اهل الخبرة بالسلق الرجاء الدخول

[البواردي2006]

السلام عليكم ورحمة الله وبركاته

كيف حالكم شباب الصراحة انا عندي سلوقي عمره خمس شهور ودي اذا ناديته يجي لمي احيانا يجي واحيانا مايجي
مدري هاذي مرحلة لعب علشانه صغير ولا علطول كذا ولا اذا كبر يترك اللعب واذا ناديته يجي ؟؟

[الأبتر]

السلام عليكم ورحمة الله وبركاته
أخوي البواردي سلوقيك تقولي عمره خمس شهور أول شي حاول أنه لايدخل عليه إلا أنت علشان يتعرف عليك أكثر وبعدين إذا جاء وقت الأكل صوتله بأسمه لأنك إذا صوتله وهو لاهي بشي مايجيك وبعدين ترى يبيلك فتره حتى يعرف أسمه يعني لاوصل عمره عشر شهور خلاص يصير مع الأسم يجيك أو حتى إذا ناديته بقولك تعال مثلا بدون أسمه يجيك لأنه تعرف عليك. صح وغير هذا أنت الوحيد ألي يحطله أكله وحرص إذا بغيت نصيحتي أنه لايجيه أحد غيرك وإذا طلعت أنت وياه للبر نزله من موترك ولا يصير حولك أحد علشان يستمر بالجري وراك وخلك وأنت تمشي تصوتله بأسمه وخل معك أكل علشان لو عيا يجيك تنزله الأكل وحرص على أنك دايم تقدمله الأكل بكيسه علشان بعدين لو دلا مايجيك تمسك كيسه وتحركه بيدك وهو متعود أن الكيسه فيها أكل هذي الحيله لاتستخدمه إلا إذا غربلك صح ما يجيك .
وشكراً وسامحنا على القصور ...

[البواردي2006]

[b]الله يعطيك العافية اخوي الابتر على هالنصايح بس تدري وش المشكلة انه في مزرعتنا ومايمر فيها يوم الا والاهل رايحين لمها وعلى الطول البزران لم السلوقي صاير مثل المعلم واذا جو شفنا السلوقي وما ادري ايش وغير كذا العامل اذا جاء يحطله الحيب من برا الشبك لازم يشوفه لاني صعبه باليوم ثلاث مرات اروح اضرب مشوار 20 كم علشان احط له حليب والمشكلة الثانية اذا صادفة جيتي مع جيت الاهل الوالده تقول لازم تطلعه يلعب مع البزران ولا اقدر اقولها لا لاني مررة قلتلها وزعلت فمسئلت انه مايشوف الا انا هاااذي صعبه مررة وانا ادري باهميتها ومقدر وكلن يقولي بس الشكوى لله .. ومشكور على الرد يالغاالي .

[السمنوف]

أخوي البواردي واللة ما أزود علي كلام أخوي الأبتر وكلامة هو الصح وكلنا مجربينها ........ وتقبل تحياتي

[القحطاني505]

عليك بالربط ربطه بسلسله ودايم مسح عليه لمدة ثلاث اسابيع وبيضبط

[طلو]

حاول تعوده علا المقناص او تفتنه علا الصيد كل فتره فكله جربوع ولا ارنب يبدا كل ما تناديه يحضر عندك يدور الصيد

[الهوى]

عليك بالربط

[نيشان1]

بسم الله الرحمن الرحيم

السلام عليكم ورحمة الله وبركاته

البواردي يا كثر ما أعز هذا الإسم

عدة طرق لذلك :
1- حاول تجوعه وتظميه ولا يأكله ويسقيه إلا انت
2- أخذه بالسيارة في مكان خالي وقت الظهيرة وانزاله في الرمضى وعدم السماح له بركوب السيارة حتى يحضر اليك
3- اصدار صوت خاص بك أثناء تقديم الأكل والشرب له
4- دع الابناء يلعبون معه ويدوخونه حتى يطيح راسه بشرط عدم تقديمهم له أكل أو شراب
5- ربطه بالقرب منك أثناء جلوسك في المزرعة وكل بعد فترة وفترة مسح عليه واصدار صوت خاص بك له لا يعرفه الا انت مثل: قز قز-كش كش
-يح يح وغيرها كثير .

هذه من الاساسيات وهناك طرق كثيرة وأهمها رحلة مقناص لا تقل عن اسبوعين وبعدها يطيح اللي في راسه كله

تاكل من صيده ان شاء الله وتتنومسبه بين الربع
والتوفيق للجميع...

[(القناص)]

العيال ما قصروااا