كم مدة اصعـــــب تغـــــــــــريـــــــــــزه (مرفق صور) [الأرشيف]

شقاوي الديرة

21/08/2011, 02:49 AM

حيا الله شيخنا العزيز
موضوع جميل ويتفاعل الإخوان إن شاء الله وبتشوف العجب العجاب:)
أنا ما أنسى قصة مضت علينا في مقناص وهي ماهي تغريزه ولكنها تعليقة
حيث طلعنا لمقناص في أحد الجبال الوعرة وكان الطريق وعر جدا وما كل سيارة توطاه وشغل جديد ونزلنا طلعة قوية ووقفنا سيارتنا العصر ورزقنا الله بوبر وسوينا العشا عليه وسهرة إلى الساعة 12 ويوم جينا نطلع قال الجيب هين الطلوع ماهو زي النزول وياهي ليلة آخر شي تقطعت الكفرات من كثر المفاحط وآخرتها شغل أكثر من ساعة في هذا الطريق وندربي من الحصى ونرصف لين وازنا الطريق شوي وطلعنا يمكن بعد ثلاث ساعات ولقينا أنفسنا كنا ما تعشينا:p
أتوقع هالقصص تصير أكثر لأصحاب الجيوب لأنها تمهزيهم ويطيح في الفخ وهو ما يدري وشوف مقاطع غرق السيارات عند عبورها السيول أكثرها من الجيوب

تقديري مشرفنا العزيز

عاشق 0000

21/08/2011, 05:02 AM

حياك الله يا طويل العمر

سالفتي انا قبل ثلاث سنوات تقريباً كنا في فيضة هجريه العوده كنا طالعين من الضحويه ومعنا العزبه
صلحنا غدانا و تغدينا يالله لك الحمد .

جلسنا الى العصير و تجينا ذيك السحابه اللي عسى ربي يعودها و ينفع بها ان شاء الله

ذرينا بمواترنا و جلسنا نستمتع بالاجواء و راح من بالنا ان الفيضه بتقلب طين :)

يوم بغينا نحرك الا الفيضه كلها صايرتن قزازه من الماء

السيارات اللي معنا
1- جيب جكسار 2005
2- نيسان 2006
3- نيسان 91
4- شاص 2007
5- شاص 2000
6- ددسن 2002

المواتر كلها حلفت و طلقت انها ما تعداء محلاتها الا الددسن كان راعيها مشطرها حول الحزم اللي قريب منا و هي السياراه الوحيده اللي سلمت ذهين راعيها هههههههههههههههههههههه

جلسنا نحاول في الموتر الاول ولا طلع حاولنا في احد الجيوب النيسان و طلع و قلنا بنسحب فيه باقي المواتر اربنا نطلعهن

سواقه لكم عليه و دقر مره ثانيه و حلف علينا ما يطلع و جلسنا لين امسانا الليل

العالم اللي في طراف الفيضه كلن توكل على الله

جلسنا تقريباً الى الساعه 8 في الليل و دقينا على الدفاع المدني حق الرفيعه

قال واحد من الربع قولو لهم ان معنا عوايل و نسوان و ورعان عشان يستعجلون و يجون بسرعه
لو حنى قايلين لهم ان حنى شباب ما شفناهم ههههههههههههههههههههههه

حروة الساعه 11 جونا

اول ما اقبل علينا غرز و اشوى ان مكانه مهوب كله طين مثل محلات مواترنا

حاولنا فيه شوي و طلع

وعقب الزهده طلع مواترنا و لا مشينا الا الساعه وحده و نص الليل

ذكريات حلوه حتى لو هي عانينا فيها

الله يعيد علينا الخير و الامطار و الربيع و كافة بلاد المسلمين

mobe

21/08/2011, 05:42 AM

شكرا للموضوع

انا فرقت عن الخط حولي الساعة ثنتين الظهر ابغى مطينة تقطع ارض صبخة ومعي باترول نص
اثاري الطبقة الفوقية من الطريق متماسكة لكن اللي تحتها طين رخو .
فلما حسيتها كذا وقفت السيارة بدون ما اضغط على البريك بزعمي ما ابغى الكفرات تخترق الطبقة العلوية المتماسكة .
وقلت اتوقف وارجع ورا قبل ما اتوغل في الطين ثم ماتجيبني ولا هيلوكبتر !

يوم جيت اريوس دار الكفر !!
مع المحاولات الناعمة اللينة انفتحت طبقة الطين تحت الكفرات الاربعة وقالت هذا مكاني
ثم نزلت السيارة تدريجيا والتصق بطنها التصاق تام بالطين ماهو يعني مجرد تعليقة

المهم رجعت للديرة مع افغاني اسعفني ودليت اتصل بالربع ابي فزعة وطولة بال وأحد فاضي ورايق لأني كنت مستوعب وضع السيارة
جمعنا وايرات حقات شد الحديد حوالي ستين متر ودلينا نحاول (نمكعها ) <<<نفك التصاقها بواسطة المتل بقوة بجمس صالون قديم دفرنسين ونستفيد من التسارع لأن فيه حزم صغير استعملناه للمناورة بالجمس

ما استفدنا شي ولا تحرك الباترول واحد ملي !
لأن الوايرات تتقطع واحدها ضرب في هايلوكس معنا وعفط كبوتها وفك الله العيال
دخلنا للديرة مجددا و جبنا سلاسل بوكلينات من حقين المعدات الثقيلة واستمرينا بالمتل حولي ساعتين لفك الالتصاق
بدأ اليأس يدب فينا حوالي العاشرة ليلا وكنا نفكر نترك السيارة لليوم التالي عشان نجيب شيول يسوي سكة ناشفة ويدخل منها لكن احد الاصدقاء اصر على المواصلة بالمتل مادام ان السلاسل لا تتقطع
وفي احدى المحاولات نجح الجمس في تنقيز الباترول من مكانه لكن سبحان الله نقز الى اعلى وليس الى الخلف !
لأنه كان ساقط في بركة من الطين وكنا ندخل ايدينا اسفل الكفرات الى عمق الارض لنتحسسها لكن ماقدامنا إلا بركة من الغرين السائل
استمرت التغريزة حوالي 8 ساعات منها 5 ساعات عمل والباقي روحة وجية

سعودأبوفهد

21/08/2011, 08:22 PM

اشكرك اخوي على الموضوع الحلو

انا سلمكم الله كنا حنا 5 ومعنا فكسار بالساحل وحرر

دخلناا بين ظلعين ويجي بينهم رمل وحنا ماخذين عزم الا القميريه القميريه

ووقفنا ورماها واحد وظاعت وقلنا بنرجع لها وحنا نرجع بدا الموتر يحفر حرك لا تحرك ذا الكلام الساعه 11 الظهر

قال السواق معنا ونش الكهربائي خل نستخدمه

ربطناه بالضلع ونسح ونسحب الا يوم تعلق بالحصاه كبيره ما نشوفها دافنها الرمل يا ولد وش السواه ..

البنزين ما بقى الا شوي والماء البارد خلص ما بقى الا موية التانكي

حتى كان ما فيه ابراج ويرقى واحد منى للضلع واشرون للي يجي

ويجيني ابن حلال واخوياه ويطلعنا الله يجزاهم خير وعطونا ماء وما طلعنا الا 1 الظهر

هاذذي قصتي ارجو انها تحوز على رضاكم

محمد الظاهري

21/08/2011, 09:42 PM

وعليكم السلام ورحمه الله وبركاته
اسعد الله اوقاتك بكل خير يابو محمد
وماشالله عليك مواضيعك شيقه وجميله
التغريز كثير خااصه في منطقتنا لئنها كلها نفود والعروق
حاااولت ان ارفق صوره للتغريزه لكن ما قدرت وما اعرف كيف انزلها
لكن اسرد السالفه
في سنه من السنين وقريبه بعد
طلعنا انا وكم واحد في النفود ومعروف لا ارسال ولا شي
المهم انا ادل الدروب وحنا ثلاثه بس دخلنا داخل النفود
بمساافه 35كم واياام الشتاء وحنا في النفود السماء غيم وفيه رش خفيف متقطع امهم وناسه وتونسنا ونعلق
و كل شوي ننزل وكل واحد يسوق الموتر
وكان خوينا اربعه طالعين في هاك المنطقه لكن حنا انجمنا وضيعنا وحنا نعدي هاك الطعس ولا السيااره قالت هاذا محلي
غرزنا وحفرنا وحولنا لكن السيااره خلاص ما فيه امل
الدفرنس وبطن الموتر في الارض
والجيب إذا تعلق اقشر
المهم حاولنا منا عندك يا فلان ويا فلان ويعلم الله كل واحد معه قروره ماء صحه ابو ريال وخلص الصرااحه
حاولنا حاولنا لكن ايسنا انه يطلع ولا حولنا احد وحنا
في بطن النفود وما فيه احد خلي والجو غيم وامطار
الكلام السااعه 9 الصبااح
وجلسنا شوي وإلا فيه سوداني راعي انياق يسرح
وحنا ذبحنا العطش خلينا السياره ورحنا للسوداني
السلام وعليكم السلام يا ولد مراح الابل قريب ولا بعيد
عشان نروح له ونشر من الماء قال لا حنا شادين
ورايحين للشامه طيب شي ينشرب قال تبون حليب
قلت ايه الحليب يسد الجوع والي اشوفه الابل اغلب حير
ولا عشااير قلت يا ولد ما فيه خلفاات تحلب منها قال ألا بس
ورا رح من ورا وتحصل ونروح ونحصل
حنا تعبانبن قلت احلب قال والله يدي فيها جروح
قلت على خير يا فلان عاوني وامسك الخظاره
واحلب ونشرب وروح راعي الابل
ورجعنا للسياره
ونحاول عقب ما تنشطنا ولا فيه امل وتعبتنا السياره
وخلاص ما حولنا شي إلا الحصانيه
وربعنا الي نبي نروح لهم ادل مكانهم فيه عرق بعيد مره
وهم بالخبه الي وراء العرق
جت الساعه 3وحنا في مكاننا وتعبنا وااحد خلاص تعب مرره
من التعب اخذ له خفوه
ونحااول مره ثانيه وعجزنا
والليل قرب يجي
والشمس توها ما غاابت
وحنا مسدحين على الارض وكل واحد معه فروه وفرش النوم معنا وفيه واحد مدري وش يبي من السياره
في الصندوق ويركب وهو يناضر
وشوي وإلا يصرخ علينا ولد ولد تعالو شوفو
وحنا مسدحين وش فيك منت بصاحي
قال فيه سياره هناك
وحنا انتقامز ونشوف وإلا هاك المجاهيم الي جااايه وراعي الشاص بساقتها والسياره كانت موجه جهتهم وحنا نكبس
ونكبس ونشر ونكبس
وما درينا إلا راعي الشااص الي يمشي طبلونه مع النفود ويجينا
وش علمكم يا الربع وش فيكم
قلنا طلعنا يا ولد طلعنا
وحو معه ونش
ومسحاات ويسحب ويسحب ويسحب لين طلعنا
قال لنا شااص ويغرز قلنا المهم اننا طلعنا
والرجال طلع دوسري
ونروح لرعنا
وعزمناه عند عيال الديره وجلس ونعشيه
ويسمر لين الفجر وونااسه وضحك وفلت حجااج
وماشالله عليه
والقصص كثيره بس مضحكه
عن نااس قبل العيد يبون يروحون للنفود يحطبون وما جو إلا فجر العيد هههههه
وانا اعرفهم ومن اهل الديره
ارجو ان سالفتي نالت على رضااكم
وتحيااااااااااتي لكم

دغيم1

21/08/2011, 11:56 PM

السلام عليكم ورحمة الله وبركاته
حياك الله أخي الغالي
فهد الهلالي
موضوع جميل ويشرح الخاطر ويبرد الأجواء مع الحر
المهم
أنا سالفتي مع الغراز سالفة واعتبرها وكالة
يعني انا وكيل معتمد للتغاريز
مافيه طلعه مافيها تغريز واقل تغريزه ما تجي اقل من 3 ساعات مع شغل عدل
المهم التغريزه الأصعب هي :
كنا متوجهين يم الفياض اللي جهة سامودة ولينه .
طلعنا جهة فيضة الفاخرة وكان معي ونيتي الفورد الأبيض
ومعنا جيب لاند كروزر جي اكس آر .
وكانت الأرض لينه وتوها شاربه المطروكانت لينة على الونيت وكان الجيب قدامي يمشي عادي ماحس بالأرض لأنه خفيف
ولما توسطت نزلت السيارة وصارت على جنبها الأيمن .
لأني كل ماتقدمت لانت الأرض .
المهم كان في الروضة ناس وفزعوا معهم جيب ربع تويوتا
مع جيبنا وسحب يالله طلع الفورد

http://www.mekshat.com/pix/upload03/images128/mk46848_imgp1903%20(small).jpg

http://www.mekshat.com/pix/upload03/images128/mk46848_imgp1905%20(small).jpg

http://www.mekshat.com/pix/upload03/images128/mk46848_imgp1900%20(small).jpg

طلعنا والحمد لله ورجعت من اول الطريق والجيب راح لطريقة وقلت اروح مع الجهة الثانية .
كان في المرتبة الخلفية واحد من الزملاء
ناداني والتفت عليه وقال :
افا يابو فيصل ماخبرتك كذا ؟
يردك شوية طين !
وعلى طول اللي قدام والثاني اللي ورا قالوا : واللي يرحم والديك مالنا خلق على التغاريز ويالله طلعنا بعد مشقة .
اناظر اللي ورا ... وماسك يده بلحيته .. ويغمز .
قلت ابشر يابو بدر والله مارده بخاطرك وان شاء الله نطلع .
المهم الكلام هذا وسط العصر .
واعطيه نمره وادعس الأبنص
وياولد ماتعدى متر واحد عن محله الأولي .
حاولنا نطلعه .. لا جيبنا ولا تحفيرنا ها المرة قدرنا نسوي شيء
لأن التغريزة صارت أصعب من الأولى .

http://www.mekshat.com/pix/upload03/images128/mk46848_imgp1928%20(small).jpg

http://www.mekshat.com/pix/upload03/images128/mk46848_imgp1925%20(small).jpg

http://www.mekshat.com/pix/upload03/images128/mk46848_imgp1915%20(small).jpg

http://www.mekshat.com/pix/upload03/images111/mk46848_imgp1922%20%28small%29.jpg

بعد عدة محاولات وتحفير وعفريته وعفريته هوا ... مافيه فايدة ..
ولما اقبل المغرب قررنا المبيت بالقرب من السيارة حتى الصباح وربك بيفرجها .
عند الصباح الباكر .. محاولات يائسة ..
توجه إثنان من الزملاء للدفاع المدني بروضة هباس وطلبوا منهم المساعدة ..
ولأن مافيه عوايل اعتذروا عن الحضور وان سيارتهم صغيرة .
طرأ على أحد الزملاء فكرة ناجحة وكانت بتوفيق الله هي الأفضل
راح يم البنشري وهو سوري .. وطلب منه عفريته تمساح ..
وحط عنده تأمين .. ولما جاء .. شوي رفعنا الموتر وبدينا نحط تحت الكفر حجر وشجر ..

http://www.mekshat.com/pix/upload05/images226/mk46848_imgp1937 (small) (small).jpg

والحمد لله العفريته التمساح جابت نتيجة بعد توفيق الله
طلعنا وواصلنا المسير .
والمقيال بعد التعب شيء خيالي

http://www.mekshat.com/pix/upload03/images111/mk46848_dsc00039%20%28small%29%20%28small%29.jpg

ختاما كل الشكر والتقدير لمشرفنا الكريم
فهد الهلالي
على هذا التميز في الطرح
وآمل أن أكون قد قدمت شيء يحوز على رضاكم
وعذرا على الإطالة
تقبلوا وافر التحية وأعطرها
محبكم / ابو فيصل

فيصل التميمي

22/08/2011, 12:32 AM

موضوع قمة في الروعة ومافية كشتة مافيها تغريز خاصة في مناطق الرمل او وقت الامطار والطين الا نادر ياخوان
قصتي قبل سنتين انا وولد عمي انا معي هايلكس دفرنس وولد عمي معة هايلكس دفرنسين ومركب لة ونش وعلومة طيبة
المهم جهات منطقة تمير لاني جاي من الرياض وولد عمي من سكان الديرة طلعنا لم فيضة حول الديرة وكان وقت الامطار وولد عمي يمشي قدامي وانا وراه بالهايلكس ويقطع الرجال الشعيب ويغرز حول الساعة خمس العصر وش الحل وكيف اطلعك قال تعال مع الجهة الثانية فيه شعيب صغير اقطعة وابي اربط الونش في موترك ويطلع موتري ان شاء الله واجيك طاير وتوني طاب في الشعيب يوم غرزت حول ولد عمي وش السوات السماء تمطر وتوقف وجانا الليل ونراسل الشباب ماحد حولنا جلسنا نحفر مافية اي فايدة نمت في موتري وولد عمي نام في موترة يوم جاء الصبح لقينا راعي ابل معه شاص جزاه الله خير سحب موتري وموتر ولد عمي عقبها خذت على نفسي وعد مادخل البر وقت الامطار خاصة مواقع الطين

فهد الهلالي

22/08/2011, 08:17 PM

حيا الله شيخنا العزيز

موضوع جميل ويتفاعل الإخوان إن شاء الله وبتشوف العجب العجاب:)
أنا ما أنسى قصة مضت علينا في مقناص وهي ماهي تغريزه ولكنها تعليقة
حيث طلعنا لمقناص في أحد الجبال الوعرة وكان الطريق وعر جدا وما كل سيارة توطاه وشغل جديد ونزلنا طلعة قوية ووقفنا سيارتنا العصر ورزقنا الله بوبر وسوينا العشا عليه وسهرة إلى الساعة 12 ويوم جينا نطلع قال الجيب هين الطلوع ماهو زي النزول وياهي ليلة آخر شي تقطعت الكفرات من كثر المفاحط وآخرتها شغل أكثر من ساعة في هذا الطريق وندربي من الحصى ونرصف لين وازنا الطريق شوي وطلعنا يمكن بعد ثلاث ساعات ولقينا أنفسنا كنا ما تعشينا:p
أتوقع هالقصص تصير أكثر لأصحاب الجيوب لأنها تمهزيهم ويطيح في الفخ وهو ما يدري وشوف مقاطع غرق السيارات عند عبورها السيول أكثرها من الجيوب

تقديري مشرفنا العزيز

هلابك يااخي الغالي شقاوي الديره
والله يسعد اوقاتك بالمسرات
اشكرك على ادراج اول موضوع للغراز على متصفحي
فليس هناك شخص يعشق الرحلات البريه ولم يواجه غراز
فموضوعك كان شيق جدا
اكرر شكري لك والله يحفظك
تقبل تحياتي

الشهيمي55

22/08/2011, 10:49 PM

موضوع رائع جداا والتغريز لا بد منه في الطلعات البريه
واصعب تغريزه مرت علينا كنا في حر طالعين من الرياض يوم الخميس بعد العصر للخفس والطعيسات اللي حولها
وكل اللي حوالي الخفس تغاريزز ماهيب صاحيه وخصوصا الدداسن واللي معنا ددسن 2005 غمارتين الله يقلعها
وتكينا وسمرنا وظبطنا عشانا وفليناها وجانا مكالمه طاريه حوالي الساعه 11 مساء لازم ترجعون للرياض وشلنا اغراضنا وتوكلنا على الله وراعي الددسن ما يعرف يسووق بالليل وساق واحد من العيال وظربنا الطعيسااات ماشاء الله علينا لين اقبلنا على الخط مابينا وبينه اللي اقل من نص كيلو ونغرس وقالت الددسن والله ماطلع يا ولد مرررررره نشبت حوالي الساعه 12 في الليل وحاولنا فيها مافي امل نسم كفررات مافيه امل رقصنا الموتر مانفع قلت يــا ربعنا خلونا نمرح والصباح ربااح وراعي الموتر اللي جاه مكالمه طاريه عيا يمررح مهتم والله مالوومه لا كن الشكوى لله
وقمنا مع الفجر وفيه واحد من العيال اللي معنا ملبق موتر جنب الخط فورد ومشا على رجلييه لين جا موتره ورحنا وركبنا معه ورحنا يم نزله الطوقي ندور واحد يسحبناا ولقينا واحد من عيال عمنا جاااي من الدهنااااء معه جيب لاند كلوزر 2011 وحولنا وسلمنا عليه قلنا جابك الله الموتر ناااشب والله جايبك لنا الله يعييينك تطلعناا قال ابشررو وسحب الموتر لين تصلخت كفرته ولا معنا استبنه لين وصلنا الخط وركبنا الموتر الثاني ورحنا لمحطه خززام وجبنا سطحه وحملت الموتر لين خزام وقال صلاه ورحنا لمحطه العطااوي طريق الثمامه بــ 400 ريال وغيرنا الكفره بــ350 ريال وووصلنا اهلنا قبل صلاه الجمعه بربع ساااااعه

وكان معنا ماطور هووا وصكه واحد من العيال عين وطفاااا

وسامحونا واعذروونا طولنا عليكم

وسلامتكم

الشيخ قوقل

22/08/2011, 10:56 PM

http://up.albrari.com/uploads/13140428551.jpg

هذي اخطر تغريزة عندما كنت في رحلة استكشافية ومررت بالنفود الكبير وقد رأيت شئ ما في اسفل النقرة
وبعدما نزلت إذا بالسيارة تقف من حالها وضننت أن صاحبي ضرب القير برجلة
والحقيقة أني سلّمت وانطلقت إلى الأبر وطرحتها هناك لأننا في أواخر الشتاء ولله الحمد اخذنا نصف ساعة والتغريزة انستني التصوير
مشكور اخي على هذه الإثارة

النبهاني

23/08/2011, 03:50 AM

حيا الله مشرفنا الغالي ابو محمد

واشكرك على طرح هذا الموضوع الجميل وليس بغريب منك الجميل

والذي سياتي بنتائج متنوعه وشيقه

اما بالنسبه لموضوعي

فالتغريزات واجد ولكن فيه تغريزه لن انساها

فقد كانت ايام الشباب والعمر بالطعش وكنا انا واحد معي نصيّد يوم الصيد وافر وكنا صايمين برمضان ومعنا ددسن ونصيد باثل مزرعه لها بهجره حول الساعه 11 الضحى وجانا راعي المزعه ويوم شفناه غاير علينا وحنا نهج ونخلي المزرعه ورانا ونشمل وما امدانا الا والشعيب معترض لنا ونطب فيه والددسن الماخوذه مامن نشاط وهي تهقس بوسط الشعيب وننزل ونطالع اللي يطردنا اثره يوم شافنا غرزنا وهو ينكس قلنا الله لايعقله ولا شفقنا على فزعته دام هذي سواته

المهم قمنا ندف السياره واحد من وراه والثاني من عند باب السواق على شان يعدل الدركسون واذا دقرت قعدنا نحفر قدام الكفرات همن نرجع ندف وعلى هالحاله تحت هالشمس وبالرمضا لين طلعنا من الشعيب يمكن قعدنا اكثر ساعه

والا حالتنا حاله يا ماما يا بابا وكل واحد منا تقل جلد بعيريابس ومدندن

وحنا ننكس يم الديره والمزارع وندور الحوابيط وكل منا يطب له بحابوط ويربص جلد البعير

هذا ما حدث ودمتم

الخفاره

24/08/2011, 03:53 AM

4 ايام مغرسين في صبخه والسياره تريله تسحب لها سطحه18 متر وعليها شاليهات 2 وجبنا دركتر وقعدت وجبنا ام جنزير وقعدت وجبنا دركتر صغيره ولخفتها قامت تجيب مخلفات بنيان طابوق وكنكري وتدفن لما سوت لها طريق وطلعت السيارات كلها بفضل الله

سد الغابة

24/08/2011, 02:36 PM

حنا الله يسلمكم و يسلم السامعين لنا قصة تغريز ما ننساها و كانت قبل عدة سنوات في ( الرايس ) جنوب ينبع
رحنا مجموعة عوايل في أربع سيارات ( بويك رودماستر ، إكسبيدشن جدييييد ، لاندكروزر جي إكس ، صابونة كحيانة )
و قعدنا ندور مكان على الساحل يكون بعيد عن الناس و مميز ، و نلقى الدنيا زحمة إلا ذاك المكان أللي ما حوله أحد و الناس يمينه و يساره قلنا بس هذا مخصص لنا :good2: و لكم الله ما دخلت السيارات إلا و كأنها في رمال متحركة و هي تخفس الأرض بالسيارات الأربعة و على الشاصي :eek: و أهونهم اللاندكروزر ، و لا في أمل إنك تحفر لأن الأرض تقل جص
و الله يا أخوان من الساعة 5.30 العصر و حتى 10.15 و حنا نحاول بكل الطرق حتى إن البحر بدأ يمد و الما يطلع علينا من تحت السيارات وخصوصاً أقرب سيارة للبحرو ينقذنا الله بواحد نشمي من أهل الديرة الله يبيض وجهه و خابر هذا الأرض و كيف يمكن تطلع السيارة منها و لا طلعنا إلا الساعة 10.30 تقريباً :eek: و هذيك التمشية ما استانس فيها إلا الحريم :p قاعدين بعيد عنا شوي على البحر و سواليف و فلة حجاج ( و يقولون حقوق المرأة ) :mad:
آسف جداً على الإطالة

راع الحشه

24/08/2011, 02:45 PM

اصعب تغريزه اللي تكون بالسيل كما في هذه الصوره
http://www.mekshat.com/pix/upload02/images98/mk29648_41225984665.jpg

منصور الفايز

27/08/2011, 11:16 AM

يا هلا والله باخوي فهد ...
الله يحييك ويخليك

كم مدة اصعب تغريزه غرزتها وماهو موقفك ذلك اليوم
وماهي سيارتك وهل في رمل والا طين
وكيف قدرت تطلعت السياره
من غرازها

المده للغراز كانت يومين ونص .. المكان الدهنا -اللي على طريق الشرقيه وموتري كان هايلوكس 82 :) قديمه جدا :)
كنت انا وصديقي نروح للدهنا نحطب .. بهذاك الوقت كنا صغار وما معنى لا بطاقة ولارخصه ولا يحزنون.. لكن متعود من ابوي الله يخليه كل الاماكن هذه...
المهم رحنا نحطب والقصد اننا نرجع بنفس اليوم .. وطحنا على منطقة هيار كبيره وعجزنا نحرك الموتر..نزلنا الحطب ..ونحاول منا ومنا وما اراد الله نطلع ... وهذاك الوقت لافيه جوال ولا غيره والخط بعيد
وما كان معنا الا جركل بنزين وماء وعزبه قهوه وشاي وتمر .. قعدنا يومين ونص... لمين مر من حولنا بدوي معاه جيب .. وهاتك يا ركض وتلويح بالشماغ له واشوي بالاخير شافنا ... ورجع وسحب الموتر والحمدلله طلعنا وشافنا هلكانين ..ما قصر اخذنا واكرمنا الله يبيض وجهه
المهم من بكرى رجعنا لم البدوي ومعنا ذبيحه هديه له للي سواه..
هذا اللي صار والحمدلله
والى الان اذا رحت للدهنا لازم امر مكان التغريز

فاصعب تغريزه تكون اذا ما كان حولك احد :)

bloodomen

06/09/2011, 02:28 PM

اصعب تغريزة كانت في عصر رمضان 1431 هـ

كانت انطلاقتنا الظهر من المدينة المنورة الى محافظة بدر وذلك لتوثيق غزوة بدر الكبرى وسيارتنا كانت يوكون دينالي 2008

وصلنا بدر وبعد ماانتهينا من التصوير والتوثيق أصر رفيقي في الرحلة بالصعود لأحد الطعوس وبعد ماطلعنا وقف ونزل من السيارة لمشاهدة المنطقة ولما رجعنا للسيارة وحاولنا نمشي قالت السيارة هذا مكاني .
حاولنا يمين شمال مافي فايدة .
والمشكلة السيارة دفع رباعي مستمر ومافيها دبل ثقيل .
جاء احد اهل المنطقة الكبار في السن جزاه الله خير وقال لنا انتو ويش جابكم لهذه المنطقة هذه أرض ميتة وماحد يمشي فيها .
الرجال جزاه الله خير راح جاب لنا خشب وضعناه تحت الكفرات لكن مافي فايدة .
قالي خوي انا رايح ابحث عن مساعدة وانت خليك عند السيارة وفعلا ذهب وعاد بعد قليل مع احد اهل بدر الكرام ومعاه جيب عشان يسحب السيارة .
ربطنا السيارة وحاولنا نسحب وننتل مافي فايدة .
الرجال ماقصر وحاول عدة مرات ولكن السيارة لم تتحرك 1 سم من مكانها .
اقترب اذان المغرب وحل علينا التعب وحنا صايمين والريق انتهى اصلا .
الرجال ماقصر جاب لنا تمر وماء للافطار واستاذن منها لتوصيل اهله والعودة لنا .

اتصلنا على الدوريات وماقصروا ارسلوا لنا دورية ولما وصل العسكري وشاف منظر السيارة اعتذر وقال انه الجيب اللي معاه تعبان ومايسمح له وقام بايصالنا للدفاع المدني لطلب النجدة منهم .

وبعد ما وصلنا الدفاع المدني اذن المغرب افطرنا والجماعة اكرمونا جزاهم الله خير وماقصروا معانا .
قلنا لهم قصتنا وطلع معانا واحد قريب صلاة العشاء بسيارتهم باترول صالون وبدا السحب ولكن لا حياة لمن تنادي .
الجيب يلعب من الخلف يمين يسار والسيارة ماتحركت من مكانها .
يالله النشبة .
من حسن الحظ غرازنا كان قريب من منقطة عمل ويويجد بعض الشيولات .
وبدا العمال في القدوم للعمل وكلمنا صاحب الشيول وجاء ربط السيارة وماشاءالله في ثواني والسيارة خرجت من مكانها .
على قدر التعب والمعاناة ولكن كانت من اجمل الرحلات
وهذه صورة للسيارة وهي مغرزة

http://www.taibanet.com/uploaded/1_1315308395.jpg

عاشق المقناص6

10/09/2011, 12:38 AM

يرجاال اصعب شي تتعلق في فنجاال هذاا الي تااخذ فيه سااعه

فتى شنه

10/09/2011, 01:26 AM

اصعب تغريزه كانت لاحد معارف والدي قبل 12 سنه في الرملة وكان الوقت في الصيف المهم كان المنطقة اللي دربه عليها منطقه تسمى الحوايا وهو لحاله على جيب شاص يقول عاد الله يرحمه كنت ساج التفت يميني الا الجيب محول مع هالجفره يقول طعس مقابل وطعسي اللي انا معه ماقدر الجيب يرجع معه حاولت مره مرتين ثلاث يقول مدقر وقدامي بين الطعوس فيه مثل المساحه اللي يوقف عليها الجيب متساوي وبعده مثل الفنجال صكت علي العراقيب من كل محل يقول عاد مافي مسافه الموتر ياخذ حيله عشان يطلع .
يقول تعوذت من الشيطان وانزل عزبتي في ضلال موتري واتقهوى واقوم اضرب الراي بالراي ياولد انا وش اسوي في هالمقطعه وقيض ولا تلفون ولا شي يقول عاد انا معي عزبت شهر بس بعدها الله اعلم بالحال يقول واقوم اصلي وادعي ربي يقول اضلم الليل والنوم طار من اعيوني واتقلب لين نمت يقول يوم جاء الفجر واصلي واتقهوى وافطر
وتخطر في بالي عودان الغضاء اني اسوي منه صيجان واكسر العودان لين تصير مثل المطارق بمسافه ذراع واختار العودان الرطبه عشان ماتتكسر اذا ركب الجيب عليها يقول واقوم اربطها من الجهتين مثل الصيجان يقول ثلاثه ايام وانا اجمع شغلي كله في براد الصبح وبراد العصر والباقي جالس في ضلال موتري ويقول وانزل موتري لين تساوى في هالنقره واحطى صيجاني قدام الكفرات اللي ورى واللي قدام وامشي عليها لين يلمس الرمل يقول احيانا تفكك وتبعثر واقوم اعيد ترتيبها وربطها بالحبل يقول كفرا ت موتري على ضغط 5 وهي بالون 900 وبعد خامس يوم ويطلع من هالنقره واقوم اصلي وابكي وادعي ربي يقول واعبي كفرات موتري واحط ندقان بين عيوني ونهاري وليلي ويوم جاء الفجر وانا من دون ندقان 40 كيلو يقول واصلي الفجر وافطر والنوم مادخل عيني يقول واجلده يوم جاء الظهر وانا معارض طريق حرض البطحاء وامشي ويوم صلوا المغرب يقول وانا داخل بيتي بالرياض عند عيالي .

هاذي من ضمن المخاطر علما بانه رحمه الله دليله في الرملة وسواق رقم 1 في المقناص.
ومن بعدها اذا ذهب الى الرملة يقوم يجمع من عودان الغضا ويزين له صيجان وقت المعشى لانها تعتبر خفيفه وسهل مشيلها في السياره

فتاح الجواد

10/09/2011, 01:51 AM

اردى شيء لما تغرز ومعك حريم ولو 15 دقيقة
واطول مرة غرزت (تعلق)الموتر بسبب تحدي والموتر نفس وانيت الفورد الي فوق وهو دفرنس 1
ولا كلعت الى في اليوم الثاني وبعد الاتصال على الوالد واخذ الوالد سيارة عمي (الله يحفظهم ويحفظ لكم غاليكم)
الله يجزاهم خير طبعا الوالد موتره باترول صالون ولكن اخذ اليوكن لانه عليه ونش 100%
وتم السحب ولله الحمد تعذبوا الشباب وحسرناهم في نقل الاغراض والعفش والماء
للأسف ليس لدي صور

طحنون

10/09/2011, 02:24 AM

تغريزه لا تنسى في طعوس الجافوره طبعا رباضه من النوع الاصلي الفاخر لدرجه اني نزلت من الدريشه طبعا الرباضه كنها فخ
لان السياره اللي يشوفها يقول السياره سقطت من علومرتفع في طحين
وكنت لحالي وفكيت الابر للكفرات الاربع وجلست احفر من غروب الشمس الى الساعه 11 بالليل حتى بان الدفرس الامامي والخلفي ورفعت كل كفر وحطيت دواسات السياره مع الفرشه من نوع الحصير قطعتها اربع قطع كل قطعه لكفر
ورجعت الى الخلف بااقصى قوه وهي المحاوله رقم تسعه في ذالك اليوم نقص من وزني 4 كيلو على عدد الكفرات
طبعا رحت الى محطه تماني ودخلت البقاله اخذ لي شي اكله خافومني اللي بالبقاله ثياب مقطعه ووجه اشعث واغبر
ونسيت المسدس تحت ابطي متحزم فيه حتى ان كانوبالبقاله اماراتيين وقطريين وبحرينييين خافو من الشكل يفكروني من قطاع الطرق
وكان يوم لا ينسى
نوع السياره باترول 2005 ولو سياره ثاني كان ماطلعت ألا بمساعده الونش لاكن بعد الله قبلت التحدي ولا اتصلت بااي احد

سحابة الخرج

15/09/2011, 11:16 PM

السلام عليكم ورحمة الله وبركاته
هذي سالفة الاولى:
المنطقة الدغم شمال شرقي الخرج شمال شرقي وادي الحنية.
اخوي الكبير واخوي اصغر منه
ريحين مقناص ضبان قبل 8سنوات على ددسن غمارتين ديزل عايدي ويقول ونشوف ضب كبييييييير مذونب في جحره ويمسكة ويسحب ويسحب والارض صلبة والثاني ويكسر الجحر ولا نفع وتقطعت يده وفكة صيدوا ضبان 2 وجاء اخر العصر ويشوفون غيوم مقبلة وتحلب وتحلب يقول يالله نشوف الخط من كثر المطر النازل على الزجاج ويقول انا متجهين للخرج وتوهم ماطلعوا من الدغم على فكره في الدغم ابل عمي 80 ناقة المهم ودخل المغرب ويقول قامت الوديان تمشي ويحلف ان البرق والصاعقة تضرب قدام السيارة ويقول وننزل من حزم ونطيح في مكان طين وننشب والمكان كله سيول ويقول انا خايفين من السيل لايداهمهم وكان في جبل عندهم ويقول نرقى فوقه على رجليهم ويشوفون نور سيارة ويركبون السيارة ويكبسون ويجيهم راعي السيارة جيب ويركبهم وهو اول مانشب دق على عماني ويقول الرجال انا ادور عيالي واحسبه انتم ويكلم عمي ويقول انا عند المحطة ونزلهم الرجال ويرجعون للخرج ويرحون لسيارة في الصبح ويلقون المنطقة كلها السيول بس السيارة خارج السيول ويطلعونها ولعب الطين في بطن السيارة .

السالفة الثانية :
نفس المنطقة ولد عمي يقولها لي يقول كان علينا غيوم وهم في الليل عند البل ويقول ونرقد في الخيمة وتحلب ويقول انا بانين الخيمة في مجرى سيل ماندري ويقول حنا في الخيمة ويدخل علينا السيل في الخيمة ويقول كلهم قاموا الا انى راقد في فراش المشمع ولا ادري ويقوموني ونروح للوايت وانا اول ماطلعت من الخيمة والقى ريال يمشي في السيل واخذه وجاء الصبح والخيمة شلها السيل بس ماراحت بعيد وقفت ويركبون على ددسن 2002 غمارتين بنزين وابوه السواق والعائله ويقول من حلو الجو والسيول واقعد ادعي انا نغرز ويقول ونمشي من البل والوايت كيلوا وننشب في طين ونرجع للخيمة على رجلينا ويكلم ابوي اخوانه ويجون ويجي عمي على فكسار 2001 ويحاول فيها وونطلعها ويقول جلسنا في الدغم بعد نشبت السيارة 4 ساعات لان عماني جايني من الخرج.

وانتهينا واسف على الاخطاء الاملائية
وتكسرت اصابعي لعيونكم

محب الرمنغتون

17/09/2011, 12:06 AM

أصعب غراز غراز الطين الله لايعيده
غرزنا في حمادة الغاط بسبخة طين ولم نخرج السيارة الا بعد أكثر من 24 ساعة وذلك بمساعدة قوية من حراثة قوية

عيسى عبد الله

17/09/2011, 01:35 PM

مشكور فهد على الموضوع المميز ....

وتكتسب خبره من الي مره بتغريزه وحشه .....

شوف هذي والله مدري وين بضط ...أخذتها من أحدالمواقع ....

بس الطين هو أصعب تغريزه ....ومشكورين ...
http://im10.gulfup.com/2011-09-17/1316255532591.jpg

بر وعزبة

21/09/2011, 10:27 AM

الموضوع الصراحة جميل
وأطول تغريزة لي كانت مدتها حوالي أربع ساعات في فنجال
غير ومعها انسلخ الكفر

لي ملحوظة بسيطة من له خلق يصور وهو مغرز
ودمت سالماً

ناصر العلي

26/09/2011, 12:57 AM

وعليكم السلام ورحمة الله وبركاته
موضوع فى غاية الروعة و أحسنت الإختيار يالغالي
وأخوك ياما من التغريزات
واحدة من هالتغريزات
كنا كاشتين مجموعة شباب فى مكانن ما وذبحنا البرد وكان معنا واحد من الربع نسميه غرزان :Dمن كثر مايغرز... والله ماأزود عليكم...الحاصل قلت للربع ويش رايكم نروح نحطب أنا أخبر مكان ماهو بعيد مليان أرطا قال غرزان مشينا ياأبوعلي وكان معه جيب ربع...ماأذكر الموديل....المهم رحنا للمكان المنشود وفجأة من غير سابق إنذار أختفى الرمل وصارت الأرض مستوية كنه مدرج مطار....قلت له...وقف...وقف وماأمداه ياقف إلا وحنا غايصين بوسط سبخة...نحاول نرجع..مافيه فايدة....جمعنا بعض أغصان الأرطا لعل وعسى..ولكن بدون فايدة...وأشتد البرد..ولافيه وسيلة إتصال..ولاحولنا أحد ...ماغير حنا الأثنين ...المهم قلت لخويي أنا بروح أطلب المساعدة وأنت خلك عند السيارة...الله يذكره بالخير كان سمين...المهم أخذت المشوار هرولة جهت الطريق السريع لعل وعسى تمر سيارة دفع رباعي تفزع لنا...ووصلت الطريق السريع..أبي أحد ياقف... وكل من وازنّي حط رجلة...وعلى هالحال مرة هرولة ومرة مشي والمسافة تقريباَ بين مكان ماغرزنا ومكان ربعنا حوالي سبعة كيلومتر...إلين وصلتهم وإلى حالتهم حالة من البرد والقلق علينا...ويش فيكم...قلت غرزان غرز ونبت نبتة مابعدة:D ..تقاحصوا الربع وجينا يم خوينا وصرنا نقرب يم سيارته ونرجع إلين مهدنا مسار الكفرات..وشبكنا السبتة.. والحمد لله مع الدف والجر وغصون الأرطا طلعت السيارة...وأستغرقت التغريزة الأربع ساعات تقريباَ
وسلامتكم

حرماوي.نت

27/09/2011, 01:15 PM

موضوع مفيد شكرا لكم

فهد الهلالي

27/09/2011, 08:26 PM

السلام عليكم ورحمة الله وبركاته
اشكركم على حضوركم المتميز
وعلى مشاركاتكم بهذا الموضوع
وبالصراحه
سواليفكم عن التغريز متنوعه باشكالها واتعابها ولكن تبقى الذكريات شامخه والتعب راح في عالم النسيان
شاكر لكم حضوركم

الربذي

30/09/2011, 04:43 PM

وعليكم السلام اشكر مشرفنا العزيز على ها المضوع الظريف
اصلا ماتحلى التمشية الا بالتغريسه
هناك مثل عامي قالو تعشيت قال ايه قالوا عرمشت قال لا قال اجل ماتعشيت
مثل اخر قلوا له قنصت قال ايه قال غرزت قال لا قال اجل ماقنصت تصدقون بس الطين هو اصعب شي اول ماتمطر وتسيل الا اغرس احب المغامرة بس الحين عقلت واطول تغريسه هي ثلاث ايام خفست وخربت السيار وديمت علينا وصارت سيارتي بموقع مضحك مااحد يقرب لها الكلام هذا من سنين طويلة

عبد الله 99

28/10/2011, 10:47 PM

اقواى تغريزه واجهتها كانت في حي السويدي في الرياض على ددسن غماره
جيتك من عند تعليم السواقه داخل تحت الكبري من جهة وادي حنيفه و كان قبلها بيوم جاي خير يحبه قلبك المهم كان قدامي جيب بليزر و دخل قلت بأدخل وراه و امشي ممشاه
ما امدانا واصلين للنص الا و نبلش انا وياه و خذ يا طين و يا قلق و اجلس من الساعه ثمان الصبح إلى حول الساعه 5 العصر و انا و الرجال نبي واحد منا يطلع و يجينا الدفاع المدني بوايت وش نبي بالوايت نبي من ينتلنا و يجون بباترول و ياحول بالونش ولا طلعنا و يجينا احد الشياول و يالله طلعنا اسواء يوم في حياتي وهي اول مره ادخل من تحت الكبري كأني بأختصر وقت و الحق على الدوام و من عقبها ما دخلت هاك المكان
و غيرها الكثير من الربضات

fh...fh

29/10/2011, 10:52 AM

ياعاشق .... نسيت اليوكن حق وليد العبيد

راعي مرزوقه

31/10/2011, 12:40 PM

السياره لاندكروزر نوع التغريز طيني المده من الخامسه عصرا حتى الثانيه صباحا طريقة الخروج وضع اشجار واحجار تحت الموتر

ذيب بيشة

31/10/2011, 12:45 PM

اصعب تغريزه لنا في جيب لكزس 2006
في رمل ولا تسمى تغريزه تسمى تعليقه طبعا انا اتحدث عني
وكان مدتها من الساعه 9الى الساعه 2 ليلا وطلعناه بدون سحب
والبل غدت ورحنا ندورلها
الكلام هذا سايقين البل لام رقيبه

ذيب بيشة

31/10/2011, 12:48 PM

موقفي طبعا زفتت ام الحاله وتعب واحلى كبسه بعد هالتعب

الإستراتيجي

31/10/2011, 01:24 PM

التغريزات كثيرة :

لكن لا يخيفني التغريز أكثر من المكان إلي مغرز فيه ...

بمعنى المكان مجهول وهناك أماكن فيها مهربين مخدرات وبعضها فيها هوام (( ضباع أو ذياب ))

المكان مقطوع من الإرسال وبعيد عن الخط وعن الناس .

تكون لوحدك أو مع عائلة وهذه خطيرات

تغامر ولا معك عدة ولا أشياء تشربها وتأكلها ...

تروح ومعك واحد يخاف من ظله

في أحد المرات غرزت بجانب الخط وكانت السيارة بتطلع وأشغلني إلي معي يروح يأشر !!

طبعا موتري جيب ودبل يعني كل حاجة تمام بس مثولث يعني يبي له تحفيره بطريقة معينة و تحفير تحت الدفرنس حق نصف ساعة ويطلع ...

للأسف حتى التبريح ما برح وقال بالحرف الواحد أنا جاي أتمشي ما جيت أحفر .

فبصراحة هالرجال ما عاد خليته يركب معي للأسف

.. .. .. ..

لكن أصعب موقف أني غطست غطسة طين ولا كنت أدري أني في سبخة وللأسف نزلت بحاول أطلعها وثيابي صيف ،

ما قدرت أطلع لأمرين الأول أنه كان فيه هواااء بارد نسري وكان معه رذاذ ماء

وأبشركم بحتث داخل السيارة وحصلت بالطو قديم وثوب كنت أرميهم سبحان الله .

وفادتني في جسمي لكن الرجلين هي الموت الأحمر ...

قعدت بعدها كم يوم مريض دخلني البرد والأوجاع ,,,

غطست العصر ولا طلعت إلا بعد الساعة 1 ليلا بعد ما جاني راعي موتر جيب وغطس جنبي لكني طلعته بأمرين

الأول أنه ما حفر الثاني كانت منطقته أحسن من منطقتي ونسمنا الكفرات حتى 10

وطلعته ووضعته في مكان ممتاز وكان ما صدق أن موتري بيطلع بس أبشركم طلعناه قلت له بس يتحرك ملي وأنا أطلعه وأطلع المكان كله

للأسف غطستي لأني تهاونت بها وقلت بيطلع بيطلع ولا نسمت وما نسمت إلا يوم دق بطنه الموتر

ولو أني مستعجل بالتنسيم كان أستأنست ذاك اليوم ...

للأسف الدفاع المدني تحجج بعوائل يطلعونهم ولا جوني ليه ما أدري :D

بس قد فزعو معي في منطقة ثانية وممكن يكونون صادقين في أمرهم لأن الوادي كان مليان مواتر :good2:

إستخلاص أمري أو أموري :

1- لا تتهاون بالأمر كله وكل الأمر خلك حاسب حسابه .

2- خذ إحتياطاتك معك من ثياب ، أكل ، شرب

لا تقول ديرتي 200 كم أرجع لها أو 80 كم حتى .

البرد والله ما يرحم ,,

3- أول ما تغطس وقف وفكر وخطط لا تحاول بالدبل وتقول 4×4 بيطلع

4- نسم الكفرات في رمل ولا في طين بس لا تنزل عن 15 إلا في الضرورة القصوة ولو تبي تنزلها تحت 10 لازم يكون معك ماطور

كثير حصلت في البر منفصخ الكفر بسبب قل الهواء

5- حاول ما تتهور ومعك عائلة
6- لا تطلع بناس ذروقين ترى ما يخلونك تفكر ولا تستنتج ولا تطلع بحل .

7- لو طلعت السيارة أسجد لله شكر أنه أنقذك ولا تنسى أذكار الصباح والمساء و دعاء المكان و الأدعية المناسبة ..

8- لا تتأخر في التفكير أكثر من اللازم بالذات وقت الأمطار ولو كنت في وادي .

ممكن يجيك السيل ويشيلك أنت والموتر (( الطبيعة لا تتصادم معها ))

روح فوق منطقة مرتفعه بس إنتبه من الصواعق ترى تكون أنت مجال تفريغ مثلك مثل الأنتل هههههه

ولي قصة مع الصواعق الله لا يعيدها :D تضرب جنبي وعلى قوة وسرعة ما قد شفت مثلها والله نجاني سبحانه .

أول مرة تمر بي في حياتي مثلها وكنت في وسط الصحراء متعطل

يوم زلت السحابه طلع موتري :p

مخطور

31/10/2011, 01:40 PM

اصعب تغريزة 6 ساعات
وفيه بنشر كفرين والسبب طاح السائق في حصى بالدهناء
ولاكن المواقف كثيرة والله يستر على كل مسلم

بدر20

05/11/2011, 12:23 AM

الله يوفقك

كحيلان تميم

23/08/2014, 12:09 AM

السلام عليكم ورحمه الله وبركاته ..

قبل كل شىء نشكر اخوانا صاحب الموضوع جزاه الله خير على هذا الموضوع الشيق و الرائع و الممتع و ذو شجون فيه من العبره الشى الكثير ..

بما إني قريت كل المشاركات حبيت اشارك معكم ونشاركم الموضوع ..

قبل سنة تقريبا كانت ايام امطار وبر .. وكانت الجامعه علقت الدراسه في ذلك اليوم .. المهم .. صحيت من النوم والقا اخوي يكلمني على الواتس ويقولي تخاوي نكشت .. الكلام هذا الصباح .. المهم قلت يالله توكلنا على الله .. المهم وين نروح وين نروح قال ورا رماح في شعيب سبق وجاه قبل كم يوم ويمدحع .. المهم توكلنا على الله .. ويوم ندخل الشعيب الصباح فاضي تقريبا 8-9 صباحا المهم ولا الشعيب يمشي ماشاء وحبينا نوقف قبال الشعيب .. المهم يوم وصلنا للشعيب وصار بعدنا عنه اقل من متر ولا ويربض الموتر .. معنا سيرا جمس 2012 ماشاء الله .. المهم واثاري المكان الي غرزنا في كان واصله مويه الشعيب وصايره الارض طينية وقاسية تقل صبه اسمنت .. المهم برك الموتر وشغل الدبل الثقيل الخفيف يمين يسار ماتحرك .. وابلش .. وزي ماهو واضح بالصور تحت كيف الارض طينيه وماسكه الكفر .. المهم جانا ابن حلال معه ربع تايوتا موديل 13 توه يقول فاكه جديد .. ما كان معنا واير راح اخوي مع راعي الربع شروا واير ابو كلب وجابوة وربطناه بالربع واسحب لا تسحب الجمس مايتحرك من مكانه تقل جدار وكفرات الربع تلعب يمين يسار ومشغل الدبل الثقيل .. كانه يسحب حصاه .. معروف السيرا مره ثقيل وزنه .. المهم اعتذر و راح ويجيه عقبه واحد قصيمي ابن حلال دوج رام موديل 2005 او 2004 المهم ونفس الحكايه وجر لا تجر مانفع والي زاد الطين بله انقطع الواير الخايس ولا مع الذيب الي سحبنا واير متين ماقد شفت زيه ماشاء الله لاكن مشكلته قصير ونحاول نربط الواير الي انقطع ونسفطه صفطتين ونربطه بالواير المتين واحسب لا تسحب مانفع السيرا رابض مكانه ولاتحرك ولا واحد سم .. المهم قال بروح ادور لكم فزعات ونجلس ننتظر ولا يجينا راعي تاهو الشكل الجديد ونفس الحكايه مانفع السحب وانقطع وايرنا مره ثانية ههههههه .. المهم ويجونا نشاما واحد معاه شاص باترول والثاني معاه جمس من موديلات 2000 .. راعي الجمس معه واير متين اخذناه .. المهم اسحب لاتسحب مانفع ولا لقينا حل الا نربط واير من السيرا على التاهو ومن التاهو ربطنا واير على شاص النيسان .. تقريبا 4 وايرات ربطنا وبصعوبة وبطلاع الروح تل الموتر تل ماشاء الله نقز من مكانه وينفك اللحيه تحت حقت السيرا والحمدلله .. سلمنا عليهم وتعرفنا عليهم وراحو وجزاهم الله خير .. والكلام ذا تقريبا 1 ونص 2 الظهر ولا يرجع خوينا راعي الدوج الرام وينزل يتقهوى معنا وتعرفنا عليه واخذنا رقمه ولا راح الا قبل اذان العصر بشوي والحمدلله على كل حال .. اعتذر عن الاطاله وسامحوني على القصور .. والله يعطيكم العافيه على القراءة ..

لاتنسو ذكر الله وقول ماشاء الله .. هذي صور الموتر يوم غرز وبعد ماطلع ..

هذي صورتين اول ماغرزنا ..

http://www12.0zz0.com/2014/08/22/20/494875540.jpeg

http://im90.gulfup.com/EfdBH2.jpeg

وهذي بعد ماطلعناه ماشاء الله ..

http://im56.gulfup.com/hrtaVM.jpeg

لاتنسوا ذكر الله على كل مايعجبكم .. ماشاء الله تبارك الله ..