقود
او منظم كهرب
او منظم ايش.؟ الله ثم انتم اعلم

كت يعني مجموعة اشياء تؤدي دور مكامل مع بعضها

الظفيرة اسم محلي يقصد به شبكة التمديدات الكهربائية في السيارة

[anas]

اشكركم جميعا
والظاهر الاقرب الى الصواب كلام (وبل نجد ) و (مركب الجمس)

[ذئب الخليج]

مشكووووررررررر