هل الهايلوكس سريعة الانقلاب وتوازنها معدوم << تحوص (نقاش)

[ابو بندر 77]

السلام عليكم

كيف حال اخواني الكشاته

الموضوع ومافيه ان اخوي الصغير يبي موتر وملزم يبي هايلوكس

وانا ماعندي مشكله لكن الشايب اول المعارضين بحجة ان الهلي سريعه الانقلاب

وموب راسيه وقالها بلغة الشياب ( تحووص:D ) ووافقه بالراي اخوياي بالاستراحه

هل صحيح كلام الناس ان الهلي تحوص ؟ وانا متاكد ان رساوتها متوسطه هي وسيارات الصندوق

في فئتها بس ماتوصل لحد الانقلاب بسرعه عاد قلت مالي الا اخواني المكشاتيه واكيد

انكم مجربين الهلي بكل موديلاتها هل صحيح الكلام ولالا لان الولد ملزم عليها :D

[وارد منصور]

ما بعد كلام الشايب شور الله يخلية لكم

[الجني العبد]

أتوقع الوالد يقصد خفتها
من ناحية الخفه ، فهي خفيفه بالحيل
تمشي 160 ويجيك شعور بزيادة السرعه غصصب هههههه
إذا كان مراهق ، يبي يتعبكم بالغشامة وبالمخالفات

[كثير السؤال]

الدفرنسين سريعة الانقلاب
والعاديه ممتازه لانقلاب ولايحزنون شف الشباب بالبران وشلون يفحطون ويطامرون بالنفد

[رسلان الوايلي]

الهلي خفيف منبعد سرعة 140

[كريزي نت]

والله عن تجربة سابقه أنك إذا أسرعت فوق 120 وضربت فرامل مفاجئ تحذف يمين او يسار < طبعاً الفرامل مهوب شرط بصوت أقصد فرامل يعني تهدئه بس قويه شوي يعني لشئ مفاجئ قدامك تحذف بك لكن يمكن انك تملك السياره اذا انت متعود أما اللي ماتعود عليها الله يستر عليه وعلى العموم هي سيارة ممتازه وعمليه لكن الددسن أرسى منها .

[SAUD HRESH]

صوتي مع صوت الشايب
انا عندي هلي والله انهات مشكلة
يبيلها ركادة مع الخطوط الملتوية

[صحراء الدهناء]

أتوقع الوالد يقصد خفتها
من ناحية الخفه ، فهي خفيفه بالحيل
تمشي 160 ويجيك شعور بزيادة السرعه غصصب هههههه
إذا كان مراهق ، يبي يتعبكم بالغشامة وبالمخالفات

عز الله انك صادق ..هذا من واقع تجربه من الاقرباء


ابعد عن الهلي تخلي الولد انواع الفرفره بالشوارع

[هويدي]

مشكله الهلي تهبلك حتى لو انك عاقل فما بالك بتسليمها لمراهق

الا ان كانه راكد وبيداري حلال ابوه فشي ثاني يستاهل

وان بغيت الجد السيارات التاليه كلها قراطيس ... الله خير حافظ

[فهد كدسة]

ياخوي أي سيارة في العالم تحوص وتنقلب .. إذا أسرعت أو تهورت ..
لكن شف الهايلكسات ماليه الشوارع ما احد انقلب إلا وهو طايش ومسرع ..

بالتوفيق

[ابو بندر 77]

والله الولد مراهق باخر سنه بالثانوي

طيب ياشباب كل ماسالت احد عن الهايلوكس والددسن

يقول الددسن تكسر الظهر في الخطوط والهلي مريحه ماعدا المراتب اللي ورى

هل صحيح انها مريحه ولا تكسر الظهر والولد يبيها كل صبحيه 60 كيلو تنفع ولالا

[سرطوقا]

تنفع بإذن الله والولد باخر سنه اكيد مفكر في مستقبله

وخلك معه دايم خوي وانصحه [ موفق ]

[V 8]

مثل ما قلت

قدام مريحة وورى لك عليها

لكن اشوف ان اكثر الشباب اللي يمتلكونها متهورين

مدري سواقتها تفرض ذلك أو نوعية ملاكها لك عليهم


لكن تراها مكدة وقوية

وان صملت عليها خذها من قطر جديدة اصفار بتوفر حول 12000 ريال

[الجني العبد]

اذا كان يبي يمسك فيها 60 كيلو يوميا ما أنصحة بتاتا البته
لأن الهلي مهما كان لايمكن يكوون مريح ، مستحيل حتى لو تفك آخر سستتين أو تحمل بالصندوق ، القساوة موجودة موجودة
لذلك مايبون الهلي إلا راعين الهبال
إذا كان الولد كل سنه يغير السيارة فما عندك مشكله ، خله تكسر ظهرة سنه لمين يعرف إن الله حق ثم يعقل ويشتري موتر صغير
أما أذا كانت تبي تجلس معاه سنين ، نصيحتي ابعد عن الهلي وغنييي لووووه !!
خله يشوف له سوناتا أو أزيرا أو أكورد ، موتر شبابي ولو تمسك فيه 200 كيلو يوميا ماراح تمل منها

[sgl2002]

مراهق وهايلوكس= انواع المقاومات والتقحيص حتى لو انه عاقل
بعدين ترى بيمل منها قريب

خذ له ددسن ارسى واثقل واحسن

[شاص99]

الهايلكس ممتازة من جميع النواحي
من ناحية الانقلاب الدفرنس ممتازة حتى لو لفيت على سرعة ماتقلب بل تجدع
ومن ناحية كسر الظهر اخوك قلت اخر سنة بالثانوي يعني شباب ولا يكسر اظهرة لو كان الوالد راح تتعبه لكن شباب

[واحد مبسوط]

الهايلكس سيارة المجتمع
ومستخدميها من جميع الفئات
ان بغيتهم شيبان حصلت
وان بغيتهم شباب حصلت
وان بغيت راعي ديرة حصلت
وان بغيت راعي بر حصلت
وان بغيت عمال حصلت
تلقاها في كل مكان وعند كل بيت
اشتر هايلكس جديدة ولن تندم
وراح تذكر كلامي

[رسلان الوايلي]

تبي ارس وريح خذ نافارا انا بعت الجمس وشريت نافارا

[ابو بندر 77]

ماقصرتو على الردود

[ابو بندر 77]

ياعيال اللي يقول خذ ددسن الددسن زينه مايحتاج

لكن عليها صوت حنين كنك صافط الطبلون

غير كذا داخليتها ماتغير من عام 2000