اهل الخبره في الترهيم تكفون تعالوا.............؟

[الـــهـــواوي]

السلام عليكم ورحمة الله وبركاته

انا ابي ارهم جيب سفاري باب 95

ابي احسن مكينه للاستخدام اليومي دوام + تطعيس

طبعأ تعبت انشد كل واحد يعطيني علم

ابي واحد فاهم وخبير في الشئ هذا فقط

المكينه اللي ينصح بها اخلي شد البلد واركب عليها اشياء ثانيه

ااو

اركب مكينه بديله زي الكابرس اللكزس والتايوتا

والاهم ابي اعرف التكلفه بالضبط عشان ماتوهق من اولها اهم شئ التكلفه

الشئ الثاني


كم قيمة مكينه الفتك من التشليح طبعأ واذا ركبت مكينه الفتك هل تحتاج ترهيم ثاني

مثل التحويله ومدري وش بعد


اتمنى ردوود تفيدني يالربع والله اني تعبت من كثر منشد

[اعدام]

السلام عليكم ورحمه الله وبركاته ومساك الله بالخير يالشيباني والله يالغالي انا عندي نيسان 97 باب واحد ومركب عليه مكينه فتك والحمدلله كل شي تمام بس تراها غاليه ماكينه الفتك انا شاريها كامله 22 الف وتقبل مروري

[ذعار الغامدي]

(فلتر + هدرز + مراوح + بواجي اسلاك بواجي + دبة )

وبيعجبك انشاء الله ..~~

[الـــهـــواوي]

اخوي اعدام 22 الف كامله مع الشغل يعني على قولت اهل البناء على المفتاح هع

[الـــهـــواوي]

لاهنت ياذعار

[كثير السؤال]

اذا تبي شوري عندك منتدى تطعيس وجراف ذولا حقين ترهيم
او منتدى شباب عنيزه فيه كباتن مثل السويداني موفق

[التعـ King ـديل]

مكينه فتك تسليم مفتاح كامله من مجاميعه وتركيب شخص خبره ب 26000 تدق سلفها وتمشي

اذا تبي التفاصيل اكثر .. لا يردك الا اصبعك والخاص

[الـــهـــواوي]

مشكورين يالربع ولا هنت ياكنق التعديل

[الـــهـــواوي]

طيب يالربع بالنسبه للهدرز و الفلتر اضرارها وشهي ومنافعها

[نسر العرب]

سلام عليكم يا الشيباني مكينة الفتك غالية مرة عندك حلين يامكينة vxr وهي حول 15الف ريال ياخيي او مكينة كابرس اوفر وارخص بس اهم شي انشد عن اللي يسقط المكينة صح ولا تستعجل لاني وقعت في فخ النصابين...شاور والشور زين وانا اخوك
تمنياتي لك بالتوفيق

[You Like Me]

وعليكم السلام ورحمه الله

الفتك حلوه لكن مثل ما ذكروا الاخوان
سعرها غالي زد على ذلك قطع الغيار نار ... المكينه ماتشيلها النظيفه الا من 23 الف وطالع
هذا اذا وفقت بنظيف لان اغلبها يجاب من الامارات موظب او ممسوح الراس
او فيها بلا والتشاليح واللي مايخاف الله يخربطون فيها ثم يبيعها تشتغل معاك فتره
ثم تطق واقعد صور بجنبها وسعرها غالي مره
والبديل موجود ومتوفر يعني منت محدود عليها

مكينة الـ VXR ترا مهيب شينة على ربع نيسان
مثل ما يذكرون بالمنتديات وهي راكبه على سياره واحد من الشباب
ما شاء الله عزم ونشاط غير طبيعي في الخطوط وفي النفود والمراقا
مكينة LS والاغلب يطبقها وكثير شغالين فيها

مكينه الدينالي 6 لتر
مكينه ناجحه على الباترول ونشاط خيالي
انا مجربها راكبه على فتك 2004 ونشاطها يروع
فمبالك على ربع اكيد بيكون طرب

مكينة اليوكون 5300
مكينة طرب واعطالها لا تذكر ومافي احد اشتكى منها

واغلب اللي عندهم مشاكل في المكاين الامريكية
هم اصحاب التزويد العالي .... لكن اذا شغلك على هدرز وفلتر
ماعندك مشكله اذا التجليس صح بإذن الله ما تشتكي منها وكثير مركبين من سنين
وماعندهم مشاكل غير الاستهلاكيه فقط

نصيحة
اذا بتركب مكينة VXR لا تشتغل هنا
اهل الامارات وقطر افضل من يركبها ومبدعين في ترهيم الياباني
واذا نويت على الامريكي خلك هنا ربعنا مبدعين فيها واللي برى يجون يركبون عندنا

نجي الحين للأسعار
هذي مشاركه سابقه للعضو قدر مكتوب
أرجوا المعذرة منه لإقتباس مشاركته

مكاين التويوتا

1- مكينه الكزس 8 سلنندر يركبون الشباب مكينه الكزس الــ 400 من موديل 90 الى 2000 وتفرق عن بعض بالقوه القديمة اقل قوه من الجديده يعني موديل 90 مش مثل موديل 2000 طبعا اغلب الشباب يركبون مكاين جايه من اليابان وفعليا لايوجد عليها شعار لكزس الا اللي يركب سعودية يجي عليها شعار تويوتا كانك تشوف مكينه فكس ار طبعا المكينه تجاب من الامارات استعمال ياباني سابقا بــ 800 ريال فقط والحين تجاب بــ 1000 ريال الى 1500 ريال بدون ظفيره وتحتاج المكينه تحويلة مثلها مثل مكينه الكابرس والامريكي بشكل عام وتبي كراسي وشغل
اغلب من يرهم المكينه يبيع المكينه عليك بـ 3500 الى 4000 الاف ريال ورح وسعر وشوف اسعارهم يقولون لك راكبة على الموتر بــ 15 الف وبعضهم ينصحك فيها عن الامريكي وغيرها عشان مكسبه بالمكينه اكبر

طبعا مكينه الكزس تبي حذاف فكس ارا قير عادي 98 وطالع
وتبي طرمبة لكزس واير كاف وشغل مثلها مثل الامريكي تقريبا لكن الاختلاف في سعر القطع

المكينه بالخط تووووووووب واي احد يقول غير كذا غلطان اما بالبر مثلها مثل مكينه الباترول البلد خصوصا ان مافيها تورك (اي قوه شد او عزم) لانك قد تلاقي مكاين قويه فيها احصنه عاليه ولكن التورك فيها ضعيف لانها غير مصممه عشان تركب على موتر ثقيل زي الباترول وتبي تمشية برمل يعني مصممة للخطوط عشان كذا تلاقيها بالخطوط ابداع بس بالنفود ماهي مثل الامريكي او الفتك


مكينه الفكس ار 8 سلندر التويوتا مكينه فيها طرب بالخط والبر حلوه وافضل من مكينه الكزس عشان فيها تورك وقه عزم ومصممة لسياره دفع رباعي بس سعر المكينه يكوي بـ 12 االف وحولها واحسب سعر التركيب والحذاف و الكلتش و و و و و يعني احسب من العشرين وفوق


مكينه التويوتا الـ 6 سلندر من موديل 4500 بخاخ مكينه جباره وقويه وحاكره مره وفيها وناسه وقوه شد بس يعيبها ايضا السعر حيث ان سعر المكينه لوحده بـ 10 وطالع ونفس الكلام تبي حذاف وشغلانه تركيبها ولا كل يضبطها اغلب من يضبطها صح اهل قطر هم اهل الاحتراف فيها يعني احسب مكينه وتركيب وكراسي وكلتش وبرمجة وظفيره واختصار ظفيره و و و و و

مكينة 4500 بخاخ النيسان المكينه خايسه
ولا تستاهل كثير مقارنه بغيرها من المكاين قيمتها من 8 الاف وحولها بس صدقني ماتستاهل تركبها



تبي النصيحة اذا ماانت راعي جلد بالحيل وراعي موالى للموتر يعني ماانت من النوع اللي شغل وامش ركب مكاين امريكي مكينه صافيه وصرف رهيب وقوه عجيبه وبنفس الوقت وقت ماتخبط المكينه ولا يجيها شي ماتزمل توضيب مكينه ال اس وان من واقع تجربه مايكلف 3000 الاف ريال قطع مع شغل المخرطة لا واذا وضبتها وخرطت البساتم تنهبل شوي المكينه تصير افضل بس اهم شي ماينكسر البلووك

اغلب خوف الشباب من هالمكينه من عده اشياء سواء هالمكينه او مكينه اليوكون 5700 او مكينه اليوكون الدينالي او السكاليد 6 ليتر او مكينه الكابرس الجديد ايضا من 2007 وطالع هو كالتالي:
1- عدم سنتره المكينه مع القير صح عشان كذا يصير مشاكل بالقير والمكينه وهذا ممكن تركب عند احد صح ويضبط لك الموضوع
2- مشكلة عمود السرعه الموجود بين القير والمكينه وخصوصا بالتحويلة وهذا اصبح من الماضي حيث ان الشباب الحين يركبون بليته وتركب المكينه على كراسي بلد وعلى كلتش الباترول يعني مافيه مشكلة وبكذا تكون انحلت مشكلة عمود السرعه
3- مشكلة عطل طرمبة البنزين وهذا مثل ماقلت لك فوق تدبل الطرمبة وتصير عندك وحده اسبير واذا بغيت عزم زود شغل كل الثنتين جميع

انا مااقول لك مكاين الامريكي هي الافضل لكن بنظري انا انا افضل حل لمن يبي جيب قوي وبسعر معقول وخصوصا لو فكرت مستقبلا عطل بالمكينه ماتزمل تروح التشليح ومكينه الكابرس بــ 4000 لااف لحالها بدون كمبيوتر وظفيره

طبعا كلن يقول لك تجربته انا جربت ls1 ومكينه اقل ماقول عنها اذا الله وفقك باللي يركب لك عز الله انك تبي تنبسط وتشوف عزم اقل مايقال عنه يخوف


هذا ما لدي
وانت استخر قبل كل شي
والله يكتب لك اللي فيه الخير

[الـــهـــواوي]

مشكور يالغالي بس ليتك تشيك على الخاص يالغالي

[قااحش الدخل]

السلام وعليكم
انا مركب لكزس على باترول 98 اربع ابواب من شهر سبعه الراح
والله المكينه كانك تبي استخدام ركب وارتح وراح تدعيلي
المكينه خط كلام والنفود احسن من عزم البلد اذا كنت منت راعي مراقي
المكيف والله ثلج والحرارة مافيه شي وقطع غيار رخيص رحت عليه اربع مرات القصيم ومرتين الشرقيه
والحمدلله مافيه مشاكل وصوتة ناعم ولا حره ولاشي والتعشيق مافيه مشكله
واعرف الي ركبو واجد والحمدلله بصراحه المكينه كلام على الباترول
وكانك تبي السعر
17 الف تسليم مفتاح مكيف شغال وبلكثير اربع ايام وتعال خذ موترك جاهز
وتبي تشوف الموتر انا برياض

[الـــهـــواوي]

لاهنت ياقاحش الدخل

انا ابيه للجلد في البر ودوام وابي مكينه ومحتار مره كابرس ومره تايوتا

ومره لكزس ومحتار لكن الخيره في ما اختاره الله