سؤال كيف تتفادى ما يسمى بـ(القص أو السيف) أثناء قيادتك في الطعوس ليلا؟ أرجو المشاركة

[سدرك]

السلام عليكم ورحمة الله وبركاته

وانت رايح للدهناء وبتدخلها الليل كيف تنجو مما ذكرت في عنوان الموضوع؟؟

1- تنزل على رجليك و تشوف صعوبة المنحدر؟
2-لا تقود في الطعوس ليلا؟

او ما هي طريقتك بالضبط؟

أحد الاخوان حصل له مثل هالموقف وانتهى به دخول وجه السيارة (كأنه حادث)
وشق الرديتر

[AbO-iBr3hEm]

أقود بالليل ...

أحدى المرات في طعوس بريدة [ ولست من القصيم وماأعرف القصيم وبالضبط بالشماسية ] فطلع من طعس طويل يوم قربت منه طلع سيف ، فدست على البنزين وجيته من جهت الأمام ...
لو الله ثم الموتر ولا كان السيف ببطن الموتر [ الموتر جيب ربع ] ...

[كم كيلو باقي]

اول شيء تشغل الكشافات اللي تحت

الشيء الثاني تكون حذر جدا وتتوقع أن اي منحدر هو سيف .. أو أي مكان ماتشوفه واضح ممتد قدامك

ولازم اذا شفت منحدر تباريه مباشره وتشوف سيف ولا لأ

أحيانا لابد انك تنزل السيف او تتوهق وهو فجأه بوجهك

اذا كنت بتنزل وانت مهدي انزل وانت تمشي بحدود 20 .. لاتهدي مره احيان تتعلق
وتنزل مايل بزاويه 45 درجة تقريا
وقوووو قلبك حتى لو اللي معك بدو يصارخون ويخوفونك اول ماتنزل الكفرات كلها بالسيف .. لف الدركسون جهة الأرض .. اذا قربت للأرض لاتصدمها صدم خذها برضو وانت نازل بزاويه 45 درجة تقريبا

اما تفاجأت فيه أكسر ابو الطاره يمين أو يسار ولاتخاف غالبا بيمديك تباريه حتى لو واحد من الكفرات دخل بالسيف يرجع بسهوله
اذا طاب طاب مالك مجال لاتمسك الفرامل نهائيا .. جود الطاره بكل قوتك وبعد وجهك عن الايرباق .. واعرف ان اقصا الأحوال بينشق الرديتر فلذلك لاتخاف واجد وتلف خطأ ويقلب الموتر

[patrol vtc]

السلام عليكم ,,

هذي نصيحة قالي إياها أحد الإخوان جزاه الله ألف خير ووفقه في دينه ودنيآآه :

اذا ماشي بين الطعوس وخفت هو سيف ولا لآ !! شف موجود جرات متجهه للطريق ومشت من عنده فهو ليس سيف !
إذا مافيه جرات فإحتمال انه سيف ,
وجربتها ولله الحمد والمنه , أبعدتنتي عن كثيير من السيوف ,

:)

[dead man]

بديهيا الواحد عندما ياصل الواحد الى نهاية طعس يخفف رجله على الدعسه شوي مو يشلها بالكامل وبعدين توزن رجللك على حسب قوة موترك الي انت تعرفعها في هذه الحاله مايتعلق عليك الموتر وان صار فيه سيف تنزل فيه بشكل انسيابي مو بالسرعه الي انت رقيت فيها وباذن الله مايصير الا الخير . وانا اتكلم عن نفسي بالييل مستحيل ارقى طعس مو خابره اما بالنها ر ما اخلي شي ما ارقى عليه .

[عاشق السيل]

أول قاعدة وأهم قاعدة إنك ماتسرع بالنفود ليل أو نهار وعلشان كذا خل كفرات لينة بتنسيم الهواء علشان تمشي بكل راحة ،،

وبعدين حاول تباري النفود وماترتقى النفد الطويل إلا إذا اضطريت ،،

وإذا تفاجأت بالسيف قدامك والكفرات الأمامية نزلت أنصحك تزيد السرعة وتنزل علشان مايتعلق الموتر وإن شاء الله تسلك أمورك ،، وإذا أمداك توقف الموتر قبل تنزل الكفرات الأمامية فأنت نجيت من السيف ودق ريوس ،، بس أهم شي لا ترتبك وتلف الطارة ترى احتمال كبير ينقلب الموتر !!

أتمنى لك قيادة آمنة وممتعة بالنفود ....

[sgl2002]

والله أنا أسوق بالنفود وبالليل وبمكان ماعرفه لكن اللي أسويه

إني إذا جيت عند الطعس أقوم أباريه
يعني أطلع إلى رأسه ثم أكسر الموتر يمين عشان أشوفه من جهتي أنا

طبعا مستعد أنزل أي قص مافيه مشكلة بس تجي بسرعه بطيئة وأول ماينزل وجه الموتر شد عليه وإذا نزل كامل امسك بريك عشان مايدق وجهه بالأرض

والموتر بالسيوف ماينقلب إلا على سرعه أو نزلت ولفيت الطارة جهة الطلوع.. يعني لازم تلفه جهة الأرض ولاتلمس البريك وانت نازل بميول

[الصامل1]

الي يبي السلامة يسمي بسم الله0قبل ما يدخل النفود يختار الموتر القوي ينسم الكفرات يقوي قلبة ومن خلال تجربتي من خاف سلم اذا كنت في اليل لاتغامر في مكان ماتعرفه اما في النهار مثل ما قالو تعتمد على الخبرة والتجربة

[ولد وايل..]

نصايح الأخوان فيها فايدة كبيرة ..


فيه نقطة لازم تنتبه لها .. وهي التركيييز بالطعس في بدايته وفي أول قمته ..

أنت لما تكون مركز خذها مني مجرد ما تنتبه للسيف يمديك تتدارك الموقف أما ماخذ السالفة سواليف فماراح تدري إلا وانت عاض الدركسون بعيد الشر عنا وعنك ..


شي مهم وهو النور بعض السيارات يحتاج ترفع النور العالي وبعضها النور العالي يفقدك تركيز المسافة القريبة..

المهم إنك تشوف نور السيارة ينقطع ولا لا لأن النور ينعكس بالأرض وإن اختفى معناه قص ..

بعدين ليه العجالة ؟؟ ياخي أرقى الطعس وباره على جنب وشوي شوي وتبين هو قص ولا نزله عادية..
حتى لو طنبحت وانت مهدي وماخذها بركادة نزولك يكون سمح ..

ونصيحة جرب تنزل من قصوص شوي شوي وتتعود عليها وخلك على القصوص السهلة لا تروح قص صغير مره يعلق الموتر ولا كبير يخليك تتوهق في النزول ..

شف القصوص اللي مضروبة قبلك وانزل معها يفيدك إنه في حال نزول مفاجي إنك عندك تجربة ..

بالتوفيق ومطامر ممتع ..

[HAS5SAN]

أفضل طريقة
تشتل (تقصه)=

zghllUnIfXI

[كثير السؤال]

نسبة الخطر كبيره بالليل بالنهار الواحد يخاف ينزل بعض الاحيان خص اذا شاف مواقف انقلاب وصبخ رديترات اوحصله موقف
انا عن نفسي كنت اتمشى بالنهار بددسن وكانت بلد وطامنه يوم اني نزلت مع السيف اثره ملعقه واصدمه وتروح وجهية الموتر
عقبة بديت اباري السيوف لاانزل منهن وادور منزال سهل وابعد عن الشر وغنيله

[سيوف الدهناء]

المشكلة ليست في السيف وإنما في السرعـــــــــــــــــــــــــــــــــة اذا انك مهدي تبي تجاوز السيف بكل سهولة او باقل الاضرار الله يحمانا من اخطار البران والمكاشيت (وبعدين مسكة خط الاسفلت باليل لا ينصح به اطلاقا هذا الخط الاسفلت فما بالك بالنفود والاماكن الوعرة
وعلى قول جدي الله يحفظه ويطيل عمره على عمل صالح((الليل له عين والنهار له عيون))
وشكرا
محبكم/سيوف الدهناء ^_^

[يريور عيمان]

انا طريقتي في هالحالة اني ما اطعس بروحي
لازم معي واحد و هو يشوف اذا سيف او لا بعدها اروح

[sgl2002]

تذكير مهم لاصحاب الشاصات بالذات ( التويوتا والنيسان ) ترى ما اسرع من تعليقته بالسيوف فانتبهوا لانك حتى لو بغيت تتفاداها بسرعه ماتقدر لانكم زي ماتعرفون كيف لفة الشاص

[راعي الغنمات]

ياخي أرقى الطعس وباره على جنب وشوي شوي وتبين هو قص ولا نزله عادية..

[أبو عقيل النجدي]

شف وأنا أخوك أهم شيء ما تقصه والموتر عدال لا بد أن يكون الموتر على جنب تقريبا مشابه للمقطع اللي حطوه أخوي
سواء بالطلوع ولا بالنزول

ثانيا لا تقارن المواتر مع بعض الهايلوكس والددسن سهله بالقص وثم يجي يليها الجكسار والباترول ثم يليها الشاص وهو أصعبها وأكثرها انقلاب لأن قيادته صعبها جدا بالقص لذالك لا تمشي أو تعتقد أن الشاص يقص زي ما يقص الهلكس ولا الجيب إلا إذا راعي الشاص خبرة

ويساعد الشاص ميزة غير موجودة بالبقية هي رفع الموتر يعني إن شاء الله احتمال الصدم أقل من بقية السيارات

[سدرك]

فائدة ذكرها أحد الاخوان وهي :

إذا وجدت أثر ماشية او ابل تصعد الطعس فأعلم ان منحدره سهل وليس سيف

سبحان الله

[السالمي]

الافضل في الليل انك ماتدخل نفود ماتعرفها

لان النهار مقدور وتقدر تتصرف فيه لاكن الليل مشكله

[حسن الشمالي]

نسم عشرة...
وتل الدبل...
ودور مطامن الارض
وحط رجلك ولاوصلت نهايه طعس هد السرعة شوي...
ولا انهل وجه الموتر ... دسسسسسسسسسسسسسس للموتر عطة النار...

وماجاك علي..
تحياتي...

[tariq2100]

معلومات مفيدة شكرا لكم

[send1398]

مشككككككككككورين

[الربع الغالي]

لا تسرع ولاتهدي
ألا وقف وناظر وشف القص وش من قص ويكون معك كشاف
فيه واحد من الشباب صار له انقلاب بجيب شاص والسبب القص صار على جبل وطلع القص وانقلب وطاح من الجبل والرجال له خبرته فالبر من زمان وفالطعوس والحمد لله أن الله سلمه من الإصابات وسلم ربعه الي معه


وهذا رأي
وتقبلوا مروري

[راعي الشاص 10]

احلا نمرة مع احلا نافورة وقضت السالفة

[الجني العبد]

ياخي ذكرتني بصديق لي توفى بسبب السيوف ( رحمه الله رحمة واسعة )
الرجال الله يذكرة بالخير كان راعي سرعة خصوصا بالنفود
عاد راح بالليل يبي يجيب غرض ولا رجع لنا ، يوم أشرقت الشمس لقينا ناقز السيف وطاب بالشعيب وقالب
طبعا الموتر كان ماسك يدة ومات غرقا

اللهم اغفر له وارحمه ياغفور يارحيم

[أبوهشام2]

السنه اللي راحت طلعت إرباقات موتري والسبب سيوف الدهنا الله يكفينا شرها
والصراحه السبب كان السرعه
أسرعت على غير يممه ونطيت السيف ويصقع بطن الموتر بالأرض وتطلع الإيرباقات كل هذا صار بالنهار
تنكدنا يومها ورجعنا الرياض ولا كملنا الطلعه


من عقبها ما أقص السيف إلا بسرعه خفيفه ونمره ثقيله بالدبل وبالجنب بعد
وإذا شفت إن الموتر بيتعلق من تحت ذبيته من الجهه اللي أبي أروح يمها
زي اللي بالمقطع اللي حطه أخونا حسان

وأخطر سيوف من وجهة نظري
سيوف الدهنا لأنها رفيعه وحااااده وتغدر بالواحد
والدهنا يبي لها مسايس ولايبي لها طفاقه
لأنها إما قلبه وإلا طيران وإلا تعليقه الله يكفينا الشر

[ihueda]

ياخي أرقى الطعس وباره على جنب وشوي شوي وتبين هو قص ولا نزله عادية..http://192.la/dd

[ابو سمسم]

والله أنا أسوق بالنفود وبالليل وبمكان ماعرفه لكن اللي أسويه

إني إذا جيت عند الطعس أقوم أباريه
يعني أطلع إلى رأسه ثم أكسر الموتر يمين عشان أشوفه من جهتي أنا

طبعا مستعد أنزل أي قص مافيه مشكلة بس تجي بسرعه بطيئة وأول ماينزل وجه الموتر شد عليه وإذا نزل كامل امسك بريك عشان مايدق وجهه بالأرض

والموتر بالسيوف ماينقلب إلا على سرعه أو نزلت ولفيت الطارة جهة الطلوع.. يعني لازم تلفه جهة الأرض ولاتلمس البريك وانت نازل بميول



هذا العلم الي مابعده

الشي المهم في الموضوع هتو السيارة اذا معاك جيب ربع نيسان او تويوتا ماتخاف علية انه يحك بالارض

عندي الربع الباترول ماعمري فكرة في القص انزل وين ما اروح بالمعقول والتعود له دور

[خب الحلوة]

والله لقد استفدت منكم وأضفتوا لي معلومات جديده... ولكن أعتب على بعض الإخوة وأقدر لهم
وجهة نظرهم وهم الذين يقولون لاتطعس بالليل أو ما يحتاج تموت أو أنا طعست وبغيت أموت
أقول لهم هناك فرق بين حل المشكلة والفرار منها... فبالطبع كلنا لايريد أن أن يموت... ولكن يريد أن يتعلم هذا الفن ...
أليس بمقدور الإنسان أن يدخل حرب وهي أكبر سبيل للموت وبفن يخرج دون أن يمون... كل شي في هذه الدنيا له فن محفوف بالمخاطر كالطيار والملاح والسائر وصاحب الغاز وصاحب الكهرباء ...

[سيف الظفير]

نصيحة اذختها من رجال كبير بالسن من الدواسر

وكذلك من شيبان شمر اهل جبه بحايل


النفوذ يا بعد حيي ريح بالليل وتعشاء وعين خير وفل الحجاج وتقهوى وبكرة من اضبح افلح

يطيب راسك ويزين النظر على كيفك

الليل ما ينصح فيه بالنفوذ الا اذا هي سهاله مرة او خد واضح وكل يوم تروح له

وفي الليل كل شئ يتشابه عليك سبحان الله ولا عاد تدري تركز بالقارمن او بالسواقة غثاء

[خب الحلوة]

من الأشياء اللي استفدتها من تجربتي الخاصة ومن وأصحابي ومن إدامة النظر للتطعيس
أنه لايمكن حصر الموضوع بكلمات فهو يختلف باختلاف السيارة والسيف ووقت التطعيس
1-اذا كانت السيارة حوض وماأشبهه وتحمل تانكي ماء فتأكد أن الماء ممتلئ أو فارغ وإياك والتطعيس وفيه نصفه لأنه يرجح بالسيارة مرة واحدة ثم لاسمح الله تنقلب السيارة .
2-اذا كانت السيارة دفرنس أو جيب لم يستخدم الدبل فاضغط على دواسة البنزين " وهذا حال كونك في السيف" فاضغت البنزين فأنت أمام خيارين إما أن تخرج السيار بأمان أو أن تغرز المهم تتلافا إنقلاب السيارة وبهذا الفعل انقلب أخي وهوأنه لم يدوس فبدأ الكفر الخلفي بجمع التراب إلى وسط الجنط ثم انكفئت السيار وبضغطك على الدواسة مع حرف المقود نحو الأرض تخرج بإذن الله .
3-من المعلوم أن للسيف جهتان جهة قاسية شي بسيط والأخرى ناعمة وهيار وهذا جراء الهواء وتحرك الرمال فاتق الجهة الناعمة وغالباً تكون أكثر انحدار وأخطر .
4- إذا كنت تقود على السيف وكان الهواء شديد فاتق التشققات والمطبات التي تحدثها الرياح على ظهر السيف .
5- كنت أسمع من أصحابنا مقولة "السيف غدار" وبالفعل فهو غدار من جهة أنك أحياناً تنقلب من ظهره إلا بطنه وأنت لا تعلم وأحياناً تمشي فيه اليوم وغداً برسمه مختلفة .
6- وجدت لربط حزام الأمان الفائدة الكبيرة ونال إعجابي أبو عبد الله الصمعاني المعروف بالترهيم ببريدة بربطه حزام الأمان فهو حافظ بعد الله وإذا تفاجئت بقفز سيف فشد ظهرك على المرتبة وشد يديك على الطارة ممسكاً بها .
7-عند النزول إياك وضغط الفرامل لأن السيارة مشحونه بطاقة فإذا كبحت الفرامل دخلت الكفرات الأمامية في الأرض والطاقة أين تذهب ؟؟ ربما تكفى السيارة ..عليك باستخدام "الجلنط" الفرامل الخلفي ونمرة أقوى للسيارة العايدي .
8- لاتطعس وفي تانكي الوقوق أقل من الربع فربما أنك إذا صعدت النفود أوالسيف ذهب الوقود لجهه معينة من التانكي وانطفئت السيارة فيصعب عليك التحكم فيها .
9- إياك والسيف وقت ما قبل الظهيرة الذي يتساوى في لوني السيف بطنه وظهرة فلا تدري في أيهما صرت .
10- إذا كنت تقود السيف بإتقان في بلدك فلا تطبق نفس التجربة في بلد آخر لأن الرمال تختلف دفيقة وناعمة مثل الدهنا تختلف عن الرمال الخشنة بالقصيم .
11- ربما أدى النور العادي فائدة أكثر من العالي لقيادة السيوف بالليل فالعالي يسطع بشئ بعيد يشغلك عن ماهو أمامك مباشرة.
"""أكرر فضَل دائما أن تغرز إذا أحسست بالمجهول فهو فرصة نهائية قبل الحدث"""

[سدرك]

أشكركم جميعا على المشاركة

[قازان]

نقطة مهمة

دائماً القص أو السيف يكون جهة عكس الريح

يعني مثلاً في نفوذ المطار بالشرقية إذا كنت متجهاً بالسيارة من الجنوب إلى الشمال لن تواجه أي قص بهذا الاتجاه

السبب لأن الرياح غالبها شمالية

ونقطة أخرى أيضاً الكشافات العلوية كما في السيارات المخصصة للبران لها دور كبير في الرؤية ليلاً

[الليث الذهبي]

السلام عليكم اعتقد انها مهاره مكتسبه
انا عن نفسي اترفق واذا كان سيف او قص حلت الموتر اول ما تنزله تجنحبه على جنبه نوعاما وليسا كليان علشان ما تجيب العيد وكل واحد عارف وزنت موتره وتنزله عقبن تنزله عدال
فالاخر يفظل انك تفصل الدبل وتدعس للموتر شوي علشا يحفر الكفر الي ورا على كذا ترتفع الوجهيه وتفادا اصتدامها بالرمل

[شحرور الدهنا]

ارفع رجلك وونزل وجه الموتر لاتنزله على جمبه علشان ماينقلب او يتعلق لاسمح الله

[سدرك]

أجوبة متميزة .....
بارك الله في جهودكم المثمرة .....

[راعي الرود]

على ان الموضوع له سنتين الا ان فيه فائده و نصائح لا تقدر بثمن

الله يكفينا وياكم الشر جميعاً

لكن مايمنع ان الواحد يتجنب السيوف قد مايقدر لأن بعضها تنزل معه و يطلع هيار خصوصاً بعد الامطار يصير هيار شديد بالذات في الدهناء

[kenedy]

ماذا تفعل إذا تعطل مثبت السرعة في سيارتك؟

http://www.emaratalyoum.com/local-section/other/2013-08-20-1.599637