مصيبه اذا مافي جوالك رقم شريطي

[راعي المضغوط]

وش اسوي ياخوان مالي الا الله ثم انتم استشيره مااعرف ولا شريطي سيارات وهذي صراحه كارثه انك ماتعرف احد في المعارض لكن انتم قدها وقدود بارك الله في اموالكم واولادكم واصلح الله لكم النيه والذريه احتسبو الاجر واشيروا علي.....................واحد من الحاره انا ماعرفه بس يعرفه خويي عنده اكسبدشن اسود داخل بيج موديل 2008 ......مطلعه وكاله ......... نص فل .......... شاشه ........... المرتبه الخلفيه تنسفط كهرب .......دبل...... يقول الموتر نضيف مره .. بس يقول مره رجعت ريوس وحكيت باب ا لبايكه من عند الرفرف ورا وضربته بويه .... على كلامه ان المخشه خفيفه....وماشي الموتر فوق الميه بشوي يقول لي السعر 80000 وهالحين يسوا ولا غالي وتراه مواضب على فحص الوكاله....يالله يالربع فزعتكم وتراني ماشفت الموتر الا هالحين كان سعره مناسب ابي اشوفه:good2:

[راعي المضغوط]

يالربع عجلوا علي الحرمه شبت علي تقول اشتر موتر لنا فكنا من قرمبعك اللي فشلنا في الجيران تبي سياره يفتح القفل بالريموت يقالها متطوره ماجابت شي جديد ......ردوا عاد

[جنوبي اصيل]

والله اشوفه مناسب اذا نظييف بس لا تستعجل استخير واستشير

[بواسامه]

مب لازم تعرف شريطي
شفهم متبطحين بموقع حراج ومستعمل ويبان لك السعر
المهم الموتر اذا بتستخدم سعره زين من 75 الى 80 الف اذا هو فورويل
الله يوفقك واللللللحق قبل العيد خلك تشخص به

[أبوعابد 22]

شف وانا واخوك موتر موضب أبعد عنه

[راعي المضغوط]

شكرا يااخ جنوبي اصيل وككذللك للاخ ابواسامه والاخ ابو عابد وترى الثقافه لك عليها عندي يابو اسامه فور ويل يعني وش ان كان ماتعني دبل والا مادري .............. وش رايكم في اللون .....لاتخوفنا يابو عابد

[T-Tamimi]

يالربع عجلوا علي الحرمه شبت علي تقول اشتر موتر لنا فكنا من قرمبعك اللي فشلنا في الجيران تبي سياره يفتح القفل بالريموت يقالها متطوره ماجابت شي جديد ......ردوا عاد

تستاهل بنت الحلال تشخص وتغاير اخواتها هههههههه الله يعينا على طبايع الحريم بس

شف ونا اخوك ..
شف سعره في الوكاله وطرح عن كل سنه بين 15.000 او 20.000 الف بحكم ان جايه بويه
نفرض ان سعره في الوكاله 130.000
اطرح منها
15 الف 2009
15 الف 2010
15 الف 2011
المجموع 45 الف
130.000-45000=85000
بوجهه نظري الموتر يستاهل بين 75 و 85 الف اذا كان سعره في الوكاله 130 الف "انت والمكاسر بينك وبين راعي السياره

اتوقع سعره في الوكاله بين 120 و 130 الف

يعني من الاخير 80 الف زينه
اتوقع ضمان السياره 200 الف او خمس سنوات
واذا كان صاحبك مواضب على التشييك معناته ضماان السياره مازال ساري المفعول وهذي ميزه مهمه ..

اهم شي الحين افحص السياره عند حقين الفحص الي عند معارض النسيم فحص بدي ومحركات تقريبا 350 ريال.
ومر على الوكاله على طريق خريص خذ فكره عن الموتر والتصليحات الي صارت عليه وكل شي موجود عن السياره في جهاز الوكاله "مجانا" وبعد تسالهم اذا الضمان ساري ولا لا. وهم يرفعون السياره ويتاكدون لو جايها ضربات في بطن الموتر او مشاكل ."كل هذا مجانا".

بالتوفيق ان شالله


شف وانا واخوك موتر موضب أبعد عنه

موااااضب مهووووب موضب هههههههههههه شكلك راد ونت صايم ^^ الله يتقبل ان شالله

[راعي المضغوط]

بارك الله فيك يااخ T اشكرك على النصيحه بس وش رايك في اللون

[سالم الحبلاني]

راعي المضغوط

شكل الموتر داخل راسك وتبي من يجزمك عليه

اول شي اخوي 2008 بالنسبه لى انا اشوفه ممتاز جداً وخاصة بان الموتر ماشي 100 وهذا كويس وغير ذلك ضمان الوكاله موجود

وبالنسبه للختش بالرفر اذا فعلاً بسيط ما يضر انت تبي تستخدم ماتبي تتكسب

وثالث شي بالنسبه للون الاسود لا تغسل وتلمع طلع شخصيه

وعلى كل حال يا الذيب بالنسبه للون لولا اختلاف الاذواق لا بارت السلع فا اذا عاجبك الون ما عليك من اي شخص انا بالنسبه لى اتمنا يكون عندي ابيض ثلجي او لؤلؤي لكن الله رزقني في لونذهبي نحاسي ولكن عاجبني فا عاجبني ما على من احد

اذا نفسك فيه وام العيال نفسها فيه خذة وتوكل على الله ولا تنسى نصائح اخوي T بالنسبه للفحص

[راعي المضغوط]

الله يجزاك خير يااخ سالم لاكن والله متخوف من طيحة اسعار ها ماتمسك القروش هالنوعيه

[محامي وراط]

اذا انت معك يا خوي 80 او 100 الف خذ لك موتر على مزاجك مهب شرط السياره اللي انت تتكلم عنها فالسوق مليان من السفاري والافجي او اي سياره تخطر في بالك بس الاند ابعد عنه لان اسعاره خياليه مرررررررره ...

والله يعين كل مسلم بيشتري في زمنا هذا كل شي غالي ان بغيت سيدان ولا جيوب ...

[راعي المضغوط]

تسلم يامحامي وش تنصحني فيه دفع رباعي باهالقيمه

[راعي المضغوط]

انا مامعي الا 80000 ويالله يالله

[سالم الحبلاني]

انا مامعي الا 80000 ويالله يالله

بالنسبه لطيح سعر السيارة تطيح ما يحتاج

انا بالنسبه لى ما عمري شريت سيارة وفكرت كم ابيعها ولا تمسك لي شي ولا لا

انا اجلس مع السيارة لين يتوفر معي شي وتتحسن ضروفي اشتري ثانيه مهما كان السعر ومهما كان سعر موتري اللى ابيعه

بالنسبه لمسك السعر تويوتا تمسك السعر فكسار جكسار

[T-Tamimi]

الله يجزاك خير يااخ سالم لاكن والله متخوف من طيحة اسعار ها ماتمسك القروش هالنوعيه

شريت كراون فكتوريا 2002 بسعر 75 الف
احد الاخوان في نفس السنه اشترى جي اكس ار 2002 بسعر 165 الف

عام 2009 موتري يسوا 30 الف وموتره يسوى 85 الف
طبعا كل السيارتين نظيفه جدا لاصدمات ولا مخوش ولا ممشى واجد
في النهايه كلنا خسرنا 55% تقريبا !!

في سيارات في توتيوتا تطيح اسعارها وسيارات تمسك اسعارها
فيه سيارات في شركه فورد تطيح اسعارها وسيارات تمسك اسعارها

سواليف المجالس والاستراحات لاتهمك
ادخل السوق وشف بعينك
اذا بغيت تشتري كل شي غالي وان بغيت تبيع كل شي رخيص


اشوف ذالموتر "اذا هو على كلامك" زين وسعره زين
ونت خلك رجال صامل "احس ماباقي احد ماشاورته واشك ان الي بيبيعك بيورط فيك خصوصا انك جاره وتعرف دربه ههههههههههه << امزح لاتزعل

[سالم الحبلاني]

هههههههههههههههههههههههههههههههههههههه

اخوي والله انك صادق مافي سيارة تمسك سعرها لحد كبير

[راعي المضغوط]

تسلمون ياخوان اخ سالم واخ T كلامكم صحيح بس انا جاني واحد قلب مخي يقول اذا تبي تدفع هالقيمه حطها في باترول وال هدد شي معروف وانا ترى ياخوان والله ماشاورت الا انتم واثنين فقط من زملائي وانت صادق ياخ T شكلي وررررررررررطه اللي يبي يبيع علي نشبة حلق هههههههههههههه صراحه ودي اعرف معك اكسبدشن والا لا