((شراء الطيور عبر المنتدى والمسافه بعيده))

[(هزاع)]

السلام عليكم اخواني الكشاته
تحيه عطره وموسم يبشر بالخير ان شاء الله
الموضوع ذو شقين
الاول/ بعد المسافه
الثاني/سلامة الطير
الاول راعي الطير يبي مايمشي طيره الا الفلوس مدفوعه له (وهذا من حقه يبي يضمن فلوسه)المسافه مهي شوي
الثاني المشتري يبي يشاهد على الطبيعه ويضمن فلوسه(وهذا من حقه)
اذا البايع ارسل طيره بمبلغ توصيل 800 ريال او 1000 والمشتري قام يتردد لاجل يخفض سعر الطير ويطلع قيمة التوصيل من قيمة الطير والطيور مثل الاوادم يتعبها السفر وقد تتعرض للامراض والتقيء ورتباكات الامعاء وتكسر الريش من سوء النقل والنفوق بيضطر راعي الطير مكره على الموافقه
الحلول بنظري واطلب الرائي من اخواني
1: يتم الاتفاق بشهاده بيطريه بسلامة الطير مع المشتري .
2:تحويل عربون مجزئ يسلم للبايع عن طريق شخص موثوق او البنك.
3:عدم الاستعجال اذا الرغبه موجوده .
4:الصراحه والمصداقيه وعدم المجامله .
5:(المرسول اوالموصل) ليس اي شخص يعرف التعامل مع الطيور من حيث الحراره والبروده وموقع الطير بالسياره وهل المرسول صقار او لديه تعامل بالصقور خصوصا الوحوش الماء والعلف بعض الوحوش من الخوف تعاف الماء والعلف(تصوم)
هذا موضوعي مطروح للمناقشه من قبل اخواني الصقاره ارجو المعذره إن جاء قصور موضوعيه او إملائيه
واتشرف بمروركم وابداء آرائكم .

اخوكم ((هزاع ))

[رعد البوادي]

السلام عليك ورحمة الله
اخوي هزاع بيض الله وجهك على الموضوع
انا معاك في كل كلمه قلتها وخاصه على الشهاده الفحص اما بنسبه للعربون وانا اخوك اذا كان الطير قيمتهه تتعدى العشر الاف انا من راي يندفع 20%من قيمة الطير لانه بيكون مبلغ لاهو كبير اذا راح وفي نفس الوقت مبلغ معقول كعربون من راعي الطير وبنسبه لشخص الي بيوصل الطير من الافضل اذا كانت المسافه بعيده يكون شخص له خبره في الطير وشخص ثقه وامين لانه في ناس ما تخاف من الله يمكن يبدل الطير بطير اخر وانته مشتري على صوره وانا اخوك وماخذ شروط على الطير وبعدها تعرف انه الطير غير موفي للشروط المتفق عليها

[مدهل الطير]

مشكور اخوي هزاع ....لاكن بحكم تجربتي والبحث عن الطير اللي يجوز لي اوالبيع والشراء فانا والله عانيت من التعب النفسي خاصه اذا جاني الطير وشفت فيه حاجه اوعذروب ماذكره لي ولما اساله والطير صار عندي ليه ماذكرت لي العذروب اللي فيه قال ياولد هذي بسطه ماتذكر وزود على هذا قيمة التوصيل انا اللي دافعها ...... فانا انصح من اراد الشراء والمسافه بعيده عليه ان يفضي نفسه ويمسكه الخط ويروح ويشوف بنفسه ويقلب الطير وهو مرتاح ان شرا ضمن طيره واذا ماشرا ضمن حقه وارتاح نفسيا واعتبر المشوار تمشيه وسعة خاطر وعلى قول الشاعر(لاطابت النفس كاني قاضين شاني).واما انك تعرف الرجال ورفيق وتاثق فيه فهذا امرها سهل واللي بيوصلون كثر على الاقل اروح للكداده وافضيله السيت اللي ورى على حسابي واقول روح ..والف شكررر

[alwafe19]

بيض الله وجهك يا هزاع

موضوع جميل وفي محله

ومن ناحية المال والتوصيل

يكون التوصيل عن طريق البايع يعني ياثق فيه البايع

وبعد مايوصل الطير للشاري يدفع للموصل مبلغ الطير مع مبلغ التوصيل

كذا الكل ضمن حقه

ولاهنت يا هزاع

[راعي نوماس_]

بيض الله وجهك على موضوعك

[ابوجبر]

موضوع في غاية الاهميه ..
ولي تعقيب في هذا الموضوع الا وهو ..
انا اعضاء مكشات متفرقين في جميع المملكه تقريبا
يتم اختيار اعضاء معروفين( ولا فيه قصور بالباقي ) لجعلهم وسطاء
بين البايع والشاري , حتى لو اعتمد الامر على اخذ الوسيط مبلغ مالي (نسبه محدده من قيمة الطير.. او مبلغ ثابت ) ويكون ذلك فيه راحه للطرفين اكثر..

هذا مجرد رأي ان اصبت فمن الله
وان اخطات فمني ومن الشيطان

[alwafe19]

بيض الله وجهك يا بو جبر

فكره طيبه

[رعد المطر]

يعطيك العافيه وبيض الله وجهك