مشكلة الجيوب الجديده 2010 وطالع... في عطل الدرايش

[المنصووووري]

السلام عليكم ورحمة الله وبركاته


واجهتني مشكلة في عطل دريشة السائق انها عندما ترفعها ترجع تنزل من نفسها

مع ان موتري جديد 2011 gx ورحت للوكاله قالوا لي يبيلها وقت خلها عندنا

وتعال بكره ... واستغربت من أمرهم ... قلت خلني ادخل على المدير يمكن يساعدني

على ان يصلحونها بسرعه ..

المهم دخلت عليه واخبرته بالعطل ... وطلع معي للكهربشي الي عندهم وقاله ابدأ في

تصليح السياره الان .. والله ماقصر المدير

المهم وقفت عند الكهربشي اشوفه كيف يصلح وانا من الناس الي ماحب اخلي موتري

في الورشات ماتدري وش يفكون وش يركبون ..

المهم قام ينزلها ويرفعها لمدة نص ساعه تقريبا وبعدين صلحت سبحان الله

قلت له شو المشكله قال هذي في كل الجيوب .. الجديده .. قلت يمكن ترجع تخرب مره ثانيه .. قالي اذا اختربت تعال ونبدل المكينه الي داخل الباب

[al.amri]

الله من الخربات لكن الناس ماتعلمك

[ساري 111]

هالحركه تعتبر تأمين وهي عباره عن حساس اذا حس بأي مقاومه والدريشه طالعه فوق يوقفها وتنزل ثانيه لانه ممكن تكون يد طفل او اي حاجه اخرى

المشكله هذي تجي اذا طلعت لبر او كنت تمشي بردميه والطريق غير مستوي لكنها غير مقلقه يعني ترفعها اول مره وتنزل ترفعها الثانيه خلاص تسكر

واذا طولت المشكله غالباً يكون فيه عائق او وصخ داخل مجرى الدريشه ينظف بالهواء عند البنشري وانت واقف وماتستغرق اكثر من دقيقه وتنتهي المشكه

فنصيحه لاتعبث بالموتر وتغير مكينه الباب وهي مافيها شي

[ابرق نثيل]

صحيح والله خاصه وانك قلت الجيوب الجديده واني ارى ان الجيات والفكسارات هذا تحمل لدى البعض قداسه لا يمكن تحت اي ظرف
ان الشخص يتكلم عن عيب مصنعي او خلل ومن شده حماسهم كانه موجود باليابان ويشرف على كل مراحل التصنيع بنفسه وهو في الاخير مجرد مستهلك مايفقه كيف تصنع اصلا السيارات
ومايفهم ان الاخطاء هذي ليست من تايوتا نفسها وانما من الشركات التي تشتري تويوتا منها تلك القطع ونتيجه فساد ما داخل الشركه

كثير حصلوا اخطاء مصنعيه وبلعوها ... اجل وش بتقول عنه الناس ينقد على فكسار!
هناك اخطاء مصنعيه جسيمه والناس ماتتكلم ولا تطالب ولاتضغط على الوكيل ابد
ومنها مشاكل
الدبلات تعلق في الثقيل
مشاكل تعليق الدعسه
مشاكل الفحمات تتاكل بسرعه
مشاكل انطلاق الركبه مما يؤدي الى حوادث الانقلاب المعروفه وليتها قلبه وحده من سته قلبات وفوق
مشاكل تلف دوده الدركسون كذا واحد اعرفهم تقلبو بعضهم اصيب وبعضهم مات

ومشكلتك بسيطه كلها حساسات ماتتعلق بما ذكر اعلاه من طوام تايوتا

[sgl2002]

ماااااااش ماااااااش

سبحان الله اللاند من 1992-2007 توب ومتفوق على النيسان مقارنه بالفتك

والآن انقلبت الآية

اللاند من 2008 وفوق صار أنواع المشاكل والباترول الجديد أنا أشوف أنه اثبت وجوده وهو اللي بياكل السوووق لكن انتظرو

[خ الفياض]

هذي حركه امنيه موجوده منذ مبطي

اذا رفعت الزجاج على الوضع الاوتو ومصادفة مريت من فوق مطب راح يرجع وجرب وشوف

[عبدالرحمن السالم]

انا على موتري الباثفندر كذا ترجع ، واستغربت يوم شفت الربل حق القزاز الا متقارب ولا يسمع بأن القزازه تمر بينه
اثاريه ترفع وتصقع وترجع وسعت الربل شوي وضبطت الحمد الله ، عموماً إلى سيارته درايشها اوتوماتيك وراعي طلعات بران ومسك ردميات عندك حلين يا انك تسكر القزازه كله او انك تفتحه كله لا تفكر انك تحطه وسط ترا يخربه ، اما الهندل ماعليه خلاف
والله يوفقك ويعطيك من خيره ويكفيك شره

[شلفا تبوك]

صارت معي في العيد
نظف المجرى اللي تمشي فيه الدريشه واطلب الله
نظام امان