المساعد الشخصي الرقمي

مشاهدة النسخة كاملة : ياناس بلشت بها البزران .... ارشدوني


نقا خريم
06/02/2006, 09:42 PM
السلام عليكم ورحمه الله
اخواني المختصر المفيد
انّي اذا طلعت مع العائله والا معنا عايله قريبه لنا اكيد فيه معك اطفال وحريم
وكل واحد يفتح قوطي ببس واكياس فشار واكواب بلاستيك وكلن يجدع من عنده:(
وانا قاعدن الجلج واهوش وامشي والقط وراهم:mad:
ومااااااافيه فايده... القط كم من كيس وقوطي ...
ثم انكسر ظهري وتعبت وقعدت:mad: :(
وانا اجزم ان هناك من المهتمين للحفاظ على النظافه يواجهون حالات كهذه
لكن مامن فائده...
حتى بعض المخيمات ( واماكن المخيمات اشطب عليها اكس ماهاد فيها فايده) يلقط اللي عند رجليه
والاغلبيه لايلقي لهذا الموضوع بالا...
اخواني انا اضفت هالموضوع لكي ترشدون الكشاته للطريقه الافضل
وانتم ماتقصرون
وننتظركم
والسلام
صوح الجبل
07/02/2006, 01:33 AM
هلا .... باخوي نقا خريم .... مثلك وانا اخوك .... هو اللي يرشدنا .... لكن من باب المشاركه بالموضوع .... اشترط وانا اخوك عليهم ..... قل لهم ترى مافيه طلعه الا بكذا وكذا .... وان شفت الشي .... هذا .... ترى ماعاد فيه .... طلعه .... والا وانا اخوك امكن هذه فيها .... شي من الممل لهم ولك ... الحل الثاني اجمعهن معك في كيس واحرقهن قبل ماتمشي ... مجرد مشاركه .... والاخوان ان شاء الله بيفدونا اكثر .... لك تحيتي ومودتي
سحاب1111
07/02/2006, 12:15 PM
وعليكم السلام ورحمة الله وبركاتة
الحقيقة اخوي انت مثل يحتذا
واتمنا لك التوفيق
ولاكن اعلم ان من شب على شى شاب علية
التوجية والارشاد لابد ان يكون مستمر ولابد ان تكون طويل البال حتا لا تمل
وعلم انك مئجور
ومن الممكن ان تضع لهم مراقب ممن يكبرهم عمراً بقليل ويكون هناك جوائز للذين يلتزمون بتنضيف (لادقق بالحيل)
في نهايت الرحلة اذاكانت انتائج طيبة وزع عليهم هداياء كلهم
وصغير يفرح بى اي شي تعطيه اياه دامة هدية . يعني لو توزع عليهم يوسف افندي كان استانسو . ولاكن بشرط لايدرون عن مهيت الجائزة
وبتوفيق للجميع وننتضر مزيد من الافكار
ودمتم بخير
نقا خريم
07/02/2006, 07:18 PM
السلام عليكم
عذرا على التأخير اخواني
صوح الجبل ...
ياهلا بك والله يابو عبدالله شرفت الموضوع
وانت الصاز شكلي ابمصّع اذانيهم واحد ورا الثاني (والا اخاف يحرّمون يكشتون مره ثانيه) امزح....
حقيقة فرحت بدخولك موضوعي وجزاك الله الجنه ووالديك
الاخ ساردار
حياك الله واسأل الله ان يوفقك دنيا واخره
اخوي ... شكلي ابتنيذل عليهم شوي اذا لقطوا الزبايل وقضوا ابعطيهم هدايا
اكياس بلديه ينضفون الزبايل اللي حولنا(كان والله ليكبون اللي لقطوا)
حيّاك الله اخي وبارك فيك
ونتمنى المزيد
ونرجوا ان اللي يتصفح الموضوع يفيدنا ويفيد غيره وله الاجر والثواب
ونحن بالانتضار
والسلام
أبو ثا بـت
07/02/2006, 07:28 PM
أعتقد أفضل شي إنك تحفرلهم حفرة وتخليهم يرمون به وإذا خلصتو عاد عارفين الباقي مايحتاج فضايح .!


لا وعجبتني أمانة مدينة الرياض في الثمامة .. يعطون الكشاته حزمة حطب وجركل ماء وكيس زبالة بشرط يرجعة مليان .؟

فكرة ولاأروع يشكرون عليها .
نقا خريم
07/02/2006, 09:49 PM
الاخ ابو ثابت
مرورك اسعدني ومشاركتك سعدنا بها
وحيّاك ربي
وحيد111
09/02/2006, 12:02 AM
السلام عليكم

اخوي نقا خريم

ترا الجائزة تعمل عمايلها على ماقالوا الاخوان

او قل لهم اللي يجيب لي اكبر كمية من الزبايل اعطية احسن جائزة

والا تدري خل المسؤولية على امهم وريح بالك :d
القرم
13/02/2006, 10:22 AM
اخوي نقا خريم انا "كنت" اعاني من نفس المشكلة وكل ما اكشت بمكان ما اروح الا وهو الهم يا كافي من الخلفات المعروفة مناديل كاسات بلاستك علب فارغه..الخ لكن الان انا ارتحت من هذا كله وهو اني ما اخذ معي شي الي مهب ضروري ما اخذه..والماء حط عن الترمس كاس معدني ..بالبداية راح تكون صعبة لاننا كلنا تعودنا على اننا نستخدم الاشياء هذي كلها لكن مع الوقت راح تكون عادية مرة وانا جربت حتى الفيشار وشلته ما اخذه وعلى ذلك قس!

شكرا لك
الضاري
13/02/2006, 12:59 PM
اللي أولة شرط آخرة نور

عليك بالجوائز والمغريات
سحاب1111
14/02/2006, 09:39 AM
السلام عليكم
الاخ الضارى انت من الضاري سكان عنيزة
اتمنا الاجابة بوضوح
للاهمية وشكراً
السابقي
14/02/2006, 10:00 AM
مرحبا اخوي نقا خريم

انا ماعندي الا ولد واحد وتوه صغير عمره سنتين الله يحرسه

والموضوع ذا افكر فيه من مبطي

الاولاد فالبيت ماعليهم لا قطو الشي اما تجي ام العيال وتشيله والا الشغاله وانتهينا

بس انا رافض هالشي ومعوده على انه لاخلص من شي ولا فيه شي بالارض اقوله بابه شيله وحطه فالزباله اعزكم الله ويشيله ويرميه ولا رماه قلت له شاااااطر حبيبي ويستانس ومن بعدها لاشاف شي رماه فالزباله لوهي خمسميئه :) علشان اقوله شاطر


المراد ولا تهون اني احاول اعوده على هالشي من صغره ونا شايف ان الولد لاتعود على شي مايتركه بسهوله

الله يصلح لنا اولادنا ويبلغنا فيهم انشاء الله

دمت بخير ...
حلوان
14/02/2006, 11:10 AM
السلام عليكم ياخوان ورحمة الله وبركاته عندي اقتراح ولو انه صعب شوي ليش مانحط في كل منطقه بريه لوحات ولافتات ارشاديه تحث على النظافه وعدم رمي النفايات اعرف انها صعبه لكن ان شاء الله ان فيه ناس لما يقرون الكلام هذا يتذكرون ويقوم بالجهد هذا شباب مكشات بالتعاون مع البلديه او حتى على الطرق السريعه وش رايكم
ثادقيه
14/02/2006, 03:27 PM
انا من رأيي مثل رأي اخي الضاري (المغريات)
أي تحدد مبلغ من المال لكل شخص يرمي بالنفايه في مكان مخصص قد جلبته انت : مثلا كيس كبير او ماشابه له.. ومن لم يرمي النفايه في مكنها يعاقب بعدم اعطائه المال ...

وقد جربت هذه الفكره وكان لها مفعولها ...
وجزاك الله خيرا ...
الضاري
14/02/2006, 11:46 PM
السلام عليكم
الاخ الضارى انت من الضاري سكان عنيزة
اتمنا الاجابة بوضوح
للاهمية وشكراً

لا والله يالغالي ماني من أهل عنيزة

وأتشرف لو أنا منهم

تحيتي
الربذي
15/02/2006, 09:02 PM
السلام عليكم
انا واعوذ بالله من كلمة انا اذا ظفينا اغراضنا طلبت منهم ان يجمعون كل شي طايح منهم بس احيانا بنيتي الله يصلحها اقول لها جيبي ذاك حطيه بالكيس او النار تقول لالايبه هذا مو منا من قبل وترفض تجيبه تقول لا ماهو منا
وافضل شي تخليهم يحطونه بكيس معكم اول باول
وحتى بنيتي عمرها اقل من سنتين اي شي تلقاه تحطه بالزباله الله يكرمكم مثل ماقال اخونا (الـــــســـــــابقي) احيانا ندور الرموت ونلقاه بالزباله واحيانا كل كرتون المناديل وهو مليان وبس كل شي بالزباله الله يصلحه
لكن البعض حدث ولاحرج انواع الزبايل في مكانهم ياهم اذى في اذى في زبيال تصدقون مافيه شي يطري ببالك الا تلقاه مجدوع قله حيا
والبعض مثل غالبيه اعضاء هذا النتدى تصدقون بس اثرهم ولاتشوف بعدهم اي شي
تصدق انا ندعي لهم بظهر الغيب وشفت الكثير من هذة النوعيه المتعلمه النادره المحافظه
ناجز
10/03/2006, 11:08 AM
الأخوان ماخلولي شيئ الله يجزاك واياهم خير
ان يصراحة الي مايهتم من العيال بالنظافة اعطيه كيس واخليه يدور ويظف الي يلقاه والي مارما شيئ يجلس يلعب وهم يناظرونه الين صارو من انفسهم اذا شافو شيئ راحو يشيلونه لآني سويت جوائز لأكثر واحد ينظف المنطقة الي حولنا
ابومحمد
راعي النفيد
26/03/2006, 11:50 PM
انا عندى طريقه بسيطة جدآ وهى
قبل مانمشى نشب نارين لكل فريق نار مره العيل فريق والبنات فريق وصاحب النار الكبيره هوالفائز ومره انا فريق وام العيال فريق
وعينك ماتشوف الاجمع زبايل كلاآ وده يفوز
بدون مبالغه حتى المخلفات الفديمه يتم احضارها الى النار كل واحد يبحث عن الفوز حتى ان بعض الاطفال صار يحتفظ بالزباله في كيس خاص حتى يحين موعد الاحراق لكى يفوز
وهذه انسب طريقه جربتها ونجحت نجاحآ باهرآ ولله الحمد
والسلام عليكم
رفيع الشان
02/04/2006, 10:54 PM
الأطفال يمشون بالتوجيه أولا .. ثم بالرد السلبي ..


يعني اللي يرمي العلبه ماياخذ عصير بعدين وكذا ..

أو اللي وده بالعصير اذا خلص الفشار يجيب العلبه .. زي كذا ..


والله يعينك .. ويكتب أجرك :)