سمعة الباترول روووعه طيب ليش يطيح سعره؟؟؟؟؟

[طير استراحه]

كل اللي تسألهم عن البر والباترول يقولون سياره مافيه زيها خفيفه مكينه قويه مريحه تصلح للديره وللخطوط وللبر ..طيب كل هذا مقبول السؤال ليش يطيح سعرها اذا شريتها جديده طيحه قويه مع انها مرغوبه ؟؟؟؟

[محمد العبدالسلام]

السلام عليكم ورحمة الله وبركاته

الغالي طير استراحه يا الحبيب مو الباترول لحاله اللي يطيح سعره كل النيسان شالسر لا اعلم !!!!!
واضرب لك مثل شوف التويوتا جيب الربع موديل 2000 ما ينزل عن 60000 الف مع انه سيارة شخص واحد او شخصين
وكذلك الهاي لوكس تلاقي نفس الموديل هاي لوكس وداتسن ونفس المواصفات واذا نظرت للسعر تلاقي الدادسن اقل من الهاي لوكس بعشرة الاف ريال
مع ان الدادسن يفضل الهاي لوكس في اشياء عده منها الفرامل والتكييف وكذلك صرفية الوقود وكذلك الشكل حيث لا يكلف صاحبه في حالة الحوادث لان شكله انسيابي يسهل سمكرته ولا يبهذل صاحبه بشراء خطوط باسعار عاليه وخاصة الاصلي منها واقل اسعار بالنسبة لقطع الغيار ناهيك عن توفر قطع غياره وافضل من ناحية الوكلاء واقول الوكلاء ومصنوع في اليابان بينما الهاي لوكس وخاصة الموديلات الجديدة مصنوعة باستراليا والاخير بتايلند وآسف على الاطاله واترك التعليق للأخوان

[فال الخير]

لأنه واناخوك( نيسان )

والنيسان الله يجيرك من مشوهين السمعه ونقالت الحكي

يقولون ان نيسان لبدوي

واسمها مشتق من كلمة (حنيسان) بعد حذف الحاء الساكنه

وانه مايشتري منها الا البدو

وتماشيا مع الحضاره والتطور الي عم القرى والمدن وظن بعض صغار السن ان كلمة بدوي سبه او (مذمه)

جرى التنبيه والتحذير من ركوب و قيادة سيارات نيسان !!!!إلا في الضروره!!!!! يعني اذا مالقيت احد ونت مغرز لك 8 ساعات تفرفر وجحدوك اخوياك الي دقيت عليهم ولا حصلت صطحه تشيلك مسموح لك انك تستنجد بالباترول اللي يتندح حولك مع تبيين عزة النفس

!!!!!وانتبه!!!! يصورك واحد بالجوال ثم تروح بـــــــــــــلوتـــــــــــــــــوث على كل لسان




وتمت مقاطعه شبه جماعيه للنيسان لا سيما للسيارات التي تدل على البر والصحرا مثل الباترول والددسن من المتحضرين اللذين يخشون على سمعتهم!!!!!!

ومن اصناف المقاطعه محاربتها في السوق ونشر الشائعات

مثل واحد يقول اول ما طلعت الباترول من الوكاله وهو يتفكك يوم وصلت لبيتنا ما لقيت الا المرتبه لاني كنت رابط الحزام ولا كان طارت !!!!!!!!!!!

والثاني يقول ماقدرت اسافر لمكه الا عقب ما شريت محطه بنزين وركبتها فوق التنده !!!!!!!!!!!!!!!

والثالث يقول صدمت لي (ذبانه) وكلفتني الصدمه ثلاث الاف وبعد الدسكاونت (الخصم) من وكالت الحمراني بلغت التكلفه 2999ريال فقط لاغير!!!!!!!!!!!!!!!!!!!!!!!!

والرابع يقول احسن مافي الباترول انهم صاروا يمشوني نقاط التفتيش يحسبوني من الجماعه لا ويعزموني بعد!!!!!!!!!!!!!!!!!!!!!!

[طير استراحه]

مع ان اخوي معه باترول ربع 1989 راح فيه الحج ورجع وماعندك احسن منه لو جيب ثاني صعب تثق فيه وتروح مسافات بعيده والدليل رح البر وشف السيارات القديمه اللي هناك وشي اغلبها باترول وتركبها كنها جديده ماشا الله ولا يوقفها شي وقليل خرابها ومريحه واسأل حقين القنص عن الباترول السلقه :good:

[ابو سمر]

أنا أملك النيسان الباترول ، و اشتريته مستعملا منذ سبع سنوات ، ولا أشير به لسبب أن هيكله خفيف ، مع البطنجة يتأثر بعكس التويوتا ، وعند شرائه وجدت أن التويوتا الشبيه به يفرق عشرة آلاف بالسعر ، ولو كانت إمكانياتي المادية تسمح في ذلك الوقت لإشتريت التويوتا بدلا عنه ، لأني مجرب التويوتا مرات كثيرة جدا في البر والبطناج قبل شراء الباترول .

يحسب للنيسان قوة الماكينة وجودتها والقير والدفرنس ، أما هيكل النيسان فيتأثر بسرعة و ( يتهرقل ) ، التويوتا هيكله أقوى وفصالات الأبواب أفضل ، وملاحم البودي أفضل ، بعكس النيسان ، تجد ملاحم البودي على شكل نقط متباعدة .

إنقر بيدك على جسم الباترول الخارجي وجسم التويوتا ، تجد حديد التويوتا أفضل ، أما سيارات النيسان فنقرتها كأنها نقرة تنكة .

لكنه بالحقيقة يأتي بالمرتبة الثانية بعد التويوتا اللاندكروزر بالنسبة لسيارات البر .

وسلامتكم ..

[كبريت]

سبب طيح سعره هي القطع الله يطول بعمرك غاليه

[ذريف]

فال الخير أضحكت سني أضحك الله سنك
ابوسمر الله يطول في عمرك وعمر الأخوان
انت يمكن تتكلم عن الموديلات القديمه من تويوتا
ابومحمد كلامك صحيح بس تراهم خفضوا القطع في
السنتين الأخيره
شكرا" لك ياخوي طير استراحه على إثارة الموضوع

أخوكم /
موادع الرمله

[بواسامه]

فادعه ولا تكثر عليه التأسفاااااااااااااااااااااا

[فال الخير]

مواسات لاصحاب الباترول


اتوقع سبب طيحة سعرالباترول هو ان نوعية الصمامات مشابهه تقنياً لنوعية مواصير الحمامات
ونوعية الحديد مشابهه لقواطي الحليب واذا صدمت به يتعفط والتيوتا مايتعفط واذ رحت للبر قامت تطيح البراغي والصواميل وهذه النظريه دليل قاطع على سبب خفة وزنه بعد مضي عدة سنوات من اقتنائه ويتكسر لحامه وتطيح بيبانه ويطير في وجهك الكبوت وتطير اغراضك اللي ورا وتتفقع لمباته وتتكسر اصطباته وتبوش مكينته وتتكسر تروس قيره وينفض تقول فيه هشهاش وتنسرق استبنته ويحترق مسجله وتوقفه تحت شجرة المدرسه اللي قبال بيتكم وقد بلغ من الكبر عتيا وبانت شيخوخته وانتها امره بخدمة 30سنه برتبة جندي وصخ مذموم مطرود من دون تقاعد




اما الحبيب الكروز المحترم فهو المفضل دائماً تشتريه بميتين وتبيعه بميتين وخمسين ولا يطيح سعره مايقر قيره ولا تطق مكينته وكلتشه رياضي يخدم مدى العمر مكيفه بارد ولا ترتفع حرارته احسن سياره واقوى سياره قطعت فولاذ مافيه لحام ولا فيه مسامير ومكينته نفس مكاين الغواصات يدخل تحت الما ويرقا فوق الجبل عزمه عزم ترنيدو وقطع غياره ارخص من ال كيت كات وفرامله قويه من قوتها تحس انك داعس بنزين وتمسك به الخط وتدوس طبلونه ولا يختل توازنه وقلبته لا ماهيب سريعه ولا تبيعه في التشليح بعد ماتشتريه بسنتين والتشاليح لا التشاليح كلها ماتحصل فيها كروز واحد كلها نياسين واذا رحت للنويصر تلقى النياسين القدام اللي مجهزه للقنص متسدحه عنده ولا حبة كروز تحصلها سمعت انهم يقولون مايحتاج تربيط


النيسان تعبهم بالتربيط والكروز تعب اهل التشاليح بالتفكيك

سمعت ويقولون ماقلت شي من راسي

وان الكروز مصممه عسكرياً اكثر منها مدنياً
وسمعت بعد ان الكروز اول سياره طلعت تجيب التنده قبل الجنب وهذه الميزه يسمونها ((((((جو ارض))))))
وان الكروز اول سياره اذا دعست الفرامل فيها تزود سرعتها وتصدم السياره اللي قدامك وهذه الميزه يسمونها (((((((اقتناص الهدف)))))))
وسمعت بعد ان الفليورات اللي قدام في الكروز مصممه لحماية الكروز من العابثين اللذين يحاولون التمقنص عليه فمن حاول التمقنص عليه رجعه في سطحه مخروع الفليور وهذه الميزه تسمى ((((((التنكيد المحتم)))))) لان الطير مب قاعد يحتريك
وضمن برنامج تيوتا لتسلح جهزت الكروز بمعدات وقطع تجهيز سري من الصين واندنيسيا حرصا منها على جودة المنتج وتسمى هذه الخطوه الجباره ((((((الجوده العاليه))))))





وبعد السب والشتم والمدح لكلا السيارتين تجي الخلاصه والحقيقه والتجربه وبدون انحيازيه





يتميز الكروز بطلته المهيبه وشكله الرائع وهو توزع على مجالات عديده ولم يتخصص فهو السياره العائليه الكبيره والسياره الفارهه الوجيهه وسياره الدفع الرباعي القويه وسيارة السفر المريحه وسيارة العود الشايب وسيارة المراهق وسيارة لكل اطياف المجتمع وهذا سبب انتشارها ومحافظتها على سعرها.

يتميز الباترول بأنه ملك الصحراء دون منازع وهو الصالون الوحيد البروفشنل (الاختصاصي) فيها وفي الطريق يعتبر أكثر سيارات الدفع الرباعي ثباتاُ ورساوه دون منازع وفي المدينه هو جدير بالثقه ويفي بالغرض ويحتل مكانه في قلوب محبيه لانهم يرون منه افضل مما يسمعون عنه.




واذا وجدت لاند كروزر فإن ذلك لا يلغي وجود باترول

وحب السياره لا يلغي عيوبها والعيب من طبيعة البشر

ويكفيكم يا اهل التيوتا ما فعلتوه في اهل النيسان كرهتوهم في سياراتهم وضيقتوا صدورهم وخليتوهم يوسوسون الين صار فيهم حاله نفسيه
وانتم ما عندكم احد واللي يشوفكم تتكلمون يقول هذا ابن مرضاح وهذا النويصر والثاني تقول مسعر القطع في الوكاله قطعه قطعه

جربنا النيسان من عهد ابائنا واجدادنا الى ان شابت عوارضنا ولم نر فيها مايدعو الا الى احترام صانعها اللذي حرص على الجوده والنوعيه والاداء العالي والقوه وفي نفس الوقت السعر المعقول.
انتهى

[ذريف]

فال الخير
الله يجعل ابوك في الجنه
أختصرت علي كلام كثيربغيت اكتبه
في موضوعي اللي طرحته اليوم ..

هنيأ" لك على ملكة الحوار اللتي تتحلى بها ياصديقي.

أخيرا" أضم صوتي لصوتك

أخوك/
موادع الرمله

[أبو خالد 12]

لأنه واناخوك( نيسان )


والثالث يقول صدمت لي (ذبانه) وكلفتني الصدمه ثلاث الاف وبعد الدسكاونت (الخصم) من وكالت الحمراني بلغت التكلفه 2999ريال فقط لاغير!!!!!!!!!!!!!!!!!!!!!!!!



الله يقطع ابليسك يا فال الخير :D .

بس يا الربع أعتقد ان سبب نزول أسعار النيسان المستعمل هو الشريطية الحرامية ، يلعبون بالسوق لعب ، وما عندهم أي علم ولا معرفة بالسيارات كل ما يعرفونه التايوتا زين والنيسان شين ، ولو تجيب لهم رولزرويز قيمتها ثلاثمية الف ساموها بعشرين الف ، والله من الجهل المركب عند الشريطية :confused: ، أجل النيسان شين؟ امحق معرفة.

[باترول 4×4]

أخوي طير استراحة ولا يهونون الأخوة الباقين
أنا معي باترول 99 وكل مكان رحت له نفود وجلد وجبال على كيفك ، بالطعوس ماشاء الله هو السيد - بصراحة - لخفته وثقل منافسه الاندكروزر ، لكن سبب نزول سعره أولا بالتحمل ليس مثل التويوتا فتجده يتفكك ومنافسه التويوتا كالخرسانة ، وثانياً بقطع الغيار أغلى من التويوتا وثالثاً إذا كنت في عز الشتاء والسيارة قديمة شوي ممكن تعند معك ولا تشتغل إلا بالعين الحمراء بخلاف التويوتا اللي حتى لو هو قديم شوي يشتغل معاك على طول .واخيرا يقولون التويوتا شيك مصدق متى مابغيت بعته .
لكن الباترول بعد الكروزر مباشرة وبدون منافس .... إلا بالطعوس فالباترول أولا ...

[خالد 5]

الاخ طير الاستراحه
السلام عليكم ورحمة الله وبركاته
قرأت بعض الردود بقول ردي (لواختلاف اذواق الناس لا بارت السلع)هذا شي الشي الثاني الي ما جرب الباترول رجاء لا يتكلم عنه جرب الشي واحكم بنفسك وبعدين الباترول الموديل الجديدمن2002وفوق مافيه منافس له ابد حتى الفيكس ار مايجيبه لا في الرمل ولا الزفلت واذا كنت تقول ماني مجرب رح للورش وشف السيارات الموجوده فيه كلها تويوتا وبالذات الجيوب التاليه ياكارونه ياقيرالخ وبعدين الي يقول يتفكك رح للبر واسال راعين الطيور كل الي معهم سلق باترولات والي يقول يصرف بانزين اشوف التويوتا قد طلعنا للبر ومعنا جيب تويوتا رحنا وجينا وماراح الا الربع من التانكي

[الفتى المجازف]

بواسامه
اضحكت سني اضحك الله سنك
واتفق مع ماذكرت بعمومه
ولكن لا بد وان تجعل المقارنة محصورة في الجي اكس ار ام الفكس ار
فاعتقد ان الباترول لاينافسه ولايضاهيه جملة وتفصيلا.
تحياتي للجميع

[راعي الحمره]

السلام عليكم ورحمة الله وبركاته

اخوي الغالي طير الاستراحه انا واحد من محبي النيسان وهي سيارتي عندي مكسيما وعندي باترول 2002 .

وانا يا خوك سالت راعي المحل الي شريت منه الباترول بالكويت عن النيسان والتيوتا وقالي ان النيسان اقوى من التيوتا بالمحركات اما بالبدي والفخامه اتيوتا طبعا افضل تشوفه مديل 99 تهقاه 2004 مشاء الله من طيب بديه ولا يقرقع على مدى السنين , وعلى فكره عندنا بالكويت سعر قطع غيار التيوتا اغلى من النيسان بكثير .

والسبب الثاني ان الناس تحب التيوتا اكثر من النيسان فهذا سبب يجعل النيسان يفقد سعره والله اعلم .

[عابد]

السلام عليكم ورحمة الله

في رأيي ان لو قارنا سعر النيسان الجديد مع اللاند الجديد نرى ان اللاند gx سعره 130000 ريال تقريباً والنيسان سفاري سعره 115000 ريال رغم ان مواصفات السفاري افضل وإذا قارنا قيمة السيارتين بعد استعمال سنة سنجده في صالح اللاند ولكننا نكون وقتها نسينا سعر الشراء فهناك نسبة وتناسب هذا سبب
السبب الثاني
أن كثير من الناس يشتري سيارته بناء على قناعة الآخرين وليس بناء على قناعته أو حتى حاجته وهذا ماذكرته في رد سابق في أحد المواضيع .

بارك الله في الجميع

اخوكم عابد

[طــــويـــق]

النيسان غلاء في قطع الغيار مع قله في توفرها وعدم توفر قطع الاكسسوارات الداخلية والخارجية للسيارة من قطع للطابلون ورفارف خارجية للباترول وغيرها ووجود قطع بدت تظهر بشكل اصلي وهي تجارية من دبي ( يغشون ناس كثير فيها )

جوده الصناعة مثل الربلات الخارجيه تنشف بسرعة من الشمس والحرارة بعكس التويوتا طويلة العمر .

مشاكل الكهرب في الديلكو وملحقاتة والبخاخات والكلبليتر . ( التقطيع الممل في سيارات النيسان )

المشاكل الصناعية مثل رجة الباترول وعدم وجودها في التويوتا .

الوكيل من ثمان سنوات وطالع عدم مبالاه في شركتة وتحسين خدماتها للمستعملين سيارات نيسان

والباقي ماقصرو الاخوان .

ملاحظة : هذا ليس تحيز لسيارات تويوتا لكن الافضل يفرض نفسة .

[فرخ الشاص]

يطيح سعرة لأنه تيسان أي مطب تسمع الصرصرة والقرقعة
التيسان كله من الددسن إلى المكسيما إلى الصني وأنت ماشي ..................

[حـاتـم]

خوي فال الخير في كلامك شي من الصحه

اخواني الاعضاء

كلام الناس مامنه فايده يعني ان الباترول يصرف

وكذلك انا فالوا لي الباترول يصرف وخرابات ومادري ايش وتفكك

بصراحه كل كلامهم طلع غلط لو على البنزين انا موتري يمشيني اكثر مايمشنا الاندكروزر مع اني اعبيه بـ100 ريال

والاند اكثر شوي

لو على الخربات والله اني كسرته فهالبر وجور والمسكين عمره ماقال لا بالعكس يقول عطني زود

الخراب الوحيد الي دخلته الورشه وقعدت ساعه ونص هو صوفه الصدر هربت وغيرته وكلفتني حدود ال210 ريال فقط

اما الباقي فلتر هواء وهاذا طبيعي وكلتش غيرته مره وحده

اما عن التفكك الباترول الي يجي فتحه سقف تطلع الفتحه تقرقع مع طلعتا البر والبطانيج ولاطلت معي هالمشكله الا بعد سنه ونص من شريته

اما الباترول البدون فتحه سقف مافيه قرقعه الا القرقعه الي بكل موتر ولاتطلع الا بالبطناج

والموتر بصراحه فالبر شيخ

واحد من الربع تشب بموتره الاند ال2004 وجيت انا وطلعته لانه كان ناشب برباضه

والله احساس كانك راكب شيخ المواتر لان موتر 98 وثلث قيمه الاند وانا اسحبه واطلعه

اما عن قول ان الباترو مايمسك سعره

فكروا معي شوي
عام 1998
الاندكروزر vxr اشتريه بـ160 الف الباترول الفل كامل قيمته 130الف وكلها جدد

الان الاندكروزر vxr موديل98 كم قيمتها اذا كان ماشي 200 الف مثلا قيمته
70 الف الى 80 الف قيمه الفرق او القيمه الي طاحت توصل الى 90 الف الى 80 الف

الان الباترول الفل كامل السوبر 98 كم قيمته اذا كان ماشي 200 الف مثلا قيمته
من ال50 الف الى ال60 الف قيمه الفرق او القيمه الي طاحت توصل الى 70الف الى 80 الف

مستثنى من هاذي المقارنه المواتر المنقلبه او المصدومه او الملعوب فيها انا اتكلم عن المواتر الطبيعيه

يعني الفرق ؟؟؟؟ فكرتوا فيها

الناس تشتري الاند غالي وتقول مايطيح لانه اصلا مشتريه بالغالي

مع ان الفرق لصالح الباترول

والي يجرب الباترول يعرف كم كانوا الناس غلطانين في كلامهم


واتمنى اكون افدتكم

وشكرا لكم




اخوكم / حاتم

[::الرهيب::]

السلام عليكم..

موضوع رائع..ومهم..

مع إن مالي خبرة..بالجيوب..وبأسعارها..

حبيت أسأل اللحين سعر الباترول 2004 أو 2005 كم يكون ؟؟؟

وشكرا..

[متحدي النفود]

السلام عليكم

أنا مع أخوي حاتم في كل كلمه قالها

وسعر الباترول السفاري 2006 في الوكاله 124 ألف والباترول السوبر الفل كامل 155 ألف ريال

ولاقي باترول فل كامل 2004 جديد 128 ألف ولاقي فل كامل 2003 108 ألف

أخوكم / متحــدي النفـــــــود

[برق تميم]

والله انها مشكله التويوتا الزين غالي
معي دفرنسين 2005 واسمع فيه قرقعه واحس انه ما تماسك