هل بت بالبر وحيــــدا على طــــريقة (مكره اخـــــاك لا بطل)

[فهد الهلالي]

السلام عليكم ورحمة الله وبركاته
حي الله اخواني المكشاتيه كل ٍ بأسمه
سؤالي
هل بت وحيد ٍ بالبر على طريقة
( مكره اخاك لابطل)
وماهي الاسباب التي اجبرتك على ذلك وكيف قضيت تلك الليله وهل تؤيد الرحله للبر وحيدا
ارجوا التفاعل مع هذا الموضوع يالمكشاتيه
وتقبلوا تحياتي

[أَبوابراهيم]

ههههههههه آآهن واااه ياكثرهاا خصوصا اني راعي مسكات تمسك معي الى انام :D

وكلهن اكون ما القى احد يطلع معي
او ان اخوياي يسبقوني بالرجعه وانا ودي اجلس هالليله
لاكن لازم اقرب لم الخط مستحيل اكون ببطن البران ..
غالبا حول شعبان وتكون قريبه ونادر نادر جدا اكون بعيد حيل

وبالنسبة لرايي ما انصح فيه ابد ابد لانه تعريض النفس للتهلكه خصوصا انك ببر ولا احدن حولك ولا حصل لك شيء لا قدر الله .. فتكون متسبب لنفسك

[ناصح]

وعليكم السلام ورحمة الله وبركاته

لم يحصل لي ذلك بالشكل الذي تقول


لكن احيانا مع الإرهاق في السفر تضطر للنوم في البر وحدك


وهذا يحصل لي أحيانا


شكرا على الموضوع

[صقر البحيرات]

وعليكم السلام ورحمة الله وبركاته

ياهلا بالهلالي .. وحي والله هالطله

اسمحلي أنت والإخوة بالرد باللهجه العامية

... أذكر أول مرة أمرحت لحالي يوم كنت بالصف الرابع 9 ـ 10 سنوات تقريبا

تركني الشايب مع الحلال .. لكن قبلها كان يقولي وش وقعك هو انت تخاف والا لا

أكيد الهياط موجود يومها ابي اكشخ .. أبد رح واترك الباقي ..

قال اكيد ما تخاف >> طبعا كان درس لي

قلت ازهلها . وانا متعود >> متى اصلن امرحت لحالي هههه

الوكاد أظلم الليل .. وحالتي حاله لا أكلت شيء ولا بنفسي شيء .. والليل راح كله تلفت.. وقصيد ممزوج بنبرة حزن (بكا) . وترمز .. لو يدبي على رجلك شيء قمت على حيلك

والغنم ما امرحت من حركتي الزايدة والتريك ( المصباح) اجهرت الماخوذات يدور عليهن أخاف بينهن احد مختبي يبي يذبحني ..!! تفكير ماأدري وشلونه


كانت تجربه قاسيه .. بس كانت نافعة بالتأكيد لي

[مطر الفجر]

لا الله لا يحطنا بمثل هالمواقف

[سارق الوقت]

نعم نمت لحالي وحصل هذا كثيرا

مثلا اوقات الصيد اوقات الربيع والسبب احيانا ما القى احد يخاويني اللي يكون عنده شغل ولا دوام

طبعا هذا قبل العرس الحين الولد عمره تسع سنين واذا ما لقيت احد اخذه معي يوسع صدري

اما شعوري فهو عادي جدا احط راسي وانوم في صندوق الشاص على فكرة راسي ثقيل بالنوم

وانا غير مؤيد للكشته منفرا الا للضرورة القصوى ويكون مستعدا بما يلزم

[دكتور بر]

موضوع جميل أخي فهد




أذكر في إحدى المرات

كنا خارجين للصيد

وبتنا في البر ثلاثة أيام


كان الصيد طيباً ولله الحمد


وفي اليوم الرابع أرهق الزملاء أكثر من اللازم :(



وقرروا العودة



لم أترك وسيلة إلا وطرقتها لبقائهم ... واحداً تلو الآخر


لكن لا حياة لمن تنادي !!


مدفع حمزة ثاير ثاير :mad:


وقررت مع وفرة الصيد البقاء وحيداً

والمبيت بالقرب من الشعيب

طمعاً في صيد وفير


واستفراداً به دون الباقين :p


والحمد لله المبيت تم دون مشاكل :D



لكن هيهات..


الظاهر أن البركة بالجمعة الطيبة والصيد معهم



وكان الوقت طويلاً ومملاً بكل ما تعنيه الكلمة من معنى في ظل قلة الصيد



والحمد لله على كل حال



ولذا فلا أنصح بهذا الأمر إلا للضرورة ...

[عيسى عبد الله]

وعليكم السلام ورحمت الله وبركاته ..

يامرحبا فهد ومبدع دايم جعلني ما أبكيك ..

ربي يسعدك ويخليك لنا طال عمرك على الطاعة ..

والله وانا أخووك كثيررررررر ومتعودين ...ما أقوول أنا ذيابه ..

من جد من يوم أحنا صغاار نباات عن الأبل لحالنا وتجينا كوارث ..

بس من شدة التعب بعد العشاء نووم على طوول ولافه فرصه أنك تسمع لشيء ,,,,

لكن الحمد لله عز وجل ...وأحلا نوومه عندي أذا صرت خايف خخخ بجد تكوون نومه خطيره

مشكور ياالغالي ..وننتضر الشبااب

[دائرة 11]

تصــير علي كثيـــر بس مع اللـبل من الشمال للجنوب مالها عداد وانا اخوك

[برق الجهمه]

من يوم الله خلقنا وحنا نتبيت في الخليان يافهد

[جبال الهملايا]

كثير جداً ( ولكن ليس على طريقة الأكراه ) وماهنا إلا العافيه والحمدلله

[المترو]

وش الغريب بالموضوع من عرفتي للعلم وانا انام بالخلا ء منول مع الحلال ومنتالي من الجيب
والمقرود اللى بيجي حولي من جن وانس وحيوان ههههههههههههههههههههه

بس منتالي خربتنا المدنيه صرنا نستاحش اذا ابطينا بالديره

ولا انصح السفر بالبر وحيدا والهمله خلاوي لحالك لان الوحده شينه بس عاد اذا صار ماحولك احد وراسك به همله اهمل وماجاك مكتوب لك

والسلام

[كحيلان تميم]

مدري كيف يجيك قوة قلب تنام لحالك بالبر ..

انا ضد النوم فالبر اساسا الا اذا معك ناس كثير تحس شوي امان نوعا ما .. انا من الناس احب اجي للبر من الصباح لليل ولا جاني النوم ارجع للبيت ..

وكلن له وجهه نظر ورغبه فيه ..

[اورنس الشمري]

يا جماعة طريقة الاكراه اما عطل ولا ضيعت درب ولا بالبر تبي تنكس وغشاك النعاس


أنا مرة وحدة طالع لخويانا بعد المغرب وضربتني عجه ووقفت طولت العجة قلت خلن استغله ونام نمت حول الساعة ٨ مرهق حيل ووعيت حول الساعة ٣ على مطر وكملت لاخويانا بس مهما كان البر لحالك فيه وحشة

[خالد الشمري20]

السلام عليكم ورحمة الله وبركاتة


لم يحصل لي ذالك



الله يعطيك العافية ,,,

[قناص الصحرآء]

كم مره اضطر للنوم لحالي بس موحش جدا ولا تنام زين

[faisal 506]

انا شخصيا مافضل السفر لحالي ابدا
فمابالك بالنوم لحالي بالبر
وهذا وانا كل اسبوع تقريبا بالبر من سنين ولافكرت بهالشي ابد
وهذا الشي مكروره لانك تعرض نفسك للتهلكه اولا وثانيا طفش
والله يحفظنا وياكم من كل شر

[الحربي حاتم]

كثير جدا ولكن ليس على طريقة مكره ولكن على طريقة هواية وإحتراف وكنت لاأستمتع إلا بالرحلات والطلعات لحالي والنوم في البر .

[ابو حسان الجنوبي]

في السفر براً في بعض الأحيان يغلبني النعاس فأنام جنب الموتر


وماجاك يابن أدم مكتوب

ولكن عليك بالاذكار فهي حرز لك ولا تنسى دعاء نزول المحل والتخطيط حول مكان مبيتك

وعندي ساعة في البر تعدل ٨ ساعات في فندق ٥ نجوم